| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
8. галяаан̣амид̇д̇асуд̇д̇аван̣н̣анаа
8. Kalyāṇamittasuttavaṇṇanā
129. адтамз со жа ко галяаан̣амид̇д̇ассаад̇и со жааяам̣ д̇хаммо галяаан̣амид̇д̇ассзва сваагкаад̇о наама ход̇и, на баабамид̇д̇ассаад̇и. гин̃жааби хи д̇хаммо саб̣б̣зсамби сваагкаад̇ова, галяаан̣амид̇д̇асса бана суссуусанд̇асса сад̣̇д̣̇аханд̇асса ад̇т̇ам̣ буурзд̇и бхзсаж̇ж̇ам̣ вияа вал̣ан̃ж̇анд̇асса на ид̇арассаад̇и. д̇знзд̇ам̣ вуд̇д̇ам̣. д̇хаммод̇и жзд̇т̇а д̣̇зсанаад̇хаммо взд̣̇ид̇аб̣б̣о.
129. Aṭṭhame so ca kho kalyāṇamittassāti so cāyaṃ dhammo kalyāṇamittasseva svākkhāto nāma hoti, na pāpamittassāti. Kiñcāpi hi dhammo sabbesampi svākkhātova, kalyāṇamittassa pana sussūsantassa saddahantassa atthaṃ pūreti bhesajjaṃ viya vaḷañjantassa na itarassāti. Tenetaṃ vuttaṃ. Dhammoti cettha desanādhammo veditabbo.
убад̣дхамид̣̇анд̇и т̇зро гира рахог̇ад̇о жинд̇зси – ‘‘аяам̣ саман̣ад̇хаммо наама оваад̣̇агз анусаасагз галяаан̣амид̇д̇з сад̇и бажжад̇д̇абурисагаарз тид̇асса самбаж̇ж̇ад̇и, убад̣дхам̣ галяаан̣амид̇д̇ад̇о ход̇и, убад̣дхам̣ бажжад̇д̇абурисагаарад̇о’’д̇и. ат̇асса зд̇ад̣̇ахоси – ‘‘ахам̣ бад̣̇зсан̃аан̣з тид̇о ниббад̣̇зсам̣ жинд̇зд̇ум̣ на саггоми, сад̇т̇аарам̣ бужчид̇ваа нигган̇ко бхависсаамий’’д̇и. д̇асмаа сад̇т̇аарам̣ убасан̇гамид̇ваа звамааха. б̣рахмажарияассаад̇и арияамаг̇г̇асса. яад̣̇ид̣̇ам̣ галяаан̣амид̇д̇ад̇аад̇и яаа зсаа галяаан̣амид̇д̇ад̇аа наама, саа убад̣дхам̣, д̇ад̇о убад̣дхам̣ ааг̇ажчад̇ийд̇и ад̇т̇о. ид̇и т̇зрзна ‘‘убад̣дхубад̣дхаа саммаад̣̇идтиаад̣̇аяо галяаан̣амид̇д̇ад̇о ааг̇ажчанд̇и, убад̣дхубад̣дхаа бажжад̇д̇абурисагаарад̇о’’д̇и вуд̇д̇ам̣. гин̃жааби т̇зрасса аяам̣ манорат̇о, яат̇аа бана б̣ахуухи силаат̇амбхз уссаабид̇з, ‘‘зд̇д̇агам̣ таанам̣ асугзна уссаабид̇ам̣, зд̇д̇агам̣ асугзнаа’’д̇и виниб̣бхог̇о над̇т̇и, яат̇аа жа маад̇аабид̇аро ниссааяа уббаннзсу буд̇д̇зсу ‘‘зд̇д̇агам̣ маад̇ид̇о ниб̣б̣ад̇д̇ам̣, зд̇д̇агам̣ бид̇ид̇о’’д̇и виниб̣бхог̇о над̇т̇и, звам̣ ид̇хааби авиниб̣бхог̇ад̇хаммо хзса, ‘‘зд̇д̇агам̣ саммаад̣̇идтиаад̣̇ийнам̣ галяаан̣амид̇д̇ад̇о ниб̣б̣ад̇д̇ам̣, зд̇д̇агам̣ бажжад̇д̇абурисагаарад̇о’’д̇и на саггаа лад̣̇д̇хум̣, галяаан̣амид̇д̇ад̇ааяа бана убад̣дхаг̇ун̣о лаб̣бхад̇ийд̇и т̇зрасса аж̇жхаасаязна убад̣дхам̣ наама ж̇аад̇ам̣, сагалаг̇ун̣о бадилаб̣бхад̇ийд̇и бхаг̇авад̇о аж̇жхаасаязна сагалам̣ наама ж̇аад̇ам̣. галяаан̣амид̇д̇ад̇аад̇и жзд̇ам̣ буб̣б̣абхааг̇абадилаабхан̇г̇ам̣ наамаад̇и г̇ахид̇ам̣. ад̇т̇ад̇о галяаан̣амид̇д̇ам̣ ниссааяа лад̣̇д̇хаа сийласамаад̇хивибассанаавасзна жад̇д̇ааро канд̇хаа. сан̇каарагканд̇ход̇иби вад̣̇анд̇иязва.
Upaḍḍhamidanti thero kira rahogato cintesi – ‘‘ayaṃ samaṇadhammo nāma ovādake anusāsake kalyāṇamitte sati paccattapurisakāre ṭhitassa sampajjati, upaḍḍhaṃ kalyāṇamittato hoti, upaḍḍhaṃ paccattapurisakārato’’ti. Athassa etadahosi – ‘‘ahaṃ padesañāṇe ṭhito nippadesaṃ cintetuṃ na sakkomi, satthāraṃ pucchitvā nikkaṅkho bhavissāmī’’ti. Tasmā satthāraṃ upasaṅkamitvā evamāha. Brahmacariyassāti ariyamaggassa. Yadidaṃ kalyāṇamittatāti yā esā kalyāṇamittatā nāma, sā upaḍḍhaṃ, tato upaḍḍhaṃ āgacchatīti attho. Iti therena ‘‘upaḍḍhupaḍḍhā sammādiṭṭhiādayo kalyāṇamittato āgacchanti, upaḍḍhupaḍḍhā paccattapurisakārato’’ti vuttaṃ. Kiñcāpi therassa ayaṃ manoratho, yathā pana bahūhi silāthambhe ussāpite, ‘‘ettakaṃ ṭhānaṃ asukena ussāpitaṃ, ettakaṃ asukenā’’ti vinibbhogo natthi, yathā ca mātāpitaro nissāya uppannesu puttesu ‘‘ettakaṃ mātito nibbattaṃ, ettakaṃ pitito’’ti vinibbhogo natthi, evaṃ idhāpi avinibbhogadhammo hesa, ‘‘ettakaṃ sammādiṭṭhiādīnaṃ kalyāṇamittato nibbattaṃ, ettakaṃ paccattapurisakārato’’ti na sakkā laddhuṃ, kalyāṇamittatāya pana upaḍḍhaguṇo labbhatīti therassa ajjhāsayena upaḍḍhaṃ nāma jātaṃ, sakalaguṇo paṭilabbhatīti bhagavato ajjhāsayena sakalaṃ nāma jātaṃ. Kalyāṇamittatāti cetaṃ pubbabhāgapaṭilābhaṅgaṃ nāmāti gahitaṃ. Atthato kalyāṇamittaṃ nissāya laddhā sīlasamādhivipassanāvasena cattāro khandhā. Saṅkhārakkhandhotipi vadantiyeva.
маа хзвам̣, аананд̣̇аад̇и, аананд̣̇а, маа звам̣ абхан̣и, б̣ахуссуд̇о д̇вам̣ сзкабадисамбхид̣̇аббад̇д̇о адта варз г̇ахзд̇ваа мам̣ убадтахаси, жад̇уухи ажчарияаб̣бхуд̇ад̇хаммзхи саманнааг̇ад̇о, д̇аад̣̇исасса звам̣ гат̇зд̇ум̣ на ваддад̇и. сагаламзва хид̣̇ам̣, аананд̣̇а, б̣рахмажарияам̣, яад̣̇ид̣̇ам̣ галяаан̣амид̇д̇ад̇аад̇и ид̣̇ам̣ бхаг̇аваа – ‘‘жад̇д̇ааро маг̇г̇аа жад̇д̇аари палаани д̇иссо виж̇ж̇аа ча абхин̃н̃аа саб̣б̣ам̣ галяаан̣амид̇д̇амуулагамзва ход̇ий’’д̇и санд̇хааяааха. ид̣̇аани важийбхзд̣̇знзва гааран̣ам̣ д̣̇ассзнд̇о галяаан̣амид̇д̇ассзд̇анд̇иаад̣̇имааха. д̇ад̇т̇а баадиган̇канд̇и баадиган̇кид̇аб̣б̣ам̣ ижчид̇аб̣б̣ам̣, авассам̣бхаавийд̇и ад̇т̇о.
Mā hevaṃ, ānandāti, ānanda, mā evaṃ abhaṇi, bahussuto tvaṃ sekhapaṭisambhidappatto aṭṭha vare gahetvā maṃ upaṭṭhahasi, catūhi acchariyabbhutadhammehi samannāgato, tādisassa evaṃ kathetuṃ na vaṭṭati. Sakalameva hidaṃ, ānanda, brahmacariyaṃ, yadidaṃ kalyāṇamittatāti idaṃ bhagavā – ‘‘cattāro maggā cattāri phalāni tisso vijjā cha abhiññā sabbaṃ kalyāṇamittamūlakameva hotī’’ti sandhāyāha. Idāni vacībhedeneva kāraṇaṃ dassento kalyāṇamittassetantiādimāha. Tattha pāṭikaṅkhanti pāṭikaṅkhitabbaṃ icchitabbaṃ, avassaṃbhāvīti attho.
ид̇хаад̇и имасмим̣ саасанз. саммаад̣̇идтим̣ бхаавзд̇ийд̇иаад̣̇ийсу адтаннам̣ аад̣̇ибад̣̇аанам̣язва д̇аава аяам̣ сан̇кзбаван̣н̣анаа – саммаа д̣̇ассаналагкан̣аа саммаад̣̇идти. саммаа абхиниробаналагкан̣о саммаасан̇габбо. саммаа бариг̇г̇ахан̣алагкан̣аа саммааваажаа. саммаа самудтаабаналагкан̣о саммаагамманд̇о. саммаа вод̣̇аабаналагкан̣аа саммааааж̇ийво. саммаа баг̇г̇ахалагкан̣о саммаавааяаамо. саммаа убадтааналагкан̣аа саммаасад̇и. саммаа самаад̇хааналагкан̣о саммаасамаад̇хи.
Idhāti imasmiṃ sāsane. Sammādiṭṭhiṃ bhāvetītiādīsu aṭṭhannaṃ ādipadānaṃyeva tāva ayaṃ saṅkhepavaṇṇanā – sammā dassanalakkhaṇā sammādiṭṭhi. Sammā abhiniropanalakkhaṇo sammāsaṅkappo. Sammā pariggahaṇalakkhaṇā sammāvācā. Sammā samuṭṭhāpanalakkhaṇo sammākammanto. Sammā vodāpanalakkhaṇā sammāājīvo. Sammā paggahalakkhaṇo sammāvāyāmo. Sammā upaṭṭhānalakkhaṇā sammāsati. Sammā samādhānalakkhaṇo sammāsamādhi.
д̇зсу згзгасса д̇ийн̣и гижжаани хонд̇и. сзяяаат̇ид̣̇ам̣ – саммаад̣̇идти д̇аава ан̃н̃зхиби ад̇д̇ано бажжанийгагилзсзхи сад̣̇д̇хим̣ мижчаад̣̇идтим̣ баж̇ахад̇и, нирод̇хам̣ аарамман̣ам̣ гарод̇и, самбаяуд̇д̇ад̇хаммз жа бассад̇и д̇аббадижчаад̣̇агамохавид̇хаманавасзна асаммохад̇о. саммаасан̇габбаад̣̇аяоби д̇ат̇зва мижчаасан̇габбаад̣̇ийни жа баж̇аханд̇и, нирод̇хан̃жа аарамман̣ам̣ гаронд̇и. висзсад̇о банзд̇т̇а саммаад̣̇идти сахаж̇аад̇ад̇хаммз саммаа д̣̇ассзд̇и . саммаасан̇габбо сахаж̇аад̇ад̇хаммз абхиниробзд̇и, саммааваажаа саммаа бариг̇г̇ан̣хаад̇и, саммаагамманд̇о саммаа самудтаабзд̇и, саммааааж̇ийво саммаа вод̣̇аабзд̇и , саммаавааяаамо саммаа баг̇г̇ан̣хаад̇и, саммаасад̇и саммаа убадтаабзд̇и, саммаасамаад̇хи саммаа д̣̇ахад̇и.
Tesu ekekassa tīṇi kiccāni honti. Seyyāthidaṃ – sammādiṭṭhi tāva aññehipi attano paccanīkakilesehi saddhiṃ micchādiṭṭhiṃ pajahati, nirodhaṃ ārammaṇaṃ karoti, sampayuttadhamme ca passati tappaṭicchādakamohavidhamanavasena asammohato. Sammāsaṅkappādayopi tatheva micchāsaṅkappādīni ca pajahanti, nirodhañca ārammaṇaṃ karonti. Visesato panettha sammādiṭṭhi sahajātadhamme sammā dasseti . Sammāsaṅkappo sahajātadhamme abhiniropeti, sammāvācā sammā pariggaṇhāti, sammākammanto sammā samuṭṭhāpeti, sammāājīvo sammā vodāpeti , sammāvāyāmo sammā paggaṇhāti, sammāsati sammā upaṭṭhāpeti, sammāsamādhi sammā dahati.
абижзсаа саммаад̣̇идти наама буб̣б̣абхааг̇з наанаакан̣аа наанаарамман̣аа ход̇и, маг̇г̇агаалз згагкан̣аа згаарамман̣аа. гижжад̇о бана саммаад̣̇идти д̣̇угкз н̃аан̣анд̇иаад̣̇ийни жад̇д̇аари наамаани лабхад̇и. саммаасан̇габбаад̣̇аяоби буб̣б̣абхааг̇з наанаакан̣аа наанаарамман̣аа хонд̇и, маг̇г̇агаалз згагкан̣аа згаарамман̣аа. д̇зсу саммаасан̇габбо гижжад̇о нзгкаммасан̇габбод̇иаад̣̇ийни д̇ийн̣и наамаани лабхад̇и. саммааваажаад̣̇аяо д̇аяо вирад̇ияоби хонд̇и жзд̇анааяоби, маг̇г̇агкан̣з бана вирад̇ияова. саммаавааяаамо саммаасад̇ийд̇и ид̣̇амби д̣̇ваяам̣ гижжад̇о саммаббад̇хаанасад̇ибадтаанавасзна жад̇д̇аари наамаани лабхад̇и. саммаасамаад̇хи бана буб̣б̣абхааг̇зби маг̇г̇агкан̣зби саммаасамаад̇хиязва.
Apicesā sammādiṭṭhi nāma pubbabhāge nānākhaṇā nānārammaṇā hoti, maggakāle ekakkhaṇā ekārammaṇā. Kiccato pana sammādiṭṭhi dukkhe ñāṇantiādīni cattāri nāmāni labhati. Sammāsaṅkappādayopi pubbabhāge nānākhaṇā nānārammaṇā honti, maggakāle ekakkhaṇā ekārammaṇā. Tesu sammāsaṅkappo kiccato nekkhammasaṅkappotiādīni tīṇi nāmāni labhati. Sammāvācādayo tayo viratiyopi honti cetanāyopi, maggakkhaṇe pana viratiyova. Sammāvāyāmo sammāsatīti idampi dvayaṃ kiccato sammappadhānasatipaṭṭhānavasena cattāri nāmāni labhati. Sammāsamādhi pana pubbabhāgepi maggakkhaṇepi sammāsamādhiyeva.
звам̣ д̇аава ‘‘саммаад̣̇идти’’нд̇иаад̣̇инаа наязна вуд̇д̇аанам̣ адтаннам̣ аад̣̇ибад̣̇аанам̣язва ад̇т̇аван̣н̣анам̣ н̃ад̇ваа ид̣̇аани бхаавзд̇и вивзганиссид̇анд̇иаад̣̇ийсу звам̣ н̃аад̇аб̣б̣о. бхаавзд̇ийд̇и вад̣дхзд̇и, ад̇д̇ано жид̇д̇асанд̇аанз бунаббунам̣ ж̇анзд̇и, абхиниб̣б̣ад̇д̇зд̇ийд̇и ад̇т̇о. вивзганиссид̇анд̇и вивзгам̣ ниссид̇ам̣, вивзгз ваа ниссид̇анд̇и вивзганиссид̇ам̣. вивзгод̇и вивид̇д̇ад̇аа. вивид̇д̇ад̇аа жааяам̣ д̇ад̣̇ан̇г̇авивзго, вигкамбхана-самужчзд̣̇а-бадиббассад̣̇д̇хи-ниссаран̣авивзгод̇и бан̃жавид̇хо. звамзд̇асмим̣ бан̃жавид̇хз вивзгз. вивзганиссид̇анд̇и д̇ад̣̇ан̇г̇авивзганиссид̇ам̣ самужчзд̣̇авивзганиссид̇ам̣ ниссаран̣авивзганиссид̇ан̃жа саммаад̣̇идтим̣ бхаавзд̇ийд̇и аяамад̇т̇о взд̣̇ид̇аб̣б̣о. д̇ат̇аа хи аяам̣ арияамаг̇г̇абхааванаануяуд̇д̇о яог̇ий вибассанаагкан̣з гижжад̇о д̇ад̣̇ан̇г̇авивзганиссид̇ам̣, аж̇жхаасаяад̇о ниссаран̣авивзганиссид̇ам̣, маг̇г̇агаалз бана гижжад̇о самужчзд̣̇авивзганиссид̇ам̣, аарамман̣ад̇о ниссаран̣авивзганиссид̇ам̣ саммаад̣̇идтим̣ бхаавзд̇и. зса наяо вирааг̇аниссид̇аад̣̇ийсу. вивзгад̇т̇аа зва хи вирааг̇аад̣̇аяо .
Evaṃ tāva ‘‘sammādiṭṭhi’’ntiādinā nayena vuttānaṃ aṭṭhannaṃ ādipadānaṃyeva atthavaṇṇanaṃ ñatvā idāni bhāveti vivekanissitantiādīsu evaṃ ñātabbo. Bhāvetīti vaḍḍheti, attano cittasantāne punappunaṃ janeti, abhinibbattetīti attho. Vivekanissitanti vivekaṃ nissitaṃ, viveke vā nissitanti vivekanissitaṃ. Vivekoti vivittatā. Vivittatā cāyaṃ tadaṅgaviveko, vikkhambhana-samuccheda-paṭippassaddhi-nissaraṇavivekoti pañcavidho. Evametasmiṃ pañcavidhe viveke. Vivekanissitanti tadaṅgavivekanissitaṃ samucchedavivekanissitaṃ nissaraṇavivekanissitañca sammādiṭṭhiṃ bhāvetīti ayamattho veditabbo. Tathā hi ayaṃ ariyamaggabhāvanānuyutto yogī vipassanākkhaṇe kiccato tadaṅgavivekanissitaṃ, ajjhāsayato nissaraṇavivekanissitaṃ, maggakāle pana kiccato samucchedavivekanissitaṃ, ārammaṇato nissaraṇavivekanissitaṃ sammādiṭṭhiṃ bhāveti. Esa nayo virāganissitādīsu. Vivekatthā eva hi virāgādayo .
гзвалан̃жзд̇т̇а воссаг̇г̇о д̣̇увид̇хо барижжааг̇авоссаг̇г̇о жа багканд̣̇анавоссаг̇г̇о жаад̇и. д̇ад̇т̇а барижжааг̇авоссаг̇г̇од̇и вибассанаагкан̣з жа д̇ад̣̇ан̇г̇авасзна, маг̇г̇агкан̣з жа самужчзд̣̇авасзна гилзсаббахаанам̣. багканд̣̇анавоссаг̇г̇од̇и вибассанаагкан̣з д̇анниннабхаавзна, маг̇г̇агкан̣з бана аарамман̣агаран̣зна ниб̣б̣аанабагканд̣̇анам̣, д̇ад̣̇убхаяамби имасмим̣ логияалогуд̇д̇арамиссагз ад̇т̇аван̣н̣анаанаяз ваддад̇и. д̇ат̇аа хи аяам̣ саммаад̣̇идти яат̇аавуд̇д̇зна багаарзна гилзсз жа барижжаж̇ад̇и, ниб̣б̣аанан̃жа багканд̣̇ад̇и.
Kevalañcettha vossaggo duvidho pariccāgavossaggo ca pakkhandanavossaggo cāti. Tattha pariccāgavossaggoti vipassanākkhaṇe ca tadaṅgavasena, maggakkhaṇe ca samucchedavasena kilesappahānaṃ. Pakkhandanavossaggoti vipassanākkhaṇe tanninnabhāvena, maggakkhaṇe pana ārammaṇakaraṇena nibbānapakkhandanaṃ, tadubhayampi imasmiṃ lokiyalokuttaramissake atthavaṇṇanānaye vaṭṭati. Tathā hi ayaṃ sammādiṭṭhi yathāvuttena pakārena kilese ca pariccajati, nibbānañca pakkhandati.
воссаг̇г̇абарин̣ааминд̇и иминаа бана сагалзна важанзна воссаг̇г̇ад̇т̇ам̣ барин̣аманд̇ам̣ барин̣ад̇ан̃жа, барибажжанд̇ам̣ барибагган̃жаад̇и ид̣̇ам̣ вуд̇д̇ам̣ ход̇и. аяан̃хи арияамаг̇г̇абхааванаануяуд̇д̇о бхигку яат̇аа саммаад̣̇идти гилзсабарижжааг̇авоссаг̇г̇ад̇т̇ам̣ ниб̣б̣аанабагканд̣̇анавоссаг̇г̇ад̇т̇ан̃жа барибажжад̇и, яат̇аа жа барибаггаа ход̇и, д̇ат̇аа нам̣ бхаавзд̇ийд̇и. зса наяо сзсамаг̇г̇ан̇г̇зсу.
Vossaggapariṇāminti iminā pana sakalena vacanena vossaggatthaṃ pariṇamantaṃ pariṇatañca, paripaccantaṃ paripakkañcāti idaṃ vuttaṃ hoti. Ayañhi ariyamaggabhāvanānuyutto bhikkhu yathā sammādiṭṭhi kilesapariccāgavossaggatthaṃ nibbānapakkhandanavossaggatthañca paripaccati, yathā ca paripakkā hoti, tathā naṃ bhāvetīti. Esa nayo sesamaggaṅgesu.
ааг̇аммаад̇и аараб̣бха санд̇хааяа бадижжа. ж̇аад̇ид̇хаммаад̇и ж̇аад̇исабхааваа ж̇аад̇ибагад̇игаа. д̇асмаад̇и яасмаа сагало арияамаг̇г̇оби галяаан̣амид̇д̇ам̣ ниссааяа лаб̣бхад̇и, д̇асмаа. ханд̣̇аад̇и вавассаг̇г̇ад̇т̇з нибаад̇о. аббамаад̣̇ам̣ басам̣санд̇ийд̇и аббамаад̣̇ам̣ ван̣н̣аяанд̇и, д̇асмаа аббамаад̣̇о гаад̇аб̣б̣о. ад̇т̇аабхисамаяаад̇и ад̇т̇абадилаабхаа. адтамам̣.
Āgammāti ārabbha sandhāya paṭicca. Jātidhammāti jātisabhāvā jātipakatikā. Tasmāti yasmā sakalo ariyamaggopi kalyāṇamittaṃ nissāya labbhati, tasmā. Handāti vavassaggatthe nipāto. Appamādaṃ pasaṃsantīti appamādaṃ vaṇṇayanti, tasmā appamādo kātabbo. Atthābhisamayāti atthapaṭilābhā. Aṭṭhamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 8. галяаан̣амид̇д̇асуд̇д̇ам̣ • 8. Kalyāṇamittasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 8. галяаан̣амид̇д̇асуд̇д̇аван̣н̣анаа • 8. Kalyāṇamittasuttavaṇṇanā
