| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. কলিঙ্গরসুত্তং
8. Kaliṅgarasuttaṃ
২৩০. এৰং মে সুতং – একং সমযং ভগৰা ৰেসালিযং ৰিহরতি মহাৰনে কূটাগারসালাযং। তত্র খো ভগৰা ভিক্খূ আমন্তেসি ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ –
230. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Tatra kho bhagavā bhikkhū āmantesi ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘কলিঙ্গরূপধানা , ভিক্খৰে, এতরহি লিচ্ছৰী ৰিহরন্তি অপ্পমত্তা আতাপিনো উপাসনস্মিং। তেসং রাজা মাগধো অজাতসত্তু ৰেদেহিপুত্তো ন লভতি ওতারং ন লভতি আরম্মণং। ভৰিস্সন্তি, ভিক্খৰে , অনাগতমদ্ধানং লিচ্ছৰী সুখুমালা 1 মুদুতলুনহত্থপাদা 2 তে মুদুকাসু সেয্যাসু তূলবিম্বোহনাসু 3 যাৰসূরিযুগ্গমনা সেয্যং কপ্পিস্সন্তি। তেসং রাজা মাগধো অজাতসত্তু ৰেদেহিপুত্তো লচ্ছতি ওতারং লচ্ছতি আরম্মণং।
‘‘Kaliṅgarūpadhānā , bhikkhave, etarahi licchavī viharanti appamattā ātāpino upāsanasmiṃ. Tesaṃ rājā māgadho ajātasattu vedehiputto na labhati otāraṃ na labhati ārammaṇaṃ. Bhavissanti, bhikkhave , anāgatamaddhānaṃ licchavī sukhumālā 4 mudutalunahatthapādā 5 te mudukāsu seyyāsu tūlabimbohanāsu 6 yāvasūriyuggamanā seyyaṃ kappissanti. Tesaṃ rājā māgadho ajātasattu vedehiputto lacchati otāraṃ lacchati ārammaṇaṃ.
‘‘কলিঙ্গরূপধানা, ভিক্খৰে, এতরহি ভিক্খূ ৰিহরন্তি অপ্পমত্তা আতাপিনো পধানস্মিং। তেসং মারো পাপিমা ন লভতি ওতারং ন লভতি আরম্মণং। ভৰিস্সন্তি, ভিক্খৰে, অনাগতমদ্ধানং ভিক্খূ সুখুমা মুদুতলুনহত্থপাদা। তে মুদুকাসু সেয্যাসু তূলবিম্বোহনাসু যাৰসূরিযুগ্গমনা সেয্যং কপ্পিস্সন্তি। তেসং মারো পাপিমা লচ্ছতি ওতারং লচ্ছতি আরম্মণং। তস্মাতিহ, ভিক্খৰে, এৰং সিক্খিতব্বং – ‘কলিঙ্গরূপধানা ৰিহরিস্সাম অপ্পমত্তা আতাপিনো পধানস্মি’ন্তি। এৰঞ্হি ৰো, ভিক্খৰে, সিক্খিতব্ব’’ন্তি। অট্ঠমং।
‘‘Kaliṅgarūpadhānā, bhikkhave, etarahi bhikkhū viharanti appamattā ātāpino padhānasmiṃ. Tesaṃ māro pāpimā na labhati otāraṃ na labhati ārammaṇaṃ. Bhavissanti, bhikkhave, anāgatamaddhānaṃ bhikkhū sukhumā mudutalunahatthapādā. Te mudukāsu seyyāsu tūlabimbohanāsu yāvasūriyuggamanā seyyaṃ kappissanti. Tesaṃ māro pāpimā lacchati otāraṃ lacchati ārammaṇaṃ. Tasmātiha, bhikkhave, evaṃ sikkhitabbaṃ – ‘kaliṅgarūpadhānā viharissāma appamattā ātāpino padhānasmi’nti. Evañhi vo, bhikkhave, sikkhitabba’’nti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. কলিঙ্গরসুত্তৰণ্ণনা • 8. Kaliṅgarasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. কলিঙ্গরসুত্তৰণ্ণনা • 8. Kaliṅgarasuttavaṇṇanā
