| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. காளிகோ³தா⁴புத்தப⁴த்³தி³யத்தே²ரஅபதா³னவண்ணனா
3. Kāḷigodhāputtabhaddiyattheraapadānavaṇṇanā
பது³முத்தரஸம்பு³த்³த⁴ந்திஆதி³கங் ஆயஸ்மதோ ப⁴த்³தி³யஸ்ஸ காளிகோ³தா⁴புத்தத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே விப⁴வஸம்பன்னே ஏகஸ்மிங் குலே நிப்³ப³த்தோ வுத்³தி⁴ப்பத்தோ புத்ததா³ரேஹி வட்³டி⁴தோ நக³ரவாஸினோ புஞ்ஞானி கரொந்தே தி³ஸ்வா ஸயம்பி புஞ்ஞானி காதுகாமோ பு³த்³த⁴ப்பமுக²ங் பி⁴க்கு²ஸங்க⁴ங் நிமந்தெத்வா தூ²லபடலிகாதி³அனேகானி மஹாரஹானி ஸயனானி பஞ்ஞாபெத்வா தத்த² நிஸின்னே ப⁴க³வதி ஸஸங்கே⁴ பணீதேனாஹாரேன போ⁴ஜெத்வா மஹாதா³னங் அதா³ஸி. ஸோ ஏவங் யாவதாயுகங் புஞ்ஞானி கத்வா தே³வமனுஸ்ஸேஸு உப⁴யஸம்பத்தியோ அனுப⁴வித்வா அபரபா⁴கே³ இமஸ்மிங் பு³த்³து⁴ப்பாதே³ காளிகோ³தா⁴ய நாம தே³வியா புத்தோ ஹுத்வா நிப்³ப³த்தி. ஸோ விஞ்ஞுதங் பத்தோ ஆரோஹபரிணாஹஹத்த²பாத³ரூபஸம்பத்தியா ப⁴த்³த³த்தா ச காளிகோ³தா⁴ய தே³வியா புத்தத்தா ச ப⁴த்³தி³யோ காளிகோ³தா⁴புத்தோதி பாகடோ. ஸத்த²ரி பஸீதி³த்வா மாதாபிதரோ ஆராதெ⁴த்வா பப்³ப³ஜித்வா நசிரஸ்ஸேவ அரஹா அஹோஸி.
Padumuttarasambuddhantiādikaṃ āyasmato bhaddiyassa kāḷigodhāputtattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle vibhavasampanne ekasmiṃ kule nibbatto vuddhippatto puttadārehi vaḍḍhito nagaravāsino puññāni karonte disvā sayampi puññāni kātukāmo buddhappamukhaṃ bhikkhusaṅghaṃ nimantetvā thūlapaṭalikādianekāni mahārahāni sayanāni paññāpetvā tattha nisinne bhagavati sasaṅghe paṇītenāhārena bhojetvā mahādānaṃ adāsi. So evaṃ yāvatāyukaṃ puññāni katvā devamanussesu ubhayasampattiyo anubhavitvā aparabhāge imasmiṃ buddhuppāde kāḷigodhāya nāma deviyā putto hutvā nibbatti. So viññutaṃ patto ārohapariṇāhahatthapādarūpasampattiyā bhaddattā ca kāḷigodhāya deviyā puttattā ca bhaddiyo kāḷigodhāputtoti pākaṭo. Satthari pasīditvā mātāpitaro ārādhetvā pabbajitvā nacirasseva arahā ahosi.
54. ஸோ அரஹா ஹுத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பது³முத்தரஸம்பு³த்³த⁴ந்திஆதி³மாஹ. தங் ஹெட்டா² வுத்தத்த²மேவ. மெத்தசித்தந்தி மிஜ்ஜதி ஸினேஹதி நந்த³தி ஸப்³ப³ஸத்தேதி மெத்தா, மெத்தாய ஸஹக³தங் சித்தங் மெத்தசித்தங், தங் யஸ்ஸ ப⁴க³வதோ அத்தீ²தி மெத்தசித்தோ, தங் மெத்தசித்தங். மஹாமுனிந்தி ஸகலபி⁴க்கூ²னங் மஹந்தத்தா மஹாமுனி, தங் பது³முத்தரங் ஸம்பு³த்³த⁴ந்தி ஸம்ப³ந்தோ⁴. ஜனதா ஸப்³பா³தி ஸப்³போ³ ஜனகாயோ, ஸப்³ப³னக³ரவாஸினோதி அத்தோ². ஸப்³ப³லோகக்³க³னாயகந்தி ஸகலலோகஸ்ஸ அக்³க³ங் ஸெட்ட²ங் நிப்³பா³னஸ்ஸ நயனதோ பாபனதோ நாயகங் பது³முத்தரஸம்பு³த்³த⁴ங் ஜனதா உபேதி ஸமீபங் க³ச்ச²தீதி ஸம்ப³ந்தோ⁴.
54. So arahā hutvā attano pubbakammaṃ saritvā somanassajāto pubbacaritāpadānaṃ pakāsento padumuttarasambuddhantiādimāha. Taṃ heṭṭhā vuttatthameva. Mettacittanti mijjati sinehati nandati sabbasatteti mettā, mettāya sahagataṃ cittaṃ mettacittaṃ, taṃ yassa bhagavato atthīti mettacitto, taṃ mettacittaṃ. Mahāmuninti sakalabhikkhūnaṃ mahantattā mahāmuni, taṃ padumuttaraṃ sambuddhanti sambandho. Janatā sabbāti sabbo janakāyo, sabbanagaravāsinoti attho. Sabbalokagganāyakanti sakalalokassa aggaṃ seṭṭhaṃ nibbānassa nayanato pāpanato nāyakaṃ padumuttarasambuddhaṃ janatā upeti samīpaṃ gacchatīti sambandho.
55. ஸத்துகஞ்ச ப³த்³த⁴கஞ்சாதி ப³த்³த⁴ஸத்துஅப³த்³த⁴ஸத்துஸங்கா²தங் ஆமிஸங். அத² வா ப⁴த்தபூபக²ஜ்ஜபோ⁴ஜ்ஜயாகு³ஆத³யோ யாவகாலிகத்தா ஆமிஸங் பானபோ⁴ஜனஞ்ச க³ஹெத்வா புஞ்ஞக்கெ²த்தே அனுத்தரே ஸத்து²னோ த³த³ந்தீதி ஸம்ப³ந்தோ⁴.
55.Sattukañca baddhakañcāti baddhasattuabaddhasattusaṅkhātaṃ āmisaṃ. Atha vā bhattapūpakhajjabhojjayāguādayo yāvakālikattā āmisaṃ pānabhojanañca gahetvā puññakkhette anuttare satthuno dadantīti sambandho.
58. ஆஸனங் பு³த்³த⁴யுத்தகந்தி பு³த்³த⁴யொக்³க³ங் பு³த்³தா⁴ரஹங் பு³த்³தா⁴னுச்ச²விகங் ஸத்தரதனமயங் ஆஸனந்தி அத்தோ². ஸேஸங் நயானுயோகே³ன ஸுவிஞ்ஞெய்யமேவாதி.
58.Āsanaṃ buddhayuttakanti buddhayoggaṃ buddhārahaṃ buddhānucchavikaṃ sattaratanamayaṃ āsananti attho. Sesaṃ nayānuyogena suviññeyyamevāti.
காளிகோ³தா⁴புத்தப⁴த்³தி³யத்தே²ரஅபதா³னவண்ணனா ஸமத்தா.
Kāḷigodhāputtabhaddiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. காளிகோ³தா⁴புத்தப⁴த்³தி³யத்தே²ரஅபதா³னங் • 3. Kāḷigodhāputtabhaddiyattheraapadānaṃ
