| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
६. कामदसुत्तं
6. Kāmadasuttaṃ
८७. सावत्थिनिदानं । एकमन्तं ठितो खो कामदो देवपुत्तो भगवन्तं एतदवोच – ‘‘दुक्करं भगवा, सुदुक्करं भगवा’’ति।
87. Sāvatthinidānaṃ . Ekamantaṃ ṭhito kho kāmado devaputto bhagavantaṃ etadavoca – ‘‘dukkaraṃ bhagavā, sudukkaraṃ bhagavā’’ti.
‘‘दुक्करं वापि करोन्ति (कामदाति भगवा),
‘‘Dukkaraṃ vāpi karonti (kāmadāti bhagavā),
सेखा सीलसमाहिता।
Sekhā sīlasamāhitā;
ठितत्ता अनगारियुपेतस्स,
Ṭhitattā anagāriyupetassa,
तुट्ठि होति सुखावहा’’ति॥
Tuṭṭhi hoti sukhāvahā’’ti.
‘‘दुल्लभा भगवा यदिदं तुट्ठी’’ति।
‘‘Dullabhā bhagavā yadidaṃ tuṭṭhī’’ti.
‘‘दुल्लभं वापि लभन्त्न्त्ति (कामदाति भगवा),
‘‘Dullabhaṃ vāpi labhantntti (kāmadāti bhagavā),
चित्तवूपसमे रता।
Cittavūpasame ratā;
येसं दिवा च रत्तो च,
Yesaṃ divā ca ratto ca,
भावनाय रतो मनो’’ति॥
Bhāvanāya rato mano’’ti.
‘‘दुस्समादहं भगवा यदिदं चित्त’’न्ति।
‘‘Dussamādahaṃ bhagavā yadidaṃ citta’’nti.
‘‘दुस्समादहं वापि समादहन्त्न्त्ति (कामदाति भगवा),
‘‘Dussamādahaṃ vāpi samādahantntti (kāmadāti bhagavā),
इन्द्रियूपसमे रता।
Indriyūpasame ratā;
ते छेत्वा मच्चुनो जालं,
Te chetvā maccuno jālaṃ,
अरिया गच्छन्ति कामदा’’ति॥
Ariyā gacchanti kāmadā’’ti.
‘‘दुग्गमो भगवा विसमो मग्गो’’ति।
‘‘Duggamo bhagavā visamo maggo’’ti.
‘‘दुग्गमे विसमे वापि, अरिया गच्छन्ति कामद।
‘‘Duggame visame vāpi, ariyā gacchanti kāmada;
अनरिया विसमे मग्गे, पपतन्ति अवंसिरा।
Anariyā visame magge, papatanti avaṃsirā;
अरियानं समो मग्गो, अरिया हि विसमे समा’’ति॥
Ariyānaṃ samo maggo, ariyā hi visame samā’’ti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ६. कामदसुत्तवण्णना • 6. Kāmadasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ६. कामदसुत्तवण्णना • 6. Kāmadasuttavaṇṇanā
