| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
(১০) ৫. উপালিৰগ্গো
(10) 5. Upālivaggo
১. কামভোগীসুত্তং
1. Kāmabhogīsuttaṃ
৯১. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। অথ খো অনাথপিণ্ডিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো অনাথপিণ্ডিকং গহপতিং ভগৰা এতদৰোচ –
91. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –
‘‘দসযিমে , গহপতি, কামভোগী সন্তো সংৰিজ্জমানা লোকস্মিং। কতমে দস? ইধ, গহপতি, একচ্চো কামভোগী অধম্মেন ভোগে পরিযেসতি সাহসেন; অধম্মেন ভোগে পরিযেসিত্ৰা সাহসেন ন অত্তানং সুখেতি ন পীণেতি 1 ন সংৰিভজতি ন পুঞ্ঞানি করোতি।
‘‘Dasayime , gahapati, kāmabhogī santo saṃvijjamānā lokasmiṃ. Katame dasa? Idha, gahapati, ekacco kāmabhogī adhammena bhoge pariyesati sāhasena; adhammena bhoge pariyesitvā sāhasena na attānaṃ sukheti na pīṇeti 2 na saṃvibhajati na puññāni karoti.
‘‘ইধ পন, গহপতি, একচ্চো কামভোগী অধম্মেন ভোগে পরিযেসতি সাহসেন; অধম্মেন ভোগে পরিযেসিত্ৰা সাহসেন অত্তানং সুখেতি পীণেতি, ন সংৰিভজতি ন পুঞ্ঞানি করোতি।
‘‘Idha pana, gahapati, ekacco kāmabhogī adhammena bhoge pariyesati sāhasena; adhammena bhoge pariyesitvā sāhasena attānaṃ sukheti pīṇeti, na saṃvibhajati na puññāni karoti.
‘‘ইধ পন , গহপতি, একচ্চো কামভোগী অধম্মেন ভোগে পরিযেসতি সাহসেন; অধম্মেন ভোগে পরিযেসিত্ৰা সাহসেন অত্তানং সুখেতি পীণেতি সংৰিভজতি পুঞ্ঞানি করোতি।
‘‘Idha pana , gahapati, ekacco kāmabhogī adhammena bhoge pariyesati sāhasena; adhammena bhoge pariyesitvā sāhasena attānaṃ sukheti pīṇeti saṃvibhajati puññāni karoti.
‘‘ইধ পন, গহপতি, একচ্চো কামভোগী ধম্মাধম্মেন ভোগে পরিযেসতি সাহসেনপি অসাহসেনপি; ধম্মাধম্মেন ভোগে পরিযেসিত্ৰা সাহসেনপি অসাহসেনপি ন অত্তানং সুখেতি ন পীণেতি ন সংৰিভজতি ন পুঞ্ঞানি করোতি।
‘‘Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi; dhammādhammena bhoge pariyesitvā sāhasenapi asāhasenapi na attānaṃ sukheti na pīṇeti na saṃvibhajati na puññāni karoti.
‘‘ইধ পন, গহপতি, একচ্চো কামভোগী ধম্মাধম্মেন ভোগে পরিযেসতি সাহসেনপি অসাহসেনপি ; ধম্মাধম্মেন ভোগে পরিযেসিত্ৰা সাহসেনপি অসাহসেনপি অত্তানং সুখেতি পীণেতি, ন সংৰিভজতি ন পুঞ্ঞানি করোতি।
‘‘Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi ; dhammādhammena bhoge pariyesitvā sāhasenapi asāhasenapi attānaṃ sukheti pīṇeti, na saṃvibhajati na puññāni karoti.
‘‘ইধ পন, গহপতি, একচ্চো কামভোগী ধম্মাধম্মেন ভোগে পরিযেসতি সাহসেনপি অসাহসেনপি; ধম্মাধম্মেন ভোগে পরিযেসিত্ৰা সাহসেনপি অসাহসেনপি অত্তানং সুখেতি পীণেতি সংৰিভজতি পুঞ্ঞানি করোতি।
‘‘Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi; dhammādhammena bhoge pariyesitvā sāhasenapi asāhasenapi attānaṃ sukheti pīṇeti saṃvibhajati puññāni karoti.
‘‘ইধ পন, গহপতি, একচ্চো কামভোগী ধম্মেন ভোগে পরিযেসতি অসাহসেন; ধম্মেন ভোগে পরিযেসিত্ৰা অসাহসেন ন অত্তানং সুখেতি ন পীণেতি ন সংৰিভজতি ন পুঞ্ঞানি করোতি।
‘‘Idha pana, gahapati, ekacco kāmabhogī dhammena bhoge pariyesati asāhasena; dhammena bhoge pariyesitvā asāhasena na attānaṃ sukheti na pīṇeti na saṃvibhajati na puññāni karoti.
‘‘ইধ পন, গহপতি, একচ্চো কামভোগী ধম্মেন ভোগে পরিযেসতি অসাহসেন; ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি, ন সংৰিভজতি ন পুঞ্ঞানি করোতি।
‘‘Idha pana, gahapati, ekacco kāmabhogī dhammena bhoge pariyesati asāhasena; dhammena bhoge pariyesitvā asāhasena attānaṃ sukheti pīṇeti, na saṃvibhajati na puññāni karoti.
‘‘ইধ পন, গহপতি, একচ্চো কামভোগী ধম্মেন ভোগে পরিযেসতি অসাহসেন; ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি সংৰিভজতি পুঞ্ঞানি করোতি। তে চ ভোগে অগথিতো অমুচ্ছিতো অনজ্ঝোসন্নো আদীনৰদস্সাৰী নিস্সরণপঞ্ঞো পরিভুঞ্জতি।
‘‘Idha pana, gahapati, ekacco kāmabhogī dhammena bhoge pariyesati asāhasena; dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti. Te ca bhoge agathito amucchito anajjhosanno ādīnavadassāvī nissaraṇapañño paribhuñjati.
‘‘তত্র, গহপতি, য্ৰাযং কামভোগী অধম্মেন ভোগে পরিযেসতি সাহসেন, অধম্মেন ভোগে পরিযেসিত্ৰা সাহসেন ন অত্তানং সুখেতি ন পীণেতি ন সংৰিভজতি ন পুঞ্ঞানি করোতি, অযং, গহপতি, কামভোগী তীহি ঠানেহি গারয্হো। ‘অধম্মেন ভোগে পরিযেসতি সাহসেনা’তি, ইমিনা পঠমেন ঠানেন গারয্হো। ‘ন অত্তানং সুখেতি ন পীণেতী’তি, ইমিনা দুতিযেন ঠানেন গারয্হো। ‘ন সংৰিভজতি ন পুঞ্ঞানি করোতী’তি, ইমিনা ততিযেন ঠানেন গারয্হো। অযং, গহপতি, কামভোগী ইমেহি তীহি ঠানেহি গারয্হো।
‘‘Tatra, gahapati, yvāyaṃ kāmabhogī adhammena bhoge pariyesati sāhasena, adhammena bhoge pariyesitvā sāhasena na attānaṃ sukheti na pīṇeti na saṃvibhajati na puññāni karoti, ayaṃ, gahapati, kāmabhogī tīhi ṭhānehi gārayho. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Na attānaṃ sukheti na pīṇetī’ti, iminā dutiyena ṭhānena gārayho. ‘Na saṃvibhajati na puññāni karotī’ti, iminā tatiyena ṭhānena gārayho. Ayaṃ, gahapati, kāmabhogī imehi tīhi ṭhānehi gārayho.
‘‘তত্র, গহপতি, য্ৰাযং কামভোগী অধম্মেন ভোগে পরিযেসতি সাহসেন, অধম্মেন ভোগে পরিযেসিত্ৰা সাহসেন অত্তানং সুখেতি পীণেতি ন সংৰিভজতি ন পুঞ্ঞানি করোতি, অযং, গহপতি, কামভোগী দ্ৰীহি ঠানেহি গারয্হো একেন ঠানেন পাসংসো। ‘অধম্মেন ভোগে পরিযেসতি সাহসেনা’তি, ইমিনা পঠমেন ঠানেন গারয্হো। ‘অত্তানং সুখেতি পীণেতী’তি, ইমিনা একেন ঠানেন পাসংসো। ‘ন সংৰিভজতি ন পুঞ্ঞানি করোতী’তি ইমিনা দুতিযেন ঠানেন গারয্হো। অযং, গহপতি, কামভোগী ইমেহি দ্ৰীহি ঠানেহি গারয্হো ইমিনা একেন ঠানেন পাসংসো।
‘‘Tatra, gahapati, yvāyaṃ kāmabhogī adhammena bhoge pariyesati sāhasena, adhammena bhoge pariyesitvā sāhasena attānaṃ sukheti pīṇeti na saṃvibhajati na puññāni karoti, ayaṃ, gahapati, kāmabhogī dvīhi ṭhānehi gārayho ekena ṭhānena pāsaṃso. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Attānaṃ sukheti pīṇetī’ti, iminā ekena ṭhānena pāsaṃso. ‘Na saṃvibhajati na puññāni karotī’ti iminā dutiyena ṭhānena gārayho. Ayaṃ, gahapati, kāmabhogī imehi dvīhi ṭhānehi gārayho iminā ekena ṭhānena pāsaṃso.
‘‘তত্র , গহপতি, য্ৰাযং কামভোগী অধম্মেন ভোগে পরিযেসতি সাহসেন , অধম্মেন ভোগে পরিযেসিত্ৰা সাহসেন অত্তানং সুখেতি পীণেতি সংৰিভজতি পুঞ্ঞানি করোতি, অযং, গহপতি, কামভোগী একেন ঠানেন গারয্হো দ্ৰীহি ঠানেহি পাসংসো। ‘অধম্মেন ভোগে পরিযেসতি সাহসেনা’তি, ইমিনা একেন ঠানেন গারয্হো। ‘অত্তানং সুখেতি পীণেতী’তি, ইমিনা পঠমেন ঠানেন পাসংসো। ‘সংৰিভজতি পুঞ্ঞানি করোতী’তি, ইমিনা দুতিযেন ঠানেন পাসংসো। অযং, গহপতি, কামভোগী ইমিনা একেন ঠানেন গারয্হো, ইমেহি দ্ৰীহি ঠানেহি পাসংসো।
‘‘Tatra , gahapati, yvāyaṃ kāmabhogī adhammena bhoge pariyesati sāhasena , adhammena bhoge pariyesitvā sāhasena attānaṃ sukheti pīṇeti saṃvibhajati puññāni karoti, ayaṃ, gahapati, kāmabhogī ekena ṭhānena gārayho dvīhi ṭhānehi pāsaṃso. ‘Adhammena bhoge pariyesati sāhasenā’ti, iminā ekena ṭhānena gārayho. ‘Attānaṃ sukheti pīṇetī’ti, iminā paṭhamena ṭhānena pāsaṃso. ‘Saṃvibhajati puññāni karotī’ti, iminā dutiyena ṭhānena pāsaṃso. Ayaṃ, gahapati, kāmabhogī iminā ekena ṭhānena gārayho, imehi dvīhi ṭhānehi pāsaṃso.
‘‘তত্র, গহপতি, য্ৰাযং কামভোগী ধম্মাধম্মেন ভোগে পরিযেসতি সাহসেনপি অসাহসেনপি, ধম্মাধম্মেন ভোগে পরিযেসিত্ৰা সাহসেনপি অসাহসেনপি ন অত্তানং সুখেতি ন পীণেতি ন সংৰিভজতি ন পুঞ্ঞানি করোতি, অযং, গহপতি, কামভোগী একেন ঠানেন পাসংসো তীহি ঠানেহি গারয্হো। ‘ধম্মেন ভোগে পরিযেসতি অসাহসেনা’তি, ইমিনা একেন ঠানেন পাসংসো। ‘অধম্মেন ভোগে পরিযেসতি সাহসেনা’তি, ইমিনা পঠমেন ঠানেন গারয্হো। ‘ন অত্তানং সুখেতি ন পীণেতী’তি, ইমিনা দুতিযেন ঠানেন গারয্হো। ‘ন সংৰিভজতি ন পুঞ্ঞানি করোতী’তি, ইমিনা ততিযেন ঠানেন গারয্হো। অযং, গহপতি, কামভোগী ইমিনা একেন ঠানেন পাসংসো ইমেহি তীহি ঠানেহি গারয্হো।
‘‘Tatra, gahapati, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi na attānaṃ sukheti na pīṇeti na saṃvibhajati na puññāni karoti, ayaṃ, gahapati, kāmabhogī ekena ṭhānena pāsaṃso tīhi ṭhānehi gārayho. ‘Dhammena bhoge pariyesati asāhasenā’ti, iminā ekena ṭhānena pāsaṃso. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Na attānaṃ sukheti na pīṇetī’ti, iminā dutiyena ṭhānena gārayho. ‘Na saṃvibhajati na puññāni karotī’ti, iminā tatiyena ṭhānena gārayho. Ayaṃ, gahapati, kāmabhogī iminā ekena ṭhānena pāsaṃso imehi tīhi ṭhānehi gārayho.
‘‘তত্র , গহপতি, য্ৰাযং কামভোগী ধম্মাধম্মেন ভোগে পরিযেসতি সাহসেনপি অসাহসেনপি, ধম্মাধম্মেন ভোগে পরিযেসিত্ৰা সাহসেনপি অসাহসেনপি অত্তানং সুখেতি পীণেতি ন সংৰিভজতি ন পুঞ্ঞানি করোতি, অযং, গহপতি, কামভোগী দ্ৰীহি ঠানেহি পাসংসো দ্ৰীহি ঠানেহি গারয্হো । ‘ধম্মেন ভোগে পরিযেসতি অসাহসেনা’তি, ইমিনা পঠমেন ঠানেন পাসংসো। ‘অধম্মেন ভোগে পরিযেসতি সাহসেনা’তি, ইমিনা পঠমেন ঠানেন গারয্হো। ‘অত্তানং সুখেতি পীণেতী’তি, ইমিনা দুতিযেন ঠানেন পাসংসো। ‘ন সংৰিভজতি ন পুঞ্ঞানি করোতী’তি, ইমিনা দুতিযেন ঠানেন গারয্হো। অযং , গহপতি, কামভোগী ইমেহি দ্ৰীহি ঠানেহি পাসংসো ইমেহি দ্ৰীহি ঠানেহি গারয্হো।
‘‘Tatra , gahapati, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṃ sukheti pīṇeti na saṃvibhajati na puññāni karoti, ayaṃ, gahapati, kāmabhogī dvīhi ṭhānehi pāsaṃso dvīhi ṭhānehi gārayho . ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Na saṃvibhajati na puññāni karotī’ti, iminā dutiyena ṭhānena gārayho. Ayaṃ , gahapati, kāmabhogī imehi dvīhi ṭhānehi pāsaṃso imehi dvīhi ṭhānehi gārayho.
‘‘তত্র, গহপতি, য্ৰাযং কামভোগী ধম্মাধম্মেন ভোগে পরিযেসতি সাহসেনপি অসাহসেনপি, ধম্মাধম্মেন ভোগে পরিযেসিত্ৰা সাহসেনপি অসাহসেনপি অত্তানং সুখেতি পীণেতি সংৰিভজতি পুঞ্ঞানি করোতি, অযং, গহপতি, কামভোগী তীহি ঠানেহি পাসংসো একেন ঠানেন গারয্হো। ‘ধম্মেন ভোগে পরিযেসতি অসাহসেনা’তি, ইমিনা পঠমেন ঠানেন পাসংসো। ‘অধম্মেন ভোগে পরিযেসতি সাহসেনা’তি, ইমিনা একেন ঠানেন গারয্হো। ‘অত্তানং সুখেতি পীণেতী’তি, ইমিনা দুতিযেন ঠানেন পাসংসো। ‘সংৰিভজতি পুঞ্ঞানি করোতী’তি, ইমিনা ততিযেন ঠানেন পাসংসো। অযং, গহপতি, কামভোগী ইমেহি তীহি ঠানেহি পাসংসো ইমিনা একেন ঠানেন গারয্হো।
‘‘Tatra, gahapati, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṃ sukheti pīṇeti saṃvibhajati puññāni karoti, ayaṃ, gahapati, kāmabhogī tīhi ṭhānehi pāsaṃso ekena ṭhānena gārayho. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Adhammena bhoge pariyesati sāhasenā’ti, iminā ekena ṭhānena gārayho. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Saṃvibhajati puññāni karotī’ti, iminā tatiyena ṭhānena pāsaṃso. Ayaṃ, gahapati, kāmabhogī imehi tīhi ṭhānehi pāsaṃso iminā ekena ṭhānena gārayho.
‘‘তত্র, গহপতি, য্ৰাযং কামভোগী ধম্মেন ভোগে পরিযেসতি অসাহসেন, ধম্মেন ভোগে পরিযেসিত্ৰা অসাহসেন ন অত্তানং সুখেতি ন পীণেতি ন সংৰিভজতি ন পুঞ্ঞানি করোতি, অযং, গহপতি, কামভোগী একেন ঠানেন পাসংসো দ্ৰীহি ঠানেহি গারয্হো। ধম্মেন ভোগে পরিযেসতি অসাহসেনা’তি, ইমিনা একেন ঠানেন পাসংসো। ‘ন অত্তানং সুখেতি ন পীণেতী’তি, ইমিনা পঠমেন ঠানেন গারয্হো। ‘ন সংৰিভজতি ন পুঞ্ঞানি করোতী’তি, ইমিনা দুতিযেন ঠানেন গারয্হো। অযং, গহপতি, কামভোগী ইমিনা একেন ঠানেন পাসংসো ইমেহি দ্ৰীহি ঠানেহি গারয্হো।
‘‘Tatra, gahapati, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena na attānaṃ sukheti na pīṇeti na saṃvibhajati na puññāni karoti, ayaṃ, gahapati, kāmabhogī ekena ṭhānena pāsaṃso dvīhi ṭhānehi gārayho. Dhammena bhoge pariyesati asāhasenā’ti, iminā ekena ṭhānena pāsaṃso. ‘Na attānaṃ sukheti na pīṇetī’ti, iminā paṭhamena ṭhānena gārayho. ‘Na saṃvibhajati na puññāni karotī’ti, iminā dutiyena ṭhānena gārayho. Ayaṃ, gahapati, kāmabhogī iminā ekena ṭhānena pāsaṃso imehi dvīhi ṭhānehi gārayho.
‘‘তত্র, গহপতি, য্ৰাযং কামভোগী ধম্মেন ভোগে পরিযেসতি অসাহসেন, ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি ন সংৰিভজতি ন পুঞ্ঞানি করোতি, অযং, গহপতি , কামভোগী দ্ৰীহি ঠানেহি পাসংসো একেন ঠানেন গারয্হো। ‘ধম্মেন ভোগে পরিযেসতি অসাহসেনা’তি, ইমিনা পঠমেন ঠানেন পাসংসো। ‘অত্তানং সুখেতি পীণেতী’তি, ইমিনা দুতিযেন ঠানেন পাসংসো। ‘ন সংৰিভজতি ন পুঞ্ঞানি করোতী’তি ইমিনা একেন ঠানেন গারয্হো। অযং , গহপতি, কামভোগী ইমেহি দ্ৰীহি ঠানেহি পাসংসো ইমিনা একেন ঠানেন গারয্হো।
‘‘Tatra, gahapati, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti na saṃvibhajati na puññāni karoti, ayaṃ, gahapati , kāmabhogī dvīhi ṭhānehi pāsaṃso ekena ṭhānena gārayho. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Na saṃvibhajati na puññāni karotī’ti iminā ekena ṭhānena gārayho. Ayaṃ , gahapati, kāmabhogī imehi dvīhi ṭhānehi pāsaṃso iminā ekena ṭhānena gārayho.
‘‘তত্র, গহপতি য্ৰাযং কামভোগী ধম্মেন ভোগে পরিযেসতি অসাহসেন, ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি সংৰিভজতি পুঞ্ঞানি করোতি, তে চ ভোগে গথিতো মুচ্ছিতো অজ্ঝোসন্নো অনাদীনৰদস্সাৰী অনিস্সরণপঞ্ঞো পরিভুঞ্জতি, অযং, গহপতি, কামভোগী তীহি ঠানেহি পাসংসো একেন ঠানেন গারয্হো। ‘ধম্মেন ভোগে পরিযেসতি অসাহসেনা’তি, ইমিনা পঠমেন ঠানেন পাসংসো। ‘অত্তানং সুখেতি পীণেতী’তি, ইমিনা দুতিযেন ঠানেন পাসংসো। ‘সংৰিভজতি পুঞ্ঞানি করোতী’তি, ইমিনা ততিযেন ঠানেন পাসংসো। ‘তে চ ভোগে গথিতো মুচ্ছিতো অজ্ঝোসন্নো অনাদীনৰদস্সাৰী অনিস্সরণপঞ্ঞো পরিভুঞ্জতী’তি , ইমিনা একেন ঠানেন গারয্হো। অযং, গহপতি, কামভোগী ইমেহি তীহি ঠানেহি পাসংসো ইমিনা একেন ঠানেন গারয্হো।
‘‘Tatra, gahapati yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge gathito mucchito ajjhosanno anādīnavadassāvī anissaraṇapañño paribhuñjati, ayaṃ, gahapati, kāmabhogī tīhi ṭhānehi pāsaṃso ekena ṭhānena gārayho. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Saṃvibhajati puññāni karotī’ti, iminā tatiyena ṭhānena pāsaṃso. ‘Te ca bhoge gathito mucchito ajjhosanno anādīnavadassāvī anissaraṇapañño paribhuñjatī’ti , iminā ekena ṭhānena gārayho. Ayaṃ, gahapati, kāmabhogī imehi tīhi ṭhānehi pāsaṃso iminā ekena ṭhānena gārayho.
‘‘তত্র, গহপতি, য্ৰাযং কামভোগী ধম্মেন ভোগে পরিযেসতি অসাহসেন, ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি সংৰিভজতি পুঞ্ঞানি করোতি, তে চ ভোগে অগথিতো অমুচ্ছিতো অনজ্ঝোসন্নো আদীনৰদস্সাৰী নিস্সরণপঞ্ঞো পরিভুঞ্জতি, অযং, গহপতি, কামভোগী চতূহি ঠানেহি পাসংসো। ‘ধম্মেন ভোগে পরিযেসতি অসাহসেনা’তি, ইমিনা পঠমেন ঠানেন পাসংসো। ‘অত্তানং সুখেতি পীণেতী’তি, ইমিনা দুতিযেন ঠানেন পাসংসো। ‘সংৰিভজতি পুঞ্ঞানি করোতী’তি, ইমিনা ততিযেন ঠানেন পাসংসো। ‘তে চ ভোগে অগথিতো অমুচ্ছিতো অনজ্ঝোসন্নো আদীনৰদস্সাৰী নিস্সরণপঞ্ঞো পরিভুঞ্জতী’তি, ইমিনা চতুত্থেন ঠানেন পাসংসো। অযং, গহপতি, কামভোগী ইমেহি চতূহি ঠানেহি পাসংসো।
‘‘Tatra, gahapati, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṃ, gahapati, kāmabhogī catūhi ṭhānehi pāsaṃso. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Saṃvibhajati puññāni karotī’ti, iminā tatiyena ṭhānena pāsaṃso. ‘Te ca bhoge agathito amucchito anajjhosanno ādīnavadassāvī nissaraṇapañño paribhuñjatī’ti, iminā catutthena ṭhānena pāsaṃso. Ayaṃ, gahapati, kāmabhogī imehi catūhi ṭhānehi pāsaṃso.
‘‘ইমে খো, গহপতি, দস কামভোগী সন্তো সংৰিজ্জমানা লোকস্মিং। ইমেসং খো, গহপতি, দসন্নং কামভোগীনং য্ৰাযং কামভোগী ধম্মেন ভোগে পরিযেসতি অসাহসেন, ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি সংৰিভজতি পুঞ্ঞানি করোতি, তে চ ভোগে অগথিতো অমুচ্ছিতো অনজ্ঝোসন্নো আদীনৰদস্সাৰী নিস্সরণপঞ্ঞো পরিভুঞ্জতি, অযং ইমেসং দসন্নং কামভোগীনং অগ্গো চ সেট্ঠো চ পামোক্খো 7 চ উত্তমো চ পৰরো চ। সেয্যথাপি, গহপতি, গৰা খীরং, খীরম্হা দধি, দধিম্হা নৰনীতং, নৰনীতম্হা সপ্পি, সপ্পিম্হা সপ্পিমণ্ডো। সপ্পিমণ্ডো তত্থ অগ্গমক্খাযতি।
‘‘Ime kho, gahapati, dasa kāmabhogī santo saṃvijjamānā lokasmiṃ. Imesaṃ kho, gahapati, dasannaṃ kāmabhogīnaṃ yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṃ imesaṃ dasannaṃ kāmabhogīnaṃ aggo ca seṭṭho ca pāmokkho 8 ca uttamo ca pavaro ca. Seyyathāpi, gahapati, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo. Sappimaṇḍo tattha aggamakkhāyati.
এৰমেৰং খো , গহপতি, ইমেসং দসন্নং কামভোগীনং য্ৰাযং কামভোগী ধম্মেন ভোগে পরিযেসতি অসাহসেন, ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি সংৰিভজতি পুঞ্ঞানি করোতি, তে চ ভোগে অগথিতো অমুচ্ছিতো অনজ্ঝোসন্নো আদীনৰদস্সাৰী নিস্সরণপঞ্ঞো পরিভুঞ্জতি, অযং ইমেসং দসন্নং কামভোগীনং অগ্গো চ সেট্ঠো চ পামোক্খো 9 চ উত্তমো চ পৰরো চা’’তি। পঠমং।
Evamevaṃ kho , gahapati, imesaṃ dasannaṃ kāmabhogīnaṃ yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṃ imesaṃ dasannaṃ kāmabhogīnaṃ aggo ca seṭṭho ca pāmokkho 10 ca uttamo ca pavaro cā’’ti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১-২. কামভোগীসুত্তাদিৰণ্ণনা • 1-2. Kāmabhogīsuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৪. কামভোগীসুত্তাদিৰণ্ণনা • 1-4. Kāmabhogīsuttādivaṇṇanā
