| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
8. கல்யாணமித்ததாதி³வக்³க³வண்ணனா
8. Kalyāṇamittatādivaggavaṇṇanā
71. அட்ட²மஸ்ஸ பட²மே கல்யாணமித்ததாதி கல்யாணா மித்தா அஸ்ஸாதி கல்யாணமித்தோ, தஸ்ஸ பா⁴வோ கல்யாணமித்ததா. ஸேஸங் வுத்தபடிபக்க²னயேன வேதி³தப்³ப³ங்.
71. Aṭṭhamassa paṭhame kalyāṇamittatāti kalyāṇā mittā assāti kalyāṇamitto, tassa bhāvo kalyāṇamittatā. Sesaṃ vuttapaṭipakkhanayena veditabbaṃ.
72-73. து³தியே அனுயோகோ³தி யோகோ³ பயோகோ³. அனநுயோகோ³தி அயோகோ³ அப்பயோகோ³. அனுயோகா³தி அனுயோகே³ன. அனநுயோகா³தி அனநுயோகே³ன. குஸலானங் த⁴ம்மானந்தி சதுபூ⁴மககுஸலத⁴ம்மானங். ததியங் உத்தானத்த²மேவ.
72-73. Dutiye anuyogoti yogo payogo. Ananuyogoti ayogo appayogo. Anuyogāti anuyogena. Ananuyogāti ananuyogena. Kusalānaṃ dhammānanti catubhūmakakusaladhammānaṃ. Tatiyaṃ uttānatthameva.
74. சதுத்தே² பொ³ஜ்ஜ²ங்கா³தி பு³ஜ்ஜ²னகஸத்தஸ்ஸ அங்க³பூ⁴தா ஸத்த த⁴ம்மா. யாய வா த⁴ம்மஸாமக்³கி³யா ஸோ பு³ஜ்ஜ²தி, ஸம்மோஹனித்³தா³தோ வா வுட்டா²தி, சதுஸச்சத⁴ம்மங் வா ஸச்சி²கரோதி. தஸ்ஸா போ³தி⁴யா அங்க³பூ⁴தாதிபி பொ³ஜ்ஜ²ங்கா³. ‘‘பொ³ஜ்ஜ²ங்கா³தி கேனட்டே²ன பொ³ஜ்ஜ²ங்கா³? பு³ஜ்ஜ²ந்தீதி பொ³ஜ்ஜ²ங்கா³, அனுபு³ஜ்ஜ²ந்தீதி பொ³ஜ்ஜ²ங்கா³, படிபு³ஜ்ஜ²ந்தீதி பொ³ஜ்ஜ²ங்கா³, ஸம்பு³ஜ்ஜ²ந்தீதி பொ³ஜ்ஜ²ங்கா³, போ³தா⁴ய ஸங்வத்தந்தீதி பொ³ஜ்ஜ²ங்கா³’’தி (படி॰ ம॰ 2.17). ஏவங் பனேதங் பத³ங் விப⁴த்தமேவ.
74. Catutthe bojjhaṅgāti bujjhanakasattassa aṅgabhūtā satta dhammā. Yāya vā dhammasāmaggiyā so bujjhati, sammohaniddāto vā vuṭṭhāti, catusaccadhammaṃ vā sacchikaroti. Tassā bodhiyā aṅgabhūtātipi bojjhaṅgā. ‘‘Bojjhaṅgāti kenaṭṭhena bojjhaṅgā? Bujjhantīti bojjhaṅgā, anubujjhantīti bojjhaṅgā, paṭibujjhantīti bojjhaṅgā, sambujjhantīti bojjhaṅgā, bodhāya saṃvattantīti bojjhaṅgā’’ti (paṭi. ma. 2.17). Evaṃ panetaṃ padaṃ vibhattameva.
75. பஞ்சமே பா⁴வனாபாரிபூரிங் க³ச்ச²ந்தீதி இமினா பதே³ன பொ³ஜ்ஜ²ங்கா³னங் யாதா²வஸரஸபூ⁴மி நாம கதி²தா . ஸா பனேஸா சதுப்³பி³தா⁴ ஹோதி – விபஸ்ஸனா, விபஸ்ஸனாபாத³கஜ்ஜா²னங், மக்³கோ³, ப²லந்தி. தத்த² விபஸ்ஸனாய உப்பஜ்ஜனகாலே பொ³ஜ்ஜ²ங்கா³ காமாவசரா ஹொந்தி, விபஸ்ஸனாபாத³கஜ்ஜா²னம்ஹி உப்பஜ்ஜனகாலே ரூபாவசரஅரூபாவசரா, மக்³க³ப²லேஸு உப்பஜ்ஜனகாலே லோகுத்தரா. இதி இமஸ்மிங் ஸுத்தே பொ³ஜ்ஜ²ங்கா³ சதுபூ⁴மகா கதி²தா.
75. Pañcame bhāvanāpāripūriṃ gacchantīti iminā padena bojjhaṅgānaṃ yāthāvasarasabhūmi nāma kathitā . Sā panesā catubbidhā hoti – vipassanā, vipassanāpādakajjhānaṃ, maggo, phalanti. Tattha vipassanāya uppajjanakāle bojjhaṅgā kāmāvacarā honti, vipassanāpādakajjhānamhi uppajjanakāle rūpāvacaraarūpāvacarā, maggaphalesu uppajjanakāle lokuttarā. Iti imasmiṃ sutte bojjhaṅgā catubhūmakā kathitā.
76. ச²ட்ட²ஸ்ஸ அட்டு²ப்பத்திகோ நிக்கே²போ. அட்டு²ப்பத்தியங் ஹேதங் நிக்கி²த்தங், ஸம்ப³ஹுலா கிர பி⁴க்கூ² த⁴ம்மஸபா⁴யங் ஸன்னிஸின்னா. தேஸங் அந்தரே ப³ந்து⁴லமல்லஸேனாபதிங் ஆரப்³ப⁴ அயங் கதா² உத³பாதி³, ‘‘ஆவுஸோ, அஸுகங் நாம குலங் புப்³பே³ ப³ஹுஞாதிகங் அஹோஸி ப³ஹுபக்க²ங், இதா³னி அப்பஞாதிகங் அப்பபக்க²ங் ஜாத’’ந்தி. அத² ப⁴க³வா தேஸங் சித்தாசாரங் ஞத்வா ‘‘மயி க³தே மஹதீ தே³ஸனா ப⁴விஸ்ஸதீ’’தி ஞத்வா க³ந்த⁴குடிதோ நிக்க²ம்ம த⁴ம்மஸபா⁴யங் பஞ்ஞத்தவரபு³த்³தா⁴ஸனே நிஸீதி³த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி ஆஹ. ப⁴க³வா அஞ்ஞா கா³மனிக³மாதி³கதா² நத்தி², அஸுகங் நாம குலங் புப்³பே³ ப³ஹுஞாதிகங் அஹோஸி ப³ஹுபக்க²ங், இதா³னி அப்பஞாதிகங் அப்பபக்க²ங் ஜாதந்தி வத³ந்தா நிஸின்னம்ஹாதி. ஸத்தா² இமிஸ்ஸா அட்டு²ப்பத்தியா அப்பமத்திகா ஏஸா, பி⁴க்க²வே, பரிஹானீதி இத³ங் ஸுத்தங் ஆரபி⁴.
76. Chaṭṭhassa aṭṭhuppattiko nikkhepo. Aṭṭhuppattiyaṃ hetaṃ nikkhittaṃ, sambahulā kira bhikkhū dhammasabhāyaṃ sannisinnā. Tesaṃ antare bandhulamallasenāpatiṃ ārabbha ayaṃ kathā udapādi, ‘‘āvuso, asukaṃ nāma kulaṃ pubbe bahuñātikaṃ ahosi bahupakkhaṃ, idāni appañātikaṃ appapakkhaṃ jāta’’nti. Atha bhagavā tesaṃ cittācāraṃ ñatvā ‘‘mayi gate mahatī desanā bhavissatī’’ti ñatvā gandhakuṭito nikkhamma dhammasabhāyaṃ paññattavarabuddhāsane nisīditvā ‘‘kāya nuttha, bhikkhave, etarahi kathāya sannisinnā’’ti āha. Bhagavā aññā gāmanigamādikathā natthi, asukaṃ nāma kulaṃ pubbe bahuñātikaṃ ahosi bahupakkhaṃ, idāni appañātikaṃ appapakkhaṃ jātanti vadantā nisinnamhāti. Satthā imissā aṭṭhuppattiyā appamattikā esā, bhikkhave, parihānīti idaṃ suttaṃ ārabhi.
தத்த² அப்பமத்திகாதி பரித்தா பரித்தப்பமாணா. ஏதாய ஹி பரிஹானியா ஸக்³க³தோ வா மக்³க³தோ வா பரிஹானி நாம நத்தி², தி³ட்ட²த⁴ம்மிகபரிஹானிமத்தமேவ ஏதந்தி ஆஹ. ஏதங் பதிகிட்ட²ந்தி ஏதங் பச்சி²மங் ஏதங் லாமகங். யதி³த³ங் பஞ்ஞாபரிஹானீதி யா ஏஸா மம ஸாஸனே கம்மஸ்ஸகதபஞ்ஞாய ஜா²னபஞ்ஞாய விபஸ்ஸனாபஞ்ஞாய மக்³க³பஞ்ஞாய ப²லபஞ்ஞாய ச பரிஹானி, ஏஸா பச்சி²மா, ஏஸா லாமகா, ஏஸா ச²ட்³ட³னீயாதி அத்தோ².
Tattha appamattikāti parittā parittappamāṇā. Etāya hi parihāniyā saggato vā maggato vā parihāni nāma natthi, diṭṭhadhammikaparihānimattameva etanti āha. Etaṃ patikiṭṭhanti etaṃ pacchimaṃ etaṃ lāmakaṃ. Yadidaṃ paññāparihānīti yā esā mama sāsane kammassakatapaññāya jhānapaññāya vipassanāpaññāya maggapaññāya phalapaññāya ca parihāni, esā pacchimā, esā lāmakā, esā chaḍḍanīyāti attho.
77. ஸத்தமம்பி அட்டு²ப்பத்தியமேவ கதி²தங். த⁴ம்மஸபா⁴யங் கிர நிஸின்னேஸு பி⁴க்கூ²ஸு ஏகச்சே ஏவங் ஆஹங்ஸு – ‘‘அஸுகங் நாம குலங் புப்³பே³ அப்பஞாதிகங் அப்பபக்க²ங் அஹோஸி, இதா³னி தங் ப³ஹுஞாதிகங் ப³ஹுபக்க²ங் ஜாத’’ந்தி. கங் ஸந்தா⁴ய ஏவமாஹங்ஸூதி? விஸாக²ங் உபாஸிகங் வேஸாலிகே ச லிச்ச²வீ. ஸத்தா² தேஸங் சித்தாசாரங் ஞத்வா புரிமனயேனேவ ஆக³ந்த்வா த⁴ம்மாஸனே நிஸின்னோ ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி². தே யதா²பூ⁴தங் கத²யிங்ஸு. ஸத்தா² இமிஸ்ஸா அட்டு²ப்பத்தியா இமங் ஸுத்தங் ஆரபி⁴. தத்த² அப்பமத்திகாதி தங் ஸம்பத்திங் நிஸ்ஸாய ஸக்³க³ங் வா மக்³க³ங் வா ஸம்பத்தானங் அபா⁴வதோ பரித்தா. யதி³த³ங் பஞ்ஞாவுத்³தீ⁴தி கம்மஸ்ஸகதபஞ்ஞாதீ³னங் வுத்³தி⁴. தஸ்மாதி யஸ்மா ஞாதீனங் வுத்³தி⁴ நாம தி³ட்ட²த⁴ம்மிகமத்தா அப்பா பரித்தா, ஸா ஸக்³க³ங் வா மக்³க³ங் வா பாபேதுங் அஸமத்தா², தஸ்மா. பஞ்ஞாவுத்³தி⁴யாதி கம்மஸ்ஸகதாதி³பஞ்ஞாய வுத்³தி⁴யா.
77. Sattamampi aṭṭhuppattiyameva kathitaṃ. Dhammasabhāyaṃ kira nisinnesu bhikkhūsu ekacce evaṃ āhaṃsu – ‘‘asukaṃ nāma kulaṃ pubbe appañātikaṃ appapakkhaṃ ahosi, idāni taṃ bahuñātikaṃ bahupakkhaṃ jāta’’nti. Kaṃ sandhāya evamāhaṃsūti? Visākhaṃ upāsikaṃ vesālike ca licchavī. Satthā tesaṃ cittācāraṃ ñatvā purimanayeneva āgantvā dhammāsane nisinno ‘‘kāya nuttha, bhikkhave, etarahi kathāya sannisinnā’’ti pucchi. Te yathābhūtaṃ kathayiṃsu. Satthā imissā aṭṭhuppattiyā imaṃ suttaṃ ārabhi. Tattha appamattikāti taṃ sampattiṃ nissāya saggaṃ vā maggaṃ vā sampattānaṃ abhāvato parittā. Yadidaṃ paññāvuddhīti kammassakatapaññādīnaṃ vuddhi. Tasmāti yasmā ñātīnaṃ vuddhi nāma diṭṭhadhammikamattā appā parittā, sā saggaṃ vā maggaṃ vā pāpetuṃ asamatthā, tasmā. Paññāvuddhiyāti kammassakatādipaññāya vuddhiyā.
78. அட்ட²மம்பி அட்டு²ப்பத்தியமேவ கதி²தங். ஸம்ப³ஹுலா கிர பி⁴க்கூ² த⁴ம்மஸபா⁴யங் ஸன்னிஸின்னா மஹாத⁴னஸெட்டி²புத்தங் ஆரப்³ப⁴ ‘‘அஸுகங் நாம குலங் புப்³பே³ மஹாபோ⁴க³ங் மஹாஹிரஞ்ஞஸுவண்ணங் அஹோஸி, தங் இதா³னி அப்பபோ⁴க³ங் ஜாத’’ந்தி கத²யிங்ஸு. ஸத்தா² புரிமனயேனேவ ஆக³ந்த்வா தேஸங் வசனங் ஸுத்வா இமங் ஸுத்தங் ஆரபி⁴.
78. Aṭṭhamampi aṭṭhuppattiyameva kathitaṃ. Sambahulā kira bhikkhū dhammasabhāyaṃ sannisinnā mahādhanaseṭṭhiputtaṃ ārabbha ‘‘asukaṃ nāma kulaṃ pubbe mahābhogaṃ mahāhiraññasuvaṇṇaṃ ahosi, taṃ idāni appabhogaṃ jāta’’nti kathayiṃsu. Satthā purimanayeneva āgantvā tesaṃ vacanaṃ sutvā imaṃ suttaṃ ārabhi.
79. நவமம்பி அட்டு²ப்பத்தியமேவ வுத்தங். த⁴ம்மஸபா⁴யங் கிர ஸன்னிஸின்னா பி⁴க்கூ² காகவலியஸெட்டி²ஞ்ச புண்ணஸெட்டி²ஞ்ச ஆரப்³ப⁴ ‘‘அஸுகங் நாம குலங் புப்³பே³ அப்பபோ⁴க³ங் அஹோஸி, தங் இதா³னி மஹாபோ⁴க³ங் ஜாத’’ந்தி கத²யிங்ஸு. ஸத்தா² புரிமனயேனேவ ஆக³ந்த்வா தேஸங் வசனங் ஸுத்வா இமங் ஸுத்தங் ஆரபி⁴. ஸேஸங் இமேஸு த்³வீஸுபி ஹெட்டா² வுத்தனயேனேவ வேதி³தப்³ப³ங்.
79. Navamampi aṭṭhuppattiyameva vuttaṃ. Dhammasabhāyaṃ kira sannisinnā bhikkhū kākavaliyaseṭṭhiñca puṇṇaseṭṭhiñca ārabbha ‘‘asukaṃ nāma kulaṃ pubbe appabhogaṃ ahosi, taṃ idāni mahābhogaṃ jāta’’nti kathayiṃsu. Satthā purimanayeneva āgantvā tesaṃ vacanaṃ sutvā imaṃ suttaṃ ārabhi. Sesaṃ imesu dvīsupi heṭṭhā vuttanayeneva veditabbaṃ.
80. த³ஸமம்பி அட்டு²ப்பத்தியங் வுத்தங். த⁴ம்மஸபா⁴யங் கிர பி⁴க்கூ² கோஸலமஹாராஜானங் ஆரப்³ப⁴ ‘‘அஸுகங் நாம குலங் புப்³பே³ மஹாயஸங் மஹாபரிவாரங் அஹோஸி, இதா³னி அப்பயஸங் அப்பபரிவாரங் ஜாத’’ந்தி கத²யிங்ஸு. ப⁴க³வா புரிமனயேனேவ ஆக³ந்த்வா தேஸங் வசனங் ஸுத்வா இமங் த⁴ம்மதே³ஸனங் ஆரபி⁴. ஸேஸங் வுத்தனயேனேவ வேதி³தப்³ப³ந்தி.
80. Dasamampi aṭṭhuppattiyaṃ vuttaṃ. Dhammasabhāyaṃ kira bhikkhū kosalamahārājānaṃ ārabbha ‘‘asukaṃ nāma kulaṃ pubbe mahāyasaṃ mahāparivāraṃ ahosi, idāni appayasaṃ appaparivāraṃ jāta’’nti kathayiṃsu. Bhagavā purimanayeneva āgantvā tesaṃ vacanaṃ sutvā imaṃ dhammadesanaṃ ārabhi. Sesaṃ vuttanayeneva veditabbanti.
கல்யாணமித்ததாதி³வக்³க³வண்ணனா.
Kalyāṇamittatādivaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. கல்யாணமித்தாதி³வக்³கோ³ • 8. Kalyāṇamittādivaggo
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8. கல்யாணமித்தாதி³வக்³க³வண்ணனா • 8. Kalyāṇamittādivaggavaṇṇanā
