| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৮. কলিঙ্গরসুত্তৰণ্ণনা
8. Kaliṅgarasuttavaṇṇanā
২৩০. কলিঙ্গরং ৰুচ্চতি খুদ্দকদারুখণ্ডং, তং উপধানং এতেসন্তি কলিঙ্গরূপধানা। লিচ্ছৰী পন খদিরদণ্ডং উপধানং কত্ৰা তদা ৰিহরিংসু। তস্মা ৰুত্তং ‘‘খদিরঘটিকাসূ’’তিআদি। পকতিৰিজ্জুসঞ্ঞিতো নত্থি এতেসং খণো ৰিজ্ঝনেতি অক্খণৰেধিনো ততো সীঘতরং ৰিজ্ঝনতো। ‘‘অক্খণ’’ন্তি ৰিজ্জু ৰুচ্চতি ইত্তরখণত্তা। অক্খণোভাসেন লক্খণৰেধকা অক্খণৰেধিনো। অনেকধা ভিন্নস্স ৰালস্স ৰিজ্ঝনেন ৰালৰেধিনো। ৰালেকদেসো হি ইধ ‘‘ৰালো’’তি গহিতো।
230. Kaliṅgaraṃ vuccati khuddakadārukhaṇḍaṃ, taṃ upadhānaṃ etesanti kaliṅgarūpadhānā. Licchavī pana khadiradaṇḍaṃ upadhānaṃ katvā tadā vihariṃsu. Tasmā vuttaṃ ‘‘khadiraghaṭikāsū’’tiādi. Pakativijjusaññito natthi etesaṃ khaṇo vijjhaneti akkhaṇavedhino tato sīghataraṃ vijjhanato. ‘‘Akkhaṇa’’nti vijju vuccati ittarakhaṇattā. Akkhaṇobhāsena lakkhaṇavedhakā akkhaṇavedhino. Anekadhā bhinnassa vālassa vijjhanena vālavedhino. Vālekadeso hi idha ‘‘vālo’’ti gahito.
বহুদেৰ দিৰসভাগং পধানানুযোগতো উপ্পন্নদরথপরিস্সমৰিনোদনত্থং ন্হাযিত্ৰা। তে সন্ধাযাতি তে তথারূপে পধানকম্মিকভিক্খূ সন্ধায। ইদং ইদানি ৰুচ্চমানং অত্থজাতং ৰুত্তং পোরাণট্ঠকথাযং। অযম্পি দীপোতি তম্বপণ্ণিদীপমাহ। পধানানুযুঞ্জনৰেলায নিৰেদনৰসেন তত্থ তত্থ একজ্ঝং পহতঘণ্ডিনিগ্ঘোসেনেৰ একঘণ্ডিনিগ্ঘোসো, তত্থ তত্থ পণ্ণসালাদীসু ৰসন্তানং ভিক্খূনং ৰসেন একপধানভূতো। নানামুখোতি অনুরাধপুরস্স পচ্ছিমদিসাযং একো ৰিহারো, পিলিচ্ছিকোল়িনগরস্স পুরত্থিমদিসাযং। উভযত্থ পৰত্তঘণ্ডিসদ্দা অন্তরাপৰত্তঘণ্ডিসদ্দেহি মিস্সেত্ৰা ওসরন্তি। কল্যাণিযং পৰত্তঘণ্ডিসদ্দো তথা নাগদীপে।
Bahudeva divasabhāgaṃ padhānānuyogato uppannadarathaparissamavinodanatthaṃ nhāyitvā. Te sandhāyāti te tathārūpe padhānakammikabhikkhū sandhāya. Idaṃ idāni vuccamānaṃ atthajātaṃ vuttaṃ porāṇaṭṭhakathāyaṃ. Ayampi dīpoti tambapaṇṇidīpamāha. Padhānānuyuñjanavelāya nivedanavasena tattha tattha ekajjhaṃ pahataghaṇḍinigghoseneva ekaghaṇḍinigghoso, tattha tattha paṇṇasālādīsu vasantānaṃ bhikkhūnaṃ vasena ekapadhānabhūto. Nānāmukhoti anurādhapurassa pacchimadisāyaṃ eko vihāro, pilicchikoḷinagarassa puratthimadisāyaṃ. Ubhayattha pavattaghaṇḍisaddā antarāpavattaghaṇḍisaddehi missetvā osaranti. Kalyāṇiyaṃ pavattaghaṇḍisaddo tathā nāgadīpe.
কলিঙ্গরসুত্তৰণ্ণনা নিট্ঠিতা।
Kaliṅgarasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. কলিঙ্গরসুত্তং • 8. Kaliṅgarasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. কলিঙ্গরসুত্তৰণ্ণনা • 8. Kaliṅgarasuttavaṇṇanā
