| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
3. காமகு³ணகதா²வண்ணனா
3. Kāmaguṇakathāvaṇṇanā
510. இதா³னி காமகு³ணகதா² நாம ஹோதி. தத்த² ஸகஸமயே தாவ காமதா⁴தூதி வத்து²காமாபி வுச்சந்தி – கிலேஸகாமாபி காமப⁴வோபி. ஏதேஸு ஹி வத்து²காமா கமனீயட்டே²ன காமா, ஸபா⁴வனிஸ்ஸத்தஸுஞ்ஞதட்டே²ன தா⁴தூதி காமதா⁴து. கிலேஸகாமா கமனீயட்டே²ன சேவ கமனட்டே²ன ச காமா, யதா²வுத்தேனேவத்தே²ன தா⁴தூதி காமதா⁴து. காமப⁴வோ கமனீயட்டே²ன கமனட்டே²ன வத்து²காமபவத்திதே³ஸட்டே²னாதி தீஹி காரணேஹி காமோ, யதா²வுத்தேனேவத்தே²ன தா⁴தூதி காமதா⁴து. பரஸமயே பன – ‘‘பஞ்சிமே, பி⁴க்க²வே, காமகு³ணா’’தி வசனமத்தங் நிஸ்ஸாய பஞ்சேவ காமகு³ணா காமதா⁴தூதி க³ஹிதங். தஸ்மா யேஸங் அயங் லத்³தி⁴, ஸெய்யதா²பி ஏதரஹி புப்³ப³ஸேலியானங்; தே ஸந்தா⁴ய காமதா⁴துனானத்தங் போ³தே⁴துங் பஞ்சேவாதி புச்சா² ஸகவாதி³ஸ்ஸ, லத்³தி⁴வஸேன படிஞ்ஞா இதரஸ்ஸ. நனு அத்தீ²திஆதி³ கிலேஸகாமத³ஸ்ஸனத்த²ங் வுத்தங். தத்த² தப்படிஸங்யுத்தோதி காமகு³ணபடிஸங்யுத்தோ, காமகு³ணாரம்மணோதி அத்தோ². நோ ச வத ரே வத்தப்³பே³ பஞ்சேவாதி இமேஸு தப்படிஸங்யுத்தச²ந்தா³தீ³ஸு ஸதி பஞ்சேவ காமகு³ணா காமதா⁴தூதி ந வத்தப்³ப³ங். ஏதேபி ஹி ச²ந்தா³த³யோ கமனீயட்டே²ன காமா ச தா⁴து சாதிபி காமதா⁴து. கமனட்டே²ன காமஸங்கா²தா தா⁴தூதிபி காமதா⁴தூதி அத்தோ².
510. Idāni kāmaguṇakathā nāma hoti. Tattha sakasamaye tāva kāmadhātūti vatthukāmāpi vuccanti – kilesakāmāpi kāmabhavopi. Etesu hi vatthukāmā kamanīyaṭṭhena kāmā, sabhāvanissattasuññataṭṭhena dhātūti kāmadhātu. Kilesakāmā kamanīyaṭṭhena ceva kamanaṭṭhena ca kāmā, yathāvuttenevatthena dhātūti kāmadhātu. Kāmabhavo kamanīyaṭṭhena kamanaṭṭhena vatthukāmapavattidesaṭṭhenāti tīhi kāraṇehi kāmo, yathāvuttenevatthena dhātūti kāmadhātu. Parasamaye pana – ‘‘pañcime, bhikkhave, kāmaguṇā’’ti vacanamattaṃ nissāya pañceva kāmaguṇā kāmadhātūti gahitaṃ. Tasmā yesaṃ ayaṃ laddhi, seyyathāpi etarahi pubbaseliyānaṃ; te sandhāya kāmadhātunānattaṃ bodhetuṃ pañcevāti pucchā sakavādissa, laddhivasena paṭiññā itarassa. Nanu atthītiādi kilesakāmadassanatthaṃ vuttaṃ. Tattha tappaṭisaṃyuttoti kāmaguṇapaṭisaṃyutto, kāmaguṇārammaṇoti attho. No ca vata re vattabbe pañcevāti imesu tappaṭisaṃyuttachandādīsu sati pañceva kāmaguṇā kāmadhātūti na vattabbaṃ. Etepi hi chandādayo kamanīyaṭṭhena kāmā ca dhātu cātipi kāmadhātu. Kamanaṭṭhena kāmasaṅkhātā dhātūtipi kāmadhātūti attho.
மனுஸ்ஸானங் சக்கு²ந்திஆதி³ வத்து²காமத³ஸ்ஸனத்த²ங் வுத்தங். தத்த² பரவாதீ³ ச²ன்னம்பி ஆயதனானங் வத்து²காமபா⁴வேன நகாமதா⁴துபா⁴வங் படிக்கி²பித்வா புன மனோதி புட்டோ² மஹக்³க³தலோகுத்தரங் ஸந்தா⁴ய நகாமதா⁴துபா⁴வங் படிஜானாதி. யஸ்மா பன ஸப்³போ³பி தேபூ⁴மகமனோ காமதா⁴துயேவ, தஸ்மா நங் ஸகவாதீ³ ஸுத்தேன நிக்³க³ண்ஹாதி.
Manussānaṃ cakkhuntiādi vatthukāmadassanatthaṃ vuttaṃ. Tattha paravādī channampi āyatanānaṃ vatthukāmabhāvena nakāmadhātubhāvaṃ paṭikkhipitvā puna manoti puṭṭho mahaggatalokuttaraṃ sandhāya nakāmadhātubhāvaṃ paṭijānāti. Yasmā pana sabbopi tebhūmakamano kāmadhātuyeva, tasmā naṃ sakavādī suttena niggaṇhāti.
511. காமகு³ணா ப⁴வோதிஆதி³ ப⁴வஸ்ஸ காமதா⁴துபா⁴வத³ஸ்ஸனத்த²ங் வுத்தங். யஸ்மா பன காமகு³ணமத்தே ப⁴வோதி வோஹாரோ நத்தி², தஸ்மா பரவாதீ³ நஹேவாதி படிக்கி²பதி. காமகு³ணூபக³ங் கம்மந்திஆதி³ ஸப்³ப³ங் காமகு³ணமத்தஸ்ஸ நகாமதா⁴துபா⁴வத³ஸ்ஸனத்த²ங் வுத்தங். காமதா⁴துஸங்கா²தகாமப⁴வூபக³மேவ ஹி கம்மங் அத்தி², காமப⁴வூபகா³ ஏவ ச ஸத்தா ஹொந்தி. தத்த² ஜாயந்தி ஜியந்தி மியந்தி சவந்தி உபபஜ்ஜந்தி, ந காமகு³ணேஸூதி இமினா உபாயேன ஸப்³ப³த்த² அத்தோ² வேதி³தப்³போ³தி.
511. Kāmaguṇābhavotiādi bhavassa kāmadhātubhāvadassanatthaṃ vuttaṃ. Yasmā pana kāmaguṇamatte bhavoti vohāro natthi, tasmā paravādī nahevāti paṭikkhipati. Kāmaguṇūpagaṃ kammantiādi sabbaṃ kāmaguṇamattassa nakāmadhātubhāvadassanatthaṃ vuttaṃ. Kāmadhātusaṅkhātakāmabhavūpagameva hi kammaṃ atthi, kāmabhavūpagā eva ca sattā honti. Tattha jāyanti jiyanti miyanti cavanti upapajjanti, na kāmaguṇesūti iminā upāyena sabbattha attho veditabboti.
காமகு³ணகதா²வண்ணனா.
Kāmaguṇakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (75) 3. காமகு³ணகதா² • (75) 3. Kāmaguṇakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 3. காமகு³ணகதா²வண்ணனா • 3. Kāmaguṇakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 3. காமகு³ணகதா²வண்ணனா • 3. Kāmaguṇakathāvaṇṇanā
