| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༢. ཀཱལཱ༹ཡསངྒཔཉྷོ
2. Kāḷāyasaṅgapañho
༢. ‘‘བྷནྟེ ནཱགསེན, ‘ཀཱལཱ༹ཡསསྶ 1 དྭེ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི དྭེ ཨངྒཱནི གཧེཏབྦཱནཱི’’ཏི ? ‘‘ཡཐཱ, མཧཱརཱཛ, ཀཱལཱ༹ཡསོ སུཔཱིཏོ 2 ཝམཏི 3, ཨེཝམེཝ ཁོ, མཧཱརཱཛ, ཡོགིནོ ཡོགཱཝཙརསྶ མཱནསཾ ཡོནིསོ མནསིཀཱརེན 4 ཨཔཱིཏཾ ཝམཏི། ཨིདཾ, མཧཱརཱཛ, ཀཱལཱ༹ཡསསྶ པཋམཾ ཨངྒཾ གཧེཏབྦཾ།
2. ‘‘Bhante nāgasena, ‘kāḷāyasassa 5 dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti ? ‘‘Yathā, mahārāja, kāḷāyaso supīto 6 vamati 7, evameva kho, mahārāja, yogino yogāvacarassa mānasaṃ yoniso manasikārena 8 apītaṃ vamati. Idaṃ, mahārāja, kāḷāyasassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཀཱལཱ༹ཡསོ སཀིཾ པཱིཏཾ ཨུདཀཾ ན ཝམཏི, ཨེཝམེཝ ཁོ, མཧཱརཱཛ , ཡོགིནཱ ཡོགཱཝཙརེན ཡོ སཀིཾ ཨུཔྤནྣོ པསཱདོ, ན པུན སོ ཝམིཏབྦོ ‘ཨུལཱ༹རོ སོ བྷགཝཱ སམྨཱསམྦུདྡྷོ, སྭཱཀྑཱཏོ དྷམྨོ, སུཔྤཊིཔནྣོ སངྒྷོ’ཏི། ‘རཱུཔཾ ཨནིཙྩཾ, ཝེདནཱ ཨནིཙྩཱ, སཉྙཱ ཨནིཙྩཱ, སངྑཱརཱ ཨནིཙྩཱ, ཝིཉྙཱཎཾ ཨནིཙྩནྟི ཡཾ སཀིཾ ཨུཔྤནྣཾ ཉཱཎཾ, ན པུན ཏཾ ཝམིཏབྦཾ། ཨིདཾ , མཧཱརཱཛ, ཀཱལཱ༹ཡསསྶ དུཏིཡཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, བྷགཝཏཱ དེཝཱཏིདེཝེན –
‘‘Puna caparaṃ, mahārāja, kāḷāyaso sakiṃ pītaṃ udakaṃ na vamati, evameva kho, mahārāja , yoginā yogāvacarena yo sakiṃ uppanno pasādo, na puna so vamitabbo ‘uḷāro so bhagavā sammāsambuddho, svākkhāto dhammo, suppaṭipanno saṅgho’ti. ‘Rūpaṃ aniccaṃ, vedanā aniccā, saññā aniccā, saṅkhārā aniccā, viññāṇaṃ aniccanti yaṃ sakiṃ uppannaṃ ñāṇaṃ, na puna taṃ vamitabbaṃ. Idaṃ , mahārāja, kāḷāyasassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena –
‘‘‘དསྶནམྷི པརིསོདྷིཏོ 9 ནརོ, ཨརིཡདྷམྨེ ནིཡཏོ ཝིསེསགཱུ།
‘‘‘Dassanamhi parisodhito 10 naro, ariyadhamme niyato visesagū;
ནཔྤཝེདྷཏི ཨནེཀབྷཱགསོ, སབྦསོ ཙ མུཁབྷཱཝམེཝ སོ’’’ཏི༎
Nappavedhati anekabhāgaso, sabbaso ca mukhabhāvameva so’’’ti.
ཀཱལཱ༹ཡསངྒཔཉྷོ དུཏིཡོ།
Kāḷāyasaṅgapañho dutiyo.
Footnotes:
