| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৭. কামসুত্তং
7. Kāmasuttaṃ
৭. ‘‘যেভুয্যেন, ভিক্খৰে, সত্তা কামেসু লল়িতা 1। অসিতব্যাভঙ্গিং 2, ভিক্খৰে, কুলপুত্তো ওহায অগারস্মা অনগারিযং পব্বজিতো হোতি, ‘সদ্ধাপব্বজিতো কুলপুত্তো’তি অলং ৰচনায। তং কিস্স হেতু? লব্ভা 3, ভিক্খৰে, যোব্বনেন কামা তে চ খো যাদিসা ৰা তাদিসা ৰা। যে চ, ভিক্খৰে, হীনা কামা যে চ মজ্ঝিমা কামা যে চ পণীতা কামা , সব্বে কামা ‘কামা’ত্ৰেৰ সঙ্খং গচ্ছন্তি। সেয্যথাপি , ভিক্খৰে, দহরো কুমারো মন্দো উত্তানসেয্যকো ধাতিযা পমাদমন্ৰায কট্ঠং ৰা কঠলং 4 ৰা মুখে আহরেয্য। তমেনং ধাতি সীঘং সীঘং 5 মনসি করেয্য; সীঘং সীঘং মনসি করিত্ৰা সীঘং সীঘং আহরেয্য। নো চে সক্কুণেয্য সীঘং সীঘং আহরিতুং, ৰামেন হত্থেন সীসং পরিগ্গহেত্ৰা দক্খিণেন হত্থেন ৰঙ্কঙ্গুলিং করিত্ৰা সলোহিতম্পি আহরেয্য। তং কিস্স হেতু? ‘অত্থেসা, ভিক্খৰে, কুমারস্স ৰিহেসা; নেসা নত্থী’তি ৰদামি। করণীযঞ্চ খো এতং 6, ভিক্খৰে, ধাতিযা অত্থকামায হিতেসিনিযা অনুকম্পিকায, অনুকম্পং উপাদায। যতো চ খো, ভিক্খৰে, সো কুমারো ৰুদ্ধো হোতি অলংপঞ্ঞো, অনপেক্খা দানি 7, ভিক্খৰে, ধাতি তস্মিং কুমারে হোতি – ‘অত্তগুত্তো দানি কুমারো নালং পমাদাযা’তি।
7. ‘‘Yebhuyyena, bhikkhave, sattā kāmesu laḷitā 8. Asitabyābhaṅgiṃ 9, bhikkhave, kulaputto ohāya agārasmā anagāriyaṃ pabbajito hoti, ‘saddhāpabbajito kulaputto’ti alaṃ vacanāya. Taṃ kissa hetu? Labbhā 10, bhikkhave, yobbanena kāmā te ca kho yādisā vā tādisā vā. Ye ca, bhikkhave, hīnā kāmā ye ca majjhimā kāmā ye ca paṇītā kāmā , sabbe kāmā ‘kāmā’tveva saṅkhaṃ gacchanti. Seyyathāpi , bhikkhave, daharo kumāro mando uttānaseyyako dhātiyā pamādamanvāya kaṭṭhaṃ vā kaṭhalaṃ 11 vā mukhe āhareyya. Tamenaṃ dhāti sīghaṃ sīghaṃ 12 manasi kareyya; sīghaṃ sīghaṃ manasi karitvā sīghaṃ sīghaṃ āhareyya. No ce sakkuṇeyya sīghaṃ sīghaṃ āharituṃ, vāmena hatthena sīsaṃ pariggahetvā dakkhiṇena hatthena vaṅkaṅguliṃ karitvā salohitampi āhareyya. Taṃ kissa hetu? ‘Atthesā, bhikkhave, kumārassa vihesā; nesā natthī’ti vadāmi. Karaṇīyañca kho etaṃ 13, bhikkhave, dhātiyā atthakāmāya hitesiniyā anukampikāya, anukampaṃ upādāya. Yato ca kho, bhikkhave, so kumāro vuddho hoti alaṃpañño, anapekkhā dāni 14, bhikkhave, dhāti tasmiṃ kumāre hoti – ‘attagutto dāni kumāro nālaṃ pamādāyā’ti.
‘‘এৰমেৰং খো, ভিক্খৰে, যাৰকীৰঞ্চ ভিক্খুনো সদ্ধায অকতং হোতি কুসলেসু ধম্মেসু, হিরিযা অকতং হোতি কুসলেসু ধম্মেসু, ওত্তপ্পেন অকতং হোতি কুসলেসু ধম্মেসু, ৰীরিযেন অকতং হোতি কুসলেসু ধম্মেসু, পঞ্ঞায অকতং হোতি কুসলেসু ধম্মেসু, অনুরক্খিতব্বো তাৰ মে সো, ভিক্খৰে, ভিক্খু হোতি। যতো চ খো, ভিক্খৰে, ভিক্খুনো সদ্ধায কতং হোতি কুসলেসু ধম্মেসু, হিরিযা কতং হোতি কুসলেসু ধম্মেসু, ওত্তপ্পেন কতং হোতি কুসলেসু ধম্মেসু, ৰীরিযেন কতং হোতি কুসলেসু ধম্মেসু, পঞ্ঞায কতং হোতি কুসলেসু ধম্মেসু, অনপেক্খো দানাহং, ভিক্খৰে 15, তস্মিং ভিক্খুস্মিং হোমি – ‘অত্তগুত্তো দানি ভিক্খু নালং পমাদাযা’’’তি। সত্তমং।
‘‘Evamevaṃ kho, bhikkhave, yāvakīvañca bhikkhuno saddhāya akataṃ hoti kusalesu dhammesu, hiriyā akataṃ hoti kusalesu dhammesu, ottappena akataṃ hoti kusalesu dhammesu, vīriyena akataṃ hoti kusalesu dhammesu, paññāya akataṃ hoti kusalesu dhammesu, anurakkhitabbo tāva me so, bhikkhave, bhikkhu hoti. Yato ca kho, bhikkhave, bhikkhuno saddhāya kataṃ hoti kusalesu dhammesu, hiriyā kataṃ hoti kusalesu dhammesu, ottappena kataṃ hoti kusalesu dhammesu, vīriyena kataṃ hoti kusalesu dhammesu, paññāya kataṃ hoti kusalesu dhammesu, anapekkho dānāhaṃ, bhikkhave 16, tasmiṃ bhikkhusmiṃ homi – ‘attagutto dāni bhikkhu nālaṃ pamādāyā’’’ti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭. কামসুত্তৰণ্ণনা • 7. Kāmasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬. মহাসুপিনসুত্তৰণ্ণনা • 6. Mahāsupinasuttavaṇṇanā
