| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. காளீஸுத்தவண்ணனா
6. Kāḷīsuttavaṇṇanā
26. ச²ட்டே² குமாரிபஞ்ஹேஸூதி குமாரீனங் மாரதீ⁴தானங் புச்சா²ஸு. அத்த²ஸ்ஸ பத்திங் ஹத³யஸ்ஸ ஸந்திந்தி த்³வீஹிபி பதே³ஹி அரஹத்தமேவ கதி²தங். ஸேனந்தி ராகா³தி³கிலேஸஸேனங். பியஸாதரூபந்தி பியஜாதிகேஸு ச ஸாதஜாதிகேஸு ச வத்தூ²ஸு உப்பஜ்ஜனதோ ஏவங்லத்³த⁴னாமங். ஏகோஹங் ஜா²யங் ஸுக²மனுபோ³தி⁴ந்தி ஏவங் கிலேஸஸேனங் ஜினித்வா அஹங் ஏககோவ ஜா²யந்தோ ஸுக²ங் அனுபு³ஜ்ஜி²ங் ஸச்சி²அகாஸிங். ஸக்கி²ந்தி ஸக்கி²பா⁴வப்பத்தங் த⁴ம்மஸக்கி²ங். ந ஸம்பஜ்ஜதி கேனசி மேதி மய்ஹங் கேனசி ஸத்³தி⁴ங் மித்தத⁴ம்மோ நாம நத்தி². பத²வீகஸிணஸமாபத்திபரமா கோ², ப⁴கி³னி, ஏகே ஸமணப்³ராஹ்மணா அத்தோ²தி அபி⁴னிப்³ப³த்தேஸுந்தி பத²வீகஸிணஸமாபத்திபரமோ உத்தமோ அத்தோ²தி க³ஹெத்வா அபி⁴னிப்³ப³த்தேஸுங். யாவதா கோ², ப⁴கி³னி, பத²வீகஸிணஸமாபத்திபரமதாதி யத்தகா பத²வீகஸிணஸமாபத்தியா உத்தமகோடி. தத³பி⁴ஞ்ஞாஸி ப⁴க³வாதி தங் ப⁴க³வா அபி⁴ஞ்ஞாபஞ்ஞாய அபி⁴ஞ்ஞாஸி. அஸ்ஸாத³மத்³த³ஸாதி ஸமுத³யஸச்சங் அத்³த³ஸ. ஆதீ³னவமத்³த³ஸாதி து³க்க²ஸச்சங் அத்³த³ஸ. நிஸ்ஸரணமத்³த³ஸாதி நிரோத⁴ஸச்சங் அத்³த³ஸ. மக்³கா³மக்³க³ஞாணத³ஸ்ஸனமத்³த³ஸாதி மக்³க³ஸச்சங் அத்³த³ஸ. அத்த²ஸ்ஸ பத்தீதி ஏதேஸங் சதுன்னங் ஸச்சானங் தி³ட்ட²த்தா அரஹத்தஸங்கா²தஸ்ஸ அத்த²ஸ்ஸ பத்தி, ஸப்³ப³த³ரத²பரிளாஹவூபஸந்ததாய ஹத³யஸ்ஸ ஸந்தீதி.
26. Chaṭṭhe kumāripañhesūti kumārīnaṃ māradhītānaṃ pucchāsu. Atthassapattiṃ hadayassa santinti dvīhipi padehi arahattameva kathitaṃ. Senanti rāgādikilesasenaṃ. Piyasātarūpanti piyajātikesu ca sātajātikesu ca vatthūsu uppajjanato evaṃladdhanāmaṃ. Ekohaṃ jhāyaṃ sukhamanubodhinti evaṃ kilesasenaṃ jinitvā ahaṃ ekakova jhāyanto sukhaṃ anubujjhiṃ sacchiakāsiṃ. Sakkhinti sakkhibhāvappattaṃ dhammasakkhiṃ. Na sampajjati kenaci meti mayhaṃ kenaci saddhiṃ mittadhammo nāma natthi. Pathavīkasiṇasamāpattiparamā kho, bhagini, eke samaṇabrāhmaṇā atthoti abhinibbattesunti pathavīkasiṇasamāpattiparamo uttamo atthoti gahetvā abhinibbattesuṃ. Yāvatā kho, bhagini, pathavīkasiṇasamāpattiparamatāti yattakā pathavīkasiṇasamāpattiyā uttamakoṭi. Tadabhiññāsi bhagavāti taṃ bhagavā abhiññāpaññāya abhiññāsi. Assādamaddasāti samudayasaccaṃ addasa. Ādīnavamaddasāti dukkhasaccaṃ addasa. Nissaraṇamaddasāti nirodhasaccaṃ addasa. Maggāmaggañāṇadassanamaddasāti maggasaccaṃ addasa. Atthassa pattīti etesaṃ catunnaṃ saccānaṃ diṭṭhattā arahattasaṅkhātassa atthassa patti, sabbadarathapariḷāhavūpasantatāya hadayassa santīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. காளீஸுத்தங் • 6. Kāḷīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. காளீஸுத்தவண்ணனா • 6. Kāḷīsuttavaṇṇanā
