| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. কামগুণসুত্তৰণ্ণনা
4. Kāmaguṇasuttavaṇṇanā
১১৭. চেতসোতি করণে সামিৰচনং। চিত্তেন সংফুসনং নাম অনুভৰোতি আহ ‘‘চিত্তেন অনুভূতপুব্বা’’তি। উতুত্তযানুরূপতাৰসেন পাসাদত্তযং, তং ৰসেন তিৰিধনাটকভেদো। মনোরম্মতামত্তেন কামগুণং কত্ৰা দস্সিতং, ন কামৰসেন। ন হি অভিনিক্খমনতো উদ্ধং বোধিসত্তস্স কামৰিতক্কা ভূতপুব্বা। তেনাহ মারো পাপিমা –
117.Cetasoti karaṇe sāmivacanaṃ. Cittena saṃphusanaṃ nāma anubhavoti āha ‘‘cittena anubhūtapubbā’’ti. Ututtayānurūpatāvasena pāsādattayaṃ, taṃ vasena tividhanāṭakabhedo. Manorammatāmattena kāmaguṇaṃ katvā dassitaṃ, na kāmavasena. Na hi abhinikkhamanato uddhaṃ bodhisattassa kāmavitakkā bhūtapubbā. Tenāha māro pāpimā –
‘‘সত্ত ৰস্সানি ভগৰন্তং, অনুবন্ধিং পদাপদং।
‘‘Satta vassāni bhagavantaṃ, anubandhiṃ padāpadaṃ;
ওতারং নাধিগচ্ছিস্সং, সম্বুদ্ধস্স সতীমতো’’তি॥ (সু॰ নি॰ ৪৪৮)।
Otāraṃ nādhigacchissaṃ, sambuddhassa satīmato’’ti. (su. ni. 448);
মেত্তেয্যো নামাতিআদি অনাগতারম্মণদস্সনমত্তং, ন বোধিসত্তস্স এৰং উপ্পজ্জতীতি। অত্তা পিযাযিতব্বরূপো এতস্সাতি অত্তরূপো, উত্তরপদে পুরিমপদলোপেনাতি ‘‘অত্তনো হিতকামজাতিকেনা’’তি অত্থো ৰুত্তো। অত্তরূপেনাতি ৰা পীতিসোমনস্সেহি গহিতসভাৰেন তুট্ঠপহট্ঠেন উদগ্গুদগ্গেন। অপ্পমাদোতি অপ্পমজ্জনং কুসলধম্মেসু অখণ্ডকারিতাতি আহ ‘‘সাতচ্চকিরিযা’’তি। অৰোস্সগ্গোতি চিত্তস্স কামগুণেসু অৰোস্সজ্জনং পক্খন্দিতুং অপ্পদানং। পুরিমো ৰিকপ্পো কুসলানং ধম্মানং করণৰসেন দস্সিতো, পচ্ছিমো অকুসলানং অকরণৰসেন। দ্ৰে ধম্মাতি অপ্পমাদো সতীতি দ্ৰে ধম্মা। অপ্পমাদো সতি চ তথা পৰত্তা চত্তারো কুসলধম্মক্খন্ধা ৰেদিতব্বা। কত্তব্বাতি পৰত্তেতব্বা।
Metteyyo nāmātiādi anāgatārammaṇadassanamattaṃ, na bodhisattassa evaṃ uppajjatīti. Attā piyāyitabbarūpo etassāti attarūpo, uttarapade purimapadalopenāti ‘‘attano hitakāmajātikenā’’ti attho vutto. Attarūpenāti vā pītisomanassehi gahitasabhāvena tuṭṭhapahaṭṭhena udaggudaggena. Appamādoti appamajjanaṃ kusaladhammesu akhaṇḍakāritāti āha ‘‘sātaccakiriyā’’ti. Avossaggoti cittassa kāmaguṇesu avossajjanaṃ pakkhandituṃ appadānaṃ. Purimo vikappo kusalānaṃ dhammānaṃ karaṇavasena dassito, pacchimo akusalānaṃ akaraṇavasena. Dve dhammāti appamādo satīti dve dhammā. Appamādo sati ca tathā pavattā cattāro kusaladhammakkhandhā veditabbā. Kattabbāti pavattetabbā.
তস্মিং আযতনেতি তস্মিং নিব্বানসঞ্ঞিতে কারণে পটিৰেধে। তং কারণন্তি ছন্নং আযতনানং কারণং। সল়াযতনং নিরুজ্ঝতি এত্থাতি সল়াযতননিরোধো ৰুচ্চতি নিব্বানং। তেনাহ ‘‘নিব্বানং। তং সন্ধাযা’’তিআদি। নিব্বানস্মিন্তি নিব্বানম্হি।
Tasmiṃ āyataneti tasmiṃ nibbānasaññite kāraṇe paṭivedhe. Taṃ kāraṇanti channaṃ āyatanānaṃ kāraṇaṃ. Saḷāyatanaṃ nirujjhati etthāti saḷāyatananirodho vuccati nibbānaṃ. Tenāha ‘‘nibbānaṃ. Taṃ sandhāyā’’tiādi. Nibbānasminti nibbānamhi.
কামগুণসুত্তৰণ্ণনা নিট্ঠিতা।
Kāmaguṇasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. কামগুণসুত্তং • 4. Kāmaguṇasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. কামগুণসুত্তৰণ্ণনা • 4. Kāmaguṇasuttavaṇṇanā
