| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
8. කලිඞ්‌ගරසුත්‌තවණ්‌ණනා
8. Kaliṅgarasuttavaṇṇanā
230. කලිඞ්‌ගරං වුච්‌චති ඛුද්‌දකදාරුඛණ්‌ඩං, තං උපධානං එතෙසන්‌ති කලිඞ්‌ගරූපධානා. ලිච්‌ඡවී පන ඛදිරදණ්‌ඩං උපධානං කත්‌වා තදා විහරිංසු. තස්‌මා වුත්‌තං ‘‘ඛදිරඝටිකාසූ’’තිආදි. පකතිවිජ්‌ජුසඤ්‌ඤිතො නත්‌ථි එතෙසං ඛණො විජ්‌ඣනෙති අක්‌ඛණවෙධිනො තතො සීඝතරං විජ්‌ඣනතො. ‘‘අක්‌ඛණ’’න්‌ති විජ්‌ජු වුච්‌චති ඉත්‌තරඛණත්‌තා. අක්‌ඛණොභාසෙන ලක්‌ඛණවෙධකා අක්‌ඛණවෙධිනො. අනෙකධා භින්‌නස්‌ස වාලස්‌ස විජ්‌ඣනෙන වාලවෙධිනො. වාලෙකදෙසො හි ඉධ ‘‘වාලො’’ති ගහිතො.
230. Kaliṅgaraṃ vuccati khuddakadārukhaṇḍaṃ, taṃ upadhānaṃ etesanti kaliṅgarūpadhānā. Licchavī pana khadiradaṇḍaṃ upadhānaṃ katvā tadā vihariṃsu. Tasmā vuttaṃ ‘‘khadiraghaṭikāsū’’tiādi. Pakativijjusaññito natthi etesaṃ khaṇo vijjhaneti akkhaṇavedhino tato sīghataraṃ vijjhanato. ‘‘Akkhaṇa’’nti vijju vuccati ittarakhaṇattā. Akkhaṇobhāsena lakkhaṇavedhakā akkhaṇavedhino. Anekadhā bhinnassa vālassa vijjhanena vālavedhino. Vālekadeso hi idha ‘‘vālo’’ti gahito.
බහුදෙව දිවසභාගං පධානානුයොගතො උප්‌පන්‌නදරථපරිස්‌සමවිනොදනත්‌ථං න්‌හායිත්‌වා. තෙ සන්‌ධායාති තෙ තථාරූපෙ පධානකම්‌මිකභික්‌ඛූ සන්‌ධාය. ඉදං ඉදානි වුච්‌චමානං අත්‌ථජාතං වුත්‌තං පොරාණට්‌ඨකථායං. අයම්‌පි දීපොති තම්‌බපණ්‌ණිදීපමාහ. පධානානුයුඤ්‌ජනවෙලාය නිවෙදනවසෙන තත්‌ථ තත්‌ථ එකජ්‌ඣං පහතඝණ්‌ඩිනිග්‌ඝොසෙනෙව එකඝණ්‌ඩිනිග්‌ඝොසො, තත්‌ථ තත්‌ථ පණ්‌ණසාලාදීසු වසන්‌තානං භික්‌ඛූනං වසෙන එකපධානභූතො. නානාමුඛොති අනුරාධපුරස්‌ස පච්‌ඡිමදිසායං එකො විහාරො, පිලිච්‌ඡිකොළිනගරස්‌ස පුරත්‌ථිමදිසායං. උභයත්‌ථ පවත්‌තඝණ්‌ඩිසද්‌දා අන්‌තරාපවත්‌තඝණ්‌ඩිසද්‌දෙහි මිස්‌සෙත්‌වා ඔසරන්‌ති. කල්‍යාණියං පවත්‌තඝණ්‌ඩිසද්‌දො තථා නාගදීපෙ.
Bahudeva divasabhāgaṃ padhānānuyogato uppannadarathaparissamavinodanatthaṃ nhāyitvā. Te sandhāyāti te tathārūpe padhānakammikabhikkhū sandhāya. Idaṃ idāni vuccamānaṃ atthajātaṃ vuttaṃ porāṇaṭṭhakathāyaṃ. Ayampi dīpoti tambapaṇṇidīpamāha. Padhānānuyuñjanavelāya nivedanavasena tattha tattha ekajjhaṃ pahataghaṇḍinigghoseneva ekaghaṇḍinigghoso, tattha tattha paṇṇasālādīsu vasantānaṃ bhikkhūnaṃ vasena ekapadhānabhūto. Nānāmukhoti anurādhapurassa pacchimadisāyaṃ eko vihāro, pilicchikoḷinagarassa puratthimadisāyaṃ. Ubhayattha pavattaghaṇḍisaddā antarāpavattaghaṇḍisaddehi missetvā osaranti. Kalyāṇiyaṃ pavattaghaṇḍisaddo tathā nāgadīpe.
කලිඞ්‌ගරසුත්‌තවණ්‌ණනා නිට්‌ඨිතා.
Kaliṅgarasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 8. කලිඞ්‌ගරසුත්‌තං • 8. Kaliṅgarasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. කලිඞ්‌ගරසුත්‌තවණ්‌ණනා • 8. Kaliṅgarasuttavaṇṇanā
