| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៨. កលិង្គរសុត្តវណ្ណនា
8. Kaliṅgarasuttavaṇṇanā
២៣០. កលិង្គរំ វុច្ចតិ ខុទ្ទកទារុខណ្ឌំ, តំ ឧបធានំ ឯតេសន្តិ កលិង្គរូបធានា។ លិច្ឆវី បន ខទិរទណ្ឌំ ឧបធានំ កត្វា តទា វិហរិំសុ។ តស្មា វុត្តំ ‘‘ខទិរឃដិកាសូ’’តិអាទិ។ បកតិវិជ្ជុសញ្ញិតោ នត្ថិ ឯតេសំ ខណោ វិជ្ឈនេតិ អក្ខណវេធិនោ តតោ សីឃតរំ វិជ្ឈនតោ។ ‘‘អក្ខណ’’ន្តិ វិជ្ជុ វុច្ចតិ ឥត្តរខណត្តា។ អក្ខណោភាសេន លក្ខណវេធកា អក្ខណវេធិនោ។ អនេកធា ភិន្នស្ស វាលស្ស វិជ្ឈនេន វាលវេធិនោ។ វាលេកទេសោ ហិ ឥធ ‘‘វាលោ’’តិ គហិតោ។
230. Kaliṅgaraṃ vuccati khuddakadārukhaṇḍaṃ, taṃ upadhānaṃ etesanti kaliṅgarūpadhānā. Licchavī pana khadiradaṇḍaṃ upadhānaṃ katvā tadā vihariṃsu. Tasmā vuttaṃ ‘‘khadiraghaṭikāsū’’tiādi. Pakativijjusaññito natthi etesaṃ khaṇo vijjhaneti akkhaṇavedhino tato sīghataraṃ vijjhanato. ‘‘Akkhaṇa’’nti vijju vuccati ittarakhaṇattā. Akkhaṇobhāsena lakkhaṇavedhakā akkhaṇavedhino. Anekadhā bhinnassa vālassa vijjhanena vālavedhino. Vālekadeso hi idha ‘‘vālo’’ti gahito.
ពហុទេវ ទិវសភាគំ បធានានុយោគតោ ឧប្បន្នទរថបរិស្សមវិនោទនត្ថំ ន្ហាយិត្វា។ តេ សន្ធាយាតិ តេ តថារូបេ បធានកម្មិកភិក្ខូ សន្ធាយ។ ឥទំ ឥទានិ វុច្ចមានំ អត្ថជាតំ វុត្តំ បោរាណដ្ឋកថាយំ។ អយម្បិ ទីបោតិ តម្ពបណ្ណិទីបមាហ។ បធានានុយុញ្ជនវេលាយ និវេទនវសេន តត្ថ តត្ថ ឯកជ្ឈំ បហតឃណ្ឌិនិគ្ឃោសេនេវ ឯកឃណ្ឌិនិគ្ឃោសោ, តត្ថ តត្ថ បណ្ណសាលាទីសុ វសន្តានំ ភិក្ខូនំ វសេន ឯកបធានភូតោ។ នានាមុខោតិ អនុរាធបុរស្ស បច្ឆិមទិសាយំ ឯកោ វិហារោ, បិលិច្ឆិកោឡិនគរស្ស បុរត្ថិមទិសាយំ។ ឧភយត្ថ បវត្តឃណ្ឌិសទ្ទា អន្តរាបវត្តឃណ្ឌិសទ្ទេហិ មិស្សេត្វា ឱសរន្តិ។ កល្យាណិយំ បវត្តឃណ្ឌិសទ្ទោ តថា នាគទីបេ។
Bahudeva divasabhāgaṃ padhānānuyogato uppannadarathaparissamavinodanatthaṃ nhāyitvā. Te sandhāyāti te tathārūpe padhānakammikabhikkhū sandhāya. Idaṃ idāni vuccamānaṃ atthajātaṃ vuttaṃ porāṇaṭṭhakathāyaṃ. Ayampi dīpoti tambapaṇṇidīpamāha. Padhānānuyuñjanavelāya nivedanavasena tattha tattha ekajjhaṃ pahataghaṇḍinigghoseneva ekaghaṇḍinigghoso, tattha tattha paṇṇasālādīsu vasantānaṃ bhikkhūnaṃ vasena ekapadhānabhūto. Nānāmukhoti anurādhapurassa pacchimadisāyaṃ eko vihāro, pilicchikoḷinagarassa puratthimadisāyaṃ. Ubhayattha pavattaghaṇḍisaddā antarāpavattaghaṇḍisaddehi missetvā osaranti. Kalyāṇiyaṃ pavattaghaṇḍisaddo tathā nāgadīpe.
កលិង្គរសុត្តវណ្ណនា និដ្ឋិតា។
Kaliṅgarasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. កលិង្គរសុត្តំ • 8. Kaliṅgarasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. កលិង្គរសុត្តវណ្ណនា • 8. Kaliṅgarasuttavaṇṇanā
