| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. কল্যাণমিত্তাদিৰগ্গো
8. Kalyāṇamittādivaggo
৭১. ‘‘নাহং , ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা কুসলা ধম্মা উপ্পজ্জন্তি উপ্পন্না ৰা অকুসলা ধম্মা পরিহাযন্তি যথযিদং, ভিক্খৰে, কল্যাণমিত্ততা। কল্যাণমিত্তস্স, ভিক্খৰে, অনুপ্পন্না চেৰ কুসলা ধম্মা উপ্পজ্জন্তি উপ্পন্না চ অকুসলা ধম্মা পরিহাযন্তী’’তি। পঠমং।
71. ‘‘Nāhaṃ , bhikkhave, aññaṃ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ, bhikkhave, kalyāṇamittatā. Kalyāṇamittassa, bhikkhave, anuppannā ceva kusalā dhammā uppajjanti uppannā ca akusalā dhammā parihāyantī’’ti. Paṭhamaṃ.
৭২. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা অকুসলা ধম্মা উপ্পজ্জন্তি উপ্পন্না ৰা কুসলা ধম্মা পরিহাযন্তি যথযিদং, ভিক্খৰে, অনুযোগো অকুসলানং ধম্মানং, অননুযোগো কুসলানং ধম্মানং। অনুযোগা, ভিক্খৰে, অকুসলানং ধম্মানং, অননুযোগা কুসলানং ধম্মানং অনুপ্পন্না চেৰ অকুসলা ধম্মা উপ্পজ্জন্তি উপ্পন্না চ কুসলা ধম্মা পরিহাযন্তী’’তি। দুতিযং।
72. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ, bhikkhave, anuyogo akusalānaṃ dhammānaṃ, ananuyogo kusalānaṃ dhammānaṃ. Anuyogā, bhikkhave, akusalānaṃ dhammānaṃ, ananuyogā kusalānaṃ dhammānaṃ anuppannā ceva akusalā dhammā uppajjanti uppannā ca kusalā dhammā parihāyantī’’ti. Dutiyaṃ.
৭৩. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা কুসলা ধম্মা উপ্পজ্জন্তি উপ্পন্না ৰা অকুসলা ধম্মা পরিহাযন্তি যথযিদং, ভিক্খৰে, অনুযোগো কুসলানং ধম্মানং, অননুযোগো অকুসলানং ধম্মানং। অনুযোগা, ভিক্খৰে, কুসলানং ধম্মানং, অননুযোগা অকুসলানং ধম্মানং অনুপ্পন্না চেৰ কুসলা ধম্মা উপ্পজ্জন্তি উপ্পন্না চ অকুসলা ধম্মা পরিহাযন্তী’’তি। ততিযং।
73. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ, bhikkhave, anuyogo kusalānaṃ dhammānaṃ, ananuyogo akusalānaṃ dhammānaṃ. Anuyogā, bhikkhave, kusalānaṃ dhammānaṃ, ananuyogā akusalānaṃ dhammānaṃ anuppannā ceva kusalā dhammā uppajjanti uppannā ca akusalā dhammā parihāyantī’’ti. Tatiyaṃ.
৭৪. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা বোজ্ঝঙ্গা নুপ্পজ্জন্তি উপ্পন্না ৰা বোজ্ঝঙ্গা ন ভাৰনাপারিপূরিং গচ্ছন্তি যথযিদং, ভিক্খৰে, অযোনিসোমনসিকারো। অযোনিসো, ভিক্খৰে, মনসি করোতো অনুপ্পন্না চেৰ বোজ্ঝঙ্গা নুপ্পজ্জন্তি উপ্পন্না চ বোজ্ঝঙ্গা ন ভাৰনাপারিপূরিং গচ্ছন্তী’’তি। চতুত্থং।
74. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā bojjhaṅgā nuppajjanti uppannā vā bojjhaṅgā na bhāvanāpāripūriṃ gacchanti yathayidaṃ, bhikkhave, ayonisomanasikāro. Ayoniso, bhikkhave, manasi karoto anuppannā ceva bojjhaṅgā nuppajjanti uppannā ca bojjhaṅgā na bhāvanāpāripūriṃ gacchantī’’ti. Catutthaṃ.
৭৫. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা বোজ্ঝঙ্গা উপ্পজ্জন্তি উপ্পন্না ৰা বোজ্ঝঙ্গা ভাৰনাপারিপূরিং গচ্ছন্তি যথযিদং, ভিক্খৰে, যোনিসোমনসিকারো । যোনিসো , ভিক্খৰে, মনসি করোতো অনুপ্পন্না চেৰ বোজ্ঝঙ্গা উপ্পজ্জন্তি উপ্পন্না চ বোজ্ঝঙ্গা ভাৰনাপারিপূরিং গচ্ছন্তী’’তি। পঞ্চমং।
75. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā bojjhaṅgā uppajjanti uppannā vā bojjhaṅgā bhāvanāpāripūriṃ gacchanti yathayidaṃ, bhikkhave, yonisomanasikāro . Yoniso , bhikkhave, manasi karoto anuppannā ceva bojjhaṅgā uppajjanti uppannā ca bojjhaṅgā bhāvanāpāripūriṃ gacchantī’’ti. Pañcamaṃ.
৭৬. ‘‘অপ্পমত্তিকা এসা, ভিক্খৰে, পরিহানি যদিদং ঞাতিপরিহানি। এতং পতিকিট্ঠং, ভিক্খৰে, পরিহানীনং যদিদং পঞ্ঞাপরিহানী’’তি। ছট্ঠং।
76. ‘‘Appamattikā esā, bhikkhave, parihāni yadidaṃ ñātiparihāni. Etaṃ patikiṭṭhaṃ, bhikkhave, parihānīnaṃ yadidaṃ paññāparihānī’’ti. Chaṭṭhaṃ.
৭৭. ‘‘অপ্পমত্তিকা এসা, ভিক্খৰে, ৰুদ্ধি যদিদং ঞাতিৰুদ্ধি। এতদগ্গং, ভিক্খৰে, ৰুদ্ধীনং যদিদং পঞ্ঞাৰুদ্ধি। তস্মাতিহ, ভিক্খৰে, এৰং সিক্খিতব্বং – ‘পঞ্ঞাৰুদ্ধিযা ৰদ্ধিস্সামা’তি। এৰঞ্হি ৰো, ভিক্খৰে , সিক্খিতব্ব’’ন্তি। সত্তমং।
77. ‘‘Appamattikā esā, bhikkhave, vuddhi yadidaṃ ñātivuddhi. Etadaggaṃ, bhikkhave, vuddhīnaṃ yadidaṃ paññāvuddhi. Tasmātiha, bhikkhave, evaṃ sikkhitabbaṃ – ‘paññāvuddhiyā vaddhissāmā’ti. Evañhi vo, bhikkhave , sikkhitabba’’nti. Sattamaṃ.
৭৮. ‘‘অপ্পমত্তিকা এসা, ভিক্খৰে, পরিহানি যদিদং ভোগপরিহানি। এতং পতিকিট্ঠং, ভিক্খৰে, পরিহানীনং যদিদং পঞ্ঞাপরিহানী’’তি। অট্ঠমং।
78. ‘‘Appamattikā esā, bhikkhave, parihāni yadidaṃ bhogaparihāni. Etaṃ patikiṭṭhaṃ, bhikkhave, parihānīnaṃ yadidaṃ paññāparihānī’’ti. Aṭṭhamaṃ.
৭৯. ‘‘অপ্পমত্তিকা এসা, ভিক্খৰে, ৰুদ্ধি যদিদং ভোগৰুদ্ধি। এতদগ্গং, ভিক্খৰে, ৰুদ্ধীনং যদিদং পঞ্ঞাৰুদ্ধি। তস্মাতিহ, ভিক্খৰে, এৰং সিক্খিতব্বং – ‘পঞ্ঞাৰুদ্ধিযা ৰদ্ধিস্সামা’তি। এৰঞ্হি ৰো, ভিক্খৰে, সিক্খিতব্ব’’ন্তি। নৰমং।
79. ‘‘Appamattikā esā, bhikkhave, vuddhi yadidaṃ bhogavuddhi. Etadaggaṃ, bhikkhave, vuddhīnaṃ yadidaṃ paññāvuddhi. Tasmātiha, bhikkhave, evaṃ sikkhitabbaṃ – ‘paññāvuddhiyā vaddhissāmā’ti. Evañhi vo, bhikkhave, sikkhitabba’’nti. Navamaṃ.
৮০. ‘‘অপ্পমত্তিকা এসা, ভিক্খৰে, পরিহানি যদিদং যসোপরিহানি। এতং পতিকিট্ঠং, ভিক্খৰে, পরিহানীনং যদিদং পঞ্ঞাপরিহানী’’তি। দসমং।
80. ‘‘Appamattikā esā, bhikkhave, parihāni yadidaṃ yasoparihāni. Etaṃ patikiṭṭhaṃ, bhikkhave, parihānīnaṃ yadidaṃ paññāparihānī’’ti. Dasamaṃ.
কল্যাণমিত্তাদিৰগ্গো অট্ঠমো।
Kalyāṇamittādivaggo aṭṭhamo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. কল্যাণমিত্ততাদিৰগ্গৰণ্ণনা • 8. Kalyāṇamittatādivaggavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৮. কল্যাণমিত্তাদিৰগ্গৰণ্ণনা • 8. Kalyāṇamittādivaggavaṇṇanā
