| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
६. काळीसुत्तवण्णना
6. Kāḷīsuttavaṇṇanā
२६. छट्ठे अत्थस्स पत्तिन्ति एकन्ततो हितानुप्पत्तिं। हदयस्स सन्तिन्ति परमचित्तूपसमं। किलेससेनन्ति कामगुणसङ्खातं पठमं किलेससेनं। सा हि किलेससेना अच्छरासङ्घातसभावापि पटिपत्थयमाना पियायितब्बइच्छितब्बरूपसभावतो पियरूपसातरूपा नाम अत्तनो किच्चवसेन। अहं एकोव झायन्तोति अहं गणसङ्गणिकाय किलेससङ्गणिकाय च अभावतो एको असहायो लक्खणूपनिज्झानेन झायन्तो। अनुबुज्झिन्ति अनुक्कमेन मग्गपटिपाटिया बुज्झिं पटिविज्झिं। इदं वुत्तं होति – पियरूपं सातरूपं सेनं जिनित्वा अहं एकोव झायन्तो ‘‘अत्थस्स पत्तिं हदयस्स सन्ति’’न्ति सङ्खं गतं अरहत्तसुखं पटिविज्झिं, तस्मा जनेन मित्तसन्थवं न करोमि, तेनेव च मे कारणेन केनचि सद्धिं सक्खी न सम्पज्जतीति। अत्थाभिनिब्बत्तेसुन्ति इतिसद्दलोपेनायं निद्देसोति आह ‘‘अत्थोति गहेत्वा’’ति।
26. Chaṭṭhe atthassa pattinti ekantato hitānuppattiṃ. Hadayassa santinti paramacittūpasamaṃ. Kilesasenanti kāmaguṇasaṅkhātaṃ paṭhamaṃ kilesasenaṃ. Sā hi kilesasenā accharāsaṅghātasabhāvāpi paṭipatthayamānā piyāyitabbaicchitabbarūpasabhāvato piyarūpasātarūpā nāma attano kiccavasena. Ahaṃ ekova jhāyantoti ahaṃ gaṇasaṅgaṇikāya kilesasaṅgaṇikāya ca abhāvato eko asahāyo lakkhaṇūpanijjhānena jhāyanto. Anubujjhinti anukkamena maggapaṭipāṭiyā bujjhiṃ paṭivijjhiṃ. Idaṃ vuttaṃ hoti – piyarūpaṃ sātarūpaṃ senaṃ jinitvā ahaṃ ekova jhāyanto ‘‘atthassa pattiṃ hadayassa santi’’nti saṅkhaṃ gataṃ arahattasukhaṃ paṭivijjhiṃ, tasmā janena mittasanthavaṃ na karomi, teneva ca me kāraṇena kenaci saddhiṃ sakkhī na sampajjatīti. Atthābhinibbattesunti itisaddalopenāyaṃ niddesoti āha ‘‘atthoti gahetvā’’ti.
काळीसुत्तवण्णना निट्ठिता।
Kāḷīsuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ६. काळीसुत्तं • 6. Kāḷīsuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ६. काळीसुत्तवण्णना • 6. Kāḷīsuttavaṇṇanā
