| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
3. කාළිගොධාපුත්‌තභද්‌දියත්‌ථෙරඅපදානවණ්‌ණනා
3. Kāḷigodhāputtabhaddiyattheraapadānavaṇṇanā
පදුමුත්‌තරසම්‌බුද්‌ධන්‌තිආදිකං ආයස්‌මතො භද්‌දියස්‌ස කාළිගොධාපුත්‌තත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො පදුමුත්‌තරස්‌ස භගවතො කාලෙ විභවසම්‌පන්‌නෙ එකස්‌මිං කුලෙ නිබ්‌බත්‌තො වුද්‌ධිප්‌පත්‌තො පුත්‌තදාරෙහි වඩ්‌ඪිතො නගරවාසිනො පුඤ්‌ඤානි කරොන්‌තෙ දිස්‌වා සයම්‌පි පුඤ්‌ඤානි කාතුකාමො බුද්‌ධප්‌පමුඛං භික්‌ඛුසඞ්‌ඝං නිමන්‌තෙත්‌වා ථූලපටලිකාදිඅනෙකානි මහාරහානි සයනානි පඤ්‌ඤාපෙත්‌වා තත්‌ථ නිසින්‌නෙ භගවති සසඞ්‌ඝෙ පණීතෙනාහාරෙන භොජෙත්‌වා මහාදානං අදාසි. සො එවං යාවතායුකං පුඤ්‌ඤානි කත්‌වා දෙවමනුස්‌සෙසු උභයසම්‌පත්‌තියො අනුභවිත්‌වා අපරභාගෙ ඉමස්‌මිං බුද්‌ධුප්‌පාදෙ කාළිගොධාය නාම දෙවියා පුත්‌තො හුත්‌වා නිබ්‌බත්‌ති. සො විඤ්‌ඤුතං පත්‌තො ආරොහපරිණාහහත්‌ථපාදරූපසම්‌පත්‌තියා භද්‌දත්‌තා ච කාළිගොධාය දෙවියා පුත්‌තත්‌තා ච භද්‌දියො කාළිගොධාපුත්‌තොති පාකටො. සත්‌ථරි පසීදිත්‌වා මාතාපිතරො ආරාධෙත්‌වා පබ්‌බජිත්‌වා නචිරස්‌සෙව අරහා අහොසි.
Padumuttarasambuddhantiādikaṃ āyasmato bhaddiyassa kāḷigodhāputtattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle vibhavasampanne ekasmiṃ kule nibbatto vuddhippatto puttadārehi vaḍḍhito nagaravāsino puññāni karonte disvā sayampi puññāni kātukāmo buddhappamukhaṃ bhikkhusaṅghaṃ nimantetvā thūlapaṭalikādianekāni mahārahāni sayanāni paññāpetvā tattha nisinne bhagavati sasaṅghe paṇītenāhārena bhojetvā mahādānaṃ adāsi. So evaṃ yāvatāyukaṃ puññāni katvā devamanussesu ubhayasampattiyo anubhavitvā aparabhāge imasmiṃ buddhuppāde kāḷigodhāya nāma deviyā putto hutvā nibbatti. So viññutaṃ patto ārohapariṇāhahatthapādarūpasampattiyā bhaddattā ca kāḷigodhāya deviyā puttattā ca bhaddiyo kāḷigodhāputtoti pākaṭo. Satthari pasīditvā mātāpitaro ārādhetvā pabbajitvā nacirasseva arahā ahosi.
54. සො අරහා හුත්‌වා අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො පදුමුත්‌තරසම්‌බුද්‌ධන්‌තිආදිමාහ. තං හෙට්‌ඨා වුත්‌තත්‌ථමෙව. මෙත්‌තචිත්‌තන්‌ති මිජ්‌ජති සිනෙහති නන්‌දති සබ්‌බසත්‌තෙති මෙත්‌තා, මෙත්‌තාය සහගතං චිත්‌තං මෙත්‌තචිත්‌තං, තං යස්‌ස භගවතො අත්‌ථීති මෙත්‌තචිත්‌තො, තං මෙත්‌තචිත්‌තං. මහාමුනින්‌ති සකලභික්‌ඛූනං මහන්‌තත්‌තා මහාමුනි, තං පදුමුත්‌තරං සම්‌බුද්‌ධන්‌ති සම්‌බන්‌ධො. ජනතා සබ්‌බාති සබ්‌බො ජනකායො, සබ්‌බනගරවාසිනොති අත්‌ථො. සබ්‌බලොකග්‌ගනායකන්‌ති සකලලොකස්‌ස අග්‌ගං සෙට්‌ඨං නිබ්‌බානස්‌ස නයනතො පාපනතො නායකං පදුමුත්‌තරසම්‌බුද්‌ධං ජනතා උපෙති සමීපං ගච්‌ඡතීති සම්‌බන්‌ධො.
54. So arahā hutvā attano pubbakammaṃ saritvā somanassajāto pubbacaritāpadānaṃ pakāsento padumuttarasambuddhantiādimāha. Taṃ heṭṭhā vuttatthameva. Mettacittanti mijjati sinehati nandati sabbasatteti mettā, mettāya sahagataṃ cittaṃ mettacittaṃ, taṃ yassa bhagavato atthīti mettacitto, taṃ mettacittaṃ. Mahāmuninti sakalabhikkhūnaṃ mahantattā mahāmuni, taṃ padumuttaraṃ sambuddhanti sambandho. Janatā sabbāti sabbo janakāyo, sabbanagaravāsinoti attho. Sabbalokagganāyakanti sakalalokassa aggaṃ seṭṭhaṃ nibbānassa nayanato pāpanato nāyakaṃ padumuttarasambuddhaṃ janatā upeti samīpaṃ gacchatīti sambandho.
55. සත්‌තුකඤ්‌ච බද්‌ධකඤ්‌චාති බද්‌ධසත්‌තුඅබද්‌ධසත්‌තුසඞ්‌ඛාතං ආමිසං. අථ වා භත්‌තපූපඛජ්‌ජභොජ්‌ජයාගුආදයො යාවකාලිකත්‌තා ආමිසං පානභොජනඤ්‌ච ගහෙත්‌වා පුඤ්‌ඤක්‌ඛෙත්‌තෙ අනුත්‌තරෙ සත්‌ථුනො දදන්‌තීති සම්‌බන්‌ධො.
55.Sattukañca baddhakañcāti baddhasattuabaddhasattusaṅkhātaṃ āmisaṃ. Atha vā bhattapūpakhajjabhojjayāguādayo yāvakālikattā āmisaṃ pānabhojanañca gahetvā puññakkhette anuttare satthuno dadantīti sambandho.
58. ආසනං බුද්‌ධයුත්‌තකන්‌ති බුද්‌ධයොග්‌ගං බුද්‌ධාරහං බුද්‌ධානුච්‌ඡවිකං සත්‌තරතනමයං ආසනන්‌ති අත්‌ථො. සෙසං නයානුයොගෙන සුවිඤ්‌ඤෙය්‍යමෙවාති.
58.Āsanaṃ buddhayuttakanti buddhayoggaṃ buddhārahaṃ buddhānucchavikaṃ sattaratanamayaṃ āsananti attho. Sesaṃ nayānuyogena suviññeyyamevāti.
කාළිගොධාපුත්‌තභද්‌දියත්‌ථෙරඅපදානවණ්‌ණනා සමත්‌තා.
Kāḷigodhāputtabhaddiyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 3. කාළිගොධාපුත්‌තභද්‌දියත්‌ථෙරඅපදානං • 3. Kāḷigodhāputtabhaddiyattheraapadānaṃ
