| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
3. гаамаг̇ун̣агат̇ааван̣н̣анаа
3. Kāmaguṇakathāvaṇṇanā
510. ид̣̇аани гаамаг̇ун̣агат̇аа наама ход̇и. д̇ад̇т̇а сагасамаяз д̇аава гаамад̇хаад̇ууд̇и вад̇т̇угаамааби вужжанд̇и – гилзсагаамааби гаамабхавоби. зд̇зсу хи вад̇т̇угаамаа гаманийяадтзна гаамаа, сабхааваниссад̇д̇асун̃н̃ад̇адтзна д̇хаад̇ууд̇и гаамад̇хаад̇у. гилзсагаамаа гаманийяадтзна жзва гаманадтзна жа гаамаа, яат̇аавуд̇д̇знзвад̇т̇зна д̇хаад̇ууд̇и гаамад̇хаад̇у. гаамабхаво гаманийяадтзна гаманадтзна вад̇т̇угаамабавад̇д̇ид̣̇зсадтзнаад̇и д̇ийхи гааран̣зхи гаамо, яат̇аавуд̇д̇знзвад̇т̇зна д̇хаад̇ууд̇и гаамад̇хаад̇у. барасамаяз бана – ‘‘бан̃жимз, бхигкавз, гаамаг̇ун̣аа’’д̇и важанамад̇д̇ам̣ ниссааяа бан̃жзва гаамаг̇ун̣аа гаамад̇хаад̇ууд̇и г̇ахид̇ам̣. д̇асмаа язсам̣ аяам̣ лад̣̇д̇хи, сзяяат̇ааби зд̇арахи буб̣б̣асзлияаанам̣; д̇з санд̇хааяа гаамад̇хаад̇унаанад̇д̇ам̣ б̣од̇хзд̇ум̣ бан̃жзваад̇и бужчаа сагаваад̣̇исса, лад̣̇д̇хивасзна бадин̃н̃аа ид̇арасса. нану ад̇т̇ийд̇иаад̣̇и гилзсагаамад̣̇ассанад̇т̇ам̣ вуд̇д̇ам̣. д̇ад̇т̇а д̇аббадисам̣яуд̇д̇од̇и гаамаг̇ун̣абадисам̣яуд̇д̇о, гаамаг̇ун̣аарамман̣од̇и ад̇т̇о. но жа вад̇а рз вад̇д̇аб̣б̣з бан̃жзваад̇и имзсу д̇аббадисам̣яуд̇д̇ачанд̣̇аад̣̇ийсу сад̇и бан̃жзва гаамаг̇ун̣аа гаамад̇хаад̇ууд̇и на вад̇д̇аб̣б̣ам̣. зд̇зби хи чанд̣̇аад̣̇аяо гаманийяадтзна гаамаа жа д̇хаад̇у жаад̇иби гаамад̇хаад̇у. гаманадтзна гаамасан̇каад̇аа д̇хаад̇ууд̇иби гаамад̇хаад̇ууд̇и ад̇т̇о.
510. Idāni kāmaguṇakathā nāma hoti. Tattha sakasamaye tāva kāmadhātūti vatthukāmāpi vuccanti – kilesakāmāpi kāmabhavopi. Etesu hi vatthukāmā kamanīyaṭṭhena kāmā, sabhāvanissattasuññataṭṭhena dhātūti kāmadhātu. Kilesakāmā kamanīyaṭṭhena ceva kamanaṭṭhena ca kāmā, yathāvuttenevatthena dhātūti kāmadhātu. Kāmabhavo kamanīyaṭṭhena kamanaṭṭhena vatthukāmapavattidesaṭṭhenāti tīhi kāraṇehi kāmo, yathāvuttenevatthena dhātūti kāmadhātu. Parasamaye pana – ‘‘pañcime, bhikkhave, kāmaguṇā’’ti vacanamattaṃ nissāya pañceva kāmaguṇā kāmadhātūti gahitaṃ. Tasmā yesaṃ ayaṃ laddhi, seyyathāpi etarahi pubbaseliyānaṃ; te sandhāya kāmadhātunānattaṃ bodhetuṃ pañcevāti pucchā sakavādissa, laddhivasena paṭiññā itarassa. Nanu atthītiādi kilesakāmadassanatthaṃ vuttaṃ. Tattha tappaṭisaṃyuttoti kāmaguṇapaṭisaṃyutto, kāmaguṇārammaṇoti attho. No ca vata re vattabbe pañcevāti imesu tappaṭisaṃyuttachandādīsu sati pañceva kāmaguṇā kāmadhātūti na vattabbaṃ. Etepi hi chandādayo kamanīyaṭṭhena kāmā ca dhātu cātipi kāmadhātu. Kamanaṭṭhena kāmasaṅkhātā dhātūtipi kāmadhātūti attho.
мануссаанам̣ жагкунд̇иаад̣̇и вад̇т̇угаамад̣̇ассанад̇т̇ам̣ вуд̇д̇ам̣. д̇ад̇т̇а бараваад̣̇ий чаннамби ааяад̇анаанам̣ вад̇т̇угаамабхаавзна нагаамад̇хаад̇убхаавам̣ бадигкибид̇ваа буна манод̇и будто махаг̇г̇ад̇алогуд̇д̇арам̣ санд̇хааяа нагаамад̇хаад̇убхаавам̣ бадиж̇аанаад̇и. яасмаа бана саб̣б̣оби д̇збхуумагамано гаамад̇хаад̇уязва, д̇асмаа нам̣ сагаваад̣̇ий суд̇д̇зна ниг̇г̇ан̣хаад̇и.
Manussānaṃ cakkhuntiādi vatthukāmadassanatthaṃ vuttaṃ. Tattha paravādī channampi āyatanānaṃ vatthukāmabhāvena nakāmadhātubhāvaṃ paṭikkhipitvā puna manoti puṭṭho mahaggatalokuttaraṃ sandhāya nakāmadhātubhāvaṃ paṭijānāti. Yasmā pana sabbopi tebhūmakamano kāmadhātuyeva, tasmā naṃ sakavādī suttena niggaṇhāti.
511. гаамаг̇ун̣аа бхавод̇иаад̣̇и бхавасса гаамад̇хаад̇убхаавад̣̇ассанад̇т̇ам̣ вуд̇д̇ам̣. яасмаа бана гаамаг̇ун̣амад̇д̇з бхавод̇и вохааро над̇т̇и, д̇асмаа бараваад̣̇ий нахзваад̇и бадигкибад̇и. гаамаг̇ун̣уубаг̇ам̣ гамманд̇иаад̣̇и саб̣б̣ам̣ гаамаг̇ун̣амад̇д̇асса нагаамад̇хаад̇убхаавад̣̇ассанад̇т̇ам̣ вуд̇д̇ам̣. гаамад̇хаад̇усан̇каад̇агаамабхавуубаг̇амзва хи гаммам̣ ад̇т̇и, гаамабхавуубаг̇аа зва жа сад̇д̇аа хонд̇и. д̇ад̇т̇а ж̇ааяанд̇и ж̇ияанд̇и мияанд̇и жаванд̇и убабаж̇ж̇анд̇и, на гаамаг̇ун̣зсууд̇и иминаа убааязна саб̣б̣ад̇т̇а ад̇т̇о взд̣̇ид̇аб̣б̣од̇и.
511. Kāmaguṇābhavotiādi bhavassa kāmadhātubhāvadassanatthaṃ vuttaṃ. Yasmā pana kāmaguṇamatte bhavoti vohāro natthi, tasmā paravādī nahevāti paṭikkhipati. Kāmaguṇūpagaṃ kammantiādi sabbaṃ kāmaguṇamattassa nakāmadhātubhāvadassanatthaṃ vuttaṃ. Kāmadhātusaṅkhātakāmabhavūpagameva hi kammaṃ atthi, kāmabhavūpagā eva ca sattā honti. Tattha jāyanti jiyanti miyanti cavanti upapajjanti, na kāmaguṇesūti iminā upāyena sabbattha attho veditabboti.
гаамаг̇ун̣агат̇ааван̣н̣анаа.
Kāmaguṇakathāvaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / гат̇аавад̇т̇убаал̣и • Kathāvatthupāḷi / (75) 3. гаамаг̇ун̣агат̇аа • (75) 3. Kāmaguṇakathā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 3. гаамаг̇ун̣агат̇ааван̣н̣анаа • 3. Kāmaguṇakathāvaṇṇanā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 3. гаамаг̇ун̣агат̇ааван̣н̣анаа • 3. Kāmaguṇakathāvaṇṇanā
