| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
8. галяаан̣асийласуд̇д̇аван̣н̣анаа
8. Kalyāṇasīlasuttavaṇṇanā
97. адтамз галяаан̣асийлод̇и сунд̣̇арасийло, басад̇т̇асийло, барибун̣н̣асийло. д̇ад̇т̇а сийлабаарибуурий д̣̇вийхи гааран̣зхи ход̇и саммад̣̇зва сийлавибад̇д̇ияаа аад̣̇ийнавад̣̇ассанзна, сийласамбад̇д̇ияаа жа аанисам̣сад̣̇ассанзна. ид̇ха бана саб̣б̣абариб̣анд̇хавиббамуд̇д̇асса саб̣б̣аагаарабарибун̣н̣асса маг̇г̇асийласса паласийласса жа васзна галяаан̣ад̇аа взд̣̇ид̇аб̣б̣аа. галяаан̣ад̇хаммод̇и саб̣б̣з б̣од̇хибагкияад̇хаммаа ад̇хиббзд̇аа, д̇асмаа галяаан̣аа сад̇ибадтаанаад̣̇иб̣од̇хибагкияад̇хаммаа зд̇ассаад̇и галяаан̣ад̇хаммо. галяаан̣абан̃н̃од̇и жа маг̇г̇апалабан̃н̃аавасзнзва галяаан̣абан̃н̃о. логуд̇д̇араа зва хи сийлаад̣̇ид̇хаммаа зганд̇агаляаан̣аа наама агуббасабхаавад̇д̇аа. гзжи бана ‘‘жад̇убаарисуд̣̇д̇хисийлавасзна галяаан̣асийло, вибассанаамаг̇г̇ад̇хаммавасзна галяаан̣ад̇хаммо, маг̇г̇апалабан̃н̃аавасзна галяаан̣абан̃н̃о’’д̇и вад̣̇анд̇и. асзгкаа зва д̇з сийлад̇хаммабан̃н̃аад̇и згз. абарз бана бхан̣анд̇и – сод̇аабаннасагад̣̇ааг̇аамийнам̣ маг̇г̇апаласийлам̣ галяаан̣асийлам̣ наама, д̇асмаа ‘‘галяаан̣асийло’’д̇и иминаа сод̇аабанно сагад̣̇ааг̇аамий жа г̇ахид̇аа хонд̇и. д̇з хи сийлзсу барибуурагаарино наама. анааг̇аамимаг̇г̇апалад̇хаммаа аг̇г̇амаг̇г̇ад̇хаммаа жа галяаан̣ад̇хаммаа наама. д̇ад̇т̇а хи б̣од̇хибагкияад̇хаммаа бхааванаабаарибуурим̣ г̇ажчанд̇и. д̇асмаа ‘‘галяаан̣ад̇хаммо’’д̇и иминаа д̇ад̇ияамаг̇г̇адтад̇о бадтааяа д̇аяо арияаа г̇ахид̇аа хонд̇и. бан̃н̃аагижжасса мад̇т̇агаббад̇д̇ияаа аг̇г̇апалз бан̃н̃аа галяаан̣абан̃н̃аа наама, д̇асмаа бан̃н̃аавзбуллаббад̇д̇о арахаа ‘‘галяаан̣абан̃н̃о’’д̇и вуд̇д̇о. звамзва буг̇г̇алаа г̇ахид̇аа хонд̇ийд̇и. гим̣ иминаа бабан̃жзна? аг̇г̇амаг̇г̇апалад̇хаммаа ид̇ха галяаан̣асийлаад̣̇аяо вуд̇д̇аад̇и аяамамхаагам̣ канд̇и. д̇хаммавибхааг̇зна хи аяам̣ буг̇г̇алавибхааг̇о, на д̇хаммавибхааг̇од̇и.
97. Aṭṭhame kalyāṇasīloti sundarasīlo, pasatthasīlo, paripuṇṇasīlo. Tattha sīlapāripūrī dvīhi kāraṇehi hoti sammadeva sīlavipattiyā ādīnavadassanena, sīlasampattiyā ca ānisaṃsadassanena. Idha pana sabbaparibandhavippamuttassa sabbākāraparipuṇṇassa maggasīlassa phalasīlassa ca vasena kalyāṇatā veditabbā. Kalyāṇadhammoti sabbe bodhipakkhiyadhammā adhippetā, tasmā kalyāṇā satipaṭṭhānādibodhipakkhiyadhammā etassāti kalyāṇadhammo. Kalyāṇapaññoti ca maggaphalapaññāvaseneva kalyāṇapañño. Lokuttarā eva hi sīlādidhammā ekantakalyāṇā nāma akuppasabhāvattā. Keci pana ‘‘catupārisuddhisīlavasena kalyāṇasīlo, vipassanāmaggadhammavasena kalyāṇadhammo, maggaphalapaññāvasena kalyāṇapañño’’ti vadanti. Asekkhā eva te sīladhammapaññāti eke. Apare pana bhaṇanti – sotāpannasakadāgāmīnaṃ maggaphalasīlaṃ kalyāṇasīlaṃ nāma, tasmā ‘‘kalyāṇasīlo’’ti iminā sotāpanno sakadāgāmī ca gahitā honti. Te hi sīlesu paripūrakārino nāma. Anāgāmimaggaphaladhammā aggamaggadhammā ca kalyāṇadhammā nāma. Tattha hi bodhipakkhiyadhammā bhāvanāpāripūriṃ gacchanti. Tasmā ‘‘kalyāṇadhammo’’ti iminā tatiyamaggaṭṭhato paṭṭhāya tayo ariyā gahitā honti. Paññākiccassa matthakappattiyā aggaphale paññā kalyāṇapaññā nāma, tasmā paññāvepullappatto arahā ‘‘kalyāṇapañño’’ti vutto. Evameva puggalā gahitā hontīti. Kiṃ iminā papañcena? Aggamaggaphaladhammā idha kalyāṇasīlādayo vuttāti ayamamhākaṃ khanti. Dhammavibhāgena hi ayaṃ puggalavibhāgo, na dhammavibhāgoti.
гзвалийд̇и зд̇т̇а гзвалам̣ вужжад̇и гзнажи авомиссагад̇ааяа саб̣б̣асан̇кад̇авивид̇д̇ам̣ ниб̣б̣аанам̣, д̇асса ад̇хиг̇ад̇ад̇д̇аа арахаа гзвалий. ат̇а ваа бахаанабхааванаабаарибуурияаа барияосаанаанаваж̇ж̇ад̇хаммабаарибуурияаа жа галяаан̣агадтзна аб̣яаасзгасукад̇ааяа жа гзвалам̣ арахад̇д̇ам̣, д̇ад̣̇ад̇хиг̇амзна гзвалий кийн̣аасаво. маг̇г̇аб̣рахмажарияаваасам̣ васид̇ваа барияосаабзд̇ваа тид̇од̇и вусид̇аваа. уд̇д̇амзхи аг̇г̇абхууд̇зхи ваа асзгкад̇хаммзхи саманнааг̇ад̇ад̇д̇аа ‘‘уд̇д̇амабурисо’’д̇и вужжад̇и.
Kevalīti ettha kevalaṃ vuccati kenaci avomissakatāya sabbasaṅkhatavivittaṃ nibbānaṃ, tassa adhigatattā arahā kevalī. Atha vā pahānabhāvanāpāripūriyā pariyosānaanavajjadhammapāripūriyā ca kalyāṇakaṭṭhena abyāsekasukhatāya ca kevalaṃ arahattaṃ, tadadhigamena kevalī khīṇāsavo. Maggabrahmacariyavāsaṃ vasitvā pariyosāpetvā ṭhitoti vusitavā. Uttamehi aggabhūtehi vā asekkhadhammehi samannāgatattā ‘‘uttamapuriso’’ti vuccati.
сийлаваад̇и зд̇т̇а гзнадтзна сийлам̣? сийланадтзна сийлам̣. гимид̣̇ам̣ сийланам̣ наама? самаад̇хаанам̣, сусийляавасзна гааяагаммаад̣̇ийнам̣ авиббагин̣н̣ад̇аад̇и ад̇т̇о. ат̇а ваа убад̇хааран̣ам̣, жхаанаад̣̇игусалад̇хаммаанам̣ бад̇идтаанавасзна аад̇хаарабхаавод̇и ад̇т̇о. д̇асмаа сийлад̇и, сийлзд̇ийд̇и ваа сийлам̣. аяам̣ д̇аава сад̣̇д̣̇алагкан̣анаязна сийладто. абарз бана ‘‘сирадто сийладто, сийд̇аладто сийладто, сивадто сийладто’’д̇и нируд̇д̇инаязна ад̇т̇ам̣ ван̣н̣аяанд̇и. д̇аяид̣̇ам̣ баарибуурид̇о ад̇исаяад̇о ваа сийлам̣ асса ад̇т̇ийд̇и сийлаваа, жад̇убаарисуд̣̇д̇хисийлавасзна сийласамбаннод̇и ад̇т̇о. д̇ад̇т̇а яам̣ ж̇здтагасийлам̣ , д̇ам̣ вид̇т̇аарзд̇ваа д̣̇ассзд̇ум̣ ‘‘баад̇имогкасам̣варасам̣вуд̇о’’д̇иаад̣̇и вуд̇д̇анд̇и згажжаанам̣ аажарияаанам̣ ад̇хиббааяо.
Sīlavāti ettha kenaṭṭhena sīlaṃ? Sīlanaṭṭhena sīlaṃ. Kimidaṃ sīlanaṃ nāma? Samādhānaṃ, susīlyavasena kāyakammādīnaṃ avippakiṇṇatāti attho. Atha vā upadhāraṇaṃ, jhānādikusaladhammānaṃ patiṭṭhānavasena ādhārabhāvoti attho. Tasmā sīlati, sīletīti vā sīlaṃ. Ayaṃ tāva saddalakkhaṇanayena sīlaṭṭho. Apare pana ‘‘siraṭṭho sīlaṭṭho, sītalaṭṭho sīlaṭṭho, sivaṭṭho sīlaṭṭho’’ti niruttinayena atthaṃ vaṇṇayanti. Tayidaṃ pāripūrito atisayato vā sīlaṃ assa atthīti sīlavā, catupārisuddhisīlavasena sīlasampannoti attho. Tattha yaṃ jeṭṭhakasīlaṃ , taṃ vitthāretvā dassetuṃ ‘‘pātimokkhasaṃvarasaṃvuto’’tiādi vuttanti ekaccānaṃ ācariyānaṃ adhippāyo.
абарзна бана бхан̣анд̇и – убхаяад̇т̇ааби баад̇имогкасам̣варо бхаг̇авад̇аа вуд̇д̇о. баад̇имогкасам̣варо зва хи сийлам̣, ид̇арзсу инд̣̇рияасам̣варо чад̣̇ваарарагкан̣амад̇д̇амзва, ааж̇ийвабаарисуд̣̇д̇хи д̇хаммзна бажжаяуббаад̣̇анамад̇д̇амзва, бажжаяасанниссид̇ам̣ бадилад̣̇д̇хабажжаяз ‘‘ид̣̇амад̇т̇а’’нд̇и бажжавзгкид̇ваа барибхун̃ж̇анамад̇д̇амзва. ниббарияааязна баад̇имогкасам̣варова сийлам̣. яасса со бхинно, со сийсажчинно бурисо вияа хад̇т̇абаад̣̇з ‘‘сзсаани рагкиссад̇ий’’д̇и на вад̇д̇аб̣б̣о. яасса бана со арог̇о, ажчиннасийсо вияа бурисо, д̇аани буна баагад̇игаани гад̇ваа рагкид̇ум̣ саггод̇и. д̇асмаа сийлаваад̇и иминаа баад̇имогкасийламзва уд̣̇д̣̇исид̇ваа д̇ам̣ вид̇т̇аарзд̇ум̣ ‘‘баад̇имогкасам̣варасам̣вуд̇о’’д̇иаад̣̇и вуд̇д̇анд̇и.
Aparena pana bhaṇanti – ubhayatthāpi pātimokkhasaṃvaro bhagavatā vutto. Pātimokkhasaṃvaro eva hi sīlaṃ, itaresu indriyasaṃvaro chadvārarakkhaṇamattameva, ājīvapārisuddhi dhammena paccayuppādanamattameva, paccayasannissitaṃ paṭiladdhapaccaye ‘‘idamattha’’nti paccavekkhitvā paribhuñjanamattameva. Nippariyāyena pātimokkhasaṃvarova sīlaṃ. Yassa so bhinno, so sīsacchinno puriso viya hatthapāde ‘‘sesāni rakkhissatī’’ti na vattabbo. Yassa pana so arogo, acchinnasīso viya puriso, tāni puna pākatikāni katvā rakkhituṃ sakkoti. Tasmā sīlavāti iminā pātimokkhasīlameva uddisitvā taṃ vitthāretuṃ ‘‘pātimokkhasaṃvarasaṃvuto’’tiādi vuttanti.
д̇ад̇т̇а баад̇имогканд̇и сигкаабад̣̇асийлам̣. д̇ан̃хи яо нам̣ баад̇и рагкад̇и, д̇ам̣ могкзд̇и можзд̇и аабааяигаад̣̇ийхи д̣̇угкзхийд̇и баад̇имогкам̣. сам̣варан̣ам̣ сам̣варо, гааяаваажаахи авийд̇иггамо. баад̇имогкамзва сам̣варо баад̇имогкасам̣варо, д̇зна сам̣вуд̇о бихид̇агааяаваажод̇и баад̇имогкасам̣варасам̣вуд̇о. ид̣̇амасса д̇асмим̣ сийлз бад̇идтид̇абхаавабарид̣̇ийбанам̣. вихарад̇ийд̇и д̇ад̣̇ануруубавихаарасаман̇г̇ибхаавабарид̣̇ийбанам̣. аажаараг̇ожарасамбаннод̇и хздтаа баад̇имогкасам̣варасса, убари висзсаануяог̇асса жа убагаарагад̇хаммабарид̣̇ийбанам̣. ан̣умад̇д̇зсу важ̇ж̇зсу бхаяад̣̇ассаавийд̇и баад̇имогкасийлад̇о ажаванад̇хаммад̇аабарид̣̇ийбанам̣. самаад̣̇ааяаад̇и сигкаабад̣̇аанам̣ анавасзсад̇о аад̣̇аанабарид̣̇ийбанам̣. сигкад̇ийд̇и сигкааяа саман̇г̇ибхаавабарид̣̇ийбанам̣. сигкаабад̣̇зсууд̇и сигкид̇аб̣б̣ад̇хаммабарид̣̇ийбанам̣.
Tattha pātimokkhanti sikkhāpadasīlaṃ. Tañhi yo naṃ pāti rakkhati, taṃ mokkheti moceti āpāyikādīhi dukkhehīti pātimokkhaṃ. Saṃvaraṇaṃ saṃvaro, kāyavācāhi avītikkamo. Pātimokkhameva saṃvaro pātimokkhasaṃvaro, tena saṃvuto pihitakāyavācoti pātimokkhasaṃvarasaṃvuto. Idamassa tasmiṃ sīle patiṭṭhitabhāvaparidīpanaṃ. Viharatīti tadanurūpavihārasamaṅgibhāvaparidīpanaṃ. Ācāragocarasampannoti heṭṭhā pātimokkhasaṃvarassa, upari visesānuyogassa ca upakārakadhammaparidīpanaṃ. Aṇumattesu vajjesu bhayadassāvīti pātimokkhasīlato acavanadhammatāparidīpanaṃ. Samādāyāti sikkhāpadānaṃ anavasesato ādānaparidīpanaṃ. Sikkhatīti sikkhāya samaṅgibhāvaparidīpanaṃ. Sikkhāpadesūti sikkhitabbadhammaparidīpanaṃ.
абаро наяо – гилзсаанам̣ б̣алавабхаавад̇о баабагирияааяа сугарабхаавад̇о бун̃н̃агирияааяа жа д̣̇уггарабхаавад̇о б̣ахугкад̇д̇ум̣ абааязсу бад̇анасийлод̇и баад̇ий, бут̇уж̇ж̇ано. анижжад̇ааяа ваа бхаваад̣̇ийсу гаммавзг̇агкид̇д̇о гхадияанд̇ам̣ вияа анавадтаанзна бариб̣бхаманад̇о г̇аманасийлод̇и баад̇ий, маран̣авасзна ваа д̇амхи д̇амхи сад̇д̇анигааяз ад̇д̇абхаавасса баад̇анасийлод̇и баад̇ий, сад̇д̇асанд̇аано, жид̇д̇амзва ваа. д̇ам̣ баад̇инам̣ сам̣саарад̣̇угкад̇о могкзд̇ийд̇и баад̇имогко. жид̇д̇асса хи вимогкзна сад̇д̇о вимуд̇д̇о . ‘‘жид̇д̇авод̣̇аанаа висуж̇жханд̇ий’’д̇и (сам̣. ни. 3.100) ‘‘анубаад̣̇ааяа аасавзхи жид̇д̇ам̣ вимуд̇д̇а’’нд̇и (ма. ни. 2.206) жа вуд̇д̇ам̣. ат̇а ваа авиж̇ж̇аад̣̇инаа хзд̇унаа сам̣саарз бад̇ад̇и г̇ажчад̇и бавад̇д̇ад̇ийд̇и баад̇и. ‘‘авиж̇ж̇аанийваран̣аанам̣ сад̇д̇аанам̣ д̇ан̣хаасам̣яож̇анаанам̣ санд̇хаавад̇ам̣ сам̣сарад̇а’’нд̇и (сам̣. ни. 2.124; 5.520) хи вуд̇д̇ам̣. д̇асса баад̇ино сад̇д̇асса д̇ан̣хаад̣̇исам̣гилзсад̇д̇аяад̇о могко зд̇знаад̇и баад̇имогко. ‘‘ган̣тзгаало’’д̇иаад̣̇ийнам̣ вияасса самаасасид̣̇д̇хи взд̣̇ид̇аб̣б̣аа.
Aparo nayo – kilesānaṃ balavabhāvato pāpakiriyāya sukarabhāvato puññakiriyāya ca dukkarabhāvato bahukkhattuṃ apāyesu patanasīloti pātī, puthujjano. Aniccatāya vā bhavādīsu kammavegakkhitto ghaṭiyantaṃ viya anavaṭṭhānena paribbhamanato gamanasīloti pātī, maraṇavasena vā tamhi tamhi sattanikāye attabhāvassa pātanasīloti pātī, sattasantāno, cittameva vā. Taṃ pātinaṃ saṃsāradukkhato mokkhetīti pātimokkho. Cittassa hi vimokkhena satto vimutto . ‘‘Cittavodānā visujjhantī’’ti (saṃ. ni. 3.100) ‘‘anupādāya āsavehi cittaṃ vimutta’’nti (ma. ni. 2.206) ca vuttaṃ. Atha vā avijjādinā hetunā saṃsāre patati gacchati pavattatīti pāti. ‘‘Avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarata’’nti (saṃ. ni. 2.124; 5.520) hi vuttaṃ. Tassa pātino sattassa taṇhādisaṃkilesattayato mokkho etenāti pātimokkho. ‘‘Kaṇṭhekālo’’tiādīnaṃ viyassa samāsasiddhi veditabbā.
ат̇а ваа баад̇зд̇и винибаад̇зд̇и д̣̇угкзд̇и баад̇и, жид̇д̇ам̣. вуд̇д̇ан̃хи ‘‘жид̇д̇зна нийяад̇и лого, жид̇д̇зна баригассад̇ий’’д̇и (сам̣. ни. 1.62). д̇асса баад̇ино могко зд̇знаад̇и баад̇имогко. бад̇ад̇и ваа зд̇зна абааяад̣̇угкз сам̣саарад̣̇угкз жаад̇и баад̇и, д̇ан̣хаад̣̇исам̣гилзсо. вуд̇д̇ан̃хи ‘‘д̇ан̣хаа ж̇анзд̇и бурисам̣ (сам̣. ни. 1.56-57), д̇ан̣хаад̣̇уд̇ияо бурисо’’д̇и (ид̇иву. 15, 105; жуул̣ани. баарааяанаануг̇ийд̇иг̇аат̇аанид̣̇д̣̇зса 107) жа аад̣̇и. д̇ад̇о баад̇ид̇о могкод̇и баад̇имогко. ат̇а ваа бад̇ад̇и зд̇т̇аад̇и баад̇и, ча аж̇жхад̇д̇игаани б̣аахираани жа ааяад̇анаани. вуд̇д̇ан̃хи ‘‘часу лого самуббанно, часу губ̣б̣ад̇и сант̇ава’’нд̇и (сам̣. ни. 1.70). д̇ад̇о чааж̇жхад̇д̇игаб̣аахирааяад̇анасан̇каад̇ад̇о баад̇ид̇о могкод̇и баад̇имогко. ат̇а ваа баад̇о винибаад̇о асса ад̇т̇ийд̇и баад̇ий, сам̣сааро. д̇ад̇о могкод̇и баад̇имогко. ат̇а ваа саб̣б̣алогаад̇хибад̇ибхаавад̇о д̇хаммиссаро бхаг̇аваа бад̇ийд̇и вужжад̇и, мужжад̇и зд̇знаад̇и могко, бад̇ино могко д̇зна бан̃н̃ад̇д̇ад̇д̇аад̇и бад̇имогко, бад̇имогко зва баад̇имогко. саб̣б̣аг̇ун̣аанам̣ ваа муулабхаавад̇о уд̇д̇амадтзна бад̇и жа со яат̇аавуд̇д̇адтзна могко жаад̇и бад̇имогко, бад̇имогко зва баад̇имогко. д̇ат̇аа хи вуд̇д̇ам̣ ‘‘баад̇имогканд̇и мукамзд̇ам̣ бамукамзд̇а’’нд̇и (махаава. 135) вид̇т̇ааро.
Atha vā pāteti vinipāteti dukkheti pāti, cittaṃ. Vuttañhi ‘‘cittena nīyati loko, cittena parikassatī’’ti (saṃ. ni. 1.62). Tassa pātino mokkho etenāti pātimokkho. Patati vā etena apāyadukkhe saṃsāradukkhe cāti pāti, taṇhādisaṃkileso. Vuttañhi ‘‘taṇhā janeti purisaṃ (saṃ. ni. 1.56-57), taṇhādutiyo puriso’’ti (itivu. 15, 105; cūḷani. pārāyanānugītigāthāniddesa 107) ca ādi. Tato pātito mokkhoti pātimokkho. Atha vā patati etthāti pāti, cha ajjhattikāni bāhirāni ca āyatanāni. Vuttañhi ‘‘chasu loko samuppanno, chasu kubbati santhava’’nti (saṃ. ni. 1.70). Tato chaajjhattikabāhirāyatanasaṅkhātato pātito mokkhoti pātimokkho. Atha vā pāto vinipāto assa atthīti pātī, saṃsāro. Tato mokkhoti pātimokkho. Atha vā sabbalokādhipatibhāvato dhammissaro bhagavā patīti vuccati, muccati etenāti mokkho, patino mokkho tena paññattattāti patimokkho, patimokkho eva pātimokkho. Sabbaguṇānaṃ vā mūlabhāvato uttamaṭṭhena pati ca so yathāvuttaṭṭhena mokkho cāti patimokkho, patimokkho eva pātimokkho. Tathā hi vuttaṃ ‘‘pātimokkhanti mukhametaṃ pamukhameta’’nti (mahāva. 135) vitthāro.
ат̇а ваа баид̇и багаарз, ад̇ийд̇и ажжанд̇ад̇т̇з нибаад̇о. д̇асмаа багаарзхи ажжанд̇ам̣ могкзд̇ийд̇и баад̇имогко. ид̣̇ан̃хи сийлам̣ саяам̣ д̇ад̣̇ан̇г̇авасзна, самаад̇хисахид̇ам̣ бан̃н̃аасахид̇ан̃жа вигкамбханавасзна самужчзд̣̇авасзна жа ажжанд̇ам̣ могкзд̇и можзд̇ийд̇и баад̇имогкам̣. бад̇и бад̇и могкод̇и ваа бад̇имогко, д̇амхаа д̇амхаа вийд̇иггамид̇аб̣б̣ад̣̇осад̇о бад̇и бажжзгам̣ могкод̇и ад̇т̇о. бад̇имогко зва баад̇имогко. могкод̇и ваа ниб̣б̣аанам̣, д̇асса могкасса бадиб̣имб̣абхууд̇анд̇и бад̇имогкам̣. баад̇имогкасийласам̣варо хи суурияасса арун̣уг̇г̇аманам̣ вияа ниб̣б̣аанасса уд̣̇аяабхууд̇о д̇аббадибхааг̇о вияа ход̇и яат̇аарахам̣ гилзсаниб̣б̣аабанад̇од̇и бад̇имогкам̣, бад̇имогкам̣ зва баад̇имогкам̣. ат̇а ваа могкам̣ бад̇и вад̇д̇ад̇и могкаабхимуканд̇и бад̇имогкам̣, бад̇имогкамзва баад̇имогканд̇и звам̣ д̇аавзд̇т̇а баад̇имогкасад̣̇д̣̇асса ад̇т̇о взд̣̇ид̇аб̣б̣о.
Atha vā paiti pakāre, atīti accantatthe nipāto. Tasmā pakārehi accantaṃ mokkhetīti pātimokkho. Idañhi sīlaṃ sayaṃ tadaṅgavasena, samādhisahitaṃ paññāsahitañca vikkhambhanavasena samucchedavasena ca accantaṃ mokkheti mocetīti pātimokkhaṃ. Pati pati mokkhoti vā patimokkho, tamhā tamhā vītikkamitabbadosato pati paccekaṃ mokkhoti attho. Patimokkho eva pātimokkho. Mokkhoti vā nibbānaṃ, tassa mokkhassa paṭibimbabhūtanti patimokkhaṃ. Pātimokkhasīlasaṃvaro hi sūriyassa aruṇuggamanaṃ viya nibbānassa udayabhūto tappaṭibhāgo viya hoti yathārahaṃ kilesanibbāpanatoti patimokkhaṃ, patimokkhaṃ eva pātimokkhaṃ. Atha vā mokkhaṃ pati vattati mokkhābhimukhanti patimokkhaṃ, patimokkhameva pātimokkhanti evaṃ tāvettha pātimokkhasaddassa attho veditabbo.
сам̣варад̇и бид̣̇ахад̇и зд̇знаад̇и сам̣варо, баад̇имогкамзва сам̣варод̇и баад̇имогкасам̣варо. ад̇т̇ад̇о бана д̇ад̇о д̇ад̇о вийд̇иггамид̇аб̣б̣ад̇о вирад̇ияо жзд̇анаа ваа, д̇зна баад̇имогкасам̣варзна убзд̇о саманнааг̇ад̇о баад̇имогкасам̣варасам̣вуд̇од̇и вуд̇д̇о. вуд̇д̇ан̃хзд̇ам̣ вибхан̇г̇з –
Saṃvarati pidahati etenāti saṃvaro, pātimokkhameva saṃvaroti pātimokkhasaṃvaro. Atthato pana tato tato vītikkamitabbato viratiyo cetanā vā, tena pātimokkhasaṃvarena upeto samannāgato pātimokkhasaṃvarasaṃvutoti vutto. Vuttañhetaṃ vibhaṅge –
‘‘иминаа баад̇имогкасам̣варзна убзд̇о ход̇и самубзд̇о убаг̇ад̇о самубаг̇ад̇о самбанно саманнааг̇ад̇о. д̇зна вужжад̇и баад̇имогкасам̣варасам̣вуд̇о’’д̇и (вибха. 511).
‘‘Iminā pātimokkhasaṃvarena upeto hoti samupeto upagato samupagato sampanno samannāgato. Tena vuccati pātimokkhasaṃvarasaṃvuto’’ti (vibha. 511).
вихарад̇ийд̇и ирияаабат̇авихаарзна вихарад̇и, ирияад̇и, вад̇д̇ад̇и. аажаараг̇ожарасамбаннод̇и взл̣уд̣̇аанаад̣̇имижчааж̇ийвасса гааяабааг̇аб̣бхияаад̣̇ийнан̃жа агаран̣зна, саб̣б̣асо анаажаарам̣ важ̇ж̇зд̇ваа ‘‘гааяиго авийд̇иггамо, ваажасиго авийд̇иггамо’’д̇и звам̣ вуд̇д̇абхигкусааруббааажаарасамбад̇д̇ияаа взсияаад̣̇иаг̇ожарам̣ важ̇ж̇зд̇ваа бин̣д̣абаад̇аад̣̇иад̇т̇ам̣ убасан̇гамид̇ум̣ яуд̇д̇адтаанасан̇каад̇аг̇ожарзна жа самбаннад̇д̇аа аажаараг̇ожарасамбанно. абижа яо бхигку сад̇т̇ари саг̇аараво саббад̇иссо саб̣рахмажаарийсу саг̇аараво саббад̇иссо хирод̇д̇аббасамбанно сунивад̇т̇о субааруд̇о баасаад̣̇игзна абхигганд̇зна бадигганд̇зна аалогид̇зна вилогид̇зна самин̃ж̇ид̇зна басаарид̇зна огкид̇д̇ажагку ирияаабат̇асамбанно инд̣̇риязсу г̇уд̇д̇ад̣̇вааро бхож̇анз мад̇д̇ан̃н̃уу ж̇ааг̇арияаануяуд̇д̇о сад̇исамбаж̇ан̃н̃зна саманнааг̇ад̇о аббижчо санд̇удто бавивид̇д̇о асам̣садто аабхисамаажааригзсу саггажжагаарий г̇аружид̇д̇ийгаараб̣ахуло вихарад̇и, аяам̣ вужжад̇и аажаарасамбанно.
Viharatīti iriyāpathavihārena viharati, iriyati, vattati. Ācāragocarasampannoti veḷudānādimicchājīvassa kāyapāgabbhiyādīnañca akaraṇena, sabbaso anācāraṃ vajjetvā ‘‘kāyiko avītikkamo, vācasiko avītikkamo’’ti evaṃ vuttabhikkhusāruppaācārasampattiyā vesiyādiagocaraṃ vajjetvā piṇḍapātādiatthaṃ upasaṅkamituṃ yuttaṭṭhānasaṅkhātagocarena ca sampannattā ācāragocarasampanno. Apica yo bhikkhu satthari sagāravo sappatisso sabrahmacārīsu sagāravo sappatisso hirottappasampanno sunivattho supāruto pāsādikena abhikkantena paṭikkantena ālokitena vilokitena samiñjitena pasāritena okkhittacakkhu iriyāpathasampanno indriyesu guttadvāro bhojane mattaññū jāgariyānuyutto satisampajaññena samannāgato appiccho santuṭṭho pavivitto asaṃsaṭṭho ābhisamācārikesu sakkaccakārī garucittīkārabahulo viharati, ayaṃ vuccati ācārasampanno.
г̇ожаро бана – убаниссаяаг̇ожаро, аарагкаг̇ожаро, убаниб̣анд̇хаг̇ожарод̇и д̇ивид̇хо. д̇ад̇т̇а д̣̇асагат̇аавад̇т̇уг̇ун̣асаманнааг̇ад̇о вуд̇д̇алагкан̣о галяаан̣амид̇д̇о яам̣ ниссааяа асуд̇ам̣ сун̣аад̇и, суд̇ам̣ барияод̣̇абзд̇и, ган̇кам̣ вид̇арад̇и, д̣̇идтим̣ уж̇угам̣ гарод̇и, жид̇д̇ам̣ басаад̣̇зд̇и, яасса жа анусигканд̇о сад̣̇д̇хааяа вад̣дхад̇и, сийлзна, суд̇зна, жааг̇зна, бан̃н̃ааяа вад̣дхад̇и, аяам̣ убаниссаяаг̇ожаро. яо бхигку анд̇арагхарам̣ бавидто вийт̇им̣ бадибанно огкид̇д̇ажагку яуг̇амад̇д̇ад̣̇ассаавий сам̣вуд̇о г̇ажчад̇и, на хад̇т̇им̣ ологзнд̇о, на ассам̣, на рат̇ам̣, на бад̇д̇им̣, на ид̇т̇им̣, на бурисам̣ ологзнд̇о, на уд̣̇д̇хам̣ ологзнд̇о, на ад̇хо ологзнд̇о, на д̣̇исаавид̣̇исаа бзгкамаано г̇ажчад̇и, аяам̣ аарагкаг̇ожаро. убаниб̣анд̇хаг̇ожаро бана жад̇д̇ааро сад̇ибадтаанаа, яад̇т̇а бхигку ад̇д̇ано жид̇д̇ам̣ убаниб̣анд̇хад̇и. вуд̇д̇ан̃хзд̇ам̣ бхаг̇авад̇аа –
Gocaro pana – upanissayagocaro, ārakkhagocaro, upanibandhagocaroti tividho. Tattha dasakathāvatthuguṇasamannāgato vuttalakkhaṇo kalyāṇamitto yaṃ nissāya asutaṃ suṇāti, sutaṃ pariyodapeti, kaṅkhaṃ vitarati, diṭṭhiṃ ujukaṃ karoti, cittaṃ pasādeti, yassa ca anusikkhanto saddhāya vaḍḍhati, sīlena, sutena, cāgena, paññāya vaḍḍhati, ayaṃ upanissayagocaro. Yo bhikkhu antaragharaṃ paviṭṭho vīthiṃ paṭipanno okkhittacakkhu yugamattadassāvī saṃvuto gacchati, na hatthiṃ olokento, na assaṃ, na rathaṃ, na pattiṃ, na itthiṃ, na purisaṃ olokento, na uddhaṃ olokento, na adho olokento, na disāvidisā pekkhamāno gacchati, ayaṃ ārakkhagocaro. Upanibandhagocaro pana cattāro satipaṭṭhānā, yattha bhikkhu attano cittaṃ upanibandhati. Vuttañhetaṃ bhagavatā –
‘‘го жа, бхигкавз, бхигкуно г̇ожаро саго бзд̇д̇иго висаяо? яад̣̇ид̣̇ам̣ – жад̇д̇ааро сад̇ибадтаанаа’’д̇и (сам̣. ни. 5.372).
‘‘Ko ca, bhikkhave, bhikkhuno gocaro sako pettiko visayo? Yadidaṃ – cattāro satipaṭṭhānā’’ti (saṃ. ni. 5.372).
ид̇и яат̇аавуд̇д̇ааяа аажаарасамбад̇д̇ияаа имааяа жа г̇ожарасамбад̇д̇ияаа саманнааг̇ад̇ад̇д̇аа аажаараг̇ожарасамбанно.
Iti yathāvuttāya ācārasampattiyā imāya ca gocarasampattiyā samannāgatattā ācāragocarasampanno.
ан̣умад̇д̇зсу важ̇ж̇зсу бхаяад̣̇ассаавийд̇и аббамад̇д̇агзсу ан̣уббамаан̣зсу асан̃жижжа аабаннасзкияаагусалажид̇д̇уббаад̣̇аад̣̇ибхзд̣̇зсу важ̇ж̇зсу бхаяад̣̇ассанасийло. яо хи бхигку барамаан̣умад̇д̇ам̣ важ̇ж̇ам̣ адтасадтияож̇анасад̇асахассуб̣б̣зд̇хасинзрубаб̣б̣ад̇арааж̇асад̣̇исам̣ гад̇ваа бассад̇и, яоби бхигку саб̣б̣алахугам̣ д̣̇уб̣бхаасид̇амад̇д̇ам̣ баарааж̇игасад̣̇исам̣ гад̇ваа бассад̇и, аяам̣ ан̣умад̇д̇зсу важ̇ж̇зсу бхаяад̣̇ассаавий наама. самаад̣̇ааяа сигкад̇и сигкаабад̣̇зсууд̇и яам̣ гин̃жи сигкаабад̣̇зсу сигкид̇аб̣б̣ам̣, д̇ам̣ саб̣б̣зна саб̣б̣ам̣ саб̣б̣ат̇аа саб̣б̣ам̣ анавасзсам̣ самаад̣̇ияид̇ваа сигкад̇и вад̇д̇ад̇и, буурзд̇ийд̇и ад̇т̇о. ид̇и галяаан̣асийлод̇и иминаа багаарзна галяаан̣асийло самаано. буг̇г̇алаад̇хидтаанавасзна хи нид̣̇д̣̇идтам̣ сийлам̣ ‘‘звам̣ ко, бхигкавз, бхигку галяаан̣асийло ход̇ий’’д̇и вуд̇д̇абуг̇г̇алаад̇хидтаанавасзнзва ниг̇амзд̇ваа ‘‘галяаан̣ад̇хаммо’’д̇и зд̇т̇а вуд̇д̇ад̇хаммз нид̣̇д̣̇исид̇угаамзна ‘‘д̇зсам̣ д̇хаммаанам̣ ид̣̇ам̣ сийлам̣ ад̇хидтаана’’нд̇и д̣̇ассзд̇ум̣ буна ‘‘ид̇и галяаан̣асийло’’д̇и вуд̇д̇ам̣. сад̇д̇аннам̣ б̣од̇хибагкияаананд̇иаад̣̇и саб̣б̣ам̣ хздтаа вуд̇д̇ад̇т̇амзва. буна галяаан̣асийлод̇иаад̣̇и ниг̇аманам̣.
Aṇumattesu vajjesu bhayadassāvīti appamattakesu aṇuppamāṇesu asañcicca āpannasekhiyaakusalacittuppādādibhedesu vajjesu bhayadassanasīlo. Yo hi bhikkhu paramāṇumattaṃ vajjaṃ aṭṭhasaṭṭhiyojanasatasahassubbedhasinerupabbatarājasadisaṃ katvā passati, yopi bhikkhu sabbalahukaṃ dubbhāsitamattaṃ pārājikasadisaṃ katvā passati, ayaṃ aṇumattesu vajjesu bhayadassāvī nāma. Samādāya sikkhati sikkhāpadesūti yaṃ kiñci sikkhāpadesu sikkhitabbaṃ, taṃ sabbena sabbaṃ sabbathā sabbaṃ anavasesaṃ samādiyitvā sikkhati vattati, pūretīti attho. Iti kalyāṇasīloti iminā pakārena kalyāṇasīlo samāno. Puggalādhiṭṭhānavasena hi niddiṭṭhaṃ sīlaṃ ‘‘evaṃ kho, bhikkhave, bhikkhu kalyāṇasīlo hotī’’ti vuttapuggalādhiṭṭhānavaseneva nigametvā ‘‘kalyāṇadhammo’’ti ettha vuttadhamme niddisitukāmena ‘‘tesaṃ dhammānaṃ idaṃ sīlaṃ adhiṭṭhāna’’nti dassetuṃ puna ‘‘iti kalyāṇasīlo’’ti vuttaṃ. Sattannaṃ bodhipakkhiyānantiādi sabbaṃ heṭṭhā vuttatthameva. Puna kalyāṇasīlotiādi nigamanaṃ.
г̇аат̇аасу д̣̇уггаданд̇и д̣̇удту гад̇ам̣, д̣̇ужжарид̇анд̇и ад̇т̇о. хиримананд̇и хириманд̇ам̣ хирисамбаннам̣, саб̣б̣асо баабабавад̇д̇ияаа ж̇иг̇ужчанасабхааванд̇и ад̇т̇о. хиримананд̇и ваа хирисахид̇ажид̇д̇ам̣. хириг̇г̇ахан̣знзва жзд̇т̇а од̇д̇аббамби г̇ахид̇анд̇и взд̣̇ид̇аб̣б̣ам̣. хирод̇д̇аббаг̇г̇ахан̣зна жа саб̣б̣асо д̣̇ужжарид̇аабхаавасса хзд̇ум̣ д̣̇ассзнд̇о галяаан̣асийлад̇ам̣ хзд̇уд̇о вибхаавзд̇и. самб̣од̇хийд̇и арияан̃аан̣ам̣, д̇ам̣ г̇ажчанд̇и бхаж̇анд̇ийд̇и самб̣од̇хиг̇аамино, б̣од̇хибагкигаад̇и ад̇т̇о. ануссад̣̇анд̇и рааг̇уссад̣̇аад̣̇ирахид̇ам̣. ‘‘д̇ат̇аавид̇ха’’нд̇иби батанд̇и. ‘‘б̣од̇хибагкигаанам̣ д̇хаммаанам̣ бхааванаануяог̇амануяуд̇д̇о’’д̇и яат̇аа яат̇аа буб̣б̣з вуд̇д̇ам̣, д̇ат̇аавид̇хам̣ д̇аад̣̇исанд̇и ад̇т̇о. д̣̇угкассаад̇и ваддад̣̇угкасса, ваддад̣̇угкахзд̇уно ваа. ид̇хзва каяамад̇д̇анод̇и аасавагкаяаад̇хиг̇амзна ад̇д̇ано ваддад̣̇угкахзд̇уно самуд̣̇аяабагкияасса гилзсаг̇ан̣асса ид̇хзва имасмим̣язва ад̇д̇абхаавз каяам̣ ануббаад̣̇ам̣ баж̇аанаад̇и, ваддад̣̇угкассзва ваа ид̇хзва жаримагажид̇д̇анирод̇хзна каяам̣ кийн̣абхаавам̣ баж̇аанаад̇и. д̇зхи д̇хаммзхи самбаннанд̇и д̇зхи яат̇аавуд̇д̇асийлаад̣̇ид̇хаммзхи саманнааг̇ад̇ам̣. асид̇анд̇и д̇ан̣хаад̣̇идтиниссаяаанам̣ бахийнад̇д̇аа асид̇ам̣, гад̇т̇ажи аниссид̇ам̣. саб̣б̣алогассаад̇и саб̣б̣асмим̣ сад̇д̇алогз. сзсам̣ вуд̇д̇анаяамзва.
Gāthāsu dukkaṭanti duṭṭhu kataṃ, duccaritanti attho. Hirimananti hirimantaṃ hirisampannaṃ, sabbaso pāpapavattiyā jigucchanasabhāvanti attho. Hirimananti vā hirisahitacittaṃ. Hiriggahaṇeneva cettha ottappampi gahitanti veditabbaṃ. Hirottappaggahaṇena ca sabbaso duccaritābhāvassa hetuṃ dassento kalyāṇasīlataṃ hetuto vibhāveti. Sambodhīti ariyañāṇaṃ, taṃ gacchanti bhajantīti sambodhigāmino, bodhipakkhikāti attho. Anussadanti rāgussadādirahitaṃ. ‘‘Tathāvidha’’ntipi paṭhanti. ‘‘Bodhipakkhikānaṃ dhammānaṃ bhāvanānuyogamanuyutto’’ti yathā yathā pubbe vuttaṃ, tathāvidhaṃ tādisanti attho. Dukkhassāti vaṭṭadukkhassa, vaṭṭadukkhahetuno vā. Idheva khayamattanoti āsavakkhayādhigamena attano vaṭṭadukkhahetuno samudayapakkhiyassa kilesagaṇassa idheva imasmiṃyeva attabhāve khayaṃ anuppādaṃ pajānāti, vaṭṭadukkhasseva vā idheva carimakacittanirodhena khayaṃ khīṇabhāvaṃ pajānāti. Tehi dhammehi sampannanti tehi yathāvuttasīlādidhammehi samannāgataṃ. Asitanti taṇhādiṭṭhinissayānaṃ pahīnattā asitaṃ, katthaci anissitaṃ. Sabbalokassāti sabbasmiṃ sattaloke. Sesaṃ vuttanayameva.
адтамасуд̇д̇аван̣н̣анаа нидтид̇аа.
Aṭṭhamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ид̇ивуд̇д̇агабаал̣и • Itivuttakapāḷi / 8. галяаан̣асийласуд̇д̇ам̣ • 8. Kalyāṇasīlasuttaṃ
