Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

    (༡༠) ༥. ཨུཔཱལིཝགྒོ

    (10) 5. Upālivaggo

    ༡. ཀཱམབྷོགཱིསུཏྟཾ

    1. Kāmabhogīsuttaṃ

    ༩༡. ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཨཐ ཁོ ཨནཱཐཔིཎྜིཀོ གཧཔཏི ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨནཱཐཔིཎྜིཀཾ གཧཔཏིཾ བྷགཝཱ ཨེཏདཝོཙ –

    91. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –

    ‘‘དསཡིམེ , གཧཔཏི, ཀཱམབྷོགཱི སནྟོ སཾཝིཛྫམཱནཱ ལོཀསྨིཾ། ཀཏམེ དས? ཨིདྷ, གཧཔཏི, ཨེཀཙྩོ ཀཱམབྷོགཱི ཨདྷམྨེན བྷོགེ པརིཡེསཏི སཱཧསེན; ཨདྷམྨེན བྷོགེ པརིཡེསིཏྭཱ སཱཧསེན ན ཨཏྟཱནཾ སུཁེཏི ན པཱིཎེཏི 1 ན སཾཝིབྷཛཏི ན པུཉྙཱནི ཀརོཏི།

    ‘‘Dasayime , gahapati, kāmabhogī santo saṃvijjamānā lokasmiṃ. Katame dasa? Idha, gahapati, ekacco kāmabhogī adhammena bhoge pariyesati sāhasena; adhammena bhoge pariyesitvā sāhasena na attānaṃ sukheti na pīṇeti 2 na saṃvibhajati na puññāni karoti.

    ‘‘ཨིདྷ པན, གཧཔཏི, ཨེཀཙྩོ ཀཱམབྷོགཱི ཨདྷམྨེན བྷོགེ པརིཡེསཏི སཱཧསེན; ཨདྷམྨེན བྷོགེ པརིཡེསིཏྭཱ སཱཧསེན ཨཏྟཱནཾ སུཁེཏི པཱིཎེཏི, ན སཾཝིབྷཛཏི ན པུཉྙཱནི ཀརོཏི།

    ‘‘Idha pana, gahapati, ekacco kāmabhogī adhammena bhoge pariyesati sāhasena; adhammena bhoge pariyesitvā sāhasena attānaṃ sukheti pīṇeti, na saṃvibhajati na puññāni karoti.

    ‘‘ཨིདྷ པན , གཧཔཏི, ཨེཀཙྩོ ཀཱམབྷོགཱི ཨདྷམྨེན བྷོགེ པརིཡེསཏི སཱཧསེན; ཨདྷམྨེན བྷོགེ པརིཡེསིཏྭཱ སཱཧསེན ཨཏྟཱནཾ སུཁེཏི པཱིཎེཏི སཾཝིབྷཛཏི པུཉྙཱནི ཀརོཏི།

    ‘‘Idha pana , gahapati, ekacco kāmabhogī adhammena bhoge pariyesati sāhasena; adhammena bhoge pariyesitvā sāhasena attānaṃ sukheti pīṇeti saṃvibhajati puññāni karoti.

    ‘‘ཨིདྷ པན, གཧཔཏི, ཨེཀཙྩོ ཀཱམབྷོགཱི དྷམྨཱདྷམྨེན བྷོགེ པརིཡེསཏི སཱཧསེནཔི ཨསཱཧསེནཔི; དྷམྨཱདྷམྨེན བྷོགེ པརིཡེསིཏྭཱ སཱཧསེནཔི ཨསཱཧསེནཔི ན ཨཏྟཱནཾ སུཁེཏི ན པཱིཎེཏི ན སཾཝིབྷཛཏི ན པུཉྙཱནི ཀརོཏི།

    ‘‘Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi; dhammādhammena bhoge pariyesitvā sāhasenapi asāhasenapi na attānaṃ sukheti na pīṇeti na saṃvibhajati na puññāni karoti.

    ‘‘ཨིདྷ པན, གཧཔཏི, ཨེཀཙྩོ ཀཱམབྷོགཱི དྷམྨཱདྷམྨེན བྷོགེ པརིཡེསཏི སཱཧསེནཔི ཨསཱཧསེནཔི ; དྷམྨཱདྷམྨེན བྷོགེ པརིཡེསིཏྭཱ སཱཧསེནཔི ཨསཱཧསེནཔི ཨཏྟཱནཾ སུཁེཏི པཱིཎེཏི, ན སཾཝིབྷཛཏི ན པུཉྙཱནི ཀརོཏི།

    ‘‘Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi ; dhammādhammena bhoge pariyesitvā sāhasenapi asāhasenapi attānaṃ sukheti pīṇeti, na saṃvibhajati na puññāni karoti.

    ‘‘ཨིདྷ པན, གཧཔཏི, ཨེཀཙྩོ ཀཱམབྷོགཱི དྷམྨཱདྷམྨེན བྷོགེ པརིཡེསཏི སཱཧསེནཔི ཨསཱཧསེནཔི; དྷམྨཱདྷམྨེན བྷོགེ པརིཡེསིཏྭཱ སཱཧསེནཔི ཨསཱཧསེནཔི ཨཏྟཱནཾ སུཁེཏི པཱིཎེཏི སཾཝིབྷཛཏི པུཉྙཱནི ཀརོཏི།

    ‘‘Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi; dhammādhammena bhoge pariyesitvā sāhasenapi asāhasenapi attānaṃ sukheti pīṇeti saṃvibhajati puññāni karoti.

    ‘‘ཨིདྷ པན, གཧཔཏི, ཨེཀཙྩོ ཀཱམབྷོགཱི དྷམྨེན བྷོགེ པརིཡེསཏི ཨསཱཧསེན; དྷམྨེན བྷོགེ པརིཡེསིཏྭཱ ཨསཱཧསེན ན ཨཏྟཱནཾ སུཁེཏི ན པཱིཎེཏི ན སཾཝིབྷཛཏི ན པུཉྙཱནི ཀརོཏི།

    ‘‘Idha pana, gahapati, ekacco kāmabhogī dhammena bhoge pariyesati asāhasena; dhammena bhoge pariyesitvā asāhasena na attānaṃ sukheti na pīṇeti na saṃvibhajati na puññāni karoti.

    ‘‘ཨིདྷ པན, གཧཔཏི, ཨེཀཙྩོ ཀཱམབྷོགཱི དྷམྨེན བྷོགེ པརིཡེསཏི ཨསཱཧསེན; དྷམྨེན བྷོགེ པརིཡེསིཏྭཱ ཨསཱཧསེན ཨཏྟཱནཾ སུཁེཏི པཱིཎེཏི, ན སཾཝིབྷཛཏི ན པུཉྙཱནི ཀརོཏི།

    ‘‘Idha pana, gahapati, ekacco kāmabhogī dhammena bhoge pariyesati asāhasena; dhammena bhoge pariyesitvā asāhasena attānaṃ sukheti pīṇeti, na saṃvibhajati na puññāni karoti.

    ‘‘ཨིདྷ པན, གཧཔཏི, ཨེཀཙྩོ ཀཱམབྷོགཱི དྷམྨེན བྷོགེ པརིཡེསཏི ཨསཱཧསེན; དྷམྨེན བྷོགེ པརིཡེསིཏྭཱ ཨསཱཧསེན ཨཏྟཱནཾ སུཁེཏི པཱིཎེཏི སཾཝིབྷཛཏི པུཉྙཱནི ཀརོཏི། ཏེ ཙ བྷོགེ གཐིཏོ 3 མུཙྪིཏོ ཨཛ྄ཛྷོསནྣོ 4 ཨནཱདཱིནཝདསྶཱཝཱི ཨནིསྶརཎཔཉྙོ པརིབྷུཉྫཏི།

    ‘‘Idha pana, gahapati, ekacco kāmabhogī dhammena bhoge pariyesati asāhasena; dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti. Te ca bhoge gathito 5 mucchito ajjhosanno 6 anādīnavadassāvī anissaraṇapañño paribhuñjati.

    ‘‘ཨིདྷ པན, གཧཔཏི, ཨེཀཙྩོ ཀཱམབྷོགཱི དྷམྨེན བྷོགེ པརིཡེསཏི ཨསཱཧསེན; དྷམྨེན བྷོགེ པརིཡེསིཏྭཱ ཨསཱཧསེན ཨཏྟཱནཾ སུཁེཏི པཱིཎེཏི སཾཝིབྷཛཏི པུཉྙཱནི ཀརོཏི། ཏེ ཙ བྷོགེ ཨགཐིཏོ ཨམུཙྪིཏོ ཨནཛ྄ཛྷོསནྣོ ཨཱདཱིནཝདསྶཱཝཱི ནིསྶརཎཔཉྙོ པརིབྷུཉྫཏི།

    ‘‘Idha pana, gahapati, ekacco kāmabhogī dhammena bhoge pariyesati asāhasena; dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti. Te ca bhoge agathito amucchito anajjhosanno ādīnavadassāvī nissaraṇapañño paribhuñjati.

    ‘‘ཏཏྲ, གཧཔཏི, ཡྭཱཡཾ ཀཱམབྷོགཱི ཨདྷམྨེན བྷོགེ པརིཡེསཏི སཱཧསེན, ཨདྷམྨེན བྷོགེ པརིཡེསིཏྭཱ སཱཧསེན ན ཨཏྟཱནཾ སུཁེཏི ན པཱིཎེཏི ན སཾཝིབྷཛཏི ན པུཉྙཱནི ཀརོཏི, ཨཡཾ, གཧཔཏི, ཀཱམབྷོགཱི ཏཱིཧི ཋཱནེཧི གཱརཡ྄ཧོ། ‘ཨདྷམྨེན བྷོགེ པརིཡེསཏི སཱཧསེནཱ’ཏི, ཨིམིནཱ པཋམེན ཋཱནེན གཱརཡ྄ཧོ། ‘ན ཨཏྟཱནཾ སུཁེཏི ན པཱིཎེཏཱི’ཏི, ཨིམིནཱ དུཏིཡེན ཋཱནེན གཱརཡ྄ཧོ། ‘ན སཾཝིབྷཛཏི ན པུཉྙཱནི ཀརོཏཱི’ཏི, ཨིམིནཱ ཏཏིཡེན ཋཱནེན གཱརཡ྄ཧོ། ཨཡཾ, གཧཔཏི, ཀཱམབྷོགཱི ཨིམེཧི ཏཱིཧི ཋཱནེཧི གཱརཡ྄ཧོ།

    ‘‘Tatra, gahapati, yvāyaṃ kāmabhogī adhammena bhoge pariyesati sāhasena, adhammena bhoge pariyesitvā sāhasena na attānaṃ sukheti na pīṇeti na saṃvibhajati na puññāni karoti, ayaṃ, gahapati, kāmabhogī tīhi ṭhānehi gārayho. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Na attānaṃ sukheti na pīṇetī’ti, iminā dutiyena ṭhānena gārayho. ‘Na saṃvibhajati na puññāni karotī’ti, iminā tatiyena ṭhānena gārayho. Ayaṃ, gahapati, kāmabhogī imehi tīhi ṭhānehi gārayho.

    ‘‘ཏཏྲ, གཧཔཏི, ཡྭཱཡཾ ཀཱམབྷོགཱི ཨདྷམྨེན བྷོགེ པརིཡེསཏི སཱཧསེན, ཨདྷམྨེན བྷོགེ པརིཡེསིཏྭཱ སཱཧསེན ཨཏྟཱནཾ སུཁེཏི པཱིཎེཏི ན སཾཝིབྷཛཏི ན པུཉྙཱནི ཀརོཏི, ཨཡཾ, གཧཔཏི, ཀཱམབྷོགཱི དྭཱིཧི ཋཱནེཧི གཱརཡ྄ཧོ ཨེཀེན ཋཱནེན པཱསཾསོ། ‘ཨདྷམྨེན བྷོགེ པརིཡེསཏི སཱཧསེནཱ’ཏི, ཨིམིནཱ པཋམེན ཋཱནེན གཱརཡ྄ཧོ། ‘ཨཏྟཱནཾ སུཁེཏི པཱིཎེཏཱི’ཏི, ཨིམིནཱ ཨེཀེན ཋཱནེན པཱསཾསོ། ‘ན སཾཝིབྷཛཏི ན པུཉྙཱནི ཀརོཏཱི’ཏི ཨིམིནཱ དུཏིཡེན ཋཱནེན གཱརཡ྄ཧོ། ཨཡཾ, གཧཔཏི, ཀཱམབྷོགཱི ཨིམེཧི དྭཱིཧི ཋཱནེཧི གཱརཡ྄ཧོ ཨིམིནཱ ཨེཀེན ཋཱནེན པཱསཾསོ།

    ‘‘Tatra, gahapati, yvāyaṃ kāmabhogī adhammena bhoge pariyesati sāhasena, adhammena bhoge pariyesitvā sāhasena attānaṃ sukheti pīṇeti na saṃvibhajati na puññāni karoti, ayaṃ, gahapati, kāmabhogī dvīhi ṭhānehi gārayho ekena ṭhānena pāsaṃso. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Attānaṃ sukheti pīṇetī’ti, iminā ekena ṭhānena pāsaṃso. ‘Na saṃvibhajati na puññāni karotī’ti iminā dutiyena ṭhānena gārayho. Ayaṃ, gahapati, kāmabhogī imehi dvīhi ṭhānehi gārayho iminā ekena ṭhānena pāsaṃso.

    ‘‘ཏཏྲ , གཧཔཏི, ཡྭཱཡཾ ཀཱམབྷོགཱི ཨདྷམྨེན བྷོགེ པརིཡེསཏི སཱཧསེན , ཨདྷམྨེན བྷོགེ པརིཡེསིཏྭཱ སཱཧསེན ཨཏྟཱནཾ སུཁེཏི པཱིཎེཏི སཾཝིབྷཛཏི པུཉྙཱནི ཀརོཏི, ཨཡཾ, གཧཔཏི, ཀཱམབྷོགཱི ཨེཀེན ཋཱནེན གཱརཡ྄ཧོ དྭཱིཧི ཋཱནེཧི པཱསཾསོ། ‘ཨདྷམྨེན བྷོགེ པརིཡེསཏི སཱཧསེནཱ’ཏི, ཨིམིནཱ ཨེཀེན ཋཱནེན གཱརཡ྄ཧོ། ‘ཨཏྟཱནཾ སུཁེཏི པཱིཎེཏཱི’ཏི, ཨིམིནཱ པཋམེན ཋཱནེན པཱསཾསོ། ‘སཾཝིབྷཛཏི པུཉྙཱནི ཀརོཏཱི’ཏི, ཨིམིནཱ དུཏིཡེན ཋཱནེན པཱསཾསོ། ཨཡཾ, གཧཔཏི, ཀཱམབྷོགཱི ཨིམིནཱ ཨེཀེན ཋཱནེན གཱརཡ྄ཧོ, ཨིམེཧི དྭཱིཧི ཋཱནེཧི པཱསཾསོ།

    ‘‘Tatra , gahapati, yvāyaṃ kāmabhogī adhammena bhoge pariyesati sāhasena , adhammena bhoge pariyesitvā sāhasena attānaṃ sukheti pīṇeti saṃvibhajati puññāni karoti, ayaṃ, gahapati, kāmabhogī ekena ṭhānena gārayho dvīhi ṭhānehi pāsaṃso. ‘Adhammena bhoge pariyesati sāhasenā’ti, iminā ekena ṭhānena gārayho. ‘Attānaṃ sukheti pīṇetī’ti, iminā paṭhamena ṭhānena pāsaṃso. ‘Saṃvibhajati puññāni karotī’ti, iminā dutiyena ṭhānena pāsaṃso. Ayaṃ, gahapati, kāmabhogī iminā ekena ṭhānena gārayho, imehi dvīhi ṭhānehi pāsaṃso.

    ‘‘ཏཏྲ, གཧཔཏི, ཡྭཱཡཾ ཀཱམབྷོགཱི དྷམྨཱདྷམྨེན བྷོགེ པརིཡེསཏི སཱཧསེནཔི ཨསཱཧསེནཔི, དྷམྨཱདྷམྨེན བྷོགེ པརིཡེསིཏྭཱ སཱཧསེནཔི ཨསཱཧསེནཔི ན ཨཏྟཱནཾ སུཁེཏི ན པཱིཎེཏི ན སཾཝིབྷཛཏི ན པུཉྙཱནི ཀརོཏི, ཨཡཾ, གཧཔཏི, ཀཱམབྷོགཱི ཨེཀེན ཋཱནེན པཱསཾསོ ཏཱིཧི ཋཱནེཧི གཱརཡ྄ཧོ། ‘དྷམྨེན བྷོགེ པརིཡེསཏི ཨསཱཧསེནཱ’ཏི, ཨིམིནཱ ཨེཀེན ཋཱནེན པཱསཾསོ། ‘ཨདྷམྨེན བྷོགེ པརིཡེསཏི སཱཧསེནཱ’ཏི, ཨིམིནཱ པཋམེན ཋཱནེན གཱརཡ྄ཧོ། ‘ན ཨཏྟཱནཾ སུཁེཏི ན པཱིཎེཏཱི’ཏི, ཨིམིནཱ དུཏིཡེན ཋཱནེན གཱརཡ྄ཧོ། ‘ན སཾཝིབྷཛཏི ན པུཉྙཱནི ཀརོཏཱི’ཏི, ཨིམིནཱ ཏཏིཡེན ཋཱནེན གཱརཡ྄ཧོ། ཨཡཾ, གཧཔཏི, ཀཱམབྷོགཱི ཨིམིནཱ ཨེཀེན ཋཱནེན པཱསཾསོ ཨིམེཧི ཏཱིཧི ཋཱནེཧི གཱརཡ྄ཧོ།

    ‘‘Tatra, gahapati, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi na attānaṃ sukheti na pīṇeti na saṃvibhajati na puññāni karoti, ayaṃ, gahapati, kāmabhogī ekena ṭhānena pāsaṃso tīhi ṭhānehi gārayho. ‘Dhammena bhoge pariyesati asāhasenā’ti, iminā ekena ṭhānena pāsaṃso. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Na attānaṃ sukheti na pīṇetī’ti, iminā dutiyena ṭhānena gārayho. ‘Na saṃvibhajati na puññāni karotī’ti, iminā tatiyena ṭhānena gārayho. Ayaṃ, gahapati, kāmabhogī iminā ekena ṭhānena pāsaṃso imehi tīhi ṭhānehi gārayho.

    ‘‘ཏཏྲ , གཧཔཏི, ཡྭཱཡཾ ཀཱམབྷོགཱི དྷམྨཱདྷམྨེན བྷོགེ པརིཡེསཏི སཱཧསེནཔི ཨསཱཧསེནཔི, དྷམྨཱདྷམྨེན བྷོགེ པརིཡེསིཏྭཱ སཱཧསེནཔི ཨསཱཧསེནཔི ཨཏྟཱནཾ སུཁེཏི པཱིཎེཏི ན སཾཝིབྷཛཏི ན པུཉྙཱནི ཀརོཏི, ཨཡཾ, གཧཔཏི, ཀཱམབྷོགཱི དྭཱིཧི ཋཱནེཧི པཱསཾསོ དྭཱིཧི ཋཱནེཧི གཱརཡ྄ཧོ ། ‘དྷམྨེན བྷོགེ པརིཡེསཏི ཨསཱཧསེནཱ’ཏི, ཨིམིནཱ པཋམེན ཋཱནེན པཱསཾསོ། ‘ཨདྷམྨེན བྷོགེ པརིཡེསཏི སཱཧསེནཱ’ཏི, ཨིམིནཱ པཋམེན ཋཱནེན གཱརཡ྄ཧོ། ‘ཨཏྟཱནཾ སུཁེཏི པཱིཎེཏཱི’ཏི, ཨིམིནཱ དུཏིཡེན ཋཱནེན པཱསཾསོ། ‘ན སཾཝིབྷཛཏི ན པུཉྙཱནི ཀརོཏཱི’ཏི, ཨིམིནཱ དུཏིཡེན ཋཱནེན གཱརཡ྄ཧོ། ཨཡཾ , གཧཔཏི, ཀཱམབྷོགཱི ཨིམེཧི དྭཱིཧི ཋཱནེཧི པཱསཾསོ ཨིམེཧི དྭཱིཧི ཋཱནེཧི གཱརཡ྄ཧོ།

    ‘‘Tatra , gahapati, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṃ sukheti pīṇeti na saṃvibhajati na puññāni karoti, ayaṃ, gahapati, kāmabhogī dvīhi ṭhānehi pāsaṃso dvīhi ṭhānehi gārayho . ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Adhammena bhoge pariyesati sāhasenā’ti, iminā paṭhamena ṭhānena gārayho. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Na saṃvibhajati na puññāni karotī’ti, iminā dutiyena ṭhānena gārayho. Ayaṃ , gahapati, kāmabhogī imehi dvīhi ṭhānehi pāsaṃso imehi dvīhi ṭhānehi gārayho.

    ‘‘ཏཏྲ, གཧཔཏི, ཡྭཱཡཾ ཀཱམབྷོགཱི དྷམྨཱདྷམྨེན བྷོགེ པརིཡེསཏི སཱཧསེནཔི ཨསཱཧསེནཔི, དྷམྨཱདྷམྨེན བྷོགེ པརིཡེསིཏྭཱ སཱཧསེནཔི ཨསཱཧསེནཔི ཨཏྟཱནཾ སུཁེཏི པཱིཎེཏི སཾཝིབྷཛཏི པུཉྙཱནི ཀརོཏི, ཨཡཾ, གཧཔཏི, ཀཱམབྷོགཱི ཏཱིཧི ཋཱནེཧི པཱསཾསོ ཨེཀེན ཋཱནེན གཱརཡ྄ཧོ། ‘དྷམྨེན བྷོགེ པརིཡེསཏི ཨསཱཧསེནཱ’ཏི, ཨིམིནཱ པཋམེན ཋཱནེན པཱསཾསོ། ‘ཨདྷམྨེན བྷོགེ པརིཡེསཏི སཱཧསེནཱ’ཏི, ཨིམིནཱ ཨེཀེན ཋཱནེན གཱརཡ྄ཧོ། ‘ཨཏྟཱནཾ སུཁེཏི པཱིཎེཏཱི’ཏི, ཨིམིནཱ དུཏིཡེན ཋཱནེན པཱསཾསོ། ‘སཾཝིབྷཛཏི པུཉྙཱནི ཀརོཏཱི’ཏི, ཨིམིནཱ ཏཏིཡེན ཋཱནེན པཱསཾསོ། ཨཡཾ, གཧཔཏི, ཀཱམབྷོགཱི ཨིམེཧི ཏཱིཧི ཋཱནེཧི པཱསཾསོ ཨིམིནཱ ཨེཀེན ཋཱནེན གཱརཡ྄ཧོ།

    ‘‘Tatra, gahapati, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṃ sukheti pīṇeti saṃvibhajati puññāni karoti, ayaṃ, gahapati, kāmabhogī tīhi ṭhānehi pāsaṃso ekena ṭhānena gārayho. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Adhammena bhoge pariyesati sāhasenā’ti, iminā ekena ṭhānena gārayho. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Saṃvibhajati puññāni karotī’ti, iminā tatiyena ṭhānena pāsaṃso. Ayaṃ, gahapati, kāmabhogī imehi tīhi ṭhānehi pāsaṃso iminā ekena ṭhānena gārayho.

    ‘‘ཏཏྲ, གཧཔཏི, ཡྭཱཡཾ ཀཱམབྷོགཱི དྷམྨེན བྷོགེ པརིཡེསཏི ཨསཱཧསེན, དྷམྨེན བྷོགེ པརིཡེསིཏྭཱ ཨསཱཧསེན ན ཨཏྟཱནཾ སུཁེཏི ན པཱིཎེཏི ན སཾཝིབྷཛཏི ན པུཉྙཱནི ཀརོཏི, ཨཡཾ, གཧཔཏི, ཀཱམབྷོགཱི ཨེཀེན ཋཱནེན པཱསཾསོ དྭཱིཧི ཋཱནེཧི གཱརཡ྄ཧོ། དྷམྨེན བྷོགེ པརིཡེསཏི ཨསཱཧསེནཱ’ཏི, ཨིམིནཱ ཨེཀེན ཋཱནེན པཱསཾསོ། ‘ན ཨཏྟཱནཾ སུཁེཏི ན པཱིཎེཏཱི’ཏི, ཨིམིནཱ པཋམེན ཋཱནེན གཱརཡ྄ཧོ། ‘ན སཾཝིབྷཛཏི ན པུཉྙཱནི ཀརོཏཱི’ཏི, ཨིམིནཱ དུཏིཡེན ཋཱནེན གཱརཡ྄ཧོ། ཨཡཾ, གཧཔཏི, ཀཱམབྷོགཱི ཨིམིནཱ ཨེཀེན ཋཱནེན པཱསཾསོ ཨིམེཧི དྭཱིཧི ཋཱནེཧི གཱརཡ྄ཧོ།

    ‘‘Tatra, gahapati, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena na attānaṃ sukheti na pīṇeti na saṃvibhajati na puññāni karoti, ayaṃ, gahapati, kāmabhogī ekena ṭhānena pāsaṃso dvīhi ṭhānehi gārayho. Dhammena bhoge pariyesati asāhasenā’ti, iminā ekena ṭhānena pāsaṃso. ‘Na attānaṃ sukheti na pīṇetī’ti, iminā paṭhamena ṭhānena gārayho. ‘Na saṃvibhajati na puññāni karotī’ti, iminā dutiyena ṭhānena gārayho. Ayaṃ, gahapati, kāmabhogī iminā ekena ṭhānena pāsaṃso imehi dvīhi ṭhānehi gārayho.

    ‘‘ཏཏྲ, གཧཔཏི, ཡྭཱཡཾ ཀཱམབྷོགཱི དྷམྨེན བྷོགེ པརིཡེསཏི ཨསཱཧསེན, དྷམྨེན བྷོགེ པརིཡེསིཏྭཱ ཨསཱཧསེན ཨཏྟཱནཾ སུཁེཏི པཱིཎེཏི ན སཾཝིབྷཛཏི ན པུཉྙཱནི ཀརོཏི, ཨཡཾ, གཧཔཏི , ཀཱམབྷོགཱི དྭཱིཧི ཋཱནེཧི པཱསཾསོ ཨེཀེན ཋཱནེན གཱརཡ྄ཧོ། ‘དྷམྨེན བྷོགེ པརིཡེསཏི ཨསཱཧསེནཱ’ཏི, ཨིམིནཱ པཋམེན ཋཱནེན པཱསཾསོ། ‘ཨཏྟཱནཾ སུཁེཏི པཱིཎེཏཱི’ཏི, ཨིམིནཱ དུཏིཡེན ཋཱནེན པཱསཾསོ། ‘ན སཾཝིབྷཛཏི ན པུཉྙཱནི ཀརོཏཱི’ཏི ཨིམིནཱ ཨེཀེན ཋཱནེན གཱརཡ྄ཧོ། ཨཡཾ , གཧཔཏི, ཀཱམབྷོགཱི ཨིམེཧི དྭཱིཧི ཋཱནེཧི པཱསཾསོ ཨིམིནཱ ཨེཀེན ཋཱནེན གཱརཡ྄ཧོ།

    ‘‘Tatra, gahapati, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti na saṃvibhajati na puññāni karoti, ayaṃ, gahapati , kāmabhogī dvīhi ṭhānehi pāsaṃso ekena ṭhānena gārayho. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Na saṃvibhajati na puññāni karotī’ti iminā ekena ṭhānena gārayho. Ayaṃ , gahapati, kāmabhogī imehi dvīhi ṭhānehi pāsaṃso iminā ekena ṭhānena gārayho.

    ‘‘ཏཏྲ, གཧཔཏི ཡྭཱཡཾ ཀཱམབྷོགཱི དྷམྨེན བྷོགེ པརིཡེསཏི ཨསཱཧསེན, དྷམྨེན བྷོགེ པརིཡེསིཏྭཱ ཨསཱཧསེན ཨཏྟཱནཾ སུཁེཏི པཱིཎེཏི སཾཝིབྷཛཏི པུཉྙཱནི ཀརོཏི, ཏེ ཙ བྷོགེ གཐིཏོ མུཙྪིཏོ ཨཛ྄ཛྷོསནྣོ ཨནཱདཱིནཝདསྶཱཝཱི ཨནིསྶརཎཔཉྙོ པརིབྷུཉྫཏི, ཨཡཾ, གཧཔཏི, ཀཱམབྷོགཱི ཏཱིཧི ཋཱནེཧི པཱསཾསོ ཨེཀེན ཋཱནེན གཱརཡ྄ཧོ། ‘དྷམྨེན བྷོགེ པརིཡེསཏི ཨསཱཧསེནཱ’ཏི, ཨིམིནཱ པཋམེན ཋཱནེན པཱསཾསོ། ‘ཨཏྟཱནཾ སུཁེཏི པཱིཎེཏཱི’ཏི, ཨིམིནཱ དུཏིཡེན ཋཱནེན པཱསཾསོ། ‘སཾཝིབྷཛཏི པུཉྙཱནི ཀརོཏཱི’ཏི, ཨིམིནཱ ཏཏིཡེན ཋཱནེན པཱསཾསོ། ‘ཏེ ཙ བྷོགེ གཐིཏོ མུཙྪིཏོ ཨཛ྄ཛྷོསནྣོ ཨནཱདཱིནཝདསྶཱཝཱི ཨནིསྶརཎཔཉྙོ པརིབྷུཉྫཏཱི’ཏི , ཨིམིནཱ ཨེཀེན ཋཱནེན གཱརཡ྄ཧོ། ཨཡཾ, གཧཔཏི, ཀཱམབྷོགཱི ཨིམེཧི ཏཱིཧི ཋཱནེཧི པཱསཾསོ ཨིམིནཱ ཨེཀེན ཋཱནེན གཱརཡ྄ཧོ།

    ‘‘Tatra, gahapati yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge gathito mucchito ajjhosanno anādīnavadassāvī anissaraṇapañño paribhuñjati, ayaṃ, gahapati, kāmabhogī tīhi ṭhānehi pāsaṃso ekena ṭhānena gārayho. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Saṃvibhajati puññāni karotī’ti, iminā tatiyena ṭhānena pāsaṃso. ‘Te ca bhoge gathito mucchito ajjhosanno anādīnavadassāvī anissaraṇapañño paribhuñjatī’ti , iminā ekena ṭhānena gārayho. Ayaṃ, gahapati, kāmabhogī imehi tīhi ṭhānehi pāsaṃso iminā ekena ṭhānena gārayho.

    ‘‘ཏཏྲ, གཧཔཏི, ཡྭཱཡཾ ཀཱམབྷོགཱི དྷམྨེན བྷོགེ པརིཡེསཏི ཨསཱཧསེན, དྷམྨེན བྷོགེ པརིཡེསིཏྭཱ ཨསཱཧསེན ཨཏྟཱནཾ སུཁེཏི པཱིཎེཏི སཾཝིབྷཛཏི པུཉྙཱནི ཀརོཏི, ཏེ ཙ བྷོགེ ཨགཐིཏོ ཨམུཙྪིཏོ ཨནཛ྄ཛྷོསནྣོ ཨཱདཱིནཝདསྶཱཝཱི ནིསྶརཎཔཉྙོ པརིབྷུཉྫཏི, ཨཡཾ, གཧཔཏི, ཀཱམབྷོགཱི ཙཏཱུཧི ཋཱནེཧི པཱསཾསོ། ‘དྷམྨེན བྷོགེ པརིཡེསཏི ཨསཱཧསེནཱ’ཏི, ཨིམིནཱ པཋམེན ཋཱནེན པཱསཾསོ། ‘ཨཏྟཱནཾ སུཁེཏི པཱིཎེཏཱི’ཏི, ཨིམིནཱ དུཏིཡེན ཋཱནེན པཱསཾསོ། ‘སཾཝིབྷཛཏི པུཉྙཱནི ཀརོཏཱི’ཏི, ཨིམིནཱ ཏཏིཡེན ཋཱནེན པཱསཾསོ། ‘ཏེ ཙ བྷོགེ ཨགཐིཏོ ཨམུཙྪིཏོ ཨནཛ྄ཛྷོསནྣོ ཨཱདཱིནཝདསྶཱཝཱི ནིསྶརཎཔཉྙོ པརིབྷུཉྫཏཱི’ཏི, ཨིམིནཱ ཙཏུཏྠེན ཋཱནེན པཱསཾསོ། ཨཡཾ, གཧཔཏི, ཀཱམབྷོགཱི ཨིམེཧི ཙཏཱུཧི ཋཱནེཧི པཱསཾསོ།

    ‘‘Tatra, gahapati, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṃ, gahapati, kāmabhogī catūhi ṭhānehi pāsaṃso. ‘Dhammena bhoge pariyesati asāhasenā’ti, iminā paṭhamena ṭhānena pāsaṃso. ‘Attānaṃ sukheti pīṇetī’ti, iminā dutiyena ṭhānena pāsaṃso. ‘Saṃvibhajati puññāni karotī’ti, iminā tatiyena ṭhānena pāsaṃso. ‘Te ca bhoge agathito amucchito anajjhosanno ādīnavadassāvī nissaraṇapañño paribhuñjatī’ti, iminā catutthena ṭhānena pāsaṃso. Ayaṃ, gahapati, kāmabhogī imehi catūhi ṭhānehi pāsaṃso.

    ‘‘ཨིམེ ཁོ, གཧཔཏི, དས ཀཱམབྷོགཱི སནྟོ སཾཝིཛྫམཱནཱ ལོཀསྨིཾ། ཨིམེསཾ ཁོ, གཧཔཏི, དསནྣཾ ཀཱམབྷོགཱིནཾ ཡྭཱཡཾ ཀཱམབྷོགཱི དྷམྨེན བྷོགེ པརིཡེསཏི ཨསཱཧསེན, དྷམྨེན བྷོགེ པརིཡེསིཏྭཱ ཨསཱཧསེན ཨཏྟཱནཾ སུཁེཏི པཱིཎེཏི སཾཝིབྷཛཏི པུཉྙཱནི ཀརོཏི, ཏེ ཙ བྷོགེ ཨགཐིཏོ ཨམུཙྪིཏོ ཨནཛ྄ཛྷོསནྣོ ཨཱདཱིནཝདསྶཱཝཱི ནིསྶརཎཔཉྙོ པརིབྷུཉྫཏི, ཨཡཾ ཨིམེསཾ དསནྣཾ ཀཱམབྷོགཱིནཾ ཨགྒོ ཙ སེཊྛོ ཙ པཱམོཀྑོ 7 ཙ ཨུཏྟམོ ཙ པཝརོ ཙ། སེཡྻཐཱཔི, གཧཔཏི, གཝཱ ཁཱིརཾ, ཁཱིརམྷཱ དདྷི, དདྷིམྷཱ ནཝནཱིཏཾ, ནཝནཱིཏམྷཱ སཔྤི, སཔྤིམྷཱ སཔྤིམཎྜོ། སཔྤིམཎྜོ ཏཏྠ ཨགྒམཀྑཱཡཏི།

    ‘‘Ime kho, gahapati, dasa kāmabhogī santo saṃvijjamānā lokasmiṃ. Imesaṃ kho, gahapati, dasannaṃ kāmabhogīnaṃ yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṃ imesaṃ dasannaṃ kāmabhogīnaṃ aggo ca seṭṭho ca pāmokkho 8 ca uttamo ca pavaro ca. Seyyathāpi, gahapati, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo. Sappimaṇḍo tattha aggamakkhāyati.

    ཨེཝམེཝཾ ཁོ , གཧཔཏི, ཨིམེསཾ དསནྣཾ ཀཱམབྷོགཱིནཾ ཡྭཱཡཾ ཀཱམབྷོགཱི དྷམྨེན བྷོགེ པརིཡེསཏི ཨསཱཧསེན, དྷམྨེན བྷོགེ པརིཡེསིཏྭཱ ཨསཱཧསེན ཨཏྟཱནཾ སུཁེཏི པཱིཎེཏི སཾཝིབྷཛཏི པུཉྙཱནི ཀརོཏི, ཏེ ཙ བྷོགེ ཨགཐིཏོ ཨམུཙྪིཏོ ཨནཛ྄ཛྷོསནྣོ ཨཱདཱིནཝདསྶཱཝཱི ནིསྶརཎཔཉྙོ པརིབྷུཉྫཏི, ཨཡཾ ཨིམེསཾ དསནྣཾ ཀཱམབྷོགཱིནཾ ཨགྒོ ཙ སེཊྛོ ཙ པཱམོཀྑོ 9 ཙ ཨུཏྟམོ ཙ པཝརོ ཙཱ’’ཏི། པཋམཾ།

    Evamevaṃ kho , gahapati, imesaṃ dasannaṃ kāmabhogīnaṃ yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṃ imesaṃ dasannaṃ kāmabhogīnaṃ aggo ca seṭṭho ca pāmokkho 10 ca uttamo ca pavaro cā’’ti. Paṭhamaṃ.




    Next: ༢. བྷཡསུཏྟཾ • 2. Bhayasuttaṃ




    Footnotes:
    1. ན ཨཏྟཱནཾ སུཁེཏི པཱིཎེཏི (སཱི॰ སྱཱ॰ པཱི॰) ཨེཝམུཔརིཔི
    2. na attānaṃ sukheti pīṇeti (sī. syā. pī.) evamuparipi
    3. གདྷིཏོ (ཀ॰) ཨ॰ ནི॰ ༣.༡༢༤ པསྶིཏབྦཾ
    4. ཨཛ྄ཛྷཱཔནྣོ (སབྦཏྠ) ཨ॰ ནི॰ ༣.༡༢༤ སུཏྟཝཎྞནཱ ཊཱིཀཱ ཨོལོཀེཏབྦཱ
    5. gadhito (ka.) a. ni. 3.124 passitabbaṃ
    6. ajjhāpanno (sabbattha) a. ni. 3.124 suttavaṇṇanā ṭīkā oloketabbā
    7. མོཀྑོ (ཀ॰ སཱི॰) ཨ॰ ནི॰ ༤.༩༥; ༥.༡༨༡; སཾ॰ ནི॰ ༣.༦༦༢
    8. mokkho (ka. sī.) a. ni. 4.95; 5.181; saṃ. ni. 3.662
    9. མོཀྑོ (ཀ॰ སཱི॰) ཨ॰ ནི॰ ༥.༡༨༡
    10. mokkho (ka. sī.) a. ni. 5.181



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡-༢. ཀཱམབྷོགཱིསུཏྟཱདིཝཎྞནཱ • 1-2. Kāmabhogīsuttādivaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༤. ཀཱམབྷོགཱིསུཏྟཱདིཝཎྞནཱ • 1-4. Kāmabhogīsuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact