| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
६. काळीसुत्तं
6. Kāḷīsuttaṃ
२६. एकं समयं आयस्मा महाकच्चानो अवन्तीसु विहरति कुररघरे 1 पवत्ते पब्बते। अथ खो काळी उपासिका कुररघरिका येनायस्मा महाकच्चानो तेनुपसङ्कमि; उपसङ्कमित्वा आयस्मन्तं महाकच्चानं अभिवादेत्वा एकमन्तं निसीदि। एकमन्तं निसिन्ना खो काळी उपासिका कुररघरिका आयस्मन्तं महाकच्चानं एतदवोच – ‘‘वुत्तमिदं, भन्ते, भगवता कुमारिपञ्हेसु –
26. Ekaṃ samayaṃ āyasmā mahākaccāno avantīsu viharati kuraraghare 2 pavatte pabbate. Atha kho kāḷī upāsikā kuraragharikā yenāyasmā mahākaccāno tenupasaṅkami; upasaṅkamitvā āyasmantaṃ mahākaccānaṃ abhivādetvā ekamantaṃ nisīdi. Ekamantaṃ nisinnā kho kāḷī upāsikā kuraragharikā āyasmantaṃ mahākaccānaṃ etadavoca – ‘‘vuttamidaṃ, bhante, bhagavatā kumāripañhesu –
‘अत्थस्स पत्तिं हदयस्स सन्तिं,
‘Atthassa pattiṃ hadayassa santiṃ,
जेत्वान सेनं पियसातरूपं।
Jetvāna senaṃ piyasātarūpaṃ;
‘‘इमस्स खो, भन्ते, भगवता संखित्तेन भासितस्स कथं वित्थारेन अत्थो दट्ठब्बो’’ति?
‘‘Imassa kho, bhante, bhagavatā saṃkhittena bhāsitassa kathaṃ vitthārena attho daṭṭhabbo’’ti?
‘‘पथवीकसिणसमापत्तिपरमा खो, भगिनि, एके समणब्राह्मणा ‘अत्थो’ति अभिनिब्बत्तेसुं 9। यावता खो, भगिनि, पथवीकसिणसमापत्तिपरमता , तदभिञ्ञासि भगवा। तदभिञ्ञाय भगवा अस्सादमद्दस 10 आदीनवमद्दस निस्सरणमद्दस मग्गामग्गञाणदस्सनमद्दस। तस्स अस्साददस्सनहेतु आदीनवदस्सनहेतु निस्सरणदस्सनहेतु मग्गामग्गञाणदस्सनहेतु अत्थस्स पत्ति हदयस्स सन्ति विदिता होति।
‘‘Pathavīkasiṇasamāpattiparamā kho, bhagini, eke samaṇabrāhmaṇā ‘attho’ti abhinibbattesuṃ 11. Yāvatā kho, bhagini, pathavīkasiṇasamāpattiparamatā , tadabhiññāsi bhagavā. Tadabhiññāya bhagavā assādamaddasa 12 ādīnavamaddasa nissaraṇamaddasa maggāmaggañāṇadassanamaddasa. Tassa assādadassanahetu ādīnavadassanahetu nissaraṇadassanahetu maggāmaggañāṇadassanahetu atthassa patti hadayassa santi viditā hoti.
‘‘आपोकसिणसमापत्तिपरमा खो, भगिनि…पे॰… तेजोकसिणसमापत्तिपरमा खो, भगिनि… वायोकसिणसमापत्तिपरमा खो, भगिनि… नीलकसिणसमापत्तिपरमा खो, भगिनि… पीतकसिणसमापत्तिपरमा खो, भगिनि… लोहितकसिणसमापत्तिपरमा खो, भगिनि… ओदातकसिणसमापत्तिपरमा खो, भगिनि… आकासकसिणसमापत्तिपरमा खो, भगिनि… विञ्ञाणकसिणसमापत्तिपरमा खो, भगिनि, एके समणब्राह्मणा ‘अत्थो’ति अभिनिब्बत्तेसुं । यावता खो, भगिनि, विञ्ञाणकसिणसमापत्तिपरमता, तदभिञ्ञासि भगवा। तदभिञ्ञाय भगवा अस्सादमद्दस आदीनवमद्दस निस्सरणमद्दस मग्गामग्गञाणदस्सनमद्दस। तस्स अस्साददस्सनहेतु आदीनवदस्सनहेतु निस्सरणदस्सनहेतु मग्गामग्गञाणदस्सनहेतु अत्थस्स पत्ति हदयस्स सन्ति विदिता होति। इति खो, भगिनि, यं तं वुत्तं भगवता कुमारिपञ्हेसु –
‘‘Āpokasiṇasamāpattiparamā kho, bhagini…pe… tejokasiṇasamāpattiparamā kho, bhagini… vāyokasiṇasamāpattiparamā kho, bhagini… nīlakasiṇasamāpattiparamā kho, bhagini… pītakasiṇasamāpattiparamā kho, bhagini… lohitakasiṇasamāpattiparamā kho, bhagini… odātakasiṇasamāpattiparamā kho, bhagini… ākāsakasiṇasamāpattiparamā kho, bhagini… viññāṇakasiṇasamāpattiparamā kho, bhagini, eke samaṇabrāhmaṇā ‘attho’ti abhinibbattesuṃ . Yāvatā kho, bhagini, viññāṇakasiṇasamāpattiparamatā, tadabhiññāsi bhagavā. Tadabhiññāya bhagavā assādamaddasa ādīnavamaddasa nissaraṇamaddasa maggāmaggañāṇadassanamaddasa. Tassa assādadassanahetu ādīnavadassanahetu nissaraṇadassanahetu maggāmaggañāṇadassanahetu atthassa patti hadayassa santi viditā hoti. Iti kho, bhagini, yaṃ taṃ vuttaṃ bhagavatā kumāripañhesu –
‘अत्थस्स पत्तिं हदयस्स सन्तिं,
‘Atthassa pattiṃ hadayassa santiṃ,
जेत्वान सेनं पियसातरूपं।
Jetvāna senaṃ piyasātarūpaṃ;
एकोहं झायं सुखमनुबोधिं,
Ekohaṃ jhāyaṃ sukhamanubodhiṃ,
तस्मा जनेन न करोमि सक्खिं।
Tasmā janena na karomi sakkhiṃ;
सक्खी न सम्पज्जति केनचि मे’ति॥
Sakkhī na sampajjati kenaci me’ti.
‘‘इमस्स खो, भगिनि, भगवता संखित्तेन भासितस्स एवं वित्थारेन अत्थो दट्ठब्बो’’ति। छट्ठं।
‘‘Imassa kho, bhagini, bhagavatā saṃkhittena bhāsitassa evaṃ vitthārena attho daṭṭhabbo’’ti. Chaṭṭhaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ६. काळीसुत्तवण्णना • 6. Kāḷīsuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ६. काळीसुत्तवण्णना • 6. Kāḷīsuttavaṇṇanā
