| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၇. ကာမသုတ္တံ
7. Kāmasuttaṃ
၇. ‘‘ယေဘုယ္ယေန, ဘိက္ခဝေ, သတ္တာ ကာမေသု လဠိတာ 1။ အသိတဗ္ယာဘင္ဂိံ 2, ဘိက္ခဝေ, ကုလပုတ္တော ဩဟာယ အဂာရသ္မာ အနဂာရိယံ ပဗ္ဗဇိတော ဟောတိ, ‘သဒ္ဓာပဗ္ဗဇိတော ကုလပုတ္တော’တိ အလံ ဝစနာယ။ တံ ကိသ္သ ဟေတု? လဗ္ဘာ 3, ဘိက္ခဝေ, ယောဗ္ဗနေန ကာမာ တေ စ ခော ယာဒိသာ ဝာ တာဒိသာ ဝာ။ ယေ စ, ဘိက္ခဝေ, ဟီနာ ကာမာ ယေ စ မဇ္ဈိမာ ကာမာ ယေ စ ပဏီတာ ကာမာ , သဗ္ဗေ ကာမာ ‘ကာမာ’တ္ဝေဝ သင္ခံ ဂစ္ဆန္တိ။ သေယ္ယထာပိ , ဘိက္ခဝေ, ဒဟရော ကုမာရော မန္ဒော ဥတ္တာနသေယ္ယကော ဓာတိယာ ပမာဒမန္ဝာယ ကဋ္ဌံ ဝာ ကဌလံ 4 ဝာ မုခေ အာဟရေယ္ယ။ တမေနံ ဓာတိ သီဃံ သီဃံ 5 မနသိ ကရေယ္ယ; သီဃံ သီဃံ မနသိ ကရိတ္ဝာ သီဃံ သီဃံ အာဟရေယ္ယ။ နော စေ သက္ကုဏေယ္ယ သီဃံ သီဃံ အာဟရိတုံ, ဝာမေန ဟတ္ထေန သီသံ ပရိဂ္ဂဟေတ္ဝာ ဒက္ခိဏေန ဟတ္ထေန ဝင္ကင္ဂုလိံ ကရိတ္ဝာ သလောဟိတမ္ပိ အာဟရေယ္ယ။ တံ ကိသ္သ ဟေတု? ‘အတ္ထေသာ, ဘိက္ခဝေ, ကုမာရသ္သ ဝိဟေသာ; နေသာ နတ္ထီ’တိ ဝဒာမိ။ ကရဏီယဉ္စ ခော ဧတံ 6, ဘိက္ခဝေ, ဓာတိယာ အတ္ထကာမာယ ဟိတေသိနိယာ အနုကမ္ပိကာယ, အနုကမ္ပံ ဥပာဒာယ။ ယတော စ ခော, ဘိက္ခဝေ, သော ကုမာရော ဝုဒ္ဓော ဟောတိ အလံပညော, အနပေက္ခာ ဒာနိ 7, ဘိက္ခဝေ, ဓာတိ တသ္မိံ ကုမာရေ ဟောတိ – ‘အတ္တဂုတ္တော ဒာနိ ကုမာရော နာလံ ပမာဒာယာ’တိ။
7. ‘‘Yebhuyyena, bhikkhave, sattā kāmesu laḷitā 8. Asitabyābhaṅgiṃ 9, bhikkhave, kulaputto ohāya agārasmā anagāriyaṃ pabbajito hoti, ‘saddhāpabbajito kulaputto’ti alaṃ vacanāya. Taṃ kissa hetu? Labbhā 10, bhikkhave, yobbanena kāmā te ca kho yādisā vā tādisā vā. Ye ca, bhikkhave, hīnā kāmā ye ca majjhimā kāmā ye ca paṇītā kāmā , sabbe kāmā ‘kāmā’tveva saṅkhaṃ gacchanti. Seyyathāpi , bhikkhave, daharo kumāro mando uttānaseyyako dhātiyā pamādamanvāya kaṭṭhaṃ vā kaṭhalaṃ 11 vā mukhe āhareyya. Tamenaṃ dhāti sīghaṃ sīghaṃ 12 manasi kareyya; sīghaṃ sīghaṃ manasi karitvā sīghaṃ sīghaṃ āhareyya. No ce sakkuṇeyya sīghaṃ sīghaṃ āharituṃ, vāmena hatthena sīsaṃ pariggahetvā dakkhiṇena hatthena vaṅkaṅguliṃ karitvā salohitampi āhareyya. Taṃ kissa hetu? ‘Atthesā, bhikkhave, kumārassa vihesā; nesā natthī’ti vadāmi. Karaṇīyañca kho etaṃ 13, bhikkhave, dhātiyā atthakāmāya hitesiniyā anukampikāya, anukampaṃ upādāya. Yato ca kho, bhikkhave, so kumāro vuddho hoti alaṃpañño, anapekkhā dāni 14, bhikkhave, dhāti tasmiṃ kumāre hoti – ‘attagutto dāni kumāro nālaṃ pamādāyā’ti.
‘‘ဧဝမေဝံ ခော, ဘိက္ခဝေ, ယာဝကီဝဉ္စ ဘိက္ခုနော သဒ္ဓာယ အကတံ ဟောတိ ကုသလေသု ဓမ္မေသု, ဟိရိယာ အကတံ ဟောတိ ကုသလေသု ဓမ္မေသု, ဩတ္တပ္ပေန အကတံ ဟောတိ ကုသလေသု ဓမ္မေသု, ဝီရိယေန အကတံ ဟောတိ ကုသလေသု ဓမ္မေသု, ပညာယ အကတံ ဟောတိ ကုသလေသု ဓမ္မေသု, အနုရက္ခိတဗ္ဗော တာဝ မေ သော, ဘိက္ခဝေ, ဘိက္ခု ဟောတိ။ ယတော စ ခော, ဘိက္ခဝေ, ဘိက္ခုနော သဒ္ဓာယ ကတံ ဟောတိ ကုသလေသု ဓမ္မေသု, ဟိရိယာ ကတံ ဟောတိ ကုသလေသု ဓမ္မေသု, ဩတ္တပ္ပေန ကတံ ဟောတိ ကုသလေသု ဓမ္မေသု, ဝီရိယေန ကတံ ဟောတိ ကုသလေသု ဓမ္မေသု, ပညာယ ကတံ ဟောတိ ကုသလေသု ဓမ္မေသု, အနပေက္ခော ဒာနာဟံ, ဘိက္ခဝေ 15, တသ္မိံ ဘိက္ခုသ္မိံ ဟောမိ – ‘အတ္တဂုတ္တော ဒာနိ ဘိက္ခု နာလံ ပမာဒာယာ’’’တိ။ သတ္တမံ။
‘‘Evamevaṃ kho, bhikkhave, yāvakīvañca bhikkhuno saddhāya akataṃ hoti kusalesu dhammesu, hiriyā akataṃ hoti kusalesu dhammesu, ottappena akataṃ hoti kusalesu dhammesu, vīriyena akataṃ hoti kusalesu dhammesu, paññāya akataṃ hoti kusalesu dhammesu, anurakkhitabbo tāva me so, bhikkhave, bhikkhu hoti. Yato ca kho, bhikkhave, bhikkhuno saddhāya kataṃ hoti kusalesu dhammesu, hiriyā kataṃ hoti kusalesu dhammesu, ottappena kataṃ hoti kusalesu dhammesu, vīriyena kataṃ hoti kusalesu dhammesu, paññāya kataṃ hoti kusalesu dhammesu, anapekkho dānāhaṃ, bhikkhave 16, tasmiṃ bhikkhusmiṃ homi – ‘attagutto dāni bhikkhu nālaṃ pamādāyā’’’ti. Sattamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၇. ကာမသုတ္တဝဏ္ဏနာ • 7. Kāmasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. မဟာသုပိနသုတ္တဝဏ္ဏနာ • 6. Mahāsupinasuttavaṇṇanā
