| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. கலிங்க³ரஸுத்தங்
8. Kaliṅgarasuttaṃ
230. ஏவங் மே ஸுதங் – ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். தத்ர கோ² ப⁴க³வா பி⁴க்கூ² ஆமந்தேஸி ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
230. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Tatra kho bhagavā bhikkhū āmantesi ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘கலிங்க³ரூபதா⁴னா , பி⁴க்க²வே, ஏதரஹி லிச்ச²வீ விஹரந்தி அப்பமத்தா ஆதாபினோ உபாஸனஸ்மிங். தேஸங் ராஜா மாக³தோ⁴ அஜாதஸத்து வேதே³ஹிபுத்தோ ந லப⁴தி ஓதாரங் ந லப⁴தி ஆரம்மணங். ப⁴விஸ்ஸந்தி, பி⁴க்க²வே , அனாக³தமத்³தா⁴னங் லிச்ச²வீ ஸுகு²மாலா 1 முது³தலுனஹத்த²பாதா³ 2 தே முது³காஸு ஸெய்யாஸு தூலபி³ம்போ³ஹனாஸு 3 யாவஸூரியுக்³க³மனா ஸெய்யங் கப்பிஸ்ஸந்தி. தேஸங் ராஜா மாக³தோ⁴ அஜாதஸத்து வேதே³ஹிபுத்தோ லச்ச²தி ஓதாரங் லச்ச²தி ஆரம்மணங்.
‘‘Kaliṅgarūpadhānā , bhikkhave, etarahi licchavī viharanti appamattā ātāpino upāsanasmiṃ. Tesaṃ rājā māgadho ajātasattu vedehiputto na labhati otāraṃ na labhati ārammaṇaṃ. Bhavissanti, bhikkhave , anāgatamaddhānaṃ licchavī sukhumālā 4 mudutalunahatthapādā 5 te mudukāsu seyyāsu tūlabimbohanāsu 6 yāvasūriyuggamanā seyyaṃ kappissanti. Tesaṃ rājā māgadho ajātasattu vedehiputto lacchati otāraṃ lacchati ārammaṇaṃ.
‘‘கலிங்க³ரூபதா⁴னா, பி⁴க்க²வே, ஏதரஹி பி⁴க்கூ² விஹரந்தி அப்பமத்தா ஆதாபினோ பதா⁴னஸ்மிங். தேஸங் மாரோ பாபிமா ந லப⁴தி ஓதாரங் ந லப⁴தி ஆரம்மணங். ப⁴விஸ்ஸந்தி, பி⁴க்க²வே, அனாக³தமத்³தா⁴னங் பி⁴க்கூ² ஸுகு²மா முது³தலுனஹத்த²பாதா³. தே முது³காஸு ஸெய்யாஸு தூலபி³ம்போ³ஹனாஸு யாவஸூரியுக்³க³மனா ஸெய்யங் கப்பிஸ்ஸந்தி. தேஸங் மாரோ பாபிமா லச்ச²தி ஓதாரங் லச்ச²தி ஆரம்மணங். தஸ்மாதிஹ, பி⁴க்க²வே, ஏவங் ஸிக்கி²தப்³ப³ங் – ‘கலிங்க³ரூபதா⁴னா விஹரிஸ்ஸாம அப்பமத்தா ஆதாபினோ பதா⁴னஸ்மி’ந்தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. அட்ட²மங்.
‘‘Kaliṅgarūpadhānā, bhikkhave, etarahi bhikkhū viharanti appamattā ātāpino padhānasmiṃ. Tesaṃ māro pāpimā na labhati otāraṃ na labhati ārammaṇaṃ. Bhavissanti, bhikkhave, anāgatamaddhānaṃ bhikkhū sukhumā mudutalunahatthapādā. Te mudukāsu seyyāsu tūlabimbohanāsu yāvasūriyuggamanā seyyaṃ kappissanti. Tesaṃ māro pāpimā lacchati otāraṃ lacchati ārammaṇaṃ. Tasmātiha, bhikkhave, evaṃ sikkhitabbaṃ – ‘kaliṅgarūpadhānā viharissāma appamattā ātāpino padhānasmi’nti. Evañhi vo, bhikkhave, sikkhitabba’’nti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. கலிங்க³ரஸுத்தவண்ணனா • 8. Kaliṅgarasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. கலிங்க³ரஸுத்தவண்ணனா • 8. Kaliṅgarasuttavaṇṇanā
