| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. කාළිගොධසුත්‌තං
9. Kāḷigodhasuttaṃ
1035. එකං සමයං භගවා සක්‌කෙසු විහරති කපිලවත්‌ථුස්‌මිං නිග්‍රොධාරාමෙ. අථ ඛො භගවා පුබ්‌බණ්‌හසමයං නිවාසෙත්‌වා පත්‌තචීවරමාදාය යෙන කාළිගොධාය සාකියානියා නිවෙසනං තෙනුපසඞ්‌කමි; උපසඞ්‌කමිත්‌වා පඤ්‌ඤත්‌තෙ ආසනෙ නිසීදි. අථ ඛො කාළිගොධා සාකියානී යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො කාළිගොධං සාකියානිං භගවා එතදවොච –
1035. Ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho bhagavā pubbaṇhasamayaṃ nivāsetvā pattacīvaramādāya yena kāḷigodhāya sākiyāniyā nivesanaṃ tenupasaṅkami; upasaṅkamitvā paññatte āsane nisīdi. Atha kho kāḷigodhā sākiyānī yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho kāḷigodhaṃ sākiyāniṃ bhagavā etadavoca –
‘‘චතූහි ඛො, ගොධෙ, ධම්‌මෙහි සමන්‌නාගතා අරියසාවිකා සොතාපන්‌නා හොති අවිනිපාතධම්‌මා නියතා සම්‌බොධිපරායණා. කතමෙහි චතූහි? ඉධ, ගොධෙ, අරියසාවිකා බුද්‌ධෙ අවෙච්‌චප්‌පසාදෙන සමන්‌නාගතා හොති – ඉතිපි සො භගවා…පෙ.… සත්‌ථා දෙවමනුස්‌සානං බුද්‌ධො භගවාති. ධම්‌මෙ…පෙ.… සඞ්‌ඝෙ…පෙ.… විගතමලමච්‌ඡෙරෙන චෙතසා අගාරං අජ්‌ඣාවසති මුත්‌තචාගා පයතපාණිනී 1 වොස්‌සග්‌ගරතා යාචයොගා දානසංවිභාගරතා. ඉමෙහි ඛො, ගොධෙ, චතූහි ධම්‌මෙහි සමන්‌නාගතා අරියසාවිකා සොතාපන්‌නා හොති අවිනිපාතධම්‌මා නියතා සම්‌බොධිපරායණා’’ති.
‘‘Catūhi kho, godhe, dhammehi samannāgatā ariyasāvikā sotāpannā hoti avinipātadhammā niyatā sambodhiparāyaṇā. Katamehi catūhi? Idha, godhe, ariyasāvikā buddhe aveccappasādena samannāgatā hoti – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… vigatamalamaccherena cetasā agāraṃ ajjhāvasati muttacāgā payatapāṇinī 2 vossaggaratā yācayogā dānasaṃvibhāgaratā. Imehi kho, godhe, catūhi dhammehi samannāgatā ariyasāvikā sotāpannā hoti avinipātadhammā niyatā sambodhiparāyaṇā’’ti.
‘‘යානිමානි, භන්‌තෙ, භගවතා චත්‌තාරි සොතාපත්‌තියඞ්‌ගානි දෙසිතානි, සංවිජ්‌ජන්‌තෙ තෙ ධම්‌මා මයි, අහඤ්‌ච තෙසු ධම්‌මෙසු සන්‌දිස්‌සාමි. අහඤ්‌හි, භන්‌තෙ, බුද්‌ධෙ අවෙච්‌චප්‌පසාදෙන සමන්‌නාගතා – ඉතිපි සො භගවා…පෙ.… සත්‌ථා දෙවමනුස්‌සානං බුද්‌ධො භගවාති. ධම්‌මෙ…පෙ.… සඞ්‌ඝෙ…පෙ.… යං ඛො පන කිඤ්‌චි කුලෙ දෙය්‍යධම්‌මං සබ්‌බං තං අප්‌පටිවිභත්‌තං සීලවන්‌තෙහි කල්‍යාණධම්‌මෙහී’’ති. ‘‘ලාභා තෙ, ගොධෙ, සුලද්‌ධං තෙ, ගොධෙ! සොතාපත්‌තිඵලං තයා, ගොධෙ, බ්‍යාකත’’න්‌ති. නවමං.
‘‘Yānimāni, bhante, bhagavatā cattāri sotāpattiyaṅgāni desitāni, saṃvijjante te dhammā mayi, ahañca tesu dhammesu sandissāmi. Ahañhi, bhante, buddhe aveccappasādena samannāgatā – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… yaṃ kho pana kiñci kule deyyadhammaṃ sabbaṃ taṃ appaṭivibhattaṃ sīlavantehi kalyāṇadhammehī’’ti. ‘‘Lābhā te, godhe, suladdhaṃ te, godhe! Sotāpattiphalaṃ tayā, godhe, byākata’’nti. Navamaṃ.
Footnotes:
