| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. காமத³ஸுத்தவண்ணனா
6. Kāmadasuttavaṇṇanā
87. ச²ட்டே² து³க்கரந்தி அயங் கிர தே³வபுத்தோ புப்³ப³யோகா³வசரோ ப³ஹலகிலேஸதாய ஸப்பயோகே³ன கிலேஸே விக்க²ம்பெ⁴ந்தோ ஸமணத⁴ம்மங் கத்வா புப்³பூ³பனிஸ்ஸயமந்த³தாய அரியபூ⁴மிங் அப்பத்வாவ காலங் கத்வா தே³வலோகே நிப்³ப³த்தோ. ஸோ ‘‘ததா²க³தஸ்ஸ ஸந்திகங் க³ந்த்வா து³க்கரபா⁴வங் ஆரோசெஸ்ஸாமீ’’தி ஆக³ந்த்வா ஏவமாஹ. தத்த² து³க்கரந்தி த³ஸபி வஸ்ஸானி…பே॰… ஸட்டி²பி யதே³தங் ஏகந்தபரிஸுத்³த⁴ஸ்ஸ ஸமணத⁴ம்மஸ்ஸ கரணங் நாம, தங் து³க்கரங். ஸேகா²தி ஸத்த ஸேகா². ஸீலஸமாஹிதாதி ஸீலேன ஸமாஹிதா ஸமுபேதா. டி²தத்தாதி பதிட்டி²தஸபா⁴வா. ஏவங் புச்சி²தபஞ்ஹங் விஸ்ஸஜ்ஜெத்வா இதா³னி உபரிபஞ்ஹஸமுட்டா²பனத்த²ங் அனகா³ரியுபேதஸ்ஸாதிஆதி³மாஹ. தத்த² அனகா³ரியுபேதஸ்ஸாதி அனகா³ரியங் நிக்³கே³ஹபா⁴வங் உபேதஸ்ஸ. ஸத்தபூ⁴மிகேபி ஹி பாஸாதே³ வஸந்தோ பி⁴க்கு² வுட்³ட⁴தரேன ஆக³ந்த்வா ‘‘மய்ஹங் இத³ங் பாபுணாதீ’’தி வுத்தே பத்தசீவரங் ஆதா³ய நிக்க²மதேவ. தஸ்மா ‘‘அனகா³ரியுபேதோ’’தி வுச்சதி. துட்டீ²தி சதுபச்சயஸந்தோஸோ. பா⁴வனாயாதி சித்தவூபஸமபா⁴வனாய.
87. Chaṭṭhe dukkaranti ayaṃ kira devaputto pubbayogāvacaro bahalakilesatāya sappayogena kilese vikkhambhento samaṇadhammaṃ katvā pubbūpanissayamandatāya ariyabhūmiṃ appatvāva kālaṃ katvā devaloke nibbatto. So ‘‘tathāgatassa santikaṃ gantvā dukkarabhāvaṃ ārocessāmī’’ti āgantvā evamāha. Tattha dukkaranti dasapi vassāni…pe… saṭṭhipi yadetaṃ ekantaparisuddhassa samaṇadhammassa karaṇaṃ nāma, taṃ dukkaraṃ. Sekhāti satta sekhā. Sīlasamāhitāti sīlena samāhitā samupetā. Ṭhitattāti patiṭṭhitasabhāvā. Evaṃ pucchitapañhaṃ vissajjetvā idāni uparipañhasamuṭṭhāpanatthaṃ anagāriyupetassātiādimāha. Tattha anagāriyupetassāti anagāriyaṃ niggehabhāvaṃ upetassa. Sattabhūmikepi hi pāsāde vasanto bhikkhu vuḍḍhatarena āgantvā ‘‘mayhaṃ idaṃ pāpuṇātī’’ti vutte pattacīvaraṃ ādāya nikkhamateva. Tasmā ‘‘anagāriyupeto’’ti vuccati. Tuṭṭhīti catupaccayasantoso. Bhāvanāyāti cittavūpasamabhāvanāya.
தே செ²த்வா மச்சுனோ ஜாலந்தி யே ரத்திந்தி³வங் இந்த்³ரியூபஸமே ரதா, தே து³ஸ்ஸமாத³ஹங் சித்தங் ஸமாத³ஹந்தி. யே ச ஸமாஹிதசித்தா, தே சதுபச்சயஸந்தோஸங் பூரெந்தா ந கிலமந்தி. யே ஸந்துட்டா², தே ஸீலங் பூரெந்தா ந கிலமந்தி . யே ஸீலே பதிட்டி²தா ஸத்த ஸேகா², தே அரியா மச்சுனோ ஜாலஸங்கா²தங் கிலேஸஜாலங் சி²ந்தி³த்வா க³ச்ச²ந்தி. து³க்³க³மோதி ‘‘ஸச்சமேதங், ப⁴ந்தே, யே இந்த்³ரியூபஸமே ரதா, தே து³ஸ்ஸமாத³ஹங் ஸமாத³ஹந்தி…பே॰… யே ஸீலே பதிட்டி²தா, தே மச்சுனோ ஜாலங் சி²ந்தி³த்வா க³ச்ச²ந்தி’’. கிங் ந க³ச்சி²ஸ்ஸந்தி? அயங் பன து³க்³க³மோ ப⁴க³வா விஸமோ மக்³கோ³தி ஆஹ. தத்த² கிஞ்சாபி அரியமக்³கோ³ நேவ து³க்³க³மோ ந விஸமோ, புப்³ப³பா⁴க³படிபதா³ய பனஸ்ஸ ப³ஹூ பரிஸ்ஸயா ஹொந்தி. தஸ்மா ஏவங் வுத்தோ. அவங்ஸிராதி ஞாணஸிரேன அதோ⁴ஸிரா ஹுத்வா பபதந்தி. அரியமக்³க³ங் ஆரோஹிதுங் அஸமத்த²தாயேவ ச தே அனரியமக்³கே³ பபதந்தீதி ச வுச்சந்தி. அரியானங் ஸமோ மக்³கோ³தி ஸ்வேவ மக்³கோ³ அரியானங் ஸமோ ஹோதி. விஸமே ஸமாதி விஸமேபி ஸத்தகாயே ஸமாயேவ. ச²ட்ட²ங்.
Te chetvā maccuno jālanti ye rattindivaṃ indriyūpasame ratā, te dussamādahaṃ cittaṃ samādahanti. Ye ca samāhitacittā, te catupaccayasantosaṃ pūrentā na kilamanti. Ye santuṭṭhā, te sīlaṃ pūrentā na kilamanti . Ye sīle patiṭṭhitā satta sekhā, te ariyā maccuno jālasaṅkhātaṃ kilesajālaṃ chinditvā gacchanti. Duggamoti ‘‘saccametaṃ, bhante, ye indriyūpasame ratā, te dussamādahaṃ samādahanti…pe… ye sīle patiṭṭhitā, te maccuno jālaṃ chinditvā gacchanti’’. Kiṃ na gacchissanti? Ayaṃ pana duggamo bhagavā visamo maggoti āha. Tattha kiñcāpi ariyamaggo neva duggamo na visamo, pubbabhāgapaṭipadāya panassa bahū parissayā honti. Tasmā evaṃ vutto. Avaṃsirāti ñāṇasirena adhosirā hutvā papatanti. Ariyamaggaṃ ārohituṃ asamatthatāyeva ca te anariyamagge papatantīti ca vuccanti. Ariyānaṃ samo maggoti sveva maggo ariyānaṃ samo hoti. Visame samāti visamepi sattakāye samāyeva. Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. காமத³ஸுத்தங் • 6. Kāmadasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. காமத³ஸுத்தவண்ணனா • 6. Kāmadasuttavaṇṇanā
