| Library / Tipiṭaka / д̇ибидага • Tipiṭaka / винаяасан̇г̇аха-адтагат̇аа • Vinayasaṅgaha-aṭṭhakathā |
18. гаалигавинижчаяагат̇аа
18. Kālikavinicchayakathā
89. гаалигааниби жад̇д̇аарийд̇и зд̇т̇а (баажи. адта. 255-256) яаавагаалигам̣ яаамагаалигам̣ сад̇д̇аахагаалигам̣ яааваж̇ийвиганд̇и имаани жад̇д̇аари гаалигаани взд̣̇ид̇аб̣б̣аани. д̇ад̇т̇а бурзбхад̇д̇ам̣ бадиг̇г̇ахзд̇ваа барибхун̃ж̇ид̇аб̣б̣ам̣ яам̣ гин̃жи каад̣̇анийяабхож̇анийяам̣ яаава маж̇жханхигасан̇кад̇о гаало, д̇аава барибхун̃ж̇ид̇аб̣б̣ад̇о яаавагаалигам̣. сад̣̇д̇хим̣ ануломабаанзхи адтавид̇хам̣ баанам̣ яаава рад̇д̇ияаа бажчимаяаамасан̇каад̇о яаамо, д̇аава барибхун̃ж̇ид̇аб̣б̣ад̇о яаамо гаало ассаад̇и яаамагаалигам̣. саббиаад̣̇и бан̃жавид̇хам̣ бхзсаж̇ж̇ам̣ бадиг̇г̇ахзд̇ваа сад̇д̇аахам̣ нид̇хзд̇аб̣б̣ад̇о сад̇д̇аахо гаало ассаад̇и сад̇д̇аахагаалигам̣. табзд̇ваа уд̣̇агам̣ авасзсам̣ саб̣б̣амби бадиг̇г̇ахид̇ам̣ яааваж̇ийвам̣ барихарид̇ваа сад̇и бажжаяз барибхун̃ж̇ид̇аб̣б̣ад̇о яааваж̇ийвиганд̇и вужжад̇и.
89.Kālikānipicattārīti ettha (pāci. aṭṭha. 255-256) yāvakālikaṃ yāmakālikaṃ sattāhakālikaṃ yāvajīvikanti imāni cattāri kālikāni veditabbāni. Tattha purebhattaṃ paṭiggahetvā paribhuñjitabbaṃ yaṃ kiñci khādanīyabhojanīyaṃ yāva majjhanhikasaṅkhato kālo, tāva paribhuñjitabbato yāvakālikaṃ. Saddhiṃ anulomapānehi aṭṭhavidhaṃ pānaṃ yāva rattiyā pacchimayāmasaṅkhāto yāmo, tāva paribhuñjitabbato yāmo kālo assāti yāmakālikaṃ. Sappiādi pañcavidhaṃ bhesajjaṃ paṭiggahetvā sattāhaṃ nidhetabbato sattāho kālo assāti sattāhakālikaṃ. Ṭhapetvā udakaṃ avasesaṃ sabbampi paṭiggahitaṃ yāvajīvaṃ pariharitvā sati paccaye paribhuñjitabbato yāvajīvikanti vuccati.
90. д̇ад̇т̇а яаавагаалигзсу бхож̇анийяам̣ наама од̣̇ано гуммаасо сад̇д̇у мажчо мам̣санд̇и. бан̃жа бхож̇анаани яаамагаалигам̣ сад̇д̇аахагаалигам̣ яааваж̇ийвиган̃жа табзд̇ваа авасзсам̣ каад̣̇анийяам̣ наама. зд̇т̇а (баажи. адта. 248-9) бана яам̣ д̇аава сагкалимод̣̇агаад̣̇и буб̣б̣ан̣н̣аабаран̣н̣амаяам̣ каад̣̇анийяам̣, д̇ад̇т̇а вад̇д̇аб̣б̣амзва над̇т̇и. яамби ванамуулаад̣̇иббабхзд̣̇ам̣ аамисаг̇ад̇игам̣ ход̇и. сзяяат̇ид̣̇ам̣ – муулакаад̣̇анийяам̣ ганд̣̇акаад̣̇анийяам̣ мул̣аалакаад̣̇анийяам̣ мад̇т̇агакаад̣̇анийяам̣ канд̇хакаад̣̇анийяам̣ д̇ажакаад̣̇анийяам̣ бад̇д̇акаад̣̇анийяам̣ бубпакаад̣̇анийяам̣ палакаад̣̇анийяам̣ адтикаад̣̇анийяам̣ бидтакаад̣̇анийяам̣ нияяаасакаад̣̇анийяанд̇и, ид̣̇амби каад̣̇анийяасан̇кяамзва г̇ажчад̇и.
90. Tattha yāvakālikesu bhojanīyaṃ nāma odano kummāso sattu maccho maṃsanti. Pañca bhojanāni yāmakālikaṃ sattāhakālikaṃ yāvajīvikañca ṭhapetvā avasesaṃ khādanīyaṃ nāma. Ettha (pāci. aṭṭha. 248-9) pana yaṃ tāva sakkhalimodakādi pubbaṇṇāparaṇṇamayaṃ khādanīyaṃ, tattha vattabbameva natthi. Yampi vanamūlādippabhedaṃ āmisagatikaṃ hoti. Seyyathidaṃ – mūlakhādanīyaṃ kandakhādanīyaṃ muḷālakhādanīyaṃ matthakakhādanīyaṃ khandhakhādanīyaṃ tacakhādanīyaṃ pattakhādanīyaṃ pupphakhādanīyaṃ phalakhādanīyaṃ aṭṭhikhādanīyaṃ piṭṭhakhādanīyaṃ niyyāsakhādanīyanti, idampi khādanīyasaṅkhyameva gacchati.
д̇ад̇т̇а бана аамисаг̇ад̇игасаллагкан̣ад̇т̇ам̣ ид̣̇ам̣ мукамад̇д̇анид̣̇ассанам̣ – муулакаад̣̇анийяз д̇аава муулагамуулам̣ каарагамуулам̣ жажжумуулам̣ д̇амб̣агамуулам̣ д̇ан̣д̣улзяяагамуулам̣ вад̇т̇улзяяагамуулам̣ важ̇агалимуулам̣ ж̇аж̇жхаримууланд̇и звамаад̣̇ийни суубзяяабан̣н̣амуулаани аамисаг̇ад̇игаани. зд̇т̇а жа важ̇агалимуулз ж̇арадтам̣ чинд̣̇ид̇ваа чад̣д̣знд̇и, д̇ам̣ яааваж̇ийвигам̣ ход̇и. ан̃н̃амби зваруубам̣ зд̇знзва наязна взд̣̇ид̇аб̣б̣ам̣. муулагакаарагаж̇аж̇жхаримуулаанам̣ бана ж̇арадтааниби аамисаг̇ад̇игаанзваад̇и вуд̇д̇ам̣. яаани бана баал̣ияам̣ –
Tattha pana āmisagatikasallakkhaṇatthaṃ idaṃ mukhamattanidassanaṃ – mūlakhādanīye tāva mūlakamūlaṃ khārakamūlaṃ caccumūlaṃ tambakamūlaṃ taṇḍuleyyakamūlaṃ vatthuleyyakamūlaṃ vajakalimūlaṃ jajjharimūlanti evamādīni sūpeyyapaṇṇamūlāni āmisagatikāni. Ettha ca vajakalimūle jaraṭṭhaṃ chinditvā chaḍḍenti, taṃ yāvajīvikaṃ hoti. Aññampi evarūpaṃ eteneva nayena veditabbaṃ. Mūlakakhārakajajjharimūlānaṃ pana jaraṭṭhānipi āmisagatikānevāti vuttaṃ. Yāni pana pāḷiyaṃ –
‘‘ануж̇аанаами, бхигкавз, муулаани бхзсаж̇ж̇аани халид̣̇д̣̇им̣ син̇г̇ивзрам̣ важам̣ важад̇д̇ам̣ ад̇ивисам̣ гадугарохин̣им̣ усийрам̣ бхад̣̇д̣̇амуд̇д̇агам̣, яаани ваа банан̃н̃ааниби ад̇т̇и муулаани бхзсаж̇ж̇аани нзва каад̣̇анийяз каад̣̇анийяад̇т̇ам̣ паранд̇и, на бхож̇анийяз бхож̇анийяад̇т̇ам̣ паранд̇ий’’д̇и (махаава. 263) –
‘‘Anujānāmi, bhikkhave, mūlāni bhesajjāni haliddiṃ siṅgiveraṃ vacaṃ vacattaṃ ativisaṃ kaṭukarohiṇiṃ usīraṃ bhaddamuttakaṃ, yāni vā panaññānipi atthi mūlāni bhesajjāni neva khādanīye khādanīyatthaṃ pharanti, na bhojanīye bhojanīyatthaṃ pharantī’’ti (mahāva. 263) –
вуд̇д̇аани, д̇аани яааваж̇ийвигаани. д̇зсам̣ жуул̣абан̃жамуулам̣ махаабан̃жамууланд̇иаад̣̇инаа наязна г̇ан̣ияамаанаанам̣ г̇ан̣анааяа анд̇о над̇т̇и, каад̣̇анийяад̇т̇ан̃жа бхож̇анийяад̇т̇ан̃жа апаран̣абхаавоязва банзд̇зсам̣ лагкан̣ам̣. д̇асмаа яам̣ гин̃жи муулам̣ д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ам̣ бхож̇анийяад̇т̇ан̃жа парад̇и, д̇ам̣ яаавагаалигам̣, ид̇арам̣ яааваж̇ийвиганд̇и взд̣̇ид̇аб̣б̣ам̣ . суб̣ахум̣ вад̇вааби хи имасмим̣язва лагкан̣з таад̇аб̣б̣ам̣. наамасан̃н̃аасу бана вужжамаанаасу д̇ам̣ д̇ам̣ наамам̣ аж̇аананд̇аанам̣ саммохоязва ход̇и, д̇асмаа наамасан̃н̃ааяа аад̣̇арам̣ агад̇ваа лагкан̣амзва д̣̇ассид̇ам̣. яат̇аа жа муулз, звам̣ ганд̣̇аад̣̇ийсуби лагкан̣ам̣ д̣̇ассаяиссаама, д̇ассзва васзна винижчаяо взд̣̇ид̇аб̣б̣о. яан̃жа д̇ам̣ баал̣ияам̣ халид̣̇д̣̇аад̣̇и адтавид̇хам̣ вуд̇д̇ам̣, д̇асса канд̇хад̇ажабубпапалаад̣̇и саб̣б̣ам̣ яааваж̇ийвиганд̇и вуд̇д̇ам̣.
Vuttāni, tāni yāvajīvikāni. Tesaṃ cūḷapañcamūlaṃ mahāpañcamūlantiādinā nayena gaṇiyamānānaṃ gaṇanāya anto natthi, khādanīyatthañca bhojanīyatthañca apharaṇabhāvoyeva panetesaṃ lakkhaṇaṃ. Tasmā yaṃ kiñci mūlaṃ tesu tesu janapadesu pakatiāhāravasena manussānaṃ khādanīyatthaṃ bhojanīyatthañca pharati, taṃ yāvakālikaṃ, itaraṃ yāvajīvikanti veditabbaṃ . Subahuṃ vatvāpi hi imasmiṃyeva lakkhaṇe ṭhātabbaṃ. Nāmasaññāsu pana vuccamānāsu taṃ taṃ nāmaṃ ajānantānaṃ sammohoyeva hoti, tasmā nāmasaññāya ādaraṃ akatvā lakkhaṇameva dassitaṃ. Yathā ca mūle, evaṃ kandādīsupi lakkhaṇaṃ dassayissāma, tasseva vasena vinicchayo veditabbo. Yañca taṃ pāḷiyaṃ haliddādi aṭṭhavidhaṃ vuttaṃ, tassa khandhatacapupphaphalādi sabbaṃ yāvajīvikanti vuttaṃ.
ганд̣̇акаад̣̇анийяз д̣̇увид̇хо ганд̣̇о д̣̇ийгхо жа бхисагим̣сугаганд̣̇аад̣̇и, ваддо жа уббалагасзругаганд̣̇аад̣̇и, яам̣ г̇ан̣тийд̇иби вад̣̇анд̇и. д̇ад̇т̇а саб̣б̣зсам̣ ганд̣̇аанам̣ ж̇ин̣н̣аж̇арадтадтаанан̃жа чалли жа сукумамуулаани жа яааваж̇ийвигаани, д̇арун̣о бана сукакаад̣̇анийяо саалагаляаан̣ибод̇агаганд̣̇о гим̣сугабод̇агаганд̣̇о амб̣аадагаганд̣̇о гзд̇агаганд̣̇о маалуваганд̣̇о бхисасан̇каад̇о бад̣̇умабун̣д̣арийгаганд̣̇о бин̣д̣аалумасаалуаад̣̇аяо жа кийраваллиганд̣̇о аалуваганд̣̇о сиг̇г̇уганд̣̇о д̇аалаганд̣̇о нийлуббаларад̇д̇уббалагумуд̣̇асог̇анд̇хигаанам̣ ганд̣̇аа гад̣̇алиганд̣̇о взл̣уганд̣̇о гасзругаганд̣̇од̇и звамаад̣̇аяо д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ан̃жа бхож̇анийяад̇т̇ан̃жа паран̣агаганд̣̇аа яаавагаалигаа. кийраваллиганд̣̇о ад̇ход̇о яааваж̇ийвиго, д̇ход̇о яаавагаалиго. кийрагааголиж̇ийвигаусабхагаласун̣аад̣̇иганд̣̇аа бана яааваж̇ийвигаа. д̇з баал̣ияам̣ ‘‘яаани ваа банан̃н̃ааниби ад̇т̇и муулаани бхзсаж̇ж̇ааний’’д̇и звам̣ (махаава. 263) муулабхзсаж̇ж̇асан̇г̇ахзнзва сан̇г̇ахид̇аа.
Kandakhādanīye duvidho kando dīgho ca bhisakiṃsukakandādi, vaṭṭo ca uppalakaserukakandādi, yaṃ gaṇṭhītipi vadanti. Tattha sabbesaṃ kandānaṃ jiṇṇajaraṭṭhaṭṭhānañca challi ca sukhumamūlāni ca yāvajīvikāni, taruṇo pana sukhakhādanīyo sālakalyāṇipotakakando kiṃsukapotakakando ambāṭakakando ketakakando māluvakando bhisasaṅkhāto padumapuṇḍarīkakando piṇḍālumasāluādayo ca khīravallikando āluvakando siggukando tālakando nīluppalarattuppalakumudasogandhikānaṃ kandā kadalikando veḷukando kaserukakandoti evamādayo tesu tesu janapadesu pakatiāhāravasena manussānaṃ khādanīyatthañca bhojanīyatthañca pharaṇakakandā yāvakālikā. Khīravallikando adhoto yāvajīviko, dhoto yāvakāliko. Khīrakākolijīvikausabhakalasuṇādikandā pana yāvajīvikā. Te pāḷiyaṃ ‘‘yāni vā panaññānipi atthi mūlāni bhesajjānī’’ti evaṃ (mahāva. 263) mūlabhesajjasaṅgaheneva saṅgahitā.
мул̣аалакаад̣̇анийяз бад̣̇умамул̣аалам̣ бун̣д̣арийгамул̣аалам̣ мууласад̣̇исам̣язва. зрагамул̣аалам̣ ганд̣̇уламул̣ааланд̇и звамаад̣̇и д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ам̣ бхож̇анийяад̇т̇ан̃жа паран̣агамул̣аалам̣ яаавагаалигам̣, халид̣̇д̣̇исин̇г̇ивзрамагажижад̇урассаваллигзд̇агад̇аалахинд̇аалагунд̇ааланаал̣игзрабууг̇аругкаад̣̇имул̣аалам̣ бана яааваж̇ийвигам̣. д̇ам̣ саб̣б̣амби баал̣ияам̣ ‘‘яаани ваа банан̃н̃ааниби ад̇т̇и муулаани бхзсаж̇ж̇ааний’’д̇и звам̣ муулабхзсаж̇ж̇асан̇г̇ахзнзва сан̇г̇ахид̇ам̣.
Muḷālakhādanīye padumamuḷālaṃ puṇḍarīkamuḷālaṃ mūlasadisaṃyeva. Erakamuḷālaṃ kandulamuḷālanti evamādi tesu tesu janapadesu pakatiāhāravasena manussānaṃ khādanīyatthaṃ bhojanīyatthañca pharaṇakamuḷālaṃ yāvakālikaṃ, haliddisiṅgiveramakacicaturassavalliketakatālahintālakuntālanāḷikerapūgarukkhādimuḷālaṃ pana yāvajīvikaṃ. Taṃ sabbampi pāḷiyaṃ ‘‘yāni vā panaññānipi atthi mūlāni bhesajjānī’’ti evaṃ mūlabhesajjasaṅgaheneva saṅgahitaṃ.
мад̇т̇агакаад̣̇анийяз д̇аалахинд̇аалагунд̇аалагзд̇аганаал̣игзрабууг̇аругкакаж̇ж̇ууривзд̇д̇азрагагад̣̇алийнам̣ гал̣ийрасан̇каад̇аа мад̇т̇агаа, взн̣угал̣ийро нал̣агал̣ийро ужчугал̣ийро муулагагал̣ийро саасабагал̣ийро сад̇ааваригал̣ийро сад̇д̇аннам̣ д̇хан̃н̃аанам̣ гал̣ийраад̇и звамаад̣̇и д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ам̣ бхож̇анийяад̇т̇ан̃жа паран̣аго ругкаваллиаад̣̇ийнам̣ мад̇т̇аго яаавагаалиго, халид̣̇д̣̇исин̇г̇ивзраважамагажиласун̣аанам̣ гал̣ийраа, д̇аалахинд̇аалагунд̇ааланаал̣игзрагал̣ийраанан̃жа чинд̣̇ид̇ваа баад̇ид̇о ж̇арадтаб̣унд̣̇о яааваж̇ийвиго.
Matthakakhādanīye tālahintālakuntālaketakanāḷikerapūgarukkhakhajjūrivettaerakakadalīnaṃ kaḷīrasaṅkhātā matthakā, veṇukaḷīro naḷakaḷīro ucchukaḷīro mūlakakaḷīro sāsapakaḷīro satāvarikaḷīro sattannaṃ dhaññānaṃ kaḷīrāti evamādi tesu tesu janapadesu pakatiāhāravasena manussānaṃ khādanīyatthaṃ bhojanīyatthañca pharaṇako rukkhavalliādīnaṃ matthako yāvakāliko, haliddisiṅgiveravacamakacilasuṇānaṃ kaḷīrā, tālahintālakuntālanāḷikerakaḷīrānañca chinditvā pātito jaraṭṭhabundo yāvajīviko.
канд̇хакаад̣̇анийяз анд̇обат̇авийг̇ад̇о саалагаляаан̣ийканд̇хо ужчуканд̇хо нийлуббаларад̇д̇уббалагумуд̣̇асог̇анд̇хигаанам̣ д̣̇ан̣д̣агаканд̇хаад̇и звамаад̣̇и д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ам̣ бхож̇анийяад̇т̇ан̃жа паран̣аго канд̇хо яаавагаалиго, уббалаж̇аад̇ийнам̣ бан̣н̣ад̣̇ан̣д̣аго бад̣̇умаж̇аад̇ийнам̣ саб̣б̣оби д̣̇ан̣д̣аго гаравинд̣̇ад̣̇ан̣д̣аад̣̇аяо жа авасзсасаб̣б̣аканд̇хаа яааваж̇ийвигаа.
Khandhakhādanīye antopathavīgato sālakalyāṇīkhandho ucchukhandho nīluppalarattuppalakumudasogandhikānaṃ daṇḍakakhandhāti evamādi tesu tesu janapadesu pakatiāhāravasena manussānaṃ khādanīyatthaṃ bhojanīyatthañca pharaṇako khandho yāvakāliko, uppalajātīnaṃ paṇṇadaṇḍako padumajātīnaṃ sabbopi daṇḍako karavindadaṇḍādayo ca avasesasabbakhandhā yāvajīvikā.
д̇ажакаад̣̇анийяз ужчуд̇ажова зго яаавагаалиго, соби сарасо, сзсо саб̣б̣о яааваж̇ийвиго. д̇зсам̣ бана мад̇т̇агаканд̇хад̇ажаанам̣ д̇ин̣н̣амби баал̣ияам̣ гасаавабхзсаж̇ж̇зна сан̇г̇ахо взд̣̇ид̇аб̣б̣о. вуд̇д̇ан̃хзд̇ам̣ –
Tacakhādanīye ucchutacova eko yāvakāliko, sopi saraso, seso sabbo yāvajīviko. Tesaṃ pana matthakakhandhatacānaṃ tiṇṇampi pāḷiyaṃ kasāvabhesajjena saṅgaho veditabbo. Vuttañhetaṃ –
‘‘ануж̇аанаами, бхигкавз, гасааваани бхзсаж̇ж̇аани нимб̣агасаавам̣ гудаж̇агасаавам̣ бадолагасаавам̣ паг̇г̇авагасаавам̣ над̇д̇амаалагасаавам̣, яаани ваа банан̃н̃ааниби ад̇т̇и гасааваани бхзсаж̇ж̇аани нзва каад̣̇анийяз каад̣̇анийяад̇т̇ам̣ паранд̇и, на бхож̇анийяз бхож̇анийяад̇т̇ам̣ паранд̇ий’’д̇и (махаава. 263).
‘‘Anujānāmi, bhikkhave, kasāvāni bhesajjāni nimbakasāvaṃ kuṭajakasāvaṃ paṭolakasāvaṃ phaggavakasāvaṃ nattamālakasāvaṃ, yāni vā panaññānipi atthi kasāvāni bhesajjāni neva khādanīye khādanīyatthaṃ pharanti, na bhojanīye bhojanīyatthaṃ pharantī’’ti (mahāva. 263).
зд̇т̇а хи зд̇зсамби сан̇г̇ахо сиж̇жхад̇и. вуд̇д̇агасааваани жа саб̣б̣агаббияаанийд̇и взд̣̇ид̇аб̣б̣аани.
Ettha hi etesampi saṅgaho sijjhati. Vuttakasāvāni ca sabbakappiyānīti veditabbāni.
бад̇д̇акаад̣̇анийяз муулагам̣ каараго жажжу д̇амб̣аго д̇ан̣д̣улзяяаго бабуннааг̇о вад̇т̇улзяяаго важ̇агали ж̇аж̇жхари сзллу сиг̇г̇у гаасамад̣̇д̣̇аго уммаажийнамуг̇г̇о маасо рааж̇амаасо табзд̇ваа махаанибпаавам̣ авасзсанибпааво аг̇г̇имант̇о сунисаннаго сзд̇аваран̣о наал̣игаа бхуумияам̣ ж̇аад̇алон̣ийд̇и зд̇зсам̣ бад̇д̇аани, ан̃н̃аани жа зваруубаани д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ан̃жа бхож̇анийяад̇т̇ан̃жа паран̣агаани бад̇д̇аани згам̣сзна яаавагаалигаани , яаа банан̃н̃аа махаанакабидтимад̇д̇абан̣н̣аа лон̣иругкз жа г̇ажчз жа аарохад̇и, д̇ассаа бад̇д̇ам̣ яааваж̇ийвигам̣. б̣рахмибад̇д̇ан̃жа яаавагаалиганд̇и д̣̇ийбаваасино вад̣̇анд̇и. амб̣абаллавам̣ яаавагаалигам̣, асогабаллавам̣ бана яааваж̇ийвигам̣. яаани жан̃н̃аани баал̣ияам̣ –
Pattakhādanīye mūlakaṃ khārako caccu tambako taṇḍuleyyako papunnāgo vatthuleyyako vajakali jajjhari sellu siggu kāsamaddako ummācīnamuggo māso rājamāso ṭhapetvā mahānipphāvaṃ avasesanipphāvo aggimantho sunisannako setavaraṇo nāḷikā bhūmiyaṃ jātaloṇīti etesaṃ pattāni, aññāni ca evarūpāni tesu tesu janapadesu pakatiāhāravasena manussānaṃ khādanīyatthañca bhojanīyatthañca pharaṇakāni pattāni ekaṃsena yāvakālikāni , yā panaññā mahānakhapiṭṭhimattapaṇṇā loṇirukkhe ca gacche ca ārohati, tassā pattaṃ yāvajīvikaṃ. Brahmipattañca yāvakālikanti dīpavāsino vadanti. Ambapallavaṃ yāvakālikaṃ, asokapallavaṃ pana yāvajīvikaṃ. Yāni caññāni pāḷiyaṃ –
‘‘ануж̇аанаами, бхигкавз, бан̣н̣аани бхзсаж̇ж̇аани нимб̣абан̣н̣ам̣ гудаж̇абан̣н̣ам̣ бадолабан̣н̣ам̣ суласибан̣н̣ам̣ габбаасабан̣н̣ам̣, яаани ваа банан̃н̃ааниби ад̇т̇и бан̣н̣аани бхзсаж̇ж̇аани нзва каад̣̇анийяз каад̣̇анийяад̇т̇ам̣ паранд̇и, на бхож̇анийяз бхож̇анийяад̇т̇ам̣ паранд̇ий’’д̇и (махаава. 263) –
‘‘Anujānāmi, bhikkhave, paṇṇāni bhesajjāni nimbapaṇṇaṃ kuṭajapaṇṇaṃ paṭolapaṇṇaṃ sulasipaṇṇaṃ kappāsapaṇṇaṃ, yāni vā panaññānipi atthi paṇṇāni bhesajjāni neva khādanīye khādanīyatthaṃ pharanti, na bhojanīye bhojanīyatthaṃ pharantī’’ti (mahāva. 263) –
вуд̇д̇аани, д̇аани яааваж̇ийвигаани. на гзвалан̃жа бан̣н̣аани, д̇зсам̣ бубпапалааниби. яааваж̇ийвигабан̣н̣аанам̣ бана паг̇г̇авабан̣н̣ам̣ аж̇ж̇угабан̣н̣ам̣ пан̣иж̇ж̇агабан̣н̣ам̣ д̇амб̣уулабан̣н̣ам̣ бад̣̇уминибан̣н̣анд̇и звам̣ г̇ан̣анавасзна анд̇о над̇т̇и.
Vuttāni, tāni yāvajīvikāni. Na kevalañca paṇṇāni, tesaṃ pupphaphalānipi. Yāvajīvikapaṇṇānaṃ pana phaggavapaṇṇaṃ ajjukapaṇṇaṃ phaṇijjakapaṇṇaṃ tambūlapaṇṇaṃ paduminipaṇṇanti evaṃ gaṇanavasena anto natthi.
бубпакаад̣̇анийяз муулагабубпам̣ каарагабубпам̣ жажжубубпам̣ д̇амб̣агабубпам̣ важ̇агалибубпам̣ ж̇аж̇жхарибубпам̣ жуул̣анибпаавабубпам̣ махаанибпаавабубпам̣ гасзругабубпам̣ наал̣игзрад̇аалагзд̇агаанам̣ д̇арун̣абубпаани сзд̇аваран̣абубпам̣ сиг̇г̇убубпам̣ уббалабад̣̇умаж̇аад̇игаанам̣ бубпаанам̣ ган̣н̣игаамад̇д̇ам̣ аг̇анд̇хибубпам̣ гарийрабубпам̣ ж̇ийванд̇ий бубпанд̇и звамаад̣̇и д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ам̣ бхож̇анийяад̇т̇ан̃жа паран̣абубпам̣ яаавагаалигам̣, асогаб̣агулагуяяагабуннааг̇ажамбагаж̇аад̇игаравийраган̣игаарагунд̣̇анавамаалигамаллигаад̣̇ийнам̣ бана бубпам̣ яааваж̇ийвигам̣, д̇асса г̇ан̣анааяа анд̇о над̇т̇и. баал̣ияам̣ банасса гасаавабхзсаж̇ж̇зна сан̇г̇ахо взд̣̇ид̇аб̣б̣о.
Pupphakhādanīye mūlakapupphaṃ khārakapupphaṃ caccupupphaṃ tambakapupphaṃ vajakalipupphaṃ jajjharipupphaṃ cūḷanipphāvapupphaṃ mahānipphāvapupphaṃ kaserukapupphaṃ nāḷikeratālaketakānaṃ taruṇapupphāni setavaraṇapupphaṃ siggupupphaṃ uppalapadumajātikānaṃ pupphānaṃ kaṇṇikāmattaṃ agandhipupphaṃ karīrapupphaṃ jīvantī pupphanti evamādi tesu tesu janapadesu pakatiāhāravasena manussānaṃ khādanīyatthaṃ bhojanīyatthañca pharaṇapupphaṃ yāvakālikaṃ, asokabakulakuyyakapunnāgacampakajātikaravīrakaṇikārakundanavamālikamallikādīnaṃ pana pupphaṃ yāvajīvikaṃ, tassa gaṇanāya anto natthi. Pāḷiyaṃ panassa kasāvabhesajjena saṅgaho veditabbo.
палакаад̣̇анийяз банасалаб̣уж̇ад̇ааланаал̣игзраамб̣аж̇амб̣уамб̣аадагад̇инд̇ин̣игамаад̇улун̇г̇агабид̇т̇алааб̣угумбхан̣д̣абуссапалад̇имб̣аруусагад̇ибусаваад̇ин̇г̇ан̣ажожаможамад̇хугаад̣̇ийнам̣ палаани, яаани логз д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ам̣ бхож̇анийяад̇т̇ан̃жа паранд̇и, саб̣б̣аани д̇аани яаавагаалигаани, наамаг̇ан̣анавасзна д̇зсам̣ на саггаа барияанд̇ам̣ д̣̇ассзд̇ум̣. яаани бана баал̣ияам̣ –
Phalakhādanīye panasalabujatālanāḷikeraambajambuambāṭakatintiṇikamātuluṅgakapitthalābukumbhaṇḍapussaphalatimbarūsakatipusavātiṅgaṇacocamocamadhukādīnaṃ phalāni, yāni loke tesu tesu janapadesu pakatiāhāravasena manussānaṃ khādanīyatthaṃ bhojanīyatthañca pharanti, sabbāni tāni yāvakālikāni, nāmagaṇanavasena tesaṃ na sakkā pariyantaṃ dassetuṃ. Yāni pana pāḷiyaṃ –
‘‘ануж̇аанаами, бхигкавз, палаани бхзсаж̇ж̇аани б̣илан̇г̇ам̣ биббалим̣ марийжам̣ харийд̇агам̣ вибхийд̇агам̣ аамалагам̣ г̇одтапалам̣, яаани ваа банан̃н̃ааниби ад̇т̇и палаани бхзсаж̇ж̇аани нзва каад̣̇анийяз каад̣̇анийяад̇т̇ам̣ паранд̇и, на бхож̇анийяз бхож̇анийяад̇т̇ам̣ паранд̇ий’’д̇и (махаава. 263) –
‘‘Anujānāmi, bhikkhave, phalāni bhesajjāni bilaṅgaṃ pippaliṃ marīcaṃ harītakaṃ vibhītakaṃ āmalakaṃ goṭṭhaphalaṃ, yāni vā panaññānipi atthi phalāni bhesajjāni neva khādanīye khādanīyatthaṃ pharanti, na bhojanīye bhojanīyatthaṃ pharantī’’ti (mahāva. 263) –
вуд̇д̇аани , д̇аани яааваж̇ийвигаани. д̇зсамби абарибаггаани ажчиваб̣имб̣аваран̣агзд̇агагаасмарийаад̣̇ийнам̣ палаани ж̇аад̇ипалам̣ гадугапалам̣ зл̣аа д̇агголанд̇и звам̣ наамавасзна на саггаа барияанд̇ам̣ д̣̇ассзд̇ум̣.
Vuttāni , tāni yāvajīvikāni. Tesampi aparipakkāni acchivabimbavaraṇaketakakāsmarīādīnaṃ phalāni jātiphalaṃ kaṭukaphalaṃ eḷā takkolanti evaṃ nāmavasena na sakkā pariyantaṃ dassetuṃ.
адтикаад̣̇анийяз лаб̣уж̇адти банасадти амб̣аадагадти сааладти каж̇ж̇уурийгзд̇агад̇имб̣аруусагаанам̣ д̇арун̣апаладти д̇инд̇ин̣игадти б̣имб̣апаладти уббалабад̣̇умаж̇аад̇ийнам̣ богкарадтийд̇и звамаад̣̇ийни д̇зсу д̇зсу ж̇анабад̣̇зсу мануссаанам̣ багад̇иаахааравасзна каад̣̇анийяад̇т̇ам̣ бхож̇анийяад̇т̇ан̃жа паран̣агаани адтийни яаавагаалигаани, мад̇хугадти буннааг̇адти харийд̇агаад̣̇ийнам̣ адтийни сид̣̇д̇хад̇т̇агадти рааж̇игадтийд̇и звамаад̣̇ийни адтийни яааваж̇ийвигаани. д̇зсам̣ баал̣ияам̣ палабхзсаж̇ж̇знзва сан̇г̇ахо взд̣̇ид̇аб̣б̣о.
Aṭṭhikhādanīye labujaṭṭhi panasaṭṭhi ambāṭakaṭṭhi sālaṭṭhi khajjūrīketakatimbarūsakānaṃ taruṇaphalaṭṭhi tintiṇikaṭṭhi bimbaphalaṭṭhi uppalapadumajātīnaṃ pokkharaṭṭhīti evamādīni tesu tesu janapadesu manussānaṃ pakatiāhāravasena khādanīyatthaṃ bhojanīyatthañca pharaṇakāni aṭṭhīni yāvakālikāni, madhukaṭṭhi punnāgaṭṭhi harītakādīnaṃ aṭṭhīni siddhatthakaṭṭhi rājikaṭṭhīti evamādīni aṭṭhīni yāvajīvikāni. Tesaṃ pāḷiyaṃ phalabhesajjeneva saṅgaho veditabbo.
бидтакаад̣̇анийяз сад̇д̇аннам̣ д̇аава д̇хан̃н̃аанам̣ д̇хан̃н̃аануломаанам̣ абаран̣н̣аанан̃жа бидтам̣ банасабидтам̣ лаб̣уж̇абидтам̣ амб̣аадагабидтам̣ саалабидтам̣ д̇ход̇агад̇аалабидтам̣ кийраваллибидтан̃жаад̇и звамаад̣̇ийни д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ам̣ бхож̇анийяад̇т̇ан̃жа паран̣агаани бидтаани яаавагаалигаани, ад̇ход̇агам̣ д̇аалабидтам̣ кийраваллибидтам̣ ассаг̇анд̇хаад̣̇ибидтаани жа яааваж̇ийвигаани. д̇зсам̣ баал̣ияам̣ гасаавзхи муулапалзхи жа сан̇г̇ахо взд̣̇ид̇аб̣б̣о.
Piṭṭhakhādanīye sattannaṃ tāva dhaññānaṃ dhaññānulomānaṃ aparaṇṇānañca piṭṭhaṃ panasapiṭṭhaṃ labujapiṭṭhaṃ ambāṭakapiṭṭhaṃ sālapiṭṭhaṃ dhotakatālapiṭṭhaṃ khīravallipiṭṭhañcāti evamādīni tesu tesu janapadesu pakatiāhāravasena manussānaṃ khādanīyatthaṃ bhojanīyatthañca pharaṇakāni piṭṭhāni yāvakālikāni, adhotakaṃ tālapiṭṭhaṃ khīravallipiṭṭhaṃ assagandhādipiṭṭhāni ca yāvajīvikāni. Tesaṃ pāḷiyaṃ kasāvehi mūlaphalehi ca saṅgaho veditabbo.
нияяаасакаад̣̇анийяз – зго ужчунияяаасова сад̇д̇аахагаалиго, сзсаа –
Niyyāsakhādanīye – eko ucchuniyyāsova sattāhakāliko, sesā –
‘‘ануж̇аанаами, бхигкавз, ж̇ад̇ууни бхзсаж̇ж̇аани хин̇г̇ум̣ хин̇г̇уж̇ад̇ум̣ хин̇г̇усибаадигам̣ д̇агам̣ д̇агабад̇д̇им̣ д̇агабан̣н̣им̣ саж̇ж̇уласам̣, яаани ваа банан̃н̃ааниби ад̇т̇и ж̇ад̇ууни бхзсаж̇ж̇ааний’’д̇и (махаава. 263) –
‘‘Anujānāmi, bhikkhave, jatūni bhesajjāni hiṅguṃ hiṅgujatuṃ hiṅgusipāṭikaṃ takaṃ takapattiṃ takapaṇṇiṃ sajjulasaṃ, yāni vā panaññānipi atthi jatūni bhesajjānī’’ti (mahāva. 263) –
звам̣ баал̣ияам̣ вуд̇д̇аа нияяаасаа яааваж̇ийвигаа. д̇ад̇т̇а язваабанагавасзна сан̇г̇ахид̇аанам̣ амб̣анияяаасо ган̣игааранияяаасод̇и звам̣ наамавасзна на саггаа барияанд̇ам̣ д̣̇ассзд̇ум̣. звам̣ имзсу муулакаад̣̇анийяаад̣̇ийсу яам̣ гин̃жи яаавагаалигам̣, саб̣б̣амби имасмим̣ ад̇т̇з авасзсам̣ каад̣̇анийяам̣ наамаад̇и сан̇г̇ахид̇ам̣.
Evaṃ pāḷiyaṃ vuttā niyyāsā yāvajīvikā. Tattha yevāpanakavasena saṅgahitānaṃ ambaniyyāso kaṇikāraniyyāsoti evaṃ nāmavasena na sakkā pariyantaṃ dassetuṃ. Evaṃ imesu mūlakhādanīyādīsu yaṃ kiñci yāvakālikaṃ, sabbampi imasmiṃ atthe avasesaṃ khādanīyaṃ nāmāti saṅgahitaṃ.
91. яаамагаалигзсу бана адта баанаани наама амб̣абаанам̣ ж̇амб̣убаанам̣ жожабаанам̣ можабаанам̣ мад̇хугабаанам̣ муд̣̇д̣̇игабаанам̣ саалуугабаанам̣ паарусагабаананд̇и имаани адта баанаани. д̇ад̇т̇а (махаава. адта. 300) амб̣абаананд̇и аамзхи ваа баггзхи ваа амб̣зхи гад̇абаанам̣. д̇ад̇т̇а аамзхи гаронд̇зна амб̣ад̇арун̣аани бхинд̣̇ид̇ваа уд̣̇агз багкибид̇ваа аад̇абз аад̣̇ижжабаагзна бажид̇ваа бариссаавзд̇ваа д̇ад̣̇ахубадиг̇г̇ахид̇агзхи мад̇хусаггаарагаббуураад̣̇ийхи яож̇зд̇ваа гаад̇аб̣б̣ам̣, звам̣ гад̇ам̣ бурзбхад̇д̇амзва габбад̇и. анубасамбаннзхи гад̇ам̣ лабхид̇ваа бана бурзбхад̇д̇ам̣ бадиг̇г̇ахид̇ам̣ бурзбхад̇д̇ам̣ саамисабарибхог̇знаби ваддад̇и, бажчаабхад̇д̇ам̣ нираамисабарибхог̇зна яаава арун̣уг̇г̇аманаа ваддад̇и. зса наяо саб̣б̣абаанзсу. ж̇амб̣убаананд̇и ж̇амб̣упалзхи гад̇абаанам̣. жожабаананд̇и адтигагад̣̇алипалзхи гад̇абаанам̣. можабаананд̇и анадтигзхи гад̣̇алипалзхи гад̇абаанам̣. мад̇хугабаананд̇и мад̇хугаанам̣ ж̇аад̇ирасзна гад̇абаанам̣. д̇ам̣ бана уд̣̇агасамбхиннам̣ ваддад̇и, суд̣̇д̇хам̣ на ваддад̇и. муд̣̇д̣̇игабаананд̇и муд̣̇д̣̇игаа уд̣̇агз мад̣̇д̣̇ид̇ваа амб̣абаанам̣ вияа гад̇абаанам̣. саалуугабаананд̇и рад̇д̇уббаланийлуббалаад̣̇ийнам̣ саалуугз мад̣̇д̣̇ид̇ваа гад̇абаанам̣. паарусагабаананд̇и паарусагапалзхи амб̣абаанам̣ вияа гад̇абаанам̣. имаани адта баанаани сийд̇ааниби аад̣̇ижжабаагааниби вадданд̇и, аг̇г̇ибаагаани на вадданд̇и.
91. Yāmakālikesu pana aṭṭha pānāni nāma ambapānaṃ jambupānaṃ cocapānaṃ mocapānaṃ madhukapānaṃ muddikapānaṃ sālūkapānaṃ phārusakapānanti imāni aṭṭha pānāni. Tattha (mahāva. aṭṭha. 300) ambapānanti āmehi vā pakkehi vā ambehi katapānaṃ. Tattha āmehi karontena ambataruṇāni bhinditvā udake pakkhipitvā ātape ādiccapākena pacitvā parissāvetvā tadahupaṭiggahitakehi madhusakkārakappūrādīhi yojetvā kātabbaṃ, evaṃ kataṃ purebhattameva kappati. Anupasampannehi kataṃ labhitvā pana purebhattaṃ paṭiggahitaṃ purebhattaṃ sāmisaparibhogenapi vaṭṭati, pacchābhattaṃ nirāmisaparibhogena yāva aruṇuggamanā vaṭṭati. Esa nayo sabbapānesu. Jambupānanti jambuphalehi katapānaṃ. Cocapānanti aṭṭhikakadaliphalehi katapānaṃ. Mocapānanti anaṭṭhikehi kadaliphalehi katapānaṃ. Madhukapānanti madhukānaṃ jātirasena katapānaṃ. Taṃ pana udakasambhinnaṃ vaṭṭati, suddhaṃ na vaṭṭati. Muddikapānanti muddikā udake madditvā ambapānaṃ viya katapānaṃ. Sālūkapānanti rattuppalanīluppalādīnaṃ sālūke madditvā katapānaṃ. Phārusakapānanti phārusakaphalehi ambapānaṃ viya katapānaṃ. Imāni aṭṭha pānāni sītānipi ādiccapākānipi vaṭṭanti, aggipākāni na vaṭṭanti.
авасзсаани взд̇д̇ад̇инд̇ин̣игамаад̇улун̇г̇агабид̇т̇агосамб̣агараманд̣̇аад̣̇икуд̣̇д̣̇агапалабаанаани адтабаанаг̇аагаанзва. д̇аани гин̃жааби баал̣ияам̣ на вуд̇д̇аани, ат̇а ко габбияам̣ ануломзнд̇и, д̇асмаа габбанд̇и. ‘‘ануж̇аанаами, бхигкавз, саб̣б̣ам̣ паларасам̣ табзд̇ваа д̇хан̃н̃апалараса’’нд̇и (махаава. адта. 300) вуд̇д̇ад̇д̇аа табзд̇ваа саануломад̇хан̃н̃апаларасам̣ ан̃н̃ам̣ палабаанам̣ наама агаббияам̣ над̇т̇и, саб̣б̣ам̣ яаамагаалигамзва. д̇ад̇т̇а саануломад̇хан̃н̃апаларасо наама сад̇д̇аннан̃жзва д̇хан̃н̃аанам̣ д̇ааланаал̣игзрабанасалаб̣уж̇аалааб̣угумбхан̣д̣абуссапалад̇ибусазл̣аалугаад̇и наваннан̃жа махаапалаанам̣ саб̣б̣зсан̃жа буб̣б̣ан̣н̣аабаран̣н̣аанам̣ ануломад̇хан̃н̃аанам̣ расо яаавагаалиго, д̇асмаа бажчаабхад̇д̇ам̣ на ваддад̇и. ‘‘ануж̇аанаами, бхигкавз, саб̣б̣ам̣ бад̇д̇арасам̣ табзд̇ваа д̣аагараса’’нд̇и (махаава. 300) вуд̇д̇ад̇д̇аа баггад̣аагарасам̣ табзд̇ваа яаавагаалигабад̇д̇аанамби сийд̇од̣̇агзна мад̣̇д̣̇ид̇ваа гад̇арасо ваа аад̣̇ижжабааго ваа ваддад̇и. ‘‘ануж̇аанаами, бхигкавз, саб̣б̣ам̣ бубпарасам̣ табзд̇ваа мад̇хугабубпараса’’нд̇и вуд̇д̇ад̇д̇аа мад̇хугабубпарасам̣ табзд̇ваа саб̣б̣оби бубпарасо ваддад̇и.
Avasesāni vettatintiṇikamātuluṅgakapitthakosambakaramandādikhuddakaphalapānāni aṭṭhapānagaakāneva. Tāni kiñcāpi pāḷiyaṃ na vuttāni, atha kho kappiyaṃ anulomenti, tasmā kappanti. ‘‘Anujānāmi, bhikkhave, sabbaṃ phalarasaṃ ṭhapetvā dhaññaphalarasa’’nti (mahāva. aṭṭha. 300) vuttattā ṭhapetvā sānulomadhaññaphalarasaṃ aññaṃ phalapānaṃ nāma akappiyaṃ natthi, sabbaṃ yāmakālikameva. Tattha sānulomadhaññaphalaraso nāma sattannañceva dhaññānaṃ tālanāḷikerapanasalabujaalābukumbhaṇḍapussaphalatipusaeḷālukāti navannañca mahāphalānaṃ sabbesañca pubbaṇṇāparaṇṇānaṃ anulomadhaññānaṃ raso yāvakāliko, tasmā pacchābhattaṃ na vaṭṭati. ‘‘Anujānāmi, bhikkhave, sabbaṃ pattarasaṃ ṭhapetvā ḍākarasa’’nti (mahāva. 300) vuttattā pakkaḍākarasaṃ ṭhapetvā yāvakālikapattānampi sītodakena madditvā kataraso vā ādiccapāko vā vaṭṭati. ‘‘Anujānāmi, bhikkhave, sabbaṃ puppharasaṃ ṭhapetvā madhukapuppharasa’’nti vuttattā madhukapuppharasaṃ ṭhapetvā sabbopi puppharaso vaṭṭati.
92. сад̇д̇аахагаалигам̣ наама сабби наванийд̇ам̣ д̇злам̣ мад̇ху паан̣ид̇анд̇и имаани бан̃жа бхзсаж̇ж̇аани. д̇ад̇т̇а сабби наама г̇осабби ваа аж̇игаасабби ваа махим̣сасабби ваа язсам̣ мам̣сам̣ габбад̇и, д̇зсам̣ сабби. наванийд̇ам̣ наама д̇зсам̣язва наванийд̇ам̣. д̇злам̣ наама д̇илад̇злам̣ саасабад̇злам̣ мад̇хугад̇злам̣ зран̣д̣ад̇злам̣ васаад̇злам̣. мад̇ху наама магкигаамад̇ху. паан̣ид̇ам̣ наама ужчумхаа ниб̣б̣ад̇д̇ам̣ (бажи. 260). яааваж̇ийвигам̣ бана хздтаа яаавагаалигз муулакаад̣̇анийяаад̣̇ийсу вуд̇д̇анаязнзва взд̣̇ид̇аб̣б̣ам̣.
92. Sattāhakālikaṃ nāma sappi navanītaṃ telaṃ madhu phāṇitanti imāni pañca bhesajjāni. Tattha sappi nāma gosappi vā ajikāsappi vā mahiṃsasappi vā yesaṃ maṃsaṃ kappati, tesaṃ sappi. Navanītaṃ nāma tesaṃyeva navanītaṃ. Telaṃ nāma tilatelaṃ sāsapatelaṃ madhukatelaṃ eraṇḍatelaṃ vasātelaṃ. Madhu nāma makkhikāmadhu. Phāṇitaṃ nāma ucchumhā nibbattaṃ (paci. 260). Yāvajīvikaṃ pana heṭṭhā yāvakālike mūlakhādanīyādīsu vuttanayeneva veditabbaṃ.
93. д̇ад̇т̇а (баажи. адта. 256) арун̣од̣̇аяз бадиг̇г̇ахид̇ам̣ яаавагаалигам̣ сад̇агкад̇д̇умби нид̣̇ахид̇ваа яаава гаало наад̇иггамад̇и, д̇аава барибхун̃ж̇ид̇ум̣ ваддад̇и, яаамагаалигам̣ згам̣ ахорад̇д̇ам̣, сад̇д̇аахагаалигам̣ сад̇д̇арад̇д̇ам̣, ид̇арам̣ сад̇и бажжаяз яааваж̇ийвамби барибхун̃ж̇ид̇ум̣ ваддад̇и. бадиг̇г̇ахзд̇ваа згарад̇д̇ам̣ вийд̇инаамид̇ам̣ бана яам̣ гин̃жи яаавагаалигам̣ ваа яаамагаалигам̣ ваа аж̇жхохарид̇угаамад̇ааяа г̇ан̣ханд̇асса бадиг̇г̇ахан̣з д̇аава д̣̇уггадам̣, аж̇жхохарад̇о бана згамзгасмим̣ аж̇жхохаарз саннид̇хибажжаяаа баажид̇д̇ияам̣. сажзби бад̇д̇о д̣̇уд̣̇д̇ход̇о ход̇и, яам̣ ан̇г̇улияаа гхам̣санд̇асса лзкаа бан̃н̃ааяад̇и, г̇ан̣тигабад̇д̇асса ваа г̇ан̣тиганд̇арз снзхо бавидто ход̇и, со ун̣хз од̇аабзнд̇асса баг̇гхарад̇и, ун̣хаяааг̇уяаа ваа г̇ахид̇ааяа санд̣̇иссад̇и, д̇аад̣̇исз бад̇д̇зби бунад̣̇ивасз бхун̃ж̇анд̇асса баажид̇д̇ияам̣, д̇асмаа бад̇д̇ам̣ д̇ховид̇ваа буна д̇ад̇т̇а ажчод̣̇агам̣ ваа аасин̃жид̇ваа ан̇г̇улияаа ваа гхам̣сид̇ваа ниснзхабхааво ж̇аанид̇аб̣б̣о. сажз хи уд̣̇агз ваа снзхабхааво, бад̇д̇з ваа ан̇г̇улилзкаа бан̃н̃ааяад̇и, д̣̇уд̣̇д̇ход̇о ход̇и, д̇злаван̣н̣абад̇д̇з бана ан̇г̇улилзкаа бан̃н̃ааяад̇и, саа аб̣б̣охааригаа. яамби бхигкуу нирабзгкаа сааман̣зраанам̣ барижжаж̇анд̇и, д̇ан̃жз сааман̣зраа нид̣̇ахид̇ваа д̣̇знд̇и, саб̣б̣ам̣ ваддад̇и. саяам̣ бадиг̇г̇ахзд̇ваа абарижжад̇д̇амзва хи д̣̇уд̇ияад̣̇ивасз на ваддад̇и. д̇ад̇о хи згасид̇т̇амби аж̇жхохарад̇о баажид̇д̇ияамзва. агаббияамам̣сзсу мануссамам̣сз т̇уллажжаязна сад̣̇д̇хим̣ баажид̇д̇ияам̣, авасзсзсу д̣̇уггадзна сад̣̇д̇хим̣.
93. Tattha (pāci. aṭṭha. 256) aruṇodaye paṭiggahitaṃ yāvakālikaṃ satakkhattumpi nidahitvā yāva kālo nātikkamati, tāva paribhuñjituṃ vaṭṭati, yāmakālikaṃ ekaṃ ahorattaṃ, sattāhakālikaṃ sattarattaṃ, itaraṃ sati paccaye yāvajīvampi paribhuñjituṃ vaṭṭati. Paṭiggahetvā ekarattaṃ vītināmitaṃ pana yaṃ kiñci yāvakālikaṃ vā yāmakālikaṃ vā ajjhoharitukāmatāya gaṇhantassa paṭiggahaṇe tāva dukkaṭaṃ, ajjhoharato pana ekamekasmiṃ ajjhohāre sannidhipaccayā pācittiyaṃ. Sacepi patto duddhoto hoti, yaṃ aṅguliyā ghaṃsantassa lekhā paññāyati, gaṇṭhikapattassa vā gaṇṭhikantare sneho paviṭṭho hoti, so uṇhe otāpentassa paggharati, uṇhayāguyā vā gahitāya sandissati, tādise pattepi punadivase bhuñjantassa pācittiyaṃ, tasmā pattaṃ dhovitvā puna tattha acchodakaṃ vā āsiñcitvā aṅguliyā vā ghaṃsitvā nisnehabhāvo jānitabbo. Sace hi udake vā snehabhāvo, patte vā aṅgulilekhā paññāyati, duddhoto hoti, telavaṇṇapatte pana aṅgulilekhā paññāyati, sā abbohārikā. Yampi bhikkhū nirapekkhā sāmaṇerānaṃ pariccajanti, tañce sāmaṇerā nidahitvā denti, sabbaṃ vaṭṭati. Sayaṃ paṭiggahetvā apariccattameva hi dutiyadivase na vaṭṭati. Tato hi ekasitthampi ajjhoharato pācittiyameva. Akappiyamaṃsesu manussamaṃse thullaccayena saddhiṃ pācittiyaṃ, avasesesu dukkaṭena saddhiṃ.
яаамагаалигам̣ сад̇и бажжаяз аж̇жхохарад̇о баажид̇д̇ияам̣, аахаарад̇т̇ааяа аж̇жхохарад̇о д̣̇уггадзна сад̣̇д̇хим̣ баажид̇д̇ияам̣. сажз баваарид̇о худ̇ваа анад̇ирид̇д̇агад̇ам̣ аж̇жхохарад̇и, багад̇иаамисз д̣̇вз баажид̇д̇ияаани, мануссамам̣сз т̇уллажжаязна сад̣̇д̇хим̣ д̣̇вз, сзсаагаббияамам̣сз д̣̇уггадзна сад̣̇д̇хим̣. яаамагаалигам̣ сад̇и бажжаяз саамисзна мукзна аж̇жхохарад̇о д̣̇вз, нираамисзна згамзва. аахаарад̇т̇ааяа аж̇жхохарад̇о вигаббад̣̇ваязби д̣̇уггадам̣ вад̣дхад̇и. сажз вигаалз аж̇жхохарад̇и, багад̇ибхож̇анз саннид̇хибажжаяаа жа вигаалабхож̇анабажжаяаа жа д̣̇вз баажид̇д̇ияаани, агаббияамам̣сз т̇уллажжаяам̣ д̣̇уггадан̃жа вад̣дхад̇и. яаамагаалигз вигаалабажжаяаа анаабад̇д̇и. анад̇ирид̇д̇абажжаяаа бана вигаалз саб̣б̣авигаббзсу анаабад̇д̇и.
Yāmakālikaṃ sati paccaye ajjhoharato pācittiyaṃ, āhāratthāya ajjhoharato dukkaṭena saddhiṃ pācittiyaṃ. Sace pavārito hutvā anatirittakataṃ ajjhoharati, pakatiāmise dve pācittiyāni, manussamaṃse thullaccayena saddhiṃ dve, sesaakappiyamaṃse dukkaṭena saddhiṃ. Yāmakālikaṃ sati paccaye sāmisena mukhena ajjhoharato dve, nirāmisena ekameva. Āhāratthāya ajjhoharato vikappadvayepi dukkaṭaṃ vaḍḍhati. Sace vikāle ajjhoharati, pakatibhojane sannidhipaccayā ca vikālabhojanapaccayā ca dve pācittiyāni, akappiyamaṃse thullaccayaṃ dukkaṭañca vaḍḍhati. Yāmakālike vikālapaccayā anāpatti. Anatirittapaccayā pana vikāle sabbavikappesu anāpatti.
сад̇д̇аахагаалигам̣ бана яааваж̇ийвиган̃жа аахаарад̇т̇ааяа бадиг̇г̇ан̣хад̇о бадиг̇г̇ан̣ханабажжаяаа д̇аава д̣̇уггадам̣, аж̇жхохарад̇о бана сажз нираамисам̣ ход̇и, аж̇жхохаарз д̣̇уггадам̣. ат̇а аамисасам̣садтам̣ бадиг̇г̇ахзд̇ваа табид̇ам̣ ход̇и, яат̇аавад̇т̇угам̣ баажид̇д̇ияамзва.
Sattāhakālikaṃ pana yāvajīvikañca āhāratthāya paṭiggaṇhato paṭiggaṇhanapaccayā tāva dukkaṭaṃ, ajjhoharato pana sace nirāmisaṃ hoti, ajjhohāre dukkaṭaṃ. Atha āmisasaṃsaṭṭhaṃ paṭiggahetvā ṭhapitaṃ hoti, yathāvatthukaṃ pācittiyameva.
94. сад̇д̇аахагаалигзсу бана саббиаад̣̇ийсу аяам̣ винижчаяо (баараа. адта. 2.622) – сабби д̇аава бурзбхад̇д̇ам̣ бадиг̇г̇ахид̇ам̣ д̇ад̣̇ахубурзбхад̇д̇ам̣ саамисамби нираамисамби барибхун̃ж̇ид̇ум̣ ваддад̇и, бажчаабхад̇д̇ад̇о бадтааяа сад̇д̇аахам̣ нираамисам̣ барибхун̃ж̇ид̇аб̣б̣ам̣. сад̇д̇аахаад̇иггамз сажз згабхааж̇анз табид̇ам̣, згам̣ ниссаг̇г̇ияам̣. сажз б̣ахуусу, вад̇т̇уг̇ан̣анааяа ниссаг̇г̇ияаани. бажчаабхад̇д̇ам̣ бадиг̇г̇ахид̇ам̣ нираамисамзва ваддад̇и, бурзбхад̇д̇ам̣ ваа бажчаабхад̇д̇ам̣ ваа уг̇г̇ахид̇агам̣ гад̇ваа нигкид̇д̇ам̣ аж̇жхохарид̇ум̣ на ваддад̇и, аб̣бхан̃ж̇анаад̣̇ийсу убанзд̇аб̣б̣ам̣. сад̇д̇аахаад̇иггамзби анаабад̇д̇и анаж̇жхохаран̣ийяад̇ам̣ аабаннад̇д̇аа. сажз анубасамбанно бурзбхад̇д̇ам̣ бадиг̇г̇ахид̇анаванийд̇зна саббим̣ гад̇ваа д̣̇зд̇и, бурзбхад̇д̇ам̣ саамисамби ваддад̇и, сажз саяам̣ гарод̇и, сад̇д̇аахамби нираамисамзва ваддад̇и. бажчаабхад̇д̇ам̣ бадиг̇г̇ахид̇анаванийд̇зна язна гзнажи гад̇асабби сад̇д̇аахамби нираамисамзва ваддад̇и, уг̇г̇ахид̇агзна гад̇з буб̣б̣з вуд̇д̇асуд̣̇д̇хасаббинаязнзва винижчаяо взд̣̇ид̇аб̣б̣о. бурзбхад̇д̇ам̣ бадиг̇г̇ахид̇акийрзна ваа д̣̇ад̇хинаа ваа гад̇асабби анубасамбаннзна гад̇ам̣ саамисамби д̇ад̣̇ахубурзбхад̇д̇ам̣ ваддад̇и, саяам̣гад̇ам̣ нираамисамзва ваддад̇и.
94. Sattāhakālikesu pana sappiādīsu ayaṃ vinicchayo (pārā. aṭṭha. 2.622) – sappi tāva purebhattaṃ paṭiggahitaṃ tadahupurebhattaṃ sāmisampi nirāmisampi paribhuñjituṃ vaṭṭati, pacchābhattato paṭṭhāya sattāhaṃ nirāmisaṃ paribhuñjitabbaṃ. Sattāhātikkame sace ekabhājane ṭhapitaṃ, ekaṃ nissaggiyaṃ. Sace bahūsu, vatthugaṇanāya nissaggiyāni. Pacchābhattaṃ paṭiggahitaṃ nirāmisameva vaṭṭati, purebhattaṃ vā pacchābhattaṃ vā uggahitakaṃ katvā nikkhittaṃ ajjhoharituṃ na vaṭṭati, abbhañjanādīsu upanetabbaṃ. Sattāhātikkamepi anāpatti anajjhoharaṇīyataṃ āpannattā. Sace anupasampanno purebhattaṃ paṭiggahitanavanītena sappiṃ katvā deti, purebhattaṃ sāmisampi vaṭṭati, sace sayaṃ karoti, sattāhampi nirāmisameva vaṭṭati. Pacchābhattaṃ paṭiggahitanavanītena yena kenaci katasappi sattāhampi nirāmisameva vaṭṭati, uggahitakena kate pubbe vuttasuddhasappinayeneva vinicchayo veditabbo. Purebhattaṃ paṭiggahitakhīrena vā dadhinā vā katasappi anupasampannena kataṃ sāmisampi tadahupurebhattaṃ vaṭṭati, sayaṃkataṃ nirāmisameva vaṭṭati.
95. наванийд̇ам̣ д̇аабзнд̇асса хи саамам̣бааго на ход̇и, саамам̣баггзна бана д̇зна сад̣̇д̇хим̣ аамисам̣ на ваддад̇и, бажчаабхад̇д̇ад̇о бадтааяа жа на ваддад̇иязва. сад̇д̇аахаад̇иггамзби анаабад̇д̇и савад̇т̇угасса бадиг̇г̇ахид̇ад̇д̇аа. бажчаабхад̇д̇ам̣ бадиг̇г̇ахид̇агзхи гад̇ам̣ бана аб̣бхан̃ж̇анаад̣̇ийсу убанзд̇аб̣б̣ам̣. бурзбхад̇д̇амби жа уг̇г̇ахид̇агзхи гад̇ам̣, убхаязсамби сад̇д̇аахаад̇иггамз анаабад̇д̇и. зса наяо агаббияамам̣сасаббимхи. аяам̣ бана висзсо – яад̇т̇а баал̣ияам̣ ааг̇ад̇асаббинаа ниссаг̇г̇ияам̣, д̇ад̇т̇а иминаа д̣̇уггадам̣. анд̇хагадтагат̇ааяам̣ гааран̣абад̇ируубагам̣ вад̇ваа мануссасабби жа наванийд̇ан̃жа бадигкид̇д̇ам̣, д̇ам̣ д̣̇уббадигкид̇д̇ам̣ саб̣б̣аадтагат̇аасу анун̃н̃аад̇ад̇д̇аа. барад̇о жасса винижчаяоби ааг̇ажчиссад̇и. баал̣ияам̣ ааг̇ад̇анаванийд̇амби бурзбхад̇д̇ам̣ бадиг̇г̇ахид̇ам̣ д̇ад̣̇ахубурзбхад̇д̇ам̣ саамисамби ваддад̇и, бажчаабхад̇д̇ад̇о бадтааяа нираамисамзва. сад̇д̇аахаад̇иггамз наанаабхааж̇анзсу табид̇з бхааж̇анаг̇ан̣анааяа, згабхааж̇анзби амиссзд̇ваа бин̣д̣абин̣д̣авасзна табид̇з бин̣д̣аг̇ан̣анааяа ниссаг̇г̇ияаани. бажчаабхад̇д̇ам̣ бадиг̇г̇ахид̇ам̣ саббинаязна взд̣̇ид̇аб̣б̣ам̣. зд̇т̇а бана д̣̇ад̇хиг̇ул̣игааяоби д̇аггаб̣инд̣̇ууниби хонд̇и, д̇асмаа д̇ход̇ам̣ ваддад̇ийд̇и убад̣дхад̇т̇зраа аахам̣су. махаасивад̇т̇зро бана ‘‘бхаг̇авад̇аа анун̃н̃аад̇агаалад̇о бадтааяа д̇аггад̇о уд̣̇д̇хадамад̇д̇амзва каад̣̇им̣суу’’д̇и ааха. д̇асмаа наванийд̇ам̣ барибхун̃ж̇анд̇зна д̇ховид̇ваа д̣̇ад̇хид̇аггамагкигаагибиллигаад̣̇ийни абанзд̇ваа барибхун̃ж̇ид̇аб̣б̣ам̣. бажид̇ваа саббим̣ гад̇ваа барибхун̃ж̇ид̇угаамзна ад̇ход̇амби барибхун̃ж̇ид̇ум̣ ваддад̇и. яам̣ д̇ад̇т̇а д̣̇ад̇хиг̇ад̇ам̣ ваа д̇аггаг̇ад̇ам̣ ваа, д̇ам̣ каяам̣ г̇амиссад̇и. зд̇д̇аавад̇аа хи савад̇т̇угабадиг̇г̇ахид̇ам̣ наама на ход̇ийд̇и аяамзд̇т̇а ад̇хиббааяо. аамисзна сад̣̇д̇хим̣ баггад̇д̇аа бана д̇асмимби гуггужжааяанд̇и гуггужжагаа. ид̣̇аани уг̇г̇ахзд̇ваа табид̇анаванийд̇з жа бурзбхад̇д̇ам̣ кийрад̣̇ад̇хийни бадиг̇г̇ахзд̇ваа гад̇анаванийд̇з жа бажчаабхад̇д̇ам̣ д̇аани бадиг̇г̇ахзд̇ваа гад̇анаванийд̇з жа уг̇г̇ахид̇агзхи гад̇анаванийд̇з жа агаббияамам̣санаванийд̇з жа саб̣б̣о аабад̇д̇аанаабад̇д̇ибарибхог̇аабарибхог̇анаяо саббимхи вуд̇д̇аггамзнзва г̇ахзд̇аб̣б̣о. д̇злабхигкааяа бавидтаанам̣ бана бхигкуунам̣ д̇ад̇т̇зва саббимби наванийд̇амби баггад̇зламби абаггад̇зламби аагиранд̇и. д̇ад̇т̇а д̇аггад̣̇ад̇хиб̣инд̣̇ууниби бхад̇д̇асид̇т̇ааниби д̇ан̣д̣улаган̣ааби магкигаад̣̇аяоби хонд̇и, аад̣̇ижжабаагам̣ гад̇ваа бариссаавзд̇ваа г̇ахид̇ам̣ сад̇д̇аахагаалигам̣ ход̇и. бадиг̇г̇ахзд̇ваа жа табид̇абхзсаж̇ж̇зхи сад̣̇д̇хим̣ бажид̇ваа над̇т̇убаанамби гаад̇ум̣ ваддад̇и. сажз вад̣̇д̣̇алисамаяз лаж̇ж̇ий сааман̣зро яат̇аа д̇ад̇т̇а бад̇ид̇ад̇ан̣д̣улаган̣аад̣̇аяо на бажжанд̇и, звам̣ аг̇г̇имхи вилийяаабзд̇ваа бариссаавзд̇ваа буна бажид̇ваа д̣̇зд̇и, буриманаязнзва сад̇д̇аахам̣ ваддад̇и.
95.Navanītaṃ tāpentassa hi sāmaṃpāko na hoti, sāmaṃpakkena pana tena saddhiṃ āmisaṃ na vaṭṭati, pacchābhattato paṭṭhāya ca na vaṭṭatiyeva. Sattāhātikkamepi anāpatti savatthukassa paṭiggahitattā. Pacchābhattaṃ paṭiggahitakehi kataṃ pana abbhañjanādīsu upanetabbaṃ. Purebhattampi ca uggahitakehi kataṃ, ubhayesampi sattāhātikkame anāpatti. Esa nayo akappiyamaṃsasappimhi. Ayaṃ pana viseso – yattha pāḷiyaṃ āgatasappinā nissaggiyaṃ, tattha iminā dukkaṭaṃ. Andhakaṭṭhakathāyaṃ kāraṇapatirūpakaṃ vatvā manussasappi ca navanītañca paṭikkhittaṃ, taṃ duppaṭikkhittaṃ sabbaaṭṭhakathāsu anuññātattā. Parato cassa vinicchayopi āgacchissati. Pāḷiyaṃ āgatanavanītampi purebhattaṃ paṭiggahitaṃ tadahupurebhattaṃ sāmisampi vaṭṭati, pacchābhattato paṭṭhāya nirāmisameva. Sattāhātikkame nānābhājanesu ṭhapite bhājanagaṇanāya, ekabhājanepi amissetvā piṇḍapiṇḍavasena ṭhapite piṇḍagaṇanāya nissaggiyāni. Pacchābhattaṃ paṭiggahitaṃ sappinayena veditabbaṃ. Ettha pana dadhiguḷikāyopi takkabindūnipi honti, tasmā dhotaṃ vaṭṭatīti upaḍḍhattherā āhaṃsu. Mahāsivatthero pana ‘‘bhagavatā anuññātakālato paṭṭhāya takkato uddhaṭamattameva khādiṃsū’’ti āha. Tasmā navanītaṃ paribhuñjantena dhovitvā dadhitakkamakkhikākipillikādīni apanetvā paribhuñjitabbaṃ. Pacitvā sappiṃ katvā paribhuñjitukāmena adhotampi paribhuñjituṃ vaṭṭati. Yaṃ tattha dadhigataṃ vā takkagataṃ vā, taṃ khayaṃ gamissati. Ettāvatā hi savatthukapaṭiggahitaṃ nāma na hotīti ayamettha adhippāyo. Āmisena saddhiṃ pakkattā pana tasmimpi kukkuccāyanti kukkuccakā. Idāni uggahetvā ṭhapitanavanīte ca purebhattaṃ khīradadhīni paṭiggahetvā katanavanīte ca pacchābhattaṃ tāni paṭiggahetvā katanavanīte ca uggahitakehi katanavanīte ca akappiyamaṃsanavanīte ca sabbo āpattānāpattiparibhogāparibhoganayo sappimhi vuttakkameneva gahetabbo. Telabhikkhāya paviṭṭhānaṃ pana bhikkhūnaṃ tattheva sappimpi navanītampi pakkatelampi apakkatelampi ākiranti. Tattha takkadadhibindūnipi bhattasitthānipi taṇḍulakaṇāpi makkhikādayopi honti, ādiccapākaṃ katvā parissāvetvā gahitaṃ sattāhakālikaṃ hoti. Paṭiggahetvā ca ṭhapitabhesajjehi saddhiṃ pacitvā natthupānampi kātuṃ vaṭṭati. Sace vaddalisamaye lajjī sāmaṇero yathā tattha patitataṇḍulakaṇādayo na paccanti, evaṃ aggimhi vilīyāpetvā parissāvetvā puna pacitvā deti, purimanayeneva sattāhaṃ vaṭṭati.
96. д̇злзсу д̇илад̇злам̣ д̇аава бурзбхад̇д̇ам̣ бадиг̇г̇ахид̇ам̣ бурзбхад̇д̇ам̣ саамисамби ваддад̇и, бажчаабхад̇д̇ад̇о бадтааяа нираамисамзва ваддад̇и. сад̇д̇аахаад̇иггамз д̇асса бхааж̇анаг̇ан̣анааяа ниссаг̇г̇ияабхааво взд̣̇ид̇аб̣б̣о. бажчаабхад̇д̇ам̣ бадиг̇г̇ахид̇ам̣ сад̇д̇аахам̣ нираамисамзва ваддад̇и, уг̇г̇ахид̇агам̣ гад̇ваа нигкид̇д̇ам̣ аж̇жхохарид̇ум̣ на ваддад̇и, сийсамагканаад̣̇ийсу убанзд̇аб̣б̣ам̣, сад̇д̇аахаад̇иггамзби анаабад̇д̇и. бурзбхад̇д̇ам̣ д̇илз бадиг̇г̇ахзд̇ваа гад̇ад̇злам̣ бурзбхад̇д̇ам̣ саамисамби ваддад̇и, бажчаабхад̇д̇ад̇о бадтааяа анаж̇жхохаран̣ийяам̣ ход̇и, сийсамагканаад̣̇ийсу убанзд̇аб̣б̣ам̣, сад̇д̇аахаад̇иггамзби анаабад̇д̇и. бажчаабхад̇д̇ам̣ д̇илз бадиг̇г̇ахзд̇ваа гад̇ад̇злам̣ анаж̇жхохаран̣ийяамзва савад̇т̇угабадиг̇г̇ахид̇ад̇д̇аа. сад̇д̇аахаад̇иггамзби анаабад̇д̇и, сийсамагканаад̣̇ийсу убанзд̇аб̣б̣ам̣. бурзбхад̇д̇ам̣ ваа бажчаабхад̇д̇ам̣ ваа уг̇г̇ахид̇агад̇илзхи гад̇ад̇злзби зсзва наяо. бурзбхад̇д̇ам̣ бадиг̇г̇ахид̇ад̇илз бхаж̇ж̇ид̇ваа ваа д̇илабидтам̣ ваа сзд̣̇зд̇ваа ун̣ход̣̇агзна ваа д̇змзд̇ваа гад̇ад̇злам̣ сажз анубасамбаннзна гад̇ам̣, бурзбхад̇д̇ам̣ саамисамби ваддад̇и, ад̇д̇анаа гад̇ам̣ ниб̣б̣аддид̇ад̇д̇аа бурзбхад̇д̇ам̣ нираамисам̣ ваддад̇и, саамам̣баггад̇д̇аа саамисам̣ на ваддад̇и. савад̇т̇угабадиг̇г̇ахид̇ад̇д̇аа бана бажчаабхад̇д̇ад̇о бадтааяа убхаяамби анаж̇жхохаран̣ийяам̣, сийсамагканаад̣̇ийсу убанзд̇аб̣б̣ам̣, сад̇д̇аахаад̇иггамзби анаабад̇д̇и. яад̣̇и бана аббам̣ ун̣ход̣̇агам̣ ход̇и аб̣бхуггиран̣амад̇д̇ам̣, аб̣б̣охааригам̣ ход̇и саамам̣баагаг̇ан̣анам̣ на г̇ажчад̇и. саасабад̇злаад̣̇ийсуби авад̇т̇угабадиг̇г̇ахид̇зсу авад̇т̇угад̇илад̇злз вуд̇д̇асад̣̇исова винижчаяо.
96.Telesu tilatelaṃ tāva purebhattaṃ paṭiggahitaṃ purebhattaṃ sāmisampi vaṭṭati, pacchābhattato paṭṭhāya nirāmisameva vaṭṭati. Sattāhātikkame tassa bhājanagaṇanāya nissaggiyabhāvo veditabbo. Pacchābhattaṃ paṭiggahitaṃ sattāhaṃ nirāmisameva vaṭṭati, uggahitakaṃ katvā nikkhittaṃ ajjhoharituṃ na vaṭṭati, sīsamakkhanādīsu upanetabbaṃ, sattāhātikkamepi anāpatti. Purebhattaṃ tile paṭiggahetvā katatelaṃ purebhattaṃ sāmisampi vaṭṭati, pacchābhattato paṭṭhāya anajjhoharaṇīyaṃ hoti, sīsamakkhanādīsu upanetabbaṃ, sattāhātikkamepi anāpatti. Pacchābhattaṃ tile paṭiggahetvā katatelaṃ anajjhoharaṇīyameva savatthukapaṭiggahitattā. Sattāhātikkamepi anāpatti, sīsamakkhanādīsu upanetabbaṃ. Purebhattaṃ vā pacchābhattaṃ vā uggahitakatilehi katatelepi eseva nayo. Purebhattaṃ paṭiggahitatile bhajjitvā vā tilapiṭṭhaṃ vā sedetvā uṇhodakena vā temetvā katatelaṃ sace anupasampannena kataṃ, purebhattaṃ sāmisampi vaṭṭati, attanā kataṃ nibbaṭṭitattā purebhattaṃ nirāmisaṃ vaṭṭati, sāmaṃpakkattā sāmisaṃ na vaṭṭati. Savatthukapaṭiggahitattā pana pacchābhattato paṭṭhāya ubhayampi anajjhoharaṇīyaṃ, sīsamakkhanādīsu upanetabbaṃ, sattāhātikkamepi anāpatti. Yadi pana appaṃ uṇhodakaṃ hoti abbhukkiraṇamattaṃ, abbohārikaṃ hoti sāmaṃpākagaṇanaṃ na gacchati. Sāsapatelādīsupi avatthukapaṭiggahitesu avatthukatilatele vuttasadisova vinicchayo.
сажз бана бурзбхад̇д̇ам̣ бадиг̇г̇ахид̇аанам̣ саасабаад̣̇ийнам̣ жун̣н̣зхи аад̣̇ижжабаагзна саггаа д̇злам̣ гаад̇ум̣, д̇ам̣ бурзбхад̇д̇ам̣ саамисамби ваддад̇и, бажчаабхад̇д̇ад̇о бадтааяа нираамисамзва ваддад̇и, сад̇д̇аахаад̇иггамз ниссаг̇г̇ияам̣. яасмаа бана саасабамад̇хугажун̣н̣аани сзд̣̇зд̇ваа зран̣д̣агадтийни жа бхаж̇ж̇ид̇ваа зва д̇злам̣ гаронд̇и, д̇асмаа зд̇зсам̣ д̇злам̣ анубасамбаннзхи гад̇ам̣ бурзбхад̇д̇ам̣ саамисамби ваддад̇и, вад̇т̇уунам̣ яааваж̇ийвигад̇д̇аа бана савад̇т̇угабадиг̇г̇ахан̣з д̣̇осо над̇т̇и. ад̇д̇анаа гад̇ам̣ сад̇д̇аахам̣ нираамисабарибхог̇знзва барибхун̃ж̇ид̇аб̣б̣ам̣. уг̇г̇ахид̇агзхи гад̇ам̣ анаж̇жхохаран̣ийяам̣, б̣аахирабарибхог̇з ваддад̇и, сад̇д̇аахаад̇иггамзби анаабад̇д̇и. д̇злагаран̣ад̇т̇ааяа саасабамад̇хугазран̣д̣агадтийни бадиг̇г̇ахзд̇ваа гад̇ад̇злам̣ сад̇д̇аахагаалигам̣, д̣̇уд̇ияад̣̇ивасз гад̇ам̣ чаахам̣ ваддад̇и, д̇ад̇ияад̣̇ивасз гад̇ам̣ бан̃жаахам̣ ваддад̇и, жад̇уд̇т̇а, бан̃жама, чадта, сад̇д̇амад̣̇ивасз гад̇ам̣ д̇ад̣̇ахзва ваддад̇и. сажз яаава арун̣асса уг̇г̇аманаа д̇идтад̇и, ниссаг̇г̇ияам̣, адтамад̣̇ивасз гад̇ам̣ анаж̇жхохаран̣ийяам̣, аниссаг̇г̇ияад̇д̇аа бана б̣аахирабарибхог̇з ваддад̇и. сажзби на гарод̇и, д̇злад̇т̇ааяа г̇ахид̇асаасабаад̣̇ийнам̣ сад̇д̇аахаад̇иггамз д̣̇уггадамзва. баал̣ияам̣ бана анааг̇ад̇аани ан̃н̃ааниби наал̣игзранимб̣агосамб̣агараманд̣̇аад̣̇ийнам̣ д̇злаани ад̇т̇и, д̇аани бадиг̇г̇ахзд̇ваа сад̇д̇аахам̣ ад̇иггаамаяад̇о д̣̇уггадам̣ ход̇и. аяамзд̇зсу висзсо – сзсам̣ яаавагаалигавад̇т̇ум̣ яааваж̇ийвигавад̇т̇ун̃жа саллагкзд̇ваа саамам̣баагасавад̇т̇угабурзбхад̇д̇абажчаабхад̇д̇абадиг̇г̇ахид̇ауг̇г̇ахид̇авад̇т̇увид̇хаанам̣ саб̣б̣ам̣ вуд̇д̇анаязнзва взд̣̇ид̇аб̣б̣ам̣.
Sace pana purebhattaṃ paṭiggahitānaṃ sāsapādīnaṃ cuṇṇehi ādiccapākena sakkā telaṃ kātuṃ, taṃ purebhattaṃ sāmisampi vaṭṭati, pacchābhattato paṭṭhāya nirāmisameva vaṭṭati, sattāhātikkame nissaggiyaṃ. Yasmā pana sāsapamadhukacuṇṇāni sedetvā eraṇḍakaṭṭhīni ca bhajjitvā eva telaṃ karonti, tasmā etesaṃ telaṃ anupasampannehi kataṃ purebhattaṃ sāmisampi vaṭṭati, vatthūnaṃ yāvajīvikattā pana savatthukapaṭiggahaṇe doso natthi. Attanā kataṃ sattāhaṃ nirāmisaparibhogeneva paribhuñjitabbaṃ. Uggahitakehi kataṃ anajjhoharaṇīyaṃ, bāhiraparibhoge vaṭṭati, sattāhātikkamepi anāpatti. Telakaraṇatthāya sāsapamadhukaeraṇḍakaṭṭhīni paṭiggahetvā katatelaṃ sattāhakālikaṃ, dutiyadivase kataṃ chāhaṃ vaṭṭati, tatiyadivase kataṃ pañcāhaṃ vaṭṭati, catuttha, pañcama, chaṭṭha, sattamadivase kataṃ tadaheva vaṭṭati. Sace yāva aruṇassa uggamanā tiṭṭhati, nissaggiyaṃ, aṭṭhamadivase kataṃ anajjhoharaṇīyaṃ, anissaggiyattā pana bāhiraparibhoge vaṭṭati. Sacepi na karoti, telatthāya gahitasāsapādīnaṃ sattāhātikkame dukkaṭameva. Pāḷiyaṃ pana anāgatāni aññānipi nāḷikeranimbakosambakaramandādīnaṃ telāni atthi, tāni paṭiggahetvā sattāhaṃ atikkāmayato dukkaṭaṃ hoti. Ayametesu viseso – sesaṃ yāvakālikavatthuṃ yāvajīvikavatthuñca sallakkhetvā sāmaṃpākasavatthukapurebhattapacchābhattapaṭiggahitauggahitavatthuvidhānaṃ sabbaṃ vuttanayeneva veditabbaṃ.
васаад̇злам̣ наама ‘‘ануж̇аанаами, бхигкавз, бан̃жа васаани ажчавасам̣ мажчавасам̣ сусугаавасам̣ суугаравасам̣ г̇ад̣̇рабхаваса’’нд̇и (махаава. 262) звам̣ анун̃н̃аад̇авасаанам̣ д̇злам̣. зд̇т̇а жа ‘‘ажчаваса’’нд̇и важанзна табзд̇ваа мануссавасам̣ саб̣б̣зсам̣ агаббияамам̣саанам̣ васаа анун̃н̃аад̇аа. мажчаг̇г̇ахан̣зна жа сусугааби г̇ахид̇аа хонд̇и, ваал̣амажчад̇д̇аа бана висум̣ вуд̇д̇ам̣. мажчаад̣̇иг̇г̇ахан̣зна жзд̇т̇а саб̣б̣зсамби габбияамам̣саанам̣ васаа анун̃н̃аад̇аа. мам̣сзсу хи д̣̇аса мануссахад̇т̇иассасунакаахисийхаб̣яаг̇гхад̣̇ийбиажчад̇аражчаанам̣ мам̣саани агаббияаани, васаасу згаа мануссавасаа. кийраад̣̇ийсу агаббияам̣ наама над̇т̇и. анубасамбаннзхи гад̇ам̣ ниб̣б̣аддид̇ам̣ васаад̇злам̣ бурзбхад̇д̇ам̣ бадиг̇г̇ахид̇ам̣ бурзбхад̇д̇ам̣ саамисамби ваддад̇и, бажчаабхад̇д̇ад̇о бадтааяа сад̇д̇аахам̣ нираамисамзва ваддад̇и. яам̣ бана д̇ад̇т̇а сукумараж̇асад̣̇исам̣ мам̣сам̣ ваа нхаару ваа адти ваа лохид̇ам̣ ваа ход̇и, д̇ам̣ аб̣б̣охааригам̣. сажз бана васам̣ бадиг̇г̇ахзд̇ваа саяам̣ гарод̇и, бурзбхад̇д̇ам̣ бадиг̇г̇ахзд̇ваа бажид̇ваа бариссаавзд̇ваа сад̇д̇аахам̣ нираамисабарибхог̇зна барибхун̃ж̇ид̇аб̣б̣ам̣. нираамисабарибхог̇ан̃хи санд̇хааяа ид̣̇ам̣ вуд̇д̇ам̣ ‘‘гаалз бадиг̇г̇ахид̇ам̣ гаалз ниббаггам̣ гаалз сам̣садтам̣ д̇злабарибхог̇зна барибхун̃ж̇ид̇у’’нд̇и (махаава. 262). д̇ад̇рааби аб̣б̣охааригам̣ аб̣б̣охааригамзва, бажчаабхад̇д̇ам̣ бана бадиг̇г̇ахзд̇ум̣ ваа гаад̇ум̣ ваа на ваддад̇иязва. вуд̇д̇ан̃хзд̇ам̣ –
Vasātelaṃ nāma ‘‘anujānāmi, bhikkhave, pañca vasāni acchavasaṃ macchavasaṃ susukāvasaṃ sūkaravasaṃ gadrabhavasa’’nti (mahāva. 262) evaṃ anuññātavasānaṃ telaṃ. Ettha ca ‘‘acchavasa’’nti vacanena ṭhapetvā manussavasaṃ sabbesaṃ akappiyamaṃsānaṃ vasā anuññātā. Macchaggahaṇena ca susukāpi gahitā honti, vāḷamacchattā pana visuṃ vuttaṃ. Macchādiggahaṇena cettha sabbesampi kappiyamaṃsānaṃ vasā anuññātā. Maṃsesu hi dasa manussahatthiassasunakhaahisīhabyagghadīpiacchataracchānaṃ maṃsāni akappiyāni, vasāsu ekā manussavasā. Khīrādīsu akappiyaṃ nāma natthi. Anupasampannehi kataṃ nibbaṭṭitaṃ vasātelaṃ purebhattaṃ paṭiggahitaṃ purebhattaṃ sāmisampi vaṭṭati, pacchābhattato paṭṭhāya sattāhaṃ nirāmisameva vaṭṭati. Yaṃ pana tattha sukhumarajasadisaṃ maṃsaṃ vā nhāru vā aṭṭhi vā lohitaṃ vā hoti, taṃ abbohārikaṃ. Sace pana vasaṃ paṭiggahetvā sayaṃ karoti, purebhattaṃ paṭiggahetvā pacitvā parissāvetvā sattāhaṃ nirāmisaparibhogena paribhuñjitabbaṃ. Nirāmisaparibhogañhi sandhāya idaṃ vuttaṃ ‘‘kāle paṭiggahitaṃ kāle nippakkaṃ kāle saṃsaṭṭhaṃ telaparibhogena paribhuñjitu’’nti (mahāva. 262). Tatrāpi abbohārikaṃ abbohārikameva, pacchābhattaṃ pana paṭiggahetuṃ vā kātuṃ vā na vaṭṭatiyeva. Vuttañhetaṃ –
‘‘вигаалз жз, бхигкавз, бадиг̇г̇ахид̇ам̣ вигаалз ниббаггам̣ вигаалз сам̣садтам̣, д̇ам̣ жз барибхун̃ж̇зяяа, аабад̇д̇и д̇ин̣н̣ам̣ д̣̇уггадаанам̣. гаалз жз, бхигкавз, бадиг̇г̇ахид̇ам̣ вигаалз ниббаггам̣ вигаалз сам̣садтам̣, д̇ам̣ жз барибхун̃ж̇зяяа, аабад̇д̇и д̣̇виннам̣ д̣̇уггадаанам̣. гаалз жз, бхигкавз, бадиг̇г̇ахид̇ам̣ гаалз ниббаггам̣ вигаалз сам̣садтам̣, д̇ам̣ жз барибхун̃ж̇зяяа, аабад̇д̇и д̣̇уггадасса . гаалз жз, бхигкавз, бадиг̇г̇ахид̇ам̣ гаалз ниббаггам̣ гаалз сам̣садтам̣, д̇ам̣ жз барибхун̃ж̇зяяа, анаабад̇д̇ий’’д̇и (махаава. 262).
‘‘Vikāle ce, bhikkhave, paṭiggahitaṃ vikāle nippakkaṃ vikāle saṃsaṭṭhaṃ, taṃ ce paribhuñjeyya, āpatti tiṇṇaṃ dukkaṭānaṃ. Kāle ce, bhikkhave, paṭiggahitaṃ vikāle nippakkaṃ vikāle saṃsaṭṭhaṃ, taṃ ce paribhuñjeyya, āpatti dvinnaṃ dukkaṭānaṃ. Kāle ce, bhikkhave, paṭiggahitaṃ kāle nippakkaṃ vikāle saṃsaṭṭhaṃ, taṃ ce paribhuñjeyya, āpatti dukkaṭassa . Kāle ce, bhikkhave, paṭiggahitaṃ kāle nippakkaṃ kāle saṃsaṭṭhaṃ, taṃ ce paribhuñjeyya, anāpattī’’ti (mahāva. 262).
убад̇иссад̇т̇зрам̣ бана анд̇зваасигаа бужчим̣су ‘‘бханд̇з, саббинаванийд̇авасаани згад̇о бажид̇ваа ниб̣б̣аддид̇аани вадданд̇и, на вадданд̇ий’’д̇и? ‘‘на вадданд̇и, аавусо’’д̇и. т̇зро гирзд̇т̇а баггад̇злагасадз вияа гуггужжааяад̇и. д̇ад̇о нам̣ уд̇д̇ари бужчим̣су ‘‘бханд̇з, наванийд̇з д̣̇ад̇хиг̇ул̣игаа ваа д̇аггаб̣инд̣̇у ваа ход̇и, зд̇ам̣ ваддад̇ий’’д̇и? ‘‘зд̇амби, аавусо, на ваддад̇ий’’д̇и. д̇ад̇о нам̣ аахам̣су ‘‘бханд̇з, згад̇о бажид̇ваа згад̇о сам̣садтаани д̇зж̇аванд̇аани хонд̇и, рог̇ам̣ ниг̇г̇ан̣ханд̇ий’’д̇и. ‘‘саад̇хаавусо’’д̇и т̇зро самбадижчи. махаасумад̇т̇зро банааха ‘‘габбияамам̣савасаава саамисабарибхог̇з ваддад̇и, ид̇араа нираамисабарибхог̇з ваддад̇ий’’д̇и. махаабад̣̇умад̇т̇зро бана ‘‘ид̣̇ам̣ ги’’нд̇и бадигкибид̇ваа ‘‘нану ваад̇ааб̣аад̇хигаа бхигкуу бан̃жамуулагасааваяааг̇уяам̣ ажчасуугарад̇злаад̣̇ийни багкибид̇ваа яааг̇ум̣ биванд̇и, саа д̇зж̇уссад̣̇ад̇д̇аа рог̇ам̣ ниг̇г̇ан̣хаад̇ий’’д̇и вад̇ваа ‘‘ваддад̇ий’’д̇и ааха.
Upatissattheraṃ pana antevāsikā pucchiṃsu ‘‘bhante, sappinavanītavasāni ekato pacitvā nibbaṭṭitāni vaṭṭanti, na vaṭṭantī’’ti? ‘‘Na vaṭṭanti, āvuso’’ti. Thero kirettha pakkatelakasaṭe viya kukkuccāyati. Tato naṃ uttari pucchiṃsu ‘‘bhante, navanīte dadhiguḷikā vā takkabindu vā hoti, etaṃ vaṭṭatī’’ti? ‘‘Etampi, āvuso, na vaṭṭatī’’ti. Tato naṃ āhaṃsu ‘‘bhante, ekato pacitvā ekato saṃsaṭṭhāni tejavantāni honti, rogaṃ niggaṇhantī’’ti. ‘‘Sādhāvuso’’ti thero sampaṭicchi. Mahāsumatthero panāha ‘‘kappiyamaṃsavasāva sāmisaparibhoge vaṭṭati, itarā nirāmisaparibhoge vaṭṭatī’’ti. Mahāpadumatthero pana ‘‘idaṃ ki’’nti paṭikkhipitvā ‘‘nanu vātābādhikā bhikkhū pañcamūlakasāvayāguyaṃ acchasūkaratelādīni pakkhipitvā yāguṃ pivanti, sā tejussadattā rogaṃ niggaṇhātī’’ti vatvā ‘‘vaṭṭatī’’ti āha.
97. мад̇ху наама мад̇хугарийхи мад̇хумагкигаахи куд̣̇д̣̇агамагкигаахи бхамарамагкигаахи жа гад̇ам̣ мад̇ху. д̇ам̣ бурзбхад̇д̇ам̣ бадиг̇г̇ахид̇ам̣ бурзбхад̇д̇ам̣ саамисабарибхог̇амби ваддад̇и, бажчаабхад̇д̇ад̇о бадтааяа сад̇д̇аахам̣ нираамисабарибхог̇амзва ваддад̇и, сад̇д̇аахаад̇иггамз ниссаг̇г̇ияам̣. сажз силзсасад̣̇исам̣ махаамад̇хум̣ кан̣д̣ам̣ гад̇ваа табид̇ам̣, ид̇арам̣ ваа наанаабхааж̇анзсу, вад̇т̇уг̇ан̣анааяа ниссаг̇г̇ияаани. сажз згамзва кан̣д̣ам̣, згабхааж̇анз ваа ид̇арам̣, згамзва ниссаг̇г̇ияам̣. уг̇г̇ахид̇агам̣ вуд̇д̇анаязнзва взд̣̇ид̇аб̣б̣ам̣, арумагканаад̣̇ийсу убанзд̇аб̣б̣ам̣. мад̇хубадалам̣ ваа мад̇хусид̇т̇агам̣ ваа сажз мад̇хунаа амагкид̇ам̣ барисуд̣̇д̇хам̣, яааваж̇ийвигам̣, мад̇хумагкид̇ам̣ бана мад̇хуг̇ад̇игамзва. жийригаа наама сабагкаа д̣̇ийгхамагкигаа д̇умб̣ал̣анаамигаа жа адтибагкигаа гаал̣амахаабхамараа хонд̇и, д̇зсам̣ аасаязсу нияяаасасад̣̇исам̣ мад̇ху ход̇и, д̇ам̣ яааваж̇ийвигам̣.
97.Madhu nāma madhukarīhi madhumakkhikāhi khuddakamakkhikāhi bhamaramakkhikāhi ca kataṃ madhu. Taṃ purebhattaṃ paṭiggahitaṃ purebhattaṃ sāmisaparibhogampi vaṭṭati, pacchābhattato paṭṭhāya sattāhaṃ nirāmisaparibhogameva vaṭṭati, sattāhātikkame nissaggiyaṃ. Sace silesasadisaṃ mahāmadhuṃ khaṇḍaṃ katvā ṭhapitaṃ, itaraṃ vā nānābhājanesu, vatthugaṇanāya nissaggiyāni. Sace ekameva khaṇḍaṃ, ekabhājane vā itaraṃ, ekameva nissaggiyaṃ. Uggahitakaṃ vuttanayeneva veditabbaṃ, arumakkhanādīsu upanetabbaṃ. Madhupaṭalaṃ vā madhusitthakaṃ vā sace madhunā amakkhitaṃ parisuddhaṃ, yāvajīvikaṃ, madhumakkhitaṃ pana madhugatikameva. Cīrikā nāma sapakkhā dīghamakkhikā tumbaḷanāmikā ca aṭṭhipakkhikā kāḷamahābhamarā honti, tesaṃ āsayesu niyyāsasadisaṃ madhu hoti, taṃ yāvajīvikaṃ.
98. паан̣ид̇ам̣ наама ужчурасам̣ убаад̣̇ааяа абаггаа ваа авад̇т̇угабаггаа ваа саб̣б̣ааби авад̇т̇угаа ужчувигад̇и. д̇ам̣ паан̣ид̇ам̣ бурзбхад̇д̇ам̣ бадиг̇г̇ахид̇ам̣ бурзбхад̇д̇ам̣ саамисамби ваддад̇и, бажчаабхад̇д̇ад̇о бадтааяа сад̇д̇аахам̣ нираамисамзва ваддад̇и, сад̇д̇аахаад̇иггамз вад̇т̇уг̇ан̣анааяа ниссаг̇г̇ияам̣. б̣ахуу бин̣д̣аа жун̣н̣з гад̇ваа згабхааж̇анз багкид̇д̇аа хонд̇и гханасаннивзсаа, згамзва ниссаг̇г̇ияам̣. уг̇г̇ахид̇агам̣ вуд̇д̇анаязнзва взд̣̇ид̇аб̣б̣ам̣, гхарад̇хуубанаад̣̇ийсу убанзд̇аб̣б̣ам̣. бурзбхад̇д̇ам̣ бадиг̇г̇ахид̇зна абариссаавид̇аужчурасзна гад̇апаан̣ид̇ам̣ сажз анубасамбаннзна гад̇ам̣, саамисамби ваддад̇и, саяам̣гад̇ам̣ нираамисамзва ваддад̇и, бажчаабхад̇д̇ад̇о бадтааяа бана савад̇т̇угабадиг̇г̇ахид̇ад̇д̇аа анаж̇жхохаран̣ийяам̣, сад̇д̇аахаад̇иггамзби анаабад̇д̇и. бажчаабхад̇д̇ам̣ абариссаавид̇абадиг̇г̇ахид̇зна гад̇амби анаж̇жхохаран̣ийяамзва, сад̇д̇аахаад̇иггамзби анаабад̇д̇и. зса наяо ужчум̣ бадиг̇г̇ахзд̇ваа гад̇апаан̣ид̇зби. бурзбхад̇д̇ам̣ бана бариссаавид̇абадиг̇г̇ахид̇зна гад̇ам̣ сажз анубасамбаннзна гад̇ам̣, бурзбхад̇д̇ам̣ саамисамби ваддад̇и, бажчаабхад̇д̇ад̇о бадтааяа сад̇д̇аахам̣ нираамисамзва. саяам̣гад̇ам̣ бурзбхад̇д̇амби нираамисамзва, бажчаабхад̇д̇ам̣ бариссаавид̇абадиг̇г̇ахид̇зна гад̇ам̣ бана нираамисамзва сад̇д̇аахам̣ ваддад̇и. уг̇г̇ахид̇агад̇ам̣ вуд̇д̇анаяамзва. ‘‘жхаамаужчупаан̣ид̇ам̣ ваа годдид̇аужчупаан̣ид̇ам̣ ваа бурзбхад̇д̇амзва ваддад̇ий’’д̇и махааадтагат̇ааяам̣ вуд̇д̇ам̣. махаабажжарияам̣ бана ‘‘зд̇ам̣ савад̇т̇угабаггам̣ ваддад̇и, но ваддад̇ий’’д̇и бужчам̣ гад̇ваа ‘‘ужчупаан̣ид̇ам̣ бажчаабхад̇д̇ам̣ но вадданагам̣ наама над̇т̇ий’’д̇и вуд̇д̇ам̣, д̇ам̣ яуд̇д̇ам̣. сийд̇од̣̇агзна гад̇ам̣ мад̇хугабубпапаан̣ид̇ам̣ бурзбхад̇д̇ам̣ саамисамби ваддад̇и, бажчаабхад̇д̇ад̇о бадтааяа сад̇д̇аахам̣ нираамисамзва ваддад̇и, сад̇д̇аахаад̇иггамз вад̇т̇уг̇ан̣анааяа д̣̇уггадам̣, кийрам̣ багкибид̇ваа гад̇ам̣ мад̇хугапаан̣ид̇ам̣ яаавагаалигам̣. кан̣д̣асагкарам̣ бана кийраж̇аллигам̣ абанзд̇ваа сод̇хзнд̇и, д̇асмаа ваддад̇и.
98.Phāṇitaṃ nāma ucchurasaṃ upādāya apakkā vā avatthukapakkā vā sabbāpi avatthukā ucchuvikati. Taṃ phāṇitaṃ purebhattaṃ paṭiggahitaṃ purebhattaṃ sāmisampi vaṭṭati, pacchābhattato paṭṭhāya sattāhaṃ nirāmisameva vaṭṭati, sattāhātikkame vatthugaṇanāya nissaggiyaṃ. Bahū piṇḍā cuṇṇe katvā ekabhājane pakkhittā honti ghanasannivesā, ekameva nissaggiyaṃ. Uggahitakaṃ vuttanayeneva veditabbaṃ, gharadhūpanādīsu upanetabbaṃ. Purebhattaṃ paṭiggahitena aparissāvitaucchurasena kataphāṇitaṃ sace anupasampannena kataṃ, sāmisampi vaṭṭati, sayaṃkataṃ nirāmisameva vaṭṭati, pacchābhattato paṭṭhāya pana savatthukapaṭiggahitattā anajjhoharaṇīyaṃ, sattāhātikkamepi anāpatti. Pacchābhattaṃ aparissāvitapaṭiggahitena katampi anajjhoharaṇīyameva, sattāhātikkamepi anāpatti. Esa nayo ucchuṃ paṭiggahetvā kataphāṇitepi. Purebhattaṃ pana parissāvitapaṭiggahitena kataṃ sace anupasampannena kataṃ, purebhattaṃ sāmisampi vaṭṭati, pacchābhattato paṭṭhāya sattāhaṃ nirāmisameva. Sayaṃkataṃ purebhattampi nirāmisameva, pacchābhattaṃ parissāvitapaṭiggahitena kataṃ pana nirāmisameva sattāhaṃ vaṭṭati. Uggahitakataṃ vuttanayameva. ‘‘Jhāmaucchuphāṇitaṃ vā koṭṭitaucchuphāṇitaṃ vā purebhattameva vaṭṭatī’’ti mahāaṭṭhakathāyaṃ vuttaṃ. Mahāpaccariyaṃ pana ‘‘etaṃ savatthukapakkaṃ vaṭṭati, no vaṭṭatī’’ti pucchaṃ katvā ‘‘ucchuphāṇitaṃ pacchābhattaṃ no vaṭṭanakaṃ nāma natthī’’ti vuttaṃ, taṃ yuttaṃ. Sītodakena kataṃ madhukapupphaphāṇitaṃ purebhattaṃ sāmisampi vaṭṭati, pacchābhattato paṭṭhāya sattāhaṃ nirāmisameva vaṭṭati, sattāhātikkame vatthugaṇanāya dukkaṭaṃ, khīraṃ pakkhipitvā kataṃ madhukaphāṇitaṃ yāvakālikaṃ. Khaṇḍasakkharaṃ pana khīrajallikaṃ apanetvā sodhenti, tasmā vaṭṭati.
99. мад̇хугабубпам̣ бана бурзбхад̇д̇амби аллам̣ ваддад̇и. бхаж̇ж̇ид̇амби ваддад̇и, бхаж̇ж̇ид̇ваа д̇илаад̣̇ийхи миссам̣ ваа амиссам̣ ваа гад̇ваа годдид̇ам̣ ваддад̇и. яад̣̇и бана д̇ам̣ г̇ахзд̇ваа мзраяад̇т̇ааяа яож̇знд̇и, яож̇ид̇ам̣ б̣ийж̇ад̇о бадтааяа на ваддад̇и. гад̣̇алийкаж̇ж̇уурийамб̣алаб̣уж̇абанасажин̃жаад̣̇ийнам̣ саб̣б̣зсам̣ яаавагаалигапалаанам̣ паан̣ид̇ам̣ яаавагаалигамзва. марижабаггзхи паан̣ид̇ам̣ гаронд̇и, д̇ам̣ яааваж̇ийвигам̣. звам̣ яат̇аавуд̇д̇аани сад̇д̇аахагаалигаани саббиаад̣̇ийни бан̃жа ‘‘ануж̇аанаами, бхигкавз, бан̃жа бхзсаж̇ж̇ааний’’д̇и (махаава. 260) бхзсаж̇ж̇анаамзна анун̃н̃аад̇ад̇д̇аа бхзсаж̇ж̇агижжам̣ гаронд̇у ваа маа ваа, аахаарад̇т̇ам̣ парид̇ум̣ самад̇т̇ааниби бадиг̇г̇ахзд̇ваа д̇ад̣̇ахубурзбхад̇д̇ам̣ яат̇аасукам̣, бажчаабхад̇д̇ад̇о бадтааяа сад̇и бажжаяз вуд̇д̇анаязна сад̇д̇аахам̣ барибхун̃ж̇ид̇аб̣б̣аани, сад̇д̇аахаад̇иггамз бана бхзсаж̇ж̇асигкаабад̣̇зна ниссаг̇г̇ияам̣ баажид̇д̇ияам̣. сажзби саасабамад̇д̇ам̣ ход̇и, сагим̣ ваа ан̇г̇улияаа г̇ахзд̇ваа ж̇ивхааяа сааяанамад̇д̇ам̣, ниссаж̇ж̇ид̇аб̣б̣амзва баажид̇д̇ияан̃жа д̣̇зсзд̇аб̣б̣ам̣. ниссадтам̣ бадилабхид̇ваа на аж̇жхохарид̇аб̣б̣ам̣, на гааяигзна барибхог̇зна барибхун̃ж̇ид̇аб̣б̣ам̣ , гааяо ваа гааяз ару ваа на магкзд̇аб̣б̣ам̣. д̇зхи магкид̇аани гаасаавагад̇д̇араяадтиубааханабаад̣̇агаталигаман̃жабийтаад̣̇ийниби абарибхог̇аани. ‘‘д̣̇ваараваад̇абаанагаваадзсуби хад̇т̇зна г̇ахан̣адтаанам̣ на магкзд̇аб̣б̣а’’нд̇и махаабажжарияам̣ вуд̇д̇ам̣. ‘‘гасаавз бана багкибид̇ваа д̣̇ваараваад̇абаанагаваадаани магкзд̇аб̣б̣ааний’’д̇и махааадтагат̇ааяам̣ вуд̇д̇ам̣. бад̣̇ийбз ваа гаал̣аван̣н̣з ваа убанзд̇ум̣ ваддад̇и. ан̃н̃зна бана бхигкунаа гааяигзна барибхог̇зна барибхун̃ж̇ид̇аб̣б̣ам̣, на аж̇жхохарид̇аб̣б̣ам̣. ‘‘анаабад̇д̇и анд̇осад̇д̇аахам̣ ад̇хидтзд̇ий’’д̇и (баараа. 625) важанад̇о бана сад̇д̇аахаб̣бханд̇арз саббин̃жа д̇злан̃жа васан̃жа муд̣̇д̇хани д̇злам̣ ваа аб̣бхан̃ж̇анам̣ ваа мад̇хум̣ арумагканам̣ паан̣ид̇ам̣ гхарад̇хуубанам̣ ад̇хидтзд̇и анаабад̇д̇и, нзва ниссаг̇г̇ияам̣ ход̇и. сажз ад̇хидтид̇ад̇злам̣ анад̇хидтид̇ад̇злабхааж̇анз аагирид̇угаамо ход̇и, бхааж̇анз жз сукумам̣ чид̣̇д̣̇ам̣, бавидтам̣ бавидтам̣ д̇злам̣ бураан̣ад̇злзна аж̇жход̇т̇арийяад̇и, буна ад̇хидтаад̇аб̣б̣ам̣. ат̇а махаамукам̣ ход̇и, сахасаава б̣аху д̇злам̣ бависид̇ваа бураан̣ад̇злам̣ аж̇жход̇т̇арад̇и, буна ад̇хидтаанагижжам̣ над̇т̇и. ад̇хидтид̇аг̇ад̇игамзва хи д̇ам̣ ход̇и. зд̇зна наязна ад̇хидтид̇ад̇злабхааж̇анз анад̇хидтид̇ад̇злааагиран̣амби взд̣̇ид̇аб̣б̣ам̣.
99. Madhukapupphaṃ pana purebhattampi allaṃ vaṭṭati. Bhajjitampi vaṭṭati, bhajjitvā tilādīhi missaṃ vā amissaṃ vā katvā koṭṭitaṃ vaṭṭati. Yadi pana taṃ gahetvā merayatthāya yojenti, yojitaṃ bījato paṭṭhāya na vaṭṭati. Kadalīkhajjūrīambalabujapanasaciñcādīnaṃ sabbesaṃ yāvakālikaphalānaṃ phāṇitaṃ yāvakālikameva. Maricapakkehi phāṇitaṃ karonti, taṃ yāvajīvikaṃ. Evaṃ yathāvuttāni sattāhakālikāni sappiādīni pañca ‘‘anujānāmi, bhikkhave, pañca bhesajjānī’’ti (mahāva. 260) bhesajjanāmena anuññātattā bhesajjakiccaṃ karontu vā mā vā, āhāratthaṃ pharituṃ samatthānipi paṭiggahetvā tadahupurebhattaṃ yathāsukhaṃ, pacchābhattato paṭṭhāya sati paccaye vuttanayena sattāhaṃ paribhuñjitabbāni, sattāhātikkame pana bhesajjasikkhāpadena nissaggiyaṃ pācittiyaṃ. Sacepi sāsapamattaṃ hoti, sakiṃ vā aṅguliyā gahetvā jivhāya sāyanamattaṃ, nissajjitabbameva pācittiyañca desetabbaṃ. Nissaṭṭhaṃ paṭilabhitvā na ajjhoharitabbaṃ, na kāyikena paribhogena paribhuñjitabbaṃ , kāyo vā kāye aru vā na makkhetabbaṃ. Tehi makkhitāni kāsāvakattarayaṭṭhiupāhanapādakaṭhalikamañcapīṭhādīnipi aparibhogāni. ‘‘Dvāravātapānakavāṭesupi hatthena gahaṇaṭṭhānaṃ na makkhetabba’’nti mahāpaccariyaṃ vuttaṃ. ‘‘Kasāve pana pakkhipitvā dvāravātapānakavāṭāni makkhetabbānī’’ti mahāaṭṭhakathāyaṃ vuttaṃ. Padīpe vā kāḷavaṇṇe vā upanetuṃ vaṭṭati. Aññena pana bhikkhunā kāyikena paribhogena paribhuñjitabbaṃ, na ajjhoharitabbaṃ. ‘‘Anāpatti antosattāhaṃ adhiṭṭhetī’’ti (pārā. 625) vacanato pana sattāhabbhantare sappiñca telañca vasañca muddhani telaṃ vā abbhañjanaṃ vā madhuṃ arumakkhanaṃ phāṇitaṃ gharadhūpanaṃ adhiṭṭheti anāpatti, neva nissaggiyaṃ hoti. Sace adhiṭṭhitatelaṃ anadhiṭṭhitatelabhājane ākiritukāmo hoti, bhājane ce sukhumaṃ chiddaṃ, paviṭṭhaṃ paviṭṭhaṃ telaṃ purāṇatelena ajjhottharīyati, puna adhiṭṭhātabbaṃ. Atha mahāmukhaṃ hoti, sahasāva bahu telaṃ pavisitvā purāṇatelaṃ ajjhottharati, puna adhiṭṭhānakiccaṃ natthi. Adhiṭṭhitagatikameva hi taṃ hoti. Etena nayena adhiṭṭhitatelabhājane anadhiṭṭhitatelaākiraṇampi veditabbaṃ.
сажз бана сад̇д̇аахаад̇игганд̇ам̣ анубасамбаннасса барижжаж̇ид̇ваа д̣̇зд̇и, буна д̇зна ад̇д̇ано санд̇агам̣ гад̇ваа д̣̇иннам̣ барибхун̃ж̇ид̇ум̣ ваддад̇и. сажз хи со абхисан̇карид̇ваа ваа анабхисан̇карид̇ваа ваа д̇асса бхигкуно над̇т̇угаммад̇т̇ам̣ д̣̇ад̣̇зяяа, г̇ахзд̇ваа над̇т̇угаммам̣ гаад̇аб̣б̣ам̣. сажз б̣аало ход̇и, д̣̇аад̇ум̣ на ж̇аанаад̇и, ан̃н̃зна бхигкунаа вад̇д̇аб̣б̣о ‘‘ад̇т̇и д̇з сааман̣зра д̇зла’’нд̇и? ‘‘аама, бханд̇з, ад̇т̇ий’’д̇и. аахара т̇зрасса бхзсаж̇ж̇ам̣ гариссаамаад̇и. звамби ваддад̇и. сажз д̣̇виннам̣ санд̇агам̣ згзна бадиг̇г̇ахид̇ам̣ авибхад̇д̇ам̣ ход̇и, сад̇д̇аахаад̇иггамз д̣̇виннамби анаабад̇д̇и, барибхун̃ж̇ид̇ум̣ бана на ваддад̇и. сажз язна бадиг̇г̇ахид̇ам̣, со ид̇арам̣ бхан̣ад̇и ‘‘аавусо, имам̣ д̇злам̣ сад̇д̇аахамад̇д̇ам̣ барибхун̃ж̇ид̇ум̣ ваддад̇ий’’д̇и, со жа барибхог̇ам̣ на гарод̇и, гасса аабад̇д̇и? на гассажи. гасмаа? язна бадиг̇г̇ахид̇ам̣, д̇зна виссаж̇ж̇ид̇ад̇д̇аа, ид̇арасса аббадиг̇г̇ахид̇ад̇д̇аа.
Sace pana sattāhātikkantaṃ anupasampannassa pariccajitvā deti, puna tena attano santakaṃ katvā dinnaṃ paribhuñjituṃ vaṭṭati. Sace hi so abhisaṅkharitvā vā anabhisaṅkharitvā vā tassa bhikkhuno natthukammatthaṃ dadeyya, gahetvā natthukammaṃ kātabbaṃ. Sace bālo hoti, dātuṃ na jānāti, aññena bhikkhunā vattabbo ‘‘atthi te sāmaṇera tela’’nti? ‘‘Āma, bhante, atthī’’ti. Āhara therassa bhesajjaṃ karissāmāti. Evampi vaṭṭati. Sace dvinnaṃ santakaṃ ekena paṭiggahitaṃ avibhattaṃ hoti, sattāhātikkame dvinnampi anāpatti, paribhuñjituṃ pana na vaṭṭati. Sace yena paṭiggahitaṃ, so itaraṃ bhaṇati ‘‘āvuso, imaṃ telaṃ sattāhamattaṃ paribhuñjituṃ vaṭṭatī’’ti, so ca paribhogaṃ na karoti, kassa āpatti? Na kassaci. Kasmā? Yena paṭiggahitaṃ, tena vissajjitattā, itarassa appaṭiggahitattā.
100. имзсу (махаава. адта. 305) бана жад̇уусу гаалигзсу яаавагаалигам̣ яаамагаалиганд̇и ид̣̇амзва д̣̇ваяам̣ анд̇овуд̇т̇аган̃жзва саннид̇хигаараган̃жа ход̇и, сад̇д̇аахагаалиган̃жа яааваж̇ийвиган̃жа агаббияагудияам̣ нигкибид̇умби ваддад̇и, саннид̇химби на ж̇анзд̇и. яаавагаалигам̣ бана ад̇д̇анаа сад̣̇д̇хим̣ самбхиннарасаани д̇ийн̣иби яаамагаалигаад̣̇ийни ад̇д̇ано сабхаавам̣ убанзд̇и. яаамагаалигам̣ д̣̇взби сад̇д̇аахагаалигаад̣̇ийни ад̇д̇ано сабхаавам̣ убанзд̇и, сад̇д̇аахагаалигамби ад̇д̇анаа сад̣̇д̇хим̣ сам̣садтам̣ яааваж̇ийвигам̣ ад̇д̇ано сабхааван̃н̃зва убанзд̇и, д̇асмаа яаавагаалигзна д̇ад̣̇ахубадиг̇г̇ахид̇зна сад̣̇д̇хим̣ сам̣садтам̣ самбхиннарасам̣ сзсагаалигад̇д̇аяам̣ д̇ад̣̇ахубурзбхад̇д̇амзва ваддад̇и. яаамагаалигзна сам̣садтам̣ бана ид̇арад̣̇ваяам̣ д̇ад̣̇ахубадиг̇г̇ахид̇ам̣ яаава арун̣уг̇г̇аманаа ваддад̇и. сад̇д̇аахагаалигзна бана д̇ад̣̇ахубадиг̇г̇ахид̇зна сад̣̇д̇хим̣ сам̣садтам̣ д̇ад̣̇ахубадиг̇г̇ахид̇ам̣ ваа бурзбадиг̇г̇ахид̇ам̣ ваа яааваж̇ийвигам̣ сад̇д̇аахам̣ габбад̇и. д̣̇вийхабадиг̇г̇ахид̇зна чаахам̣. д̇ийхабадиг̇г̇ахид̇зна бан̃жаахам̣…бз… сад̇д̇аахабадиг̇г̇ахид̇зна д̇ад̣̇ахзва габбад̇ийд̇и взд̣̇ид̇аб̣б̣ам̣. гаалаяаамасад̇д̇аахаад̇иггамзсу жзд̇т̇а вигаалабхож̇анасаннид̇хибхзсаж̇ж̇асигкаабад̣̇аанам̣ васзна аабад̇д̇ияо взд̣̇ид̇аб̣б̣аа.
100. Imesu (mahāva. aṭṭha. 305) pana catūsu kālikesu yāvakālikaṃ yāmakālikanti idameva dvayaṃ antovutthakañceva sannidhikārakañca hoti, sattāhakālikañca yāvajīvikañca akappiyakuṭiyaṃ nikkhipitumpi vaṭṭati, sannidhimpi na janeti. Yāvakālikaṃ pana attanā saddhiṃ sambhinnarasāni tīṇipi yāmakālikādīni attano sabhāvaṃ upaneti. Yāmakālikaṃ dvepi sattāhakālikādīni attano sabhāvaṃ upaneti, sattāhakālikampi attanā saddhiṃ saṃsaṭṭhaṃ yāvajīvikaṃ attano sabhāvaññeva upaneti, tasmā yāvakālikena tadahupaṭiggahitena saddhiṃ saṃsaṭṭhaṃ sambhinnarasaṃ sesakālikattayaṃ tadahupurebhattameva vaṭṭati. Yāmakālikena saṃsaṭṭhaṃ pana itaradvayaṃ tadahupaṭiggahitaṃ yāva aruṇuggamanā vaṭṭati. Sattāhakālikena pana tadahupaṭiggahitena saddhiṃ saṃsaṭṭhaṃ tadahupaṭiggahitaṃ vā purepaṭiggahitaṃ vā yāvajīvikaṃ sattāhaṃ kappati. Dvīhapaṭiggahitena chāhaṃ. Tīhapaṭiggahitena pañcāhaṃ…pe… sattāhapaṭiggahitena tadaheva kappatīti veditabbaṃ. Kālayāmasattāhātikkamesu cettha vikālabhojanasannidhibhesajjasikkhāpadānaṃ vasena āpattiyo veditabbā.
сажз бана згад̇о бадиг̇г̇ахид̇ааниби жад̇д̇аари гаалигаани самбхиннарасаани на хонд̇и, д̇асса д̇ассзва гааласса васзна барибхун̃ж̇ид̇ум̣ вадданд̇и. сажз хи чаллимби анабанзд̇ваа сагалзнзва наал̣игзрапалзна сад̣̇д̇хим̣ амб̣абаанаад̣̇ибаанагам̣ бадиг̇г̇ахид̇ам̣ ход̇и, наал̣игзрам̣ абанзд̇ваа д̇ам̣ вигаалзби габбад̇и. убари саббибин̣д̣ам̣ табзд̇ваа сийд̇алабааяаасам̣ д̣̇знд̇и, яам̣ бааяаасзна асам̣садтам̣ сабби, д̇ам̣ абанзд̇ваа сад̇д̇аахам̣ барибхун̃ж̇ид̇ум̣ ваддад̇и. т̇ад̣̇д̇хамад̇хупаан̣ид̇аад̣̇ийсуби зсзва наяо. д̇агголаж̇аад̇ипалаад̣̇ийхи алан̇гарид̇ваа бин̣д̣абаад̇ам̣ д̣̇знд̇и, д̇аани уд̣̇д̇харид̇ваа д̇ховид̇ваа яааваж̇ийвам̣ барибхун̃ж̇ид̇аб̣б̣аани. яааг̇уяам̣ багкибид̇ваа д̣̇иннасин̇г̇ивзраад̣̇ийсуби д̇злаад̣̇ийсу багкибид̇ваа д̣̇инналадтимад̇хугаад̣̇ийсуби зсзва наяо. звам̣ яам̣ яам̣ асамбхиннарасам̣ ход̇и, д̇ам̣ д̇ам̣ згад̇о бадиг̇г̇ахид̇амби яат̇аа суд̣̇д̇хам̣ ход̇и, д̇ат̇аа д̇ховид̇ваа д̇ажчзд̇ваа ваа д̇асса д̇асса гааласса васзна барибхун̃ж̇ид̇ум̣ ваддад̇и. сажз самбхиннарасам̣ ход̇и сам̣садтам̣, на ваддад̇и.
Sace pana ekato paṭiggahitānipi cattāri kālikāni sambhinnarasāni na honti, tassa tasseva kālassa vasena paribhuñjituṃ vaṭṭanti. Sace hi challimpi anapanetvā sakaleneva nāḷikeraphalena saddhiṃ ambapānādipānakaṃ paṭiggahitaṃ hoti, nāḷikeraṃ apanetvā taṃ vikālepi kappati. Upari sappipiṇḍaṃ ṭhapetvā sītalapāyāsaṃ denti, yaṃ pāyāsena asaṃsaṭṭhaṃ sappi, taṃ apanetvā sattāhaṃ paribhuñjituṃ vaṭṭati. Thaddhamadhuphāṇitādīsupi eseva nayo. Takkolajātiphalādīhi alaṅkaritvā piṇḍapātaṃ denti, tāni uddharitvā dhovitvā yāvajīvaṃ paribhuñjitabbāni. Yāguyaṃ pakkhipitvā dinnasiṅgiverādīsupi telādīsu pakkhipitvā dinnalaṭṭhimadhukādīsupi eseva nayo. Evaṃ yaṃ yaṃ asambhinnarasaṃ hoti, taṃ taṃ ekato paṭiggahitampi yathā suddhaṃ hoti, tathā dhovitvā tacchetvā vā tassa tassa kālassa vasena paribhuñjituṃ vaṭṭati. Sace sambhinnarasaṃ hoti saṃsaṭṭhaṃ, na vaṭṭati.
ид̇и баал̣имуд̇д̇агавинаяавинижчаяасан̇г̇ахз
Iti pāḷimuttakavinayavinicchayasaṅgahe
гаалигавинижчаяагат̇аа самад̇д̇аа.
Kālikavinicchayakathā samattā.
