| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. கலிங்க³ரஸுத்தவண்ணனா
8. Kaliṅgarasuttavaṇṇanā
230. அட்ட²மே கலிங்க³ரூபதா⁴னாதி கலிங்க³ரக⁴டிகங் ஸீஸூபதா⁴னஞ்சேவ பாதூ³பதா⁴னஞ்ச கத்வா. அப்பமத்தாதி ஸிப்புக்³க³ஹணே அப்பமத்தா. ஆதாபினோதி உட்டா²னவீரியாதாபேன யுத்தா. உபாஸனஸ்மிந்தி ஸிப்பானங் அபி⁴யோகே³ ஆசரியானஞ்ச பயிருபாஸனே. தே கிர ததா³ பாதோவ உட்டா²ய ஸிப்பஸாலங் க³ச்ச²ந்தி, தத்த² ஸிப்பங் உக்³க³ஹெத்வா ஸஜ்ஜா²யாதீ³ஹி அபி⁴யோக³ங் கத்வா முக²ங் தோ⁴வித்வா யாகு³பானாய க³ச்ச²ந்தி. யாகு³ங் பிவித்வா புன ஸிப்பஸாலங் க³ந்த்வா ஸிப்பங் க³ண்ஹித்வா ஸஜ்ஜா²யங் கரொந்தா பாதராஸாய க³ச்ச²ந்தி. கதபாதராஸா ஸமானா ‘‘மா பமாதே³ன சிரங் நித்³தோ³க்கமனங் அஹோஸீ’’தி க²தி³ரக⁴டிகாஸு ஸீஸே ச பாதே³ ச உபத³ஹித்வா தோ²கங் நிபஜ்ஜித்வா புன ஸிப்பஸாலங் க³ந்த்வா ஸிப்பங் க³ஹெத்வா ஸஜ்ஜா²யந்தி. ஸாயங் ஸஜ்ஜா²யங் கரொந்தா ச கே³ஹங் க³ந்த்வா பு⁴த்தஸாயமாஸா பட²மயாமங் ஸஜ்ஜா²யங் கத்வா ஸயனகாலே ததே²வ கலிங்க³ரங் உபதா⁴னங் கத்வா ஸயந்தி. ஏவங் தே அக்க²ணவேதி⁴னோ வாலவேதி⁴னோ ச அஹேஸுங். இத³ங் ஸந்தா⁴யேதங் வுத்தங்.
230. Aṭṭhame kaliṅgarūpadhānāti kaliṅgaraghaṭikaṃ sīsūpadhānañceva pādūpadhānañca katvā. Appamattāti sippuggahaṇe appamattā. Ātāpinoti uṭṭhānavīriyātāpena yuttā. Upāsanasminti sippānaṃ abhiyoge ācariyānañca payirupāsane. Te kira tadā pātova uṭṭhāya sippasālaṃ gacchanti, tattha sippaṃ uggahetvā sajjhāyādīhi abhiyogaṃ katvā mukhaṃ dhovitvā yāgupānāya gacchanti. Yāguṃ pivitvā puna sippasālaṃ gantvā sippaṃ gaṇhitvā sajjhāyaṃ karontā pātarāsāya gacchanti. Katapātarāsā samānā ‘‘mā pamādena ciraṃ niddokkamanaṃ ahosī’’ti khadiraghaṭikāsu sīse ca pāde ca upadahitvā thokaṃ nipajjitvā puna sippasālaṃ gantvā sippaṃ gahetvā sajjhāyanti. Sāyaṃ sajjhāyaṃ karontā ca gehaṃ gantvā bhuttasāyamāsā paṭhamayāmaṃ sajjhāyaṃ katvā sayanakāle tatheva kaliṅgaraṃ upadhānaṃ katvā sayanti. Evaṃ te akkhaṇavedhino vālavedhino ca ahesuṃ. Idaṃ sandhāyetaṃ vuttaṃ.
ஓதாரந்தி விவரங். ஆரம்மணந்தி பச்சயங். பதா⁴னஸ்மிந்தி பதா⁴னபூ⁴மியங் வீரியங் குருமானா. பட²மபோ³தி⁴யங் கிர பி⁴க்கூ² ப⁴த்தகிச்சங் கத்வாவ கம்மட்டா²னங் மனஸி கரொந்தி. தேஸங் மனஸிகரொந்தானங்யேவ ஸூரியோ அத்த²ங் க³ச்ச²தி. தே ந்ஹாயித்வா புன சங்கமங் ஓதரித்வா பட²மயாமங் சங்கமந்தி. ததோ ‘‘மா சிரங் நித்³தா³யிம்ஹா’’தி ஸரீரத³ரத²வினோத³னத்த²ங் நிபஜ்ஜந்தா கட்ட²க²ண்ட³ங் உபத³ஹித்வா நிபஜ்ஜந்தி, தே புன பச்சி²மயாமே வுட்டா²ய சங்கமங் ஓதரந்தி. தே ஸந்தா⁴ய இத³ங் வுத்தங். அயம்பி தீ³போ திண்ணங் ராஜூனங் காலே ஏகக⁴ண்டி³னிக்³கோ⁴ஸோ ஏகபதா⁴னபூ⁴மி அஹோஸி. நானாமுகே² பஹடக⁴ண்டி³ பிலிச்சி²கோளியங் ஓஸரதி, கல்யாணியங் பஹடக⁴ண்டி³ நாக³தீ³பே ஓஸரதி . ‘‘அயங் பி⁴க்கு² புது²ஜ்ஜனோ, அயங் புது²ஜ்ஜனோ’’தி அங்கு³லிங் பஸாரெத்வா த³ஸ்ஸேதப்³போ³ அஹோஸி. ஏகதி³வஸங் ஸப்³பே³ அரஹந்தோவ அஹேஸுங். தஸ்மாதி யஸ்மா கலிங்க³ரூபதா⁴னானங் மாரோ ஆரம்மணங் ந லப⁴தி, தஸ்மா. அட்ட²மங்.
Otāranti vivaraṃ. Ārammaṇanti paccayaṃ. Padhānasminti padhānabhūmiyaṃ vīriyaṃ kurumānā. Paṭhamabodhiyaṃ kira bhikkhū bhattakiccaṃ katvāva kammaṭṭhānaṃ manasi karonti. Tesaṃ manasikarontānaṃyeva sūriyo atthaṃ gacchati. Te nhāyitvā puna caṅkamaṃ otaritvā paṭhamayāmaṃ caṅkamanti. Tato ‘‘mā ciraṃ niddāyimhā’’ti sarīradarathavinodanatthaṃ nipajjantā kaṭṭhakhaṇḍaṃ upadahitvā nipajjanti, te puna pacchimayāme vuṭṭhāya caṅkamaṃ otaranti. Te sandhāya idaṃ vuttaṃ. Ayampi dīpo tiṇṇaṃ rājūnaṃ kāle ekaghaṇḍinigghoso ekapadhānabhūmi ahosi. Nānāmukhe pahaṭaghaṇḍi pilicchikoḷiyaṃ osarati, kalyāṇiyaṃ pahaṭaghaṇḍi nāgadīpe osarati . ‘‘Ayaṃ bhikkhu puthujjano, ayaṃ puthujjano’’ti aṅguliṃ pasāretvā dassetabbo ahosi. Ekadivasaṃ sabbe arahantova ahesuṃ. Tasmāti yasmā kaliṅgarūpadhānānaṃ māro ārammaṇaṃ na labhati, tasmā. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. கலிங்க³ரஸுத்தங் • 8. Kaliṅgarasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. கலிங்க³ரஸுத்தவண்ணனா • 8. Kaliṅgarasuttavaṇṇanā
