| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
(10) 5. උපාලිවග්‌ගො
(10) 5. Upālivaggo
1. කාමභොගීසුත්‌තං
1. Kāmabhogīsuttaṃ
91. එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. අථ ඛො අනාථපිණ්‌ඩිකො ගහපති යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො අනාථපිණ්‌ඩිකං ගහපතිං භගවා එතදවොච –
91. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –
‘‘දසයිමෙ , ගහපති, කාමභොගී සන්‌තො සංවිජ්‌ජමානා ලොකස්‌මිං. කතමෙ දස? ඉධ, ගහපති, එකච්‌චො කාමභොගී අධම්‌මෙන භොගෙ පරියෙසති සාහසෙන; අධම්‌මෙන භොගෙ පරියෙසිත්‌වා සාහසෙන න අත්‌තානං සුඛෙති න පීණෙති 1 න සංවිභජති න පුඤ්‌ඤානි කරොති.
‘‘Dasayime , gahapati, kāmabhogī santo saṃvijjamānā lokasmiṃ. Katame dasa? Idha, gahapati, ekacco kāmabhogī adhammena bhoge pariyesati sāhasena; adhammena bhoge pariyesitvā sāhasena na attānaṃ sukheti na pīṇeti 2 na saṃvibhajati na puññāni karoti.
‘‘ඉධ පන, ගහපති, එකච්‌චො කාමභොගී අධම්‌මෙන භොගෙ පරියෙසති සාහසෙන; අධම්‌මෙන භොගෙ පරියෙසිත්‌වා සාහසෙන අත්‌තානං සුඛෙති පීණෙති, න සංවිභජති න පුඤ්‌ඤානි කරොති.
‘‘Idha pana, gahapati, ekacco kāmabhogī adhammena bhoge pariyesati sāhasena; adhammena bhoge pariyesitvā sāhasena attānaṃ sukheti pīṇeti, na saṃvibhajati na puññāni karoti.
‘‘ඉධ පන , ගහපති, එකච්‌චො කාමභොගී අධම්‌මෙන භොගෙ පරියෙසති සාහසෙන; අධම්‌මෙන භොගෙ පරියෙසිත්‌වා සාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති.
‘‘Idha pana , gahapati, ekacco kāmabhogī adhammena bhoge pariyesati sāhasena; adhammena bhoge pariyesitvā sāhasena attānaṃ sukheti pīṇeti saṃvibhajati puññāni karoti.
‘‘ඉධ පන, ගහපති, එකච්‌චො කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි; ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි න අත්‌තානං සුඛෙති න පීණෙති න සංවිභජති න පුඤ්‌ඤානි කරොති.
‘‘Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi; dhammādhammena bhoge pariyesitvā sāhasenapi asāhasenapi na attānaṃ sukheti na pīṇeti na saṃvibhajati na puññāni karoti.
‘‘ඉධ පන, ගහපති, එකච්‌චො කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි ; ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි අත්‌තානං සුඛෙති පීණෙති, න සංවිභජති න පුඤ්‌ඤානි කරොති.
‘‘Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi ; dhammādhammena bhoge pariyesitvā sāhasenapi asāhasenapi attānaṃ sukheti pīṇeti, na saṃvibhajati na puññāni karoti.
‘‘ඉධ පන, ගහපති, එකච්‌චො කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි; ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි අත්‌තානං සුඛෙති පීණෙති සංවිභජති පුඤ්‌ඤානි කරොති.
‘‘Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi; dhammādhammena bhoge pariyesitvā sāhasenapi asāhasenapi attānaṃ sukheti pīṇeti saṃvibhajati puññāni karoti.
‘‘ඉධ පන, ගහපති, එකච්‌චො කාමභොගී ධම්‌මෙන භොගෙ පරියෙසති අසාහසෙන; ධම්‌මෙන භොගෙ පරියෙසිත්‌වා අසාහසෙන න අත්‌තානං සුඛෙති න පීණෙති න සංවිභජති න පුඤ්‌ඤානි කරොති.
‘‘Idha pana, gahapati, ekacco kāmabhogī dhammena bhoge pariyesati asāhasena; dhammena bhoge pariyesitvā asāhasena na attānaṃ sukheti na pīṇeti na saṃvibhajati na puññāni karoti.
‘‘ඉධ පන, ගහපති, එකච්‌චො කාමභොගී ධම්‌මෙන භොගෙ පරියෙසති අසාහසෙන; ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති, න සංවිභජති න පුඤ්‌ඤානි කරොති.
‘‘Idha pana, gahapati, ekacco kāmabhogī dhammena bhoge pariyesati asāhasena; dhammena bhoge pariyesitvā asāhasena attānaṃ sukheti pīṇeti, na saṃvibhajati na puññāni karoti.
‘‘ඉධ පන, ගහපති, එකච්‌චො කාමභොගී ධම්‌මෙන භොගෙ පරියෙසති අසාහසෙන; ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති. තෙ ච භොගෙ අගථිතො අමුච්‌ඡිතො අනජ්‌ඣොසන්‌නො ආදීනවදස්‌සාවී නිස්‌සරණපඤ්‌ඤො පරිභුඤ්‌ජති.
‘‘Idha pana, gahapati, ekacco kāmabhogī dhammena bhoge pariyesati asāhasena; dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti. Te ca bhoge agathito amucchito anajjhosanno ādīnavadassāvī nissaraṇapañño paribhuñjati.
‘‘තත්‍ර, ගහපති, ය්‌වායං කාමභොගී අධම්‌මෙන භොගෙ පරියෙසති සාහසෙන, අධම්‌මෙන භොගෙ පරියෙසිත්‌වා සාහසෙන න අත්‌තානං සුඛෙති න පීණෙති න සංවිභජති න පුඤ්‌ඤානි කරොති, අයං, ගහපති, කාමභොගී තීහි ඨානෙහි ගාරය්‌හො. ‘අධම්‌මෙන භොගෙ පරියෙසති සාහසෙනා’ති, ඉමිනා පඨමෙන ඨානෙන ගාරය්‌හො. ‘න අත්‌තානං සුඛෙති න පීණෙතී’ති, ඉමිනා දුතියෙන ඨානෙන ගාරය්‌හො. ‘න සංවිභජති න පුඤ්‌ඤානි කරොතී’ති, ඉමිනා තතියෙන ඨානෙන ගාරය්‌හො. අයං, ගහපති, කාමභොගී ඉමෙහි තීහි ඨානෙහි ගාරය්‌හො.
‘‘Tatra, gahapati, yvāyaṃ kāmabhogī adhammena bhoge pariyesati sāhasena, adhammena bhoge pariyesitvā sāhasena na attānaṃ sukheti na pīṇeti na saṃvibhajati na puññāni karoti, ayaṃ, gahapati, kāmabhogī tīhi ṭhānehi gārayho. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Na attānaṃ sukheti na pīṇetī’ti, iminā dutiyena ṭhānena gārayho. ‘Na saṃvibhajati na puññāni karotī’ti, iminā tatiyena ṭhānena gārayho. Ayaṃ, gahapati, kāmabhogī imehi tīhi ṭhānehi gārayho.
‘‘තත්‍ර, ගහපති, ය්‌වායං කාමභොගී අධම්‌මෙන භොගෙ පරියෙසති සාහසෙන, අධම්‌මෙන භොගෙ පරියෙසිත්‌වා සාහසෙන අත්‌තානං සුඛෙති පීණෙති න සංවිභජති න පුඤ්‌ඤානි කරොති, අයං, ගහපති, කාමභොගී ද්‌වීහි ඨානෙහි ගාරය්‌හො එකෙන ඨානෙන පාසංසො. ‘අධම්‌මෙන භොගෙ පරියෙසති සාහසෙනා’ති, ඉමිනා පඨමෙන ඨානෙන ගාරය්‌හො. ‘අත්‌තානං සුඛෙති පීණෙතී’ති, ඉමිනා එකෙන ඨානෙන පාසංසො. ‘න සංවිභජති න පුඤ්‌ඤානි කරොතී’ති ඉමිනා දුතියෙන ඨානෙන ගාරය්‌හො. අයං, ගහපති, කාමභොගී ඉමෙහි ද්‌වීහි ඨානෙහි ගාරය්‌හො ඉමිනා එකෙන ඨානෙන පාසංසො.
‘‘Tatra, gahapati, yvāyaṃ kāmabhogī adhammena bhoge pariyesati sāhasena, adhammena bhoge pariyesitvā sāhasena attānaṃ sukheti pīṇeti na saṃvibhajati na puññāni karoti, ayaṃ, gahapati, kāmabhogī dvīhi ṭhānehi gārayho ekena ṭhānena pāsaṃso. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Attānaṃ sukheti pīṇetī’ti, iminā ekena ṭhānena pāsaṃso. ‘Na saṃvibhajati na puññāni karotī’ti iminā dutiyena ṭhānena gārayho. Ayaṃ, gahapati, kāmabhogī imehi dvīhi ṭhānehi gārayho iminā ekena ṭhānena pāsaṃso.
‘‘තත්‍ර , ගහපති, ය්‌වායං කාමභොගී අධම්‌මෙන භොගෙ පරියෙසති සාහසෙන , අධම්‌මෙන භොගෙ පරියෙසිත්‌වා සාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති, අයං, ගහපති, කාමභොගී එකෙන ඨානෙන ගාරය්‌හො ද්‌වීහි ඨානෙහි පාසංසො. ‘අධම්‌මෙන භොගෙ පරියෙසති සාහසෙනා’ති, ඉමිනා එකෙන ඨානෙන ගාරය්‌හො. ‘අත්‌තානං සුඛෙති පීණෙතී’ති, ඉමිනා පඨමෙන ඨානෙන පාසංසො. ‘සංවිභජති පුඤ්‌ඤානි කරොතී’ති, ඉමිනා දුතියෙන ඨානෙන පාසංසො. අයං, ගහපති, කාමභොගී ඉමිනා එකෙන ඨානෙන ගාරය්‌හො, ඉමෙහි ද්‌වීහි ඨානෙහි පාසංසො.
‘‘Tatra , gahapati, yvāyaṃ kāmabhogī adhammena bhoge pariyesati sāhasena , adhammena bhoge pariyesitvā sāhasena attānaṃ sukheti pīṇeti saṃvibhajati puññāni karoti, ayaṃ, gahapati, kāmabhogī ekena ṭhānena gārayho dvīhi ṭhānehi pāsaṃso. ‘Adhammena bhoge pariyesati sāhasenā’ti, iminā ekena ṭhānena gārayho. ‘Attānaṃ sukheti pīṇetī’ti, iminā paṭhamena ṭhānena pāsaṃso. ‘Saṃvibhajati puññāni karotī’ti, iminā dutiyena ṭhānena pāsaṃso. Ayaṃ, gahapati, kāmabhogī iminā ekena ṭhānena gārayho, imehi dvīhi ṭhānehi pāsaṃso.
‘‘තත්‍ර, ගහපති, ය්‌වායං කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි, ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි න අත්‌තානං සුඛෙති න පීණෙති න සංවිභජති න පුඤ්‌ඤානි කරොති, අයං, ගහපති, කාමභොගී එකෙන ඨානෙන පාසංසො තීහි ඨානෙහි ගාරය්‌හො. ‘ධම්‌මෙන භොගෙ පරියෙසති අසාහසෙනා’ති, ඉමිනා එකෙන ඨානෙන පාසංසො. ‘අධම්‌මෙන භොගෙ පරියෙසති සාහසෙනා’ති, ඉමිනා පඨමෙන ඨානෙන ගාරය්‌හො. ‘න අත්‌තානං සුඛෙති න පීණෙතී’ති, ඉමිනා දුතියෙන ඨානෙන ගාරය්‌හො. ‘න සංවිභජති න පුඤ්‌ඤානි කරොතී’ති, ඉමිනා තතියෙන ඨානෙන ගාරය්‌හො. අයං, ගහපති, කාමභොගී ඉමිනා එකෙන ඨානෙන පාසංසො ඉමෙහි තීහි ඨානෙහි ගාරය්‌හො.
‘‘Tatra, gahapati, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi na attānaṃ sukheti na pīṇeti na saṃvibhajati na puññāni karoti, ayaṃ, gahapati, kāmabhogī ekena ṭhānena pāsaṃso tīhi ṭhānehi gārayho. ‘Dhammena bhoge pariyesati asāhasenā’ti, iminā ekena ṭhānena pāsaṃso. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Na attānaṃ sukheti na pīṇetī’ti, iminā dutiyena ṭhānena gārayho. ‘Na saṃvibhajati na puññāni karotī’ti, iminā tatiyena ṭhānena gārayho. Ayaṃ, gahapati, kāmabhogī iminā ekena ṭhānena pāsaṃso imehi tīhi ṭhānehi gārayho.
‘‘තත්‍ර , ගහපති, ය්‌වායං කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි, ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි අත්‌තානං සුඛෙති පීණෙති න සංවිභජති න පුඤ්‌ඤානි කරොති, අයං, ගහපති, කාමභොගී ද්‌වීහි ඨානෙහි පාසංසො ද්‌වීහි ඨානෙහි ගාරය්‌හො . ‘ධම්‌මෙන භොගෙ පරියෙසති අසාහසෙනා’ති, ඉමිනා පඨමෙන ඨානෙන පාසංසො. ‘අධම්‌මෙන භොගෙ පරියෙසති සාහසෙනා’ති, ඉමිනා පඨමෙන ඨානෙන ගාරය්‌හො. ‘අත්‌තානං සුඛෙති පීණෙතී’ති, ඉමිනා දුතියෙන ඨානෙන පාසංසො. ‘න සංවිභජති න පුඤ්‌ඤානි කරොතී’ති, ඉමිනා දුතියෙන ඨානෙන ගාරය්‌හො. අයං , ගහපති, කාමභොගී ඉමෙහි ද්‌වීහි ඨානෙහි පාසංසො ඉමෙහි ද්‌වීහි ඨානෙහි ගාරය්‌හො.
‘‘Tatra , gahapati, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṃ sukheti pīṇeti na saṃvibhajati na puññāni karoti, ayaṃ, gahapati, kāmabhogī dvīhi ṭhānehi pāsaṃso dvīhi ṭhānehi gārayho . ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Na saṃvibhajati na puññāni karotī’ti, iminā dutiyena ṭhānena gārayho. Ayaṃ , gahapati, kāmabhogī imehi dvīhi ṭhānehi pāsaṃso imehi dvīhi ṭhānehi gārayho.
‘‘තත්‍ර, ගහපති, ය්‌වායං කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි, ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි අත්‌තානං සුඛෙති පීණෙති සංවිභජති පුඤ්‌ඤානි කරොති, අයං, ගහපති, කාමභොගී තීහි ඨානෙහි පාසංසො එකෙන ඨානෙන ගාරය්‌හො. ‘ධම්‌මෙන භොගෙ පරියෙසති අසාහසෙනා’ති, ඉමිනා පඨමෙන ඨානෙන පාසංසො. ‘අධම්‌මෙන භොගෙ පරියෙසති සාහසෙනා’ති, ඉමිනා එකෙන ඨානෙන ගාරය්‌හො. ‘අත්‌තානං සුඛෙති පීණෙතී’ති, ඉමිනා දුතියෙන ඨානෙන පාසංසො. ‘සංවිභජති පුඤ්‌ඤානි කරොතී’ති, ඉමිනා තතියෙන ඨානෙන පාසංසො. අයං, ගහපති, කාමභොගී ඉමෙහි තීහි ඨානෙහි පාසංසො ඉමිනා එකෙන ඨානෙන ගාරය්‌හො.
‘‘Tatra, gahapati, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṃ sukheti pīṇeti saṃvibhajati puññāni karoti, ayaṃ, gahapati, kāmabhogī tīhi ṭhānehi pāsaṃso ekena ṭhānena gārayho. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Adhammena bhoge pariyesati sāhasenā’ti, iminā ekena ṭhānena gārayho. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Saṃvibhajati puññāni karotī’ti, iminā tatiyena ṭhānena pāsaṃso. Ayaṃ, gahapati, kāmabhogī imehi tīhi ṭhānehi pāsaṃso iminā ekena ṭhānena gārayho.
‘‘තත්‍ර, ගහපති, ය්‌වායං කාමභොගී ධම්‌මෙන භොගෙ පරියෙසති අසාහසෙන, ධම්‌මෙන භොගෙ පරියෙසිත්‌වා අසාහසෙන න අත්‌තානං සුඛෙති න පීණෙති න සංවිභජති න පුඤ්‌ඤානි කරොති, අයං, ගහපති, කාමභොගී එකෙන ඨානෙන පාසංසො ද්‌වීහි ඨානෙහි ගාරය්‌හො. ධම්‌මෙන භොගෙ පරියෙසති අසාහසෙනා’ති, ඉමිනා එකෙන ඨානෙන පාසංසො. ‘න අත්‌තානං සුඛෙති න පීණෙතී’ති, ඉමිනා පඨමෙන ඨානෙන ගාරය්‌හො. ‘න සංවිභජති න පුඤ්‌ඤානි කරොතී’ති, ඉමිනා දුතියෙන ඨානෙන ගාරය්‌හො. අයං, ගහපති, කාමභොගී ඉමිනා එකෙන ඨානෙන පාසංසො ඉමෙහි ද්‌වීහි ඨානෙහි ගාරය්‌හො.
‘‘Tatra, gahapati, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena na attānaṃ sukheti na pīṇeti na saṃvibhajati na puññāni karoti, ayaṃ, gahapati, kāmabhogī ekena ṭhānena pāsaṃso dvīhi ṭhānehi gārayho. Dhammena bhoge pariyesati asāhasenā’ti, iminā ekena ṭhānena pāsaṃso. ‘Na attānaṃ sukheti na pīṇetī’ti, iminā paṭhamena ṭhānena gārayho. ‘Na saṃvibhajati na puññāni karotī’ti, iminā dutiyena ṭhānena gārayho. Ayaṃ, gahapati, kāmabhogī iminā ekena ṭhānena pāsaṃso imehi dvīhi ṭhānehi gārayho.
‘‘තත්‍ර, ගහපති, ය්‌වායං කාමභොගී ධම්‌මෙන භොගෙ පරියෙසති අසාහසෙන, ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති න සංවිභජති න පුඤ්‌ඤානි කරොති, අයං, ගහපති , කාමභොගී ද්‌වීහි ඨානෙහි පාසංසො එකෙන ඨානෙන ගාරය්‌හො. ‘ධම්‌මෙන භොගෙ පරියෙසති අසාහසෙනා’ති, ඉමිනා පඨමෙන ඨානෙන පාසංසො. ‘අත්‌තානං සුඛෙති පීණෙතී’ති, ඉමිනා දුතියෙන ඨානෙන පාසංසො. ‘න සංවිභජති න පුඤ්‌ඤානි කරොතී’ති ඉමිනා එකෙන ඨානෙන ගාරය්‌හො. අයං , ගහපති, කාමභොගී ඉමෙහි ද්‌වීහි ඨානෙහි පාසංසො ඉමිනා එකෙන ඨානෙන ගාරය්‌හො.
‘‘Tatra, gahapati, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti na saṃvibhajati na puññāni karoti, ayaṃ, gahapati , kāmabhogī dvīhi ṭhānehi pāsaṃso ekena ṭhānena gārayho. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Na saṃvibhajati na puññāni karotī’ti iminā ekena ṭhānena gārayho. Ayaṃ , gahapati, kāmabhogī imehi dvīhi ṭhānehi pāsaṃso iminā ekena ṭhānena gārayho.
‘‘තත්‍ර, ගහපති ය්‌වායං කාමභොගී ධම්‌මෙන භොගෙ පරියෙසති අසාහසෙන, ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති, තෙ ච භොගෙ ගථිතො මුච්‌ඡිතො අජ්‌ඣොසන්‌නො අනාදීනවදස්‌සාවී අනිස්‌සරණපඤ්‌ඤො පරිභුඤ්‌ජති, අයං, ගහපති, කාමභොගී තීහි ඨානෙහි පාසංසො එකෙන ඨානෙන ගාරය්‌හො. ‘ධම්‌මෙන භොගෙ පරියෙසති අසාහසෙනා’ති, ඉමිනා පඨමෙන ඨානෙන පාසංසො. ‘අත්‌තානං සුඛෙති පීණෙතී’ති, ඉමිනා දුතියෙන ඨානෙන පාසංසො. ‘සංවිභජති පුඤ්‌ඤානි කරොතී’ති, ඉමිනා තතියෙන ඨානෙන පාසංසො. ‘තෙ ච භොගෙ ගථිතො මුච්‌ඡිතො අජ්‌ඣොසන්‌නො අනාදීනවදස්‌සාවී අනිස්‌සරණපඤ්‌ඤො පරිභුඤ්‌ජතී’ති , ඉමිනා එකෙන ඨානෙන ගාරය්‌හො. අයං, ගහපති, කාමභොගී ඉමෙහි තීහි ඨානෙහි පාසංසො ඉමිනා එකෙන ඨානෙන ගාරය්‌හො.
‘‘Tatra, gahapati yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge gathito mucchito ajjhosanno anādīnavadassāvī anissaraṇapañño paribhuñjati, ayaṃ, gahapati, kāmabhogī tīhi ṭhānehi pāsaṃso ekena ṭhānena gārayho. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Saṃvibhajati puññāni karotī’ti, iminā tatiyena ṭhānena pāsaṃso. ‘Te ca bhoge gathito mucchito ajjhosanno anādīnavadassāvī anissaraṇapañño paribhuñjatī’ti , iminā ekena ṭhānena gārayho. Ayaṃ, gahapati, kāmabhogī imehi tīhi ṭhānehi pāsaṃso iminā ekena ṭhānena gārayho.
‘‘තත්‍ර, ගහපති, ය්‌වායං කාමභොගී ධම්‌මෙන භොගෙ පරියෙසති අසාහසෙන, ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති, තෙ ච භොගෙ අගථිතො අමුච්‌ඡිතො අනජ්‌ඣොසන්‌නො ආදීනවදස්‌සාවී නිස්‌සරණපඤ්‌ඤො පරිභුඤ්‌ජති, අයං, ගහපති, කාමභොගී චතූහි ඨානෙහි පාසංසො. ‘ධම්‌මෙන භොගෙ පරියෙසති අසාහසෙනා’ති, ඉමිනා පඨමෙන ඨානෙන පාසංසො. ‘අත්‌තානං සුඛෙති පීණෙතී’ති, ඉමිනා දුතියෙන ඨානෙන පාසංසො. ‘සංවිභජති පුඤ්‌ඤානි කරොතී’ති, ඉමිනා තතියෙන ඨානෙන පාසංසො. ‘තෙ ච භොගෙ අගථිතො අමුච්‌ඡිතො අනජ්‌ඣොසන්‌නො ආදීනවදස්‌සාවී නිස්‌සරණපඤ්‌ඤො පරිභුඤ්‌ජතී’ති, ඉමිනා චතුත්‌ථෙන ඨානෙන පාසංසො. අයං, ගහපති, කාමභොගී ඉමෙහි චතූහි ඨානෙහි පාසංසො.
‘‘Tatra, gahapati, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṃ, gahapati, kāmabhogī catūhi ṭhānehi pāsaṃso. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Saṃvibhajati puññāni karotī’ti, iminā tatiyena ṭhānena pāsaṃso. ‘Te ca bhoge agathito amucchito anajjhosanno ādīnavadassāvī nissaraṇapañño paribhuñjatī’ti, iminā catutthena ṭhānena pāsaṃso. Ayaṃ, gahapati, kāmabhogī imehi catūhi ṭhānehi pāsaṃso.
‘‘ඉමෙ ඛො, ගහපති, දස කාමභොගී සන්‌තො සංවිජ්‌ජමානා ලොකස්‌මිං. ඉමෙසං ඛො, ගහපති, දසන්‌නං කාමභොගීනං ය්‌වායං කාමභොගී ධම්‌මෙන භොගෙ පරියෙසති අසාහසෙන, ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති, තෙ ච භොගෙ අගථිතො අමුච්‌ඡිතො අනජ්‌ඣොසන්‌නො ආදීනවදස්‌සාවී නිස්‌සරණපඤ්‌ඤො පරිභුඤ්‌ජති, අයං ඉමෙසං දසන්‌නං කාමභොගීනං අග්‌ගො ච සෙට්‌ඨො ච පාමොක්‌ඛො 7 ච උත්‌තමො ච පවරො ච. සෙය්‍යථාපි, ගහපති, ගවා ඛීරං, ඛීරම්‌හා දධි, දධිම්‌හා නවනීතං, නවනීතම්‌හා සප්‌පි, සප්‌පිම්‌හා සප්‌පිමණ්‌ඩො. සප්‌පිමණ්‌ඩො තත්‌ථ අග්‌ගමක්‌ඛායති.
‘‘Ime kho, gahapati, dasa kāmabhogī santo saṃvijjamānā lokasmiṃ. Imesaṃ kho, gahapati, dasannaṃ kāmabhogīnaṃ yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṃ imesaṃ dasannaṃ kāmabhogīnaṃ aggo ca seṭṭho ca pāmokkho 8 ca uttamo ca pavaro ca. Seyyathāpi, gahapati, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo. Sappimaṇḍo tattha aggamakkhāyati.
එවමෙවං ඛො , ගහපති, ඉමෙසං දසන්‌නං කාමභොගීනං ය්‌වායං කාමභොගී ධම්‌මෙන භොගෙ පරියෙසති අසාහසෙන, ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති, තෙ ච භොගෙ අගථිතො අමුච්‌ඡිතො අනජ්‌ඣොසන්‌නො ආදීනවදස්‌සාවී නිස්‌සරණපඤ්‌ඤො පරිභුඤ්‌ජති, අයං ඉමෙසං දසන්‌නං කාමභොගීනං අග්‌ගො ච සෙට්‌ඨො ච පාමොක්‌ඛො 9 ච උත්‌තමො ච පවරො චා’’ති. පඨමං.
Evamevaṃ kho , gahapati, imesaṃ dasannaṃ kāmabhogīnaṃ yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṃ imesaṃ dasannaṃ kāmabhogīnaṃ aggo ca seṭṭho ca pāmokkho 10 ca uttamo ca pavaro cā’’ti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1-2. කාමභොගීසුත්‌තාදිවණ්‌ණනා • 1-2. Kāmabhogīsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-4. කාමභොගීසුත්‌තාදිවණ්‌ණනා • 1-4. Kāmabhogīsuttādivaṇṇanā
