| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. காமகு³ணஸுத்தவண்ணனா
4. Kāmaguṇasuttavaṇṇanā
117. சதுத்தே² யே மேதி யே மம. சேதஸோ ஸம்பு²ட்ட²புப்³பா³தி சித்தேன அனுபூ⁴தபுப்³பா³. தத்ர மே சித்தங் ப³ஹுலங் க³ச்ச²மானங் க³ச்செ²ய்யாதி தேஸு பாஸாத³த்தயதிவித⁴னாடகாதி³பே⁴த³ஸம்பத்திவஸேன அனுபூ⁴தபுப்³பே³ஸு பஞ்சஸு காமகு³ணேஸு ப³ஹூஸு வாரேஸு உப்பஜ்ஜமானங் உப்பஜ்ஜெய்யாதி தீ³பேதி. பச்சுப்பன்னேஸு வாதி இத⁴ பதா⁴னசரியகாலே ச²ப்³ப³ஸ்ஸானி ஸுபுப்பி²தவனஸண்ட³ஜாதானங் தி³ஜக³ணாதீ³னங் வஸேன தி³ட்ட²ஸுதாதி³பே⁴த³ங் மனோரமாரம்மணங் காமகு³ணங் கத்வா த³ஸ்ஸெந்தோ ‘‘ஏவரூபேஸு பச்சுப்பன்னேஸு வா ப³ஹுலங் உப்பஜ்ஜெய்யா’’தி த³ஸ்ஸேதி. அப்பங் வா அனாக³தேஸூதி அனாக³தே ‘‘மெத்தெய்யோ நாம பு³த்³தோ⁴ ப⁴விஸ்ஸதி, ஸங்கோ² நாம ராஜா, கேதுமதீ நாம ராஜதா⁴னீ’’திஆதி³வஸேன (தீ³॰ நி॰ 3.106) பரித்தகமேவ அனாக³தேஸு காமகு³ணேஸு உப்பஜ்ஜெய்யாதி த³ஸ்ஸேதி. தத்ர மே அத்தரூபேனாதி தத்ர மயா அத்தனோ ஹிதகாமஜாதிகேன. அப்பமாதோ³தி ஸாதச்சகிரியா பஞ்சஸு காமகு³ணேஸு சித்தஸ்ஸ அவொஸ்ஸக்³கோ³. ஸதீதி ஆரம்மணபரிக்³க³ஹிதஸதி. ஆரக்கோ²தி அயங் அப்பமாதோ³ ச ஸதி ச சேதஸோ ஆரக்கோ² கரணீயோ, ஏவங் மே அஹோஸீதி த³ஸ்ஸேதி, ஆரக்க²த்தா²ய இமே த்³வே த⁴ம்மா காதப்³பா³தி வுத்தங் ஹோதி.
117. Catutthe ye meti ye mama. Cetaso samphuṭṭhapubbāti cittena anubhūtapubbā. Tatra me cittaṃ bahulaṃ gacchamānaṃ gaccheyyāti tesu pāsādattayatividhanāṭakādibhedasampattivasena anubhūtapubbesu pañcasu kāmaguṇesu bahūsu vāresu uppajjamānaṃ uppajjeyyāti dīpeti. Paccuppannesu vāti idha padhānacariyakāle chabbassāni supupphitavanasaṇḍajātānaṃ dijagaṇādīnaṃ vasena diṭṭhasutādibhedaṃ manoramārammaṇaṃ kāmaguṇaṃ katvā dassento ‘‘evarūpesu paccuppannesu vā bahulaṃ uppajjeyyā’’ti dasseti. Appaṃ vā anāgatesūti anāgate ‘‘metteyyo nāma buddho bhavissati, saṅkho nāma rājā, ketumatī nāma rājadhānī’’tiādivasena (dī. ni. 3.106) parittakameva anāgatesu kāmaguṇesu uppajjeyyāti dasseti. Tatra me attarūpenāti tatra mayā attano hitakāmajātikena. Appamādoti sātaccakiriyā pañcasu kāmaguṇesu cittassa avossaggo. Satīti ārammaṇapariggahitasati. Ārakkhoti ayaṃ appamādo ca sati ca cetaso ārakkho karaṇīyo, evaṃ me ahosīti dasseti, ārakkhatthāya ime dve dhammā kātabbāti vuttaṃ hoti.
தஸ்மாதிஹ, பி⁴க்க²வே, ஸே ஆயதனே வேதி³தப்³பே³தி யஸ்மா சேதஸோ ஆரக்க²த்தா²ய அப்பமாதோ³ ச ஸதி ச காதப்³பா³, யஸ்மா தஸ்மிங் ஆயதனே விதி³தே அப்பமாதே³ன வா ஸதியா வா காதப்³ப³ங் நத்தி², தஸ்மா ஸே ஆயதனே வேதி³தப்³பே³, தங் காரணங் ஜானிதப்³ப³ந்தி அத்தோ². ஸளாயதனநிரோத⁴ந்தி ஸளாயதனநிரோதோ⁴ வுச்சதி நிப்³பா³னங், தங் ஸந்தா⁴ய பா⁴ஸிதந்தி அத்தோ². நிப்³பா³னஸ்மிஞ்ஹி சக்கு²ஆதீ³னி சேவ நிருஜ்ஜ²ந்தி ரூபஸஞ்ஞாத³யோ ச நிருஜ்ஜ²ந்தீதி. ஸேஸங் வுத்தனயமேவ.
Tasmātiha, bhikkhave, se āyatane veditabbeti yasmā cetaso ārakkhatthāya appamādo ca sati ca kātabbā, yasmā tasmiṃ āyatane vidite appamādena vā satiyā vā kātabbaṃ natthi, tasmā se āyatane veditabbe, taṃ kāraṇaṃ jānitabbanti attho. Saḷāyatananirodhanti saḷāyatananirodho vuccati nibbānaṃ, taṃ sandhāya bhāsitanti attho. Nibbānasmiñhi cakkhuādīni ceva nirujjhanti rūpasaññādayo ca nirujjhantīti. Sesaṃ vuttanayameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. காமகு³ணஸுத்தங் • 4. Kāmaguṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. காமகு³ணஸுத்தவண்ணனா • 4. Kāmaguṇasuttavaṇṇanā
