| Library / Tipiṭaka / তিপিটক • Tipiṭaka / ইতিৰুত্তক-অট্ঠকথা • Itivuttaka-aṭṭhakathā |
৮. কল্যাণসীলসুত্তৰণ্ণনা
8. Kalyāṇasīlasuttavaṇṇanā
৯৭. অট্ঠমে কল্যাণসীলোতি সুন্দরসীলো, পসত্থসীলো, পরিপুণ্ণসীলো। তত্থ সীলপারিপূরী দ্ৰীহি কারণেহি হোতি সম্মদেৰ সীলৰিপত্তিযা আদীনৰদস্সনেন, সীলসম্পত্তিযা চ আনিসংসদস্সনেন। ইধ পন সব্বপরিবন্ধৰিপ্পমুত্তস্স সব্বাকারপরিপুণ্ণস্স মগ্গসীলস্স ফলসীলস্স চ ৰসেন কল্যাণতা ৰেদিতব্বা। কল্যাণধম্মোতি সব্বে বোধিপক্খিযধম্মা অধিপ্পেতা, তস্মা কল্যাণা সতিপট্ঠানাদিবোধিপক্খিযধম্মা এতস্সাতি কল্যাণধম্মো। কল্যাণপঞ্ঞোতি চ মগ্গফলপঞ্ঞাৰসেনেৰ কল্যাণপঞ্ঞো। লোকুত্তরা এৰ হি সীলাদিধম্মা একন্তকল্যাণা নাম অকুপ্পসভাৰত্তা। কেচি পন ‘‘চতুপারিসুদ্ধিসীলৰসেন কল্যাণসীলো, ৰিপস্সনামগ্গধম্মৰসেন কল্যাণধম্মো, মগ্গফলপঞ্ঞাৰসেন কল্যাণপঞ্ঞো’’তি ৰদন্তি। অসেক্খা এৰ তে সীলধম্মপঞ্ঞাতি একে। অপরে পন ভণন্তি – সোতাপন্নসকদাগামীনং মগ্গফলসীলং কল্যাণসীলং নাম, তস্মা ‘‘কল্যাণসীলো’’তি ইমিনা সোতাপন্নো সকদাগামী চ গহিতা হোন্তি। তে হি সীলেসু পরিপূরকারিনো নাম। অনাগামিমগ্গফলধম্মা অগ্গমগ্গধম্মা চ কল্যাণধম্মা নাম। তত্থ হি বোধিপক্খিযধম্মা ভাৰনাপারিপূরিং গচ্ছন্তি। তস্মা ‘‘কল্যাণধম্মো’’তি ইমিনা ততিযমগ্গট্ঠতো পট্ঠায তযো অরিযা গহিতা হোন্তি। পঞ্ঞাকিচ্চস্স মত্থকপ্পত্তিযা অগ্গফলে পঞ্ঞা কল্যাণপঞ্ঞা নাম, তস্মা পঞ্ঞাৰেপুল্লপ্পত্তো অরহা ‘‘কল্যাণপঞ্ঞো’’তি ৰুত্তো। এৰমেৰ পুগ্গলা গহিতা হোন্তীতি। কিং ইমিনা পপঞ্চেন? অগ্গমগ্গফলধম্মা ইধ কল্যাণসীলাদযো ৰুত্তাতি অযমম্হাকং খন্তি। ধম্মৰিভাগেন হি অযং পুগ্গলৰিভাগো, ন ধম্মৰিভাগোতি।
97. Aṭṭhame kalyāṇasīloti sundarasīlo, pasatthasīlo, paripuṇṇasīlo. Tattha sīlapāripūrī dvīhi kāraṇehi hoti sammadeva sīlavipattiyā ādīnavadassanena, sīlasampattiyā ca ānisaṃsadassanena. Idha pana sabbaparibandhavippamuttassa sabbākāraparipuṇṇassa maggasīlassa phalasīlassa ca vasena kalyāṇatā veditabbā. Kalyāṇadhammoti sabbe bodhipakkhiyadhammā adhippetā, tasmā kalyāṇā satipaṭṭhānādibodhipakkhiyadhammā etassāti kalyāṇadhammo. Kalyāṇapaññoti ca maggaphalapaññāvaseneva kalyāṇapañño. Lokuttarā eva hi sīlādidhammā ekantakalyāṇā nāma akuppasabhāvattā. Keci pana ‘‘catupārisuddhisīlavasena kalyāṇasīlo, vipassanāmaggadhammavasena kalyāṇadhammo, maggaphalapaññāvasena kalyāṇapañño’’ti vadanti. Asekkhā eva te sīladhammapaññāti eke. Apare pana bhaṇanti – sotāpannasakadāgāmīnaṃ maggaphalasīlaṃ kalyāṇasīlaṃ nāma, tasmā ‘‘kalyāṇasīlo’’ti iminā sotāpanno sakadāgāmī ca gahitā honti. Te hi sīlesu paripūrakārino nāma. Anāgāmimaggaphaladhammā aggamaggadhammā ca kalyāṇadhammā nāma. Tattha hi bodhipakkhiyadhammā bhāvanāpāripūriṃ gacchanti. Tasmā ‘‘kalyāṇadhammo’’ti iminā tatiyamaggaṭṭhato paṭṭhāya tayo ariyā gahitā honti. Paññākiccassa matthakappattiyā aggaphale paññā kalyāṇapaññā nāma, tasmā paññāvepullappatto arahā ‘‘kalyāṇapañño’’ti vutto. Evameva puggalā gahitā hontīti. Kiṃ iminā papañcena? Aggamaggaphaladhammā idha kalyāṇasīlādayo vuttāti ayamamhākaṃ khanti. Dhammavibhāgena hi ayaṃ puggalavibhāgo, na dhammavibhāgoti.
কেৰলীতি এত্থ কেৰলং ৰুচ্চতি কেনচি অৰোমিস্সকতায সব্বসঙ্খতৰিৰিত্তং নিব্বানং, তস্স অধিগতত্তা অরহা কেৰলী। অথ ৰা পহানভাৰনাপারিপূরিযা পরিযোসানঅনৰজ্জধম্মপারিপূরিযা চ কল্যাণকট্ঠেন অব্যাসেকসুখতায চ কেৰলং অরহত্তং, তদধিগমেন কেৰলী খীণাসৰো। মগ্গব্রহ্মচরিযৰাসং ৰসিত্ৰা পরিযোসাপেত্ৰা ঠিতোতি ৰুসিতৰা। উত্তমেহি অগ্গভূতেহি ৰা অসেক্খধম্মেহি সমন্নাগতত্তা ‘‘উত্তমপুরিসো’’তি ৰুচ্চতি।
Kevalīti ettha kevalaṃ vuccati kenaci avomissakatāya sabbasaṅkhatavivittaṃ nibbānaṃ, tassa adhigatattā arahā kevalī. Atha vā pahānabhāvanāpāripūriyā pariyosānaanavajjadhammapāripūriyā ca kalyāṇakaṭṭhena abyāsekasukhatāya ca kevalaṃ arahattaṃ, tadadhigamena kevalī khīṇāsavo. Maggabrahmacariyavāsaṃ vasitvā pariyosāpetvā ṭhitoti vusitavā. Uttamehi aggabhūtehi vā asekkhadhammehi samannāgatattā ‘‘uttamapuriso’’ti vuccati.
সীলৰাতি এত্থ কেনট্ঠেন সীলং? সীলনট্ঠেন সীলং। কিমিদং সীলনং নাম? সমাধানং, সুসীল্যৰসেন কাযকম্মাদীনং অৰিপ্পকিণ্ণতাতি অত্থো। অথ ৰা উপধারণং, ঝানাদিকুসলধম্মানং পতিট্ঠানৰসেন আধারভাৰোতি অত্থো। তস্মা সীলতি, সীলেতীতি ৰা সীলং। অযং তাৰ সদ্দলক্খণনযেন সীলট্ঠো। অপরে পন ‘‘সিরট্ঠো সীলট্ঠো, সীতলট্ঠো সীলট্ঠো, সিৰট্ঠো সীলট্ঠো’’তি নিরুত্তিনযেন অত্থং ৰণ্ণযন্তি। তযিদং পারিপূরিতো অতিসযতো ৰা সীলং অস্স অত্থীতি সীলৰা, চতুপারিসুদ্ধিসীলৰসেন সীলসম্পন্নোতি অত্থো। তত্থ যং জেট্ঠকসীলং , তং ৰিত্থারেত্ৰা দস্সেতুং ‘‘পাতিমোক্খসংৰরসংৰুতো’’তিআদি ৰুত্তন্তি একচ্চানং আচরিযানং অধিপ্পাযো।
Sīlavāti ettha kenaṭṭhena sīlaṃ? Sīlanaṭṭhena sīlaṃ. Kimidaṃ sīlanaṃ nāma? Samādhānaṃ, susīlyavasena kāyakammādīnaṃ avippakiṇṇatāti attho. Atha vā upadhāraṇaṃ, jhānādikusaladhammānaṃ patiṭṭhānavasena ādhārabhāvoti attho. Tasmā sīlati, sīletīti vā sīlaṃ. Ayaṃ tāva saddalakkhaṇanayena sīlaṭṭho. Apare pana ‘‘siraṭṭho sīlaṭṭho, sītalaṭṭho sīlaṭṭho, sivaṭṭho sīlaṭṭho’’ti niruttinayena atthaṃ vaṇṇayanti. Tayidaṃ pāripūrito atisayato vā sīlaṃ assa atthīti sīlavā, catupārisuddhisīlavasena sīlasampannoti attho. Tattha yaṃ jeṭṭhakasīlaṃ , taṃ vitthāretvā dassetuṃ ‘‘pātimokkhasaṃvarasaṃvuto’’tiādi vuttanti ekaccānaṃ ācariyānaṃ adhippāyo.
অপরেন পন ভণন্তি – উভযত্থাপি পাতিমোক্খসংৰরো ভগৰতা ৰুত্তো। পাতিমোক্খসংৰরো এৰ হি সীলং, ইতরেসু ইন্দ্রিযসংৰরো ছদ্ৰাররক্খণমত্তমেৰ, আজীৰপারিসুদ্ধি ধম্মেন পচ্চযুপ্পাদনমত্তমেৰ, পচ্চযসন্নিস্সিতং পটিলদ্ধপচ্চযে ‘‘ইদমত্থ’’ন্তি পচ্চৰেক্খিত্ৰা পরিভুঞ্জনমত্তমেৰ। নিপ্পরিযাযেন পাতিমোক্খসংৰরোৰ সীলং। যস্স সো ভিন্নো, সো সীসচ্ছিন্নো পুরিসো ৰিয হত্থপাদে ‘‘সেসানি রক্খিস্সতী’’তি ন ৰত্তব্বো। যস্স পন সো অরোগো, অচ্ছিন্নসীসো ৰিয পুরিসো, তানি পুন পাকতিকানি কত্ৰা রক্খিতুং সক্কোতি। তস্মা সীলৰাতি ইমিনা পাতিমোক্খসীলমেৰ উদ্দিসিত্ৰা তং ৰিত্থারেতুং ‘‘পাতিমোক্খসংৰরসংৰুতো’’তিআদি ৰুত্তন্তি।
Aparena pana bhaṇanti – ubhayatthāpi pātimokkhasaṃvaro bhagavatā vutto. Pātimokkhasaṃvaro eva hi sīlaṃ, itaresu indriyasaṃvaro chadvārarakkhaṇamattameva, ājīvapārisuddhi dhammena paccayuppādanamattameva, paccayasannissitaṃ paṭiladdhapaccaye ‘‘idamattha’’nti paccavekkhitvā paribhuñjanamattameva. Nippariyāyena pātimokkhasaṃvarova sīlaṃ. Yassa so bhinno, so sīsacchinno puriso viya hatthapāde ‘‘sesāni rakkhissatī’’ti na vattabbo. Yassa pana so arogo, acchinnasīso viya puriso, tāni puna pākatikāni katvā rakkhituṃ sakkoti. Tasmā sīlavāti iminā pātimokkhasīlameva uddisitvā taṃ vitthāretuṃ ‘‘pātimokkhasaṃvarasaṃvuto’’tiādi vuttanti.
তত্থ পাতিমোক্খন্তি সিক্খাপদসীলং। তঞ্হি যো নং পাতি রক্খতি, তং মোক্খেতি মোচেতি আপাযিকাদীহি দুক্খেহীতি পাতিমোক্খং। সংৰরণং সংৰরো, কাযৰাচাহি অৰীতিক্কমো। পাতিমোক্খমেৰ সংৰরো পাতিমোক্খসংৰরো, তেন সংৰুতো পিহিতকাযৰাচোতি পাতিমোক্খসংৰরসংৰুতো। ইদমস্স তস্মিং সীলে পতিট্ঠিতভাৰপরিদীপনং। ৰিহরতীতি তদনুরূপৰিহারসমঙ্গিভাৰপরিদীপনং। আচারগোচরসম্পন্নোতি হেট্ঠা পাতিমোক্খসংৰরস্স, উপরি ৰিসেসানুযোগস্স চ উপকারকধম্মপরিদীপনং। অণুমত্তেসু ৰজ্জেসু ভযদস্সাৰীতি পাতিমোক্খসীলতো অচৰনধম্মতাপরিদীপনং। সমাদাযাতি সিক্খাপদানং অনৰসেসতো আদানপরিদীপনং। সিক্খতীতি সিক্খায সমঙ্গিভাৰপরিদীপনং। সিক্খাপদেসূতি সিক্খিতব্বধম্মপরিদীপনং।
Tattha pātimokkhanti sikkhāpadasīlaṃ. Tañhi yo naṃ pāti rakkhati, taṃ mokkheti moceti āpāyikādīhi dukkhehīti pātimokkhaṃ. Saṃvaraṇaṃ saṃvaro, kāyavācāhi avītikkamo. Pātimokkhameva saṃvaro pātimokkhasaṃvaro, tena saṃvuto pihitakāyavācoti pātimokkhasaṃvarasaṃvuto. Idamassa tasmiṃ sīle patiṭṭhitabhāvaparidīpanaṃ. Viharatīti tadanurūpavihārasamaṅgibhāvaparidīpanaṃ. Ācāragocarasampannoti heṭṭhā pātimokkhasaṃvarassa, upari visesānuyogassa ca upakārakadhammaparidīpanaṃ. Aṇumattesu vajjesu bhayadassāvīti pātimokkhasīlato acavanadhammatāparidīpanaṃ. Samādāyāti sikkhāpadānaṃ anavasesato ādānaparidīpanaṃ. Sikkhatīti sikkhāya samaṅgibhāvaparidīpanaṃ. Sikkhāpadesūti sikkhitabbadhammaparidīpanaṃ.
অপরো নযো – কিলেসানং বলৰভাৰতো পাপকিরিযায সুকরভাৰতো পুঞ্ঞকিরিযায চ দুক্করভাৰতো বহুক্খত্তুং অপাযেসু পতনসীলোতি পাতী, পুথুজ্জনো। অনিচ্চতায ৰা ভৰাদীসু কম্মৰেগক্খিত্তো ঘটিযন্তং ৰিয অনৰট্ঠানেন পরিব্ভমনতো গমনসীলোতি পাতী, মরণৰসেন ৰা তম্হি তম্হি সত্তনিকাযে অত্তভাৰস্স পাতনসীলোতি পাতী, সত্তসন্তানো, চিত্তমেৰ ৰা। তং পাতিনং সংসারদুক্খতো মোক্খেতীতি পাতিমোক্খো। চিত্তস্স হি ৰিমোক্খেন সত্তো ৰিমুত্তো । ‘‘চিত্তৰোদানা ৰিসুজ্ঝন্তী’’তি (সং॰ নি॰ ৩.১০০) ‘‘অনুপাদায আসৰেহি চিত্তং ৰিমুত্ত’’ন্তি (ম॰ নি॰ ২.২০৬) চ ৰুত্তং। অথ ৰা অৰিজ্জাদিনা হেতুনা সংসারে পততি গচ্ছতি পৰত্ততীতি পাতি। ‘‘অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরত’’ন্তি (সং॰ নি॰ ২.১২৪; ৫.৫২০) হি ৰুত্তং। তস্স পাতিনো সত্তস্স তণ্হাদিসংকিলেসত্তযতো মোক্খো এতেনাতি পাতিমোক্খো। ‘‘কণ্ঠেকালো’’তিআদীনং ৰিযস্স সমাসসিদ্ধি ৰেদিতব্বা।
Aparo nayo – kilesānaṃ balavabhāvato pāpakiriyāya sukarabhāvato puññakiriyāya ca dukkarabhāvato bahukkhattuṃ apāyesu patanasīloti pātī, puthujjano. Aniccatāya vā bhavādīsu kammavegakkhitto ghaṭiyantaṃ viya anavaṭṭhānena paribbhamanato gamanasīloti pātī, maraṇavasena vā tamhi tamhi sattanikāye attabhāvassa pātanasīloti pātī, sattasantāno, cittameva vā. Taṃ pātinaṃ saṃsāradukkhato mokkhetīti pātimokkho. Cittassa hi vimokkhena satto vimutto . ‘‘Cittavodānā visujjhantī’’ti (saṃ. ni. 3.100) ‘‘anupādāya āsavehi cittaṃ vimutta’’nti (ma. ni. 2.206) ca vuttaṃ. Atha vā avijjādinā hetunā saṃsāre patati gacchati pavattatīti pāti. ‘‘Avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarata’’nti (saṃ. ni. 2.124; 5.520) hi vuttaṃ. Tassa pātino sattassa taṇhādisaṃkilesattayato mokkho etenāti pātimokkho. ‘‘Kaṇṭhekālo’’tiādīnaṃ viyassa samāsasiddhi veditabbā.
অথ ৰা পাতেতি ৰিনিপাতেতি দুক্খেতি পাতি, চিত্তং। ৰুত্তঞ্হি ‘‘চিত্তেন নীযতি লোকো, চিত্তেন পরিকস্সতী’’তি (সং॰ নি॰ ১.৬২)। তস্স পাতিনো মোক্খো এতেনাতি পাতিমোক্খো। পততি ৰা এতেন অপাযদুক্খে সংসারদুক্খে চাতি পাতি, তণ্হাদিসংকিলেসো। ৰুত্তঞ্হি ‘‘তণ্হা জনেতি পুরিসং (সং॰ নি॰ ১.৫৬-৫৭), তণ্হাদুতিযো পুরিসো’’তি (ইতিৰু॰ ১৫, ১০৫; চূল়নি॰ পারাযনানুগীতিগাথানিদ্দেস ১০৭) চ আদি। ততো পাতিতো মোক্খোতি পাতিমোক্খো। অথ ৰা পততি এত্থাতি পাতি, ছ অজ্ঝত্তিকানি বাহিরানি চ আযতনানি। ৰুত্তঞ্হি ‘‘ছসু লোকো সমুপ্পন্নো, ছসু কুব্বতি সন্থৰ’’ন্তি (সং॰ নি॰ ১.৭০)। ততো ছঅজ্ঝত্তিকবাহিরাযতনসঙ্খাততো পাতিতো মোক্খোতি পাতিমোক্খো। অথ ৰা পাতো ৰিনিপাতো অস্স অত্থীতি পাতী, সংসারো। ততো মোক্খোতি পাতিমোক্খো। অথ ৰা সব্বলোকাধিপতিভাৰতো ধম্মিস্সরো ভগৰা পতীতি ৰুচ্চতি, মুচ্চতি এতেনাতি মোক্খো, পতিনো মোক্খো তেন পঞ্ঞত্তত্তাতি পতিমোক্খো, পতিমোক্খো এৰ পাতিমোক্খো। সব্বগুণানং ৰা মূলভাৰতো উত্তমট্ঠেন পতি চ সো যথাৰুত্তট্ঠেন মোক্খো চাতি পতিমোক্খো, পতিমোক্খো এৰ পাতিমোক্খো। তথা হি ৰুত্তং ‘‘পাতিমোক্খন্তি মুখমেতং পমুখমেত’’ন্তি (মহাৰ॰ ১৩৫) ৰিত্থারো।
Atha vā pāteti vinipāteti dukkheti pāti, cittaṃ. Vuttañhi ‘‘cittena nīyati loko, cittena parikassatī’’ti (saṃ. ni. 1.62). Tassa pātino mokkho etenāti pātimokkho. Patati vā etena apāyadukkhe saṃsāradukkhe cāti pāti, taṇhādisaṃkileso. Vuttañhi ‘‘taṇhā janeti purisaṃ (saṃ. ni. 1.56-57), taṇhādutiyo puriso’’ti (itivu. 15, 105; cūḷani. pārāyanānugītigāthāniddesa 107) ca ādi. Tato pātito mokkhoti pātimokkho. Atha vā patati etthāti pāti, cha ajjhattikāni bāhirāni ca āyatanāni. Vuttañhi ‘‘chasu loko samuppanno, chasu kubbati santhava’’nti (saṃ. ni. 1.70). Tato chaajjhattikabāhirāyatanasaṅkhātato pātito mokkhoti pātimokkho. Atha vā pāto vinipāto assa atthīti pātī, saṃsāro. Tato mokkhoti pātimokkho. Atha vā sabbalokādhipatibhāvato dhammissaro bhagavā patīti vuccati, muccati etenāti mokkho, patino mokkho tena paññattattāti patimokkho, patimokkho eva pātimokkho. Sabbaguṇānaṃ vā mūlabhāvato uttamaṭṭhena pati ca so yathāvuttaṭṭhena mokkho cāti patimokkho, patimokkho eva pātimokkho. Tathā hi vuttaṃ ‘‘pātimokkhanti mukhametaṃ pamukhameta’’nti (mahāva. 135) vitthāro.
অথ ৰা পইতি পকারে, অতীতি অচ্চন্তত্থে নিপাতো। তস্মা পকারেহি অচ্চন্তং মোক্খেতীতি পাতিমোক্খো। ইদঞ্হি সীলং সযং তদঙ্গৰসেন, সমাধিসহিতং পঞ্ঞাসহিতঞ্চ ৰিক্খম্ভনৰসেন সমুচ্ছেদৰসেন চ অচ্চন্তং মোক্খেতি মোচেতীতি পাতিমোক্খং। পতি পতি মোক্খোতি ৰা পতিমোক্খো, তম্হা তম্হা ৰীতিক্কমিতব্বদোসতো পতি পচ্চেকং মোক্খোতি অত্থো। পতিমোক্খো এৰ পাতিমোক্খো। মোক্খোতি ৰা নিব্বানং, তস্স মোক্খস্স পটিবিম্বভূতন্তি পতিমোক্খং। পাতিমোক্খসীলসংৰরো হি সূরিযস্স অরুণুগ্গমনং ৰিয নিব্বানস্স উদযভূতো তপ্পটিভাগো ৰিয হোতি যথারহং কিলেসনিব্বাপনতোতি পতিমোক্খং, পতিমোক্খং এৰ পাতিমোক্খং। অথ ৰা মোক্খং পতি ৰত্ততি মোক্খাভিমুখন্তি পতিমোক্খং, পতিমোক্খমেৰ পাতিমোক্খন্তি এৰং তাৰেত্থ পাতিমোক্খসদ্দস্স অত্থো ৰেদিতব্বো।
Atha vā paiti pakāre, atīti accantatthe nipāto. Tasmā pakārehi accantaṃ mokkhetīti pātimokkho. Idañhi sīlaṃ sayaṃ tadaṅgavasena, samādhisahitaṃ paññāsahitañca vikkhambhanavasena samucchedavasena ca accantaṃ mokkheti mocetīti pātimokkhaṃ. Pati pati mokkhoti vā patimokkho, tamhā tamhā vītikkamitabbadosato pati paccekaṃ mokkhoti attho. Patimokkho eva pātimokkho. Mokkhoti vā nibbānaṃ, tassa mokkhassa paṭibimbabhūtanti patimokkhaṃ. Pātimokkhasīlasaṃvaro hi sūriyassa aruṇuggamanaṃ viya nibbānassa udayabhūto tappaṭibhāgo viya hoti yathārahaṃ kilesanibbāpanatoti patimokkhaṃ, patimokkhaṃ eva pātimokkhaṃ. Atha vā mokkhaṃ pati vattati mokkhābhimukhanti patimokkhaṃ, patimokkhameva pātimokkhanti evaṃ tāvettha pātimokkhasaddassa attho veditabbo.
সংৰরতি পিদহতি এতেনাতি সংৰরো, পাতিমোক্খমেৰ সংৰরোতি পাতিমোক্খসংৰরো। অত্থতো পন ততো ততো ৰীতিক্কমিতব্বতো ৰিরতিযো চেতনা ৰা, তেন পাতিমোক্খসংৰরেন উপেতো সমন্নাগতো পাতিমোক্খসংৰরসংৰুতোতি ৰুত্তো। ৰুত্তঞ্হেতং ৰিভঙ্গে –
Saṃvarati pidahati etenāti saṃvaro, pātimokkhameva saṃvaroti pātimokkhasaṃvaro. Atthato pana tato tato vītikkamitabbato viratiyo cetanā vā, tena pātimokkhasaṃvarena upeto samannāgato pātimokkhasaṃvarasaṃvutoti vutto. Vuttañhetaṃ vibhaṅge –
‘‘ইমিনা পাতিমোক্খসংৰরেন উপেতো হোতি সমুপেতো উপগতো সমুপগতো সম্পন্নো সমন্নাগতো। তেন ৰুচ্চতি পাতিমোক্খসংৰরসংৰুতো’’তি (ৰিভ॰ ৫১১)।
‘‘Iminā pātimokkhasaṃvarena upeto hoti samupeto upagato samupagato sampanno samannāgato. Tena vuccati pātimokkhasaṃvarasaṃvuto’’ti (vibha. 511).
ৰিহরতীতি ইরিযাপথৰিহারেন ৰিহরতি, ইরিযতি, ৰত্ততি। আচারগোচরসম্পন্নোতি ৰেল়ুদানাদিমিচ্ছাজীৰস্স কাযপাগব্ভিযাদীনঞ্চ অকরণেন, সব্বসো অনাচারং ৰজ্জেত্ৰা ‘‘কাযিকো অৰীতিক্কমো, ৰাচসিকো অৰীতিক্কমো’’তি এৰং ৰুত্তভিক্খুসারুপ্পআচারসম্পত্তিযা ৰেসিযাদিঅগোচরং ৰজ্জেত্ৰা পিণ্ডপাতাদিঅত্থং উপসঙ্কমিতুং যুত্তট্ঠানসঙ্খাতগোচরেন চ সম্পন্নত্তা আচারগোচরসম্পন্নো। অপিচ যো ভিক্খু সত্থরি সগারৰো সপ্পতিস্সো সব্রহ্মচারীসু সগারৰো সপ্পতিস্সো হিরোত্তপ্পসম্পন্নো সুনিৰত্থো সুপারুতো পাসাদিকেন অভিক্কন্তেন পটিক্কন্তেন আলোকিতেন ৰিলোকিতেন সমিঞ্জিতেন পসারিতেন ওক্খিত্তচক্খু ইরিযাপথসম্পন্নো ইন্দ্রিযেসু গুত্তদ্ৰারো ভোজনে মত্তঞ্ঞূ জাগরিযানুযুত্তো সতিসম্পজঞ্ঞেন সমন্নাগতো অপ্পিচ্ছো সন্তুট্ঠো পৰিৰিত্তো অসংসট্ঠো আভিসমাচারিকেসু সক্কচ্চকারী গরুচিত্তীকারবহুলো ৰিহরতি, অযং ৰুচ্চতি আচারসম্পন্নো।
Viharatīti iriyāpathavihārena viharati, iriyati, vattati. Ācāragocarasampannoti veḷudānādimicchājīvassa kāyapāgabbhiyādīnañca akaraṇena, sabbaso anācāraṃ vajjetvā ‘‘kāyiko avītikkamo, vācasiko avītikkamo’’ti evaṃ vuttabhikkhusāruppaācārasampattiyā vesiyādiagocaraṃ vajjetvā piṇḍapātādiatthaṃ upasaṅkamituṃ yuttaṭṭhānasaṅkhātagocarena ca sampannattā ācāragocarasampanno. Apica yo bhikkhu satthari sagāravo sappatisso sabrahmacārīsu sagāravo sappatisso hirottappasampanno sunivattho supāruto pāsādikena abhikkantena paṭikkantena ālokitena vilokitena samiñjitena pasāritena okkhittacakkhu iriyāpathasampanno indriyesu guttadvāro bhojane mattaññū jāgariyānuyutto satisampajaññena samannāgato appiccho santuṭṭho pavivitto asaṃsaṭṭho ābhisamācārikesu sakkaccakārī garucittīkārabahulo viharati, ayaṃ vuccati ācārasampanno.
গোচরো পন – উপনিস্সযগোচরো, আরক্খগোচরো, উপনিবন্ধগোচরোতি তিৰিধো। তত্থ দসকথাৰত্থুগুণসমন্নাগতো ৰুত্তলক্খণো কল্যাণমিত্তো যং নিস্সায অসুতং সুণাতি, সুতং পরিযোদপেতি, কঙ্খং ৰিতরতি, দিট্ঠিং উজুকং করোতি, চিত্তং পসাদেতি, যস্স চ অনুসিক্খন্তো সদ্ধায ৰড্ঢতি, সীলেন, সুতেন, চাগেন, পঞ্ঞায ৰড্ঢতি, অযং উপনিস্সযগোচরো। যো ভিক্খু অন্তরঘরং পৰিট্ঠো ৰীথিং পটিপন্নো ওক্খিত্তচক্খু যুগমত্তদস্সাৰী সংৰুতো গচ্ছতি, ন হত্থিং ওলোকেন্তো, ন অস্সং, ন রথং, ন পত্তিং, ন ইত্থিং, ন পুরিসং ওলোকেন্তো, ন উদ্ধং ওলোকেন্তো, ন অধো ওলোকেন্তো, ন দিসাৰিদিসা পেক্খমানো গচ্ছতি, অযং আরক্খগোচরো। উপনিবন্ধগোচরো পন চত্তারো সতিপট্ঠানা, যত্থ ভিক্খু অত্তনো চিত্তং উপনিবন্ধতি। ৰুত্তঞ্হেতং ভগৰতা –
Gocaro pana – upanissayagocaro, ārakkhagocaro, upanibandhagocaroti tividho. Tattha dasakathāvatthuguṇasamannāgato vuttalakkhaṇo kalyāṇamitto yaṃ nissāya asutaṃ suṇāti, sutaṃ pariyodapeti, kaṅkhaṃ vitarati, diṭṭhiṃ ujukaṃ karoti, cittaṃ pasādeti, yassa ca anusikkhanto saddhāya vaḍḍhati, sīlena, sutena, cāgena, paññāya vaḍḍhati, ayaṃ upanissayagocaro. Yo bhikkhu antaragharaṃ paviṭṭho vīthiṃ paṭipanno okkhittacakkhu yugamattadassāvī saṃvuto gacchati, na hatthiṃ olokento, na assaṃ, na rathaṃ, na pattiṃ, na itthiṃ, na purisaṃ olokento, na uddhaṃ olokento, na adho olokento, na disāvidisā pekkhamāno gacchati, ayaṃ ārakkhagocaro. Upanibandhagocaro pana cattāro satipaṭṭhānā, yattha bhikkhu attano cittaṃ upanibandhati. Vuttañhetaṃ bhagavatā –
‘‘কো চ, ভিক্খৰে, ভিক্খুনো গোচরো সকো পেত্তিকো ৰিসযো? যদিদং – চত্তারো সতিপট্ঠানা’’তি (সং॰ নি॰ ৫.৩৭২)।
‘‘Ko ca, bhikkhave, bhikkhuno gocaro sako pettiko visayo? Yadidaṃ – cattāro satipaṭṭhānā’’ti (saṃ. ni. 5.372).
ইতি যথাৰুত্তায আচারসম্পত্তিযা ইমায চ গোচরসম্পত্তিযা সমন্নাগতত্তা আচারগোচরসম্পন্নো।
Iti yathāvuttāya ācārasampattiyā imāya ca gocarasampattiyā samannāgatattā ācāragocarasampanno.
অণুমত্তেসু ৰজ্জেসু ভযদস্সাৰীতি অপ্পমত্তকেসু অণুপ্পমাণেসু অসঞ্চিচ্চ আপন্নসেখিযঅকুসলচিত্তুপ্পাদাদিভেদেসু ৰজ্জেসু ভযদস্সনসীলো। যো হি ভিক্খু পরমাণুমত্তং ৰজ্জং অট্ঠসট্ঠিযোজনসতসহস্সুব্বেধসিনেরুপব্বতরাজসদিসং কত্ৰা পস্সতি, যোপি ভিক্খু সব্বলহুকং দুব্ভাসিতমত্তং পারাজিকসদিসং কত্ৰা পস্সতি, অযং অণুমত্তেসু ৰজ্জেসু ভযদস্সাৰী নাম। সমাদায সিক্খতি সিক্খাপদেসূতি যং কিঞ্চি সিক্খাপদেসু সিক্খিতব্বং, তং সব্বেন সব্বং সব্বথা সব্বং অনৰসেসং সমাদিযিত্ৰা সিক্খতি ৰত্ততি, পূরেতীতি অত্থো। ইতি কল্যাণসীলোতি ইমিনা পকারেন কল্যাণসীলো সমানো। পুগ্গলাধিট্ঠানৰসেন হি নিদ্দিট্ঠং সীলং ‘‘এৰং খো, ভিক্খৰে, ভিক্খু কল্যাণসীলো হোতী’’তি ৰুত্তপুগ্গলাধিট্ঠানৰসেনেৰ নিগমেত্ৰা ‘‘কল্যাণধম্মো’’তি এত্থ ৰুত্তধম্মে নিদ্দিসিতুকামেন ‘‘তেসং ধম্মানং ইদং সীলং অধিট্ঠান’’ন্তি দস্সেতুং পুন ‘‘ইতি কল্যাণসীলো’’তি ৰুত্তং। সত্তন্নং বোধিপক্খিযানন্তিআদি সব্বং হেট্ঠা ৰুত্তত্থমেৰ। পুন কল্যাণসীলোতিআদি নিগমনং।
Aṇumattesu vajjesu bhayadassāvīti appamattakesu aṇuppamāṇesu asañcicca āpannasekhiyaakusalacittuppādādibhedesu vajjesu bhayadassanasīlo. Yo hi bhikkhu paramāṇumattaṃ vajjaṃ aṭṭhasaṭṭhiyojanasatasahassubbedhasinerupabbatarājasadisaṃ katvā passati, yopi bhikkhu sabbalahukaṃ dubbhāsitamattaṃ pārājikasadisaṃ katvā passati, ayaṃ aṇumattesu vajjesu bhayadassāvī nāma. Samādāya sikkhati sikkhāpadesūti yaṃ kiñci sikkhāpadesu sikkhitabbaṃ, taṃ sabbena sabbaṃ sabbathā sabbaṃ anavasesaṃ samādiyitvā sikkhati vattati, pūretīti attho. Iti kalyāṇasīloti iminā pakārena kalyāṇasīlo samāno. Puggalādhiṭṭhānavasena hi niddiṭṭhaṃ sīlaṃ ‘‘evaṃ kho, bhikkhave, bhikkhu kalyāṇasīlo hotī’’ti vuttapuggalādhiṭṭhānavaseneva nigametvā ‘‘kalyāṇadhammo’’ti ettha vuttadhamme niddisitukāmena ‘‘tesaṃ dhammānaṃ idaṃ sīlaṃ adhiṭṭhāna’’nti dassetuṃ puna ‘‘iti kalyāṇasīlo’’ti vuttaṃ. Sattannaṃ bodhipakkhiyānantiādi sabbaṃ heṭṭhā vuttatthameva. Puna kalyāṇasīlotiādi nigamanaṃ.
গাথাসু দুক্কটন্তি দুট্ঠু কতং, দুচ্চরিতন্তি অত্থো। হিরিমনন্তি হিরিমন্তং হিরিসম্পন্নং, সব্বসো পাপপৰত্তিযা জিগুচ্ছনসভাৰন্তি অত্থো। হিরিমনন্তি ৰা হিরিসহিতচিত্তং। হিরিগ্গহণেনেৰ চেত্থ ওত্তপ্পম্পি গহিতন্তি ৰেদিতব্বং। হিরোত্তপ্পগ্গহণেন চ সব্বসো দুচ্চরিতাভাৰস্স হেতুং দস্সেন্তো কল্যাণসীলতং হেতুতো ৰিভাৰেতি। সম্বোধীতি অরিযঞাণং, তং গচ্ছন্তি ভজন্তীতি সম্বোধিগামিনো, বোধিপক্খিকাতি অত্থো। অনুস্সদন্তি রাগুস্সদাদিরহিতং। ‘‘তথাৰিধ’’ন্তিপি পঠন্তি। ‘‘বোধিপক্খিকানং ধম্মানং ভাৰনানুযোগমনুযুত্তো’’তি যথা যথা পুব্বে ৰুত্তং, তথাৰিধং তাদিসন্তি অত্থো। দুক্খস্সাতি ৰট্টদুক্খস্স, ৰট্টদুক্খহেতুনো ৰা। ইধেৰ খযমত্তনোতি আসৰক্খযাধিগমেন অত্তনো ৰট্টদুক্খহেতুনো সমুদযপক্খিযস্স কিলেসগণস্স ইধেৰ ইমস্মিংযেৰ অত্তভাৰে খযং অনুপ্পাদং পজানাতি, ৰট্টদুক্খস্সেৰ ৰা ইধেৰ চরিমকচিত্তনিরোধেন খযং খীণভাৰং পজানাতি। তেহি ধম্মেহি সম্পন্নন্তি তেহি যথাৰুত্তসীলাদিধম্মেহি সমন্নাগতং। অসিতন্তি তণ্হাদিট্ঠিনিস্সযানং পহীনত্তা অসিতং, কত্থচি অনিস্সিতং। সব্বলোকস্সাতি সব্বস্মিং সত্তলোকে। সেসং ৰুত্তনযমেৰ।
Gāthāsu dukkaṭanti duṭṭhu kataṃ, duccaritanti attho. Hirimananti hirimantaṃ hirisampannaṃ, sabbaso pāpapavattiyā jigucchanasabhāvanti attho. Hirimananti vā hirisahitacittaṃ. Hiriggahaṇeneva cettha ottappampi gahitanti veditabbaṃ. Hirottappaggahaṇena ca sabbaso duccaritābhāvassa hetuṃ dassento kalyāṇasīlataṃ hetuto vibhāveti. Sambodhīti ariyañāṇaṃ, taṃ gacchanti bhajantīti sambodhigāmino, bodhipakkhikāti attho. Anussadanti rāgussadādirahitaṃ. ‘‘Tathāvidha’’ntipi paṭhanti. ‘‘Bodhipakkhikānaṃ dhammānaṃ bhāvanānuyogamanuyutto’’ti yathā yathā pubbe vuttaṃ, tathāvidhaṃ tādisanti attho. Dukkhassāti vaṭṭadukkhassa, vaṭṭadukkhahetuno vā. Idheva khayamattanoti āsavakkhayādhigamena attano vaṭṭadukkhahetuno samudayapakkhiyassa kilesagaṇassa idheva imasmiṃyeva attabhāve khayaṃ anuppādaṃ pajānāti, vaṭṭadukkhasseva vā idheva carimakacittanirodhena khayaṃ khīṇabhāvaṃ pajānāti. Tehi dhammehi sampannanti tehi yathāvuttasīlādidhammehi samannāgataṃ. Asitanti taṇhādiṭṭhinissayānaṃ pahīnattā asitaṃ, katthaci anissitaṃ. Sabbalokassāti sabbasmiṃ sattaloke. Sesaṃ vuttanayameva.
অট্ঠমসুত্তৰণ্ণনা নিট্ঠিতা।
Aṭṭhamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ইতিৰুত্তকপাল়ি • Itivuttakapāḷi / ৮. কল্যাণসীলসুত্তং • 8. Kalyāṇasīlasuttaṃ
