| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8. கல்யாணமித்தாதி³வக்³க³வண்ணனா
8. Kalyāṇamittādivaggavaṇṇanā
71. அட்ட²மஸ்ஸ பட²மே பு³த்³தா⁴, ஸாரிபுத்தாத³யோ வா கல்யாணமித்தா. வுத்தபடிபக்க²னயேனாதி ‘‘பாபமித்ததா’’தி பதே³ வுத்தஸ்ஸ படிபக்க²னயேன.
71. Aṭṭhamassa paṭhame buddhā, sāriputtādayo vā kalyāṇamittā. Vuttapaṭipakkhanayenāti ‘‘pāpamittatā’’ti pade vuttassa paṭipakkhanayena.
72-73. து³தியே யோகோ³தி ஸமங்கீ³பா⁴வோ. பயோகோ³தி பயுஞ்ஜனங் படிபத்தி. அயோகோ³தி அஸமங்கீ³பா⁴வோ. அப்பயோகோ³தி அப்பயுஞ்ஜனங் அப்படிபத்தி. அனுயோகே³னாதி அனுயோக³ஹேது.
72-73. Dutiye yogoti samaṅgībhāvo. Payogoti payuñjanaṃ paṭipatti. Ayogoti asamaṅgībhāvo. Appayogoti appayuñjanaṃ appaṭipatti. Anuyogenāti anuyogahetu.
74. சதுத்தே² பு³ஜ்ஜ²னகஸத்தஸ்ஸாதி சதுன்னங் அரியஸச்சானங் படிவிஜ்ஜ²னகபுக்³க³லஸ்ஸ. அங்க³பூ⁴தாதி தஸ்ஸேவ படிவேத⁴ஸ்ஸ காரணபூ⁴தா. எத்த² ச சத்தாரி அரியஸச்சானி பு³ஜ்ஜ²தி, அஞ்ஞாணனித்³தா³ய வாபி பு³ஜ்ஜ²தீதி போ³தீ⁴தி லத்³த⁴னாமோ அரியஸாவகோ பு³ஜ்ஜ²னகஸத்தோ, தஸ்ஸ பு³ஜ்ஜ²னகஸத்தஸ்ஸ. போ³தி⁴யாதி தஸ்ஸா த⁴ம்மஸாமக்³கி³ஸங்கா²தாய போ³தி⁴யா. பு³ஜ்ஜ²னட்டே²ன போ³தி⁴யோ, போ³தி⁴யோ ஏவ ஸச்சஸம்படிபோ³த⁴ஸ்ஸ அங்கா³தி வுத்தங். ‘‘பு³ஜ்ஜ²ந்தீதி பொ³ஜ்ஜ²ங்கா³’’தி. விபஸ்ஸனாதீ³னங் காரணானங் பு³ஜ்ஜி²தப்³பா³னஞ்ச ஸச்சானங் அனுரூபங் பு³ஜ்ஜ²னதோ அனுபு³ஜ்ஜ²ந்தீதி பொ³ஜ்ஜ²ங்கா³, படிமுக²ங் பச்சக்க²பா⁴வேன அபி⁴முக²ங் பு³ஜ்ஜ²னதோ படிபு³ஜ்ஜ²ந்தீதி பொ³ஜ்ஜ²ங்கா³, ஸம்மா அவிபரீததோ பு³ஜ்ஜ²னதோ ஸம்பு³ஜ்ஜ²ந்தீதி பொ³ஜ்ஜ²ங்கா³தி ஏவங் அத்த²விஸேஸதீ³பகேஹி உபஸக்³கே³ஹி அனுபு³ஜ்ஜ²ந்தீதிஆதி³ வுத்தங். போ³தி⁴ஸத்³தோ³ ஸப்³ப³விஸேஸயுத்தங் பு³ஜ்ஜ²னஸாமஞ்ஞேன ஸங்க³ண்ஹாதி. போ³தா⁴ய ஸங்வத்தந்தீதி இமினா தஸ்ஸா த⁴ம்மஸாமக்³கி³யா பு³ஜ்ஜ²னஸ்ஸ ஏகந்தகாரணதங் த³ஸ்ஸேதி. ஏவங் பனேதங் பத³ங் விப⁴த்தமேவாதி வுத்தப்பகாரேன ஏதங் ‘‘பொ³ஜ்ஜ²ங்கா³’’தி (படி॰ ம॰ 2.17) பத³ங் நித்³தே³ஸே படிஸம்பி⁴தா³மக்³கே³ விப⁴த்தமேவ.
74. Catutthe bujjhanakasattassāti catunnaṃ ariyasaccānaṃ paṭivijjhanakapuggalassa. Aṅgabhūtāti tasseva paṭivedhassa kāraṇabhūtā. Ettha ca cattāri ariyasaccāni bujjhati, aññāṇaniddāya vāpi bujjhatīti bodhīti laddhanāmo ariyasāvako bujjhanakasatto, tassa bujjhanakasattassa. Bodhiyāti tassā dhammasāmaggisaṅkhātāya bodhiyā. Bujjhanaṭṭhena bodhiyo, bodhiyo eva saccasampaṭibodhassa aṅgāti vuttaṃ. ‘‘Bujjhantīti bojjhaṅgā’’ti. Vipassanādīnaṃ kāraṇānaṃ bujjhitabbānañca saccānaṃ anurūpaṃ bujjhanato anubujjhantīti bojjhaṅgā, paṭimukhaṃ paccakkhabhāvena abhimukhaṃ bujjhanato paṭibujjhantīti bojjhaṅgā, sammā aviparītato bujjhanato sambujjhantīti bojjhaṅgāti evaṃ atthavisesadīpakehi upasaggehi anubujjhantītiādi vuttaṃ. Bodhisaddo sabbavisesayuttaṃ bujjhanasāmaññena saṅgaṇhāti. Bodhāya saṃvattantīti iminā tassā dhammasāmaggiyā bujjhanassa ekantakāraṇataṃ dasseti. Evaṃ panetaṃ padaṃ vibhattamevāti vuttappakārena etaṃ ‘‘bojjhaṅgā’’ti (paṭi. ma. 2.17) padaṃ niddese paṭisambhidāmagge vibhattameva.
75. பஞ்சமே யாதா²வஸரஸபூ⁴மீதி யாதா²வதோ ஸகிச்சகரணபூ⁴மி. ஸாதி யாதா²வஸரஸபூ⁴மி. விபஸ்ஸனாதி ப³லவவிபஸ்ஸனா. கேசி ‘‘ப⁴ங்க³ஞாணதோ பட்டா²யா’’தி வத³ந்தி. விபஸ்ஸனாய பாத³கஜ்ஜா²னே ச ஸதிஆத³யோ பொ³ஜ்ஜ²ங்க³பக்கி²கா ஏவ பரியாயபோ³தி⁴பக்கி²யபா⁴வதோ. தத்தா²திஆதி³ சதுப்³பி³தா⁴னங் பொ³ஜ்ஜ²ங்கா³னங் பூ⁴மிவிபா⁴க³த³ஸ்ஸனங்.
75. Pañcame yāthāvasarasabhūmīti yāthāvato sakiccakaraṇabhūmi. Sāti yāthāvasarasabhūmi. Vipassanāti balavavipassanā. Keci ‘‘bhaṅgañāṇato paṭṭhāyā’’ti vadanti. Vipassanāya pādakajjhāne ca satiādayo bojjhaṅgapakkhikā eva pariyāyabodhipakkhiyabhāvato. Tatthātiādi catubbidhānaṃ bojjhaṅgānaṃ bhūmivibhāgadassanaṃ.
76. ச²ட்டே² தேஸங் அந்தரேதி தேஸங் பி⁴க்கூ²னங் அந்தரே. காமங் ஸங்கீ³திஆருள்ஹவஸேன அப்பகமித³ங் ஸுத்தபத³ங், ப⁴க³வா பனெத்த² ஸன்னிபதிதபரிஸாய அஜ்ஜா²ஸயானுரூபங் வித்தா²ரிகங் கரோதீதி கத்வா இத³ங் வுத்தங் – ‘‘மஹதீ தே³ஸனா ப⁴விஸ்ஸதீ’’தி. கா³மனிக³மாதி³கதா² நத்தீ²தி தஸ்ஸா கதா²ய அதிரச்சா²னகதா²பா⁴வமாஹு . ததா² ஹி ஸா புப்³பே³ ப³ஹுஞாதிகங் அஹோஸி ப³ஹுபக்க²ங், இதா³னி அப்பஞாதிகங் அப்பபக்க²ந்தி அனிச்சதாமுகே²ன நிய்யானிகபக்கி²கா ஜாதா. ஏதாயாதி யதா²வுத்தாய பரிஹானியா. பதிகிட்ட²ந்தி நிஹீனங். மம ஸாஸனேதி இத³ங் கம்மஸ்ஸகதஜ்ஜா²னபஞ்ஞானம்பி விஸேஸனமேவ. தது³ப⁴யம்பி ஹி பா³ஹிரகானங் தப்பஞ்ஞாத்³வயதோ ஸாதிஸயமேவ ஸப்³ப³ஞ்ஞுபு³த்³தா⁴னங் தே³ஸனாய லத்³த⁴விஸேஸதோ விவட்டூபனிஸ்ஸயதோ ச.
76. Chaṭṭhe tesaṃ antareti tesaṃ bhikkhūnaṃ antare. Kāmaṃ saṅgītiāruḷhavasena appakamidaṃ suttapadaṃ, bhagavā panettha sannipatitaparisāya ajjhāsayānurūpaṃ vitthārikaṃ karotīti katvā idaṃ vuttaṃ – ‘‘mahatī desanā bhavissatī’’ti. Gāmanigamādikathā natthīti tassā kathāya atiracchānakathābhāvamāhu . Tathā hi sā pubbe bahuñātikaṃ ahosi bahupakkhaṃ, idāni appañātikaṃ appapakkhanti aniccatāmukhena niyyānikapakkhikā jātā. Etāyāti yathāvuttāya parihāniyā. Patikiṭṭhanti nihīnaṃ. Mama sāsaneti idaṃ kammassakatajjhānapaññānampi visesanameva. Tadubhayampi hi bāhirakānaṃ tappaññādvayato sātisayameva sabbaññubuddhānaṃ desanāya laddhavisesato vivaṭṭūpanissayato ca.
77. ஸத்தமே தேஸங் சித்தாசாரங் ஞத்வாதி ததா² கதெ²ந்தானங் தேஸங் பி⁴க்கூ²னங் தத்த² உபக³மனேன அத்தனோ தே³ஸனாய பா⁴ஜனபூ⁴தங் சித்தப்பவத்திங் ஞத்வா. கம்மஸ்ஸகதாதீ³தி ஆதி³ஸத்³தே³ன ஜா²னபஞ்ஞாதீ³னங் சதுன்னம்பி பஞ்ஞானங் க³ஹணங்.
77. Sattame tesaṃ cittācāraṃ ñatvāti tathā kathentānaṃ tesaṃ bhikkhūnaṃ tattha upagamanena attano desanāya bhājanabhūtaṃ cittappavattiṃ ñatvā. Kammassakatādīti ādisaddena jhānapaññādīnaṃ catunnampi paññānaṃ gahaṇaṃ.
78-80. அட்ட²மாதீ³ஸு ஹெட்டா² வுத்தனயேனேவாதி ‘‘யா ஏஸ மம ஸாஸனே’’திஆதி³னா ஹெட்டா² வுத்தனயேனேவ. ஸேஸமெத்த² உத்தானத்த²மேவ.
78-80. Aṭṭhamādīsu heṭṭhā vuttanayenevāti ‘‘yā esa mama sāsane’’tiādinā heṭṭhā vuttanayeneva. Sesamettha uttānatthameva.
கல்யாணமித்தாதி³வக்³க³வண்ணனா நிட்டி²தா.
Kalyāṇamittādivaggavaṇṇanā niṭṭhitā.
81-82. நவமே வக்³கே³ நத்தி² வத்தப்³ப³ங்.
81-82. Navame vagge natthi vattabbaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
8. கல்யாணமித்தாதி³வக்³கோ³ • 8. Kalyāṇamittādivaggo
9. பமாதா³தி³வக்³கோ³ • 9. Pamādādivaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
8. கல்யாணமித்ததாதி³வக்³க³வண்ணனா • 8. Kalyāṇamittatādivaggavaṇṇanā
9. பமாதா³தி³வக்³க³வண்ணனா • 9. Pamādādivaggavaṇṇanā
