| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. කාමසුත්‌තං
7. Kāmasuttaṃ
7. ‘‘යෙභුය්‍යෙන, භික්‌ඛවෙ, සත්‌තා කාමෙසු ලළිතා 1. අසිතබ්‍යාභඞ්‌ගිං 2, භික්‌ඛවෙ, කුලපුත්‌තො ඔහාය අගාරස්‌මා අනගාරියං පබ්‌බජිතො හොති, ‘සද්‌ධාපබ්‌බජිතො කුලපුත්‌තො’ති අලං වචනාය. තං කිස්‌ස හෙතු? ලබ්‌භා 3, භික්‌ඛවෙ, යොබ්‌බනෙන කාමා තෙ ච ඛො යාදිසා වා තාදිසා වා. යෙ ච, භික්‌ඛවෙ, හීනා කාමා යෙ ච මජ්‌ඣිමා කාමා යෙ ච පණීතා කාමා , සබ්‌බෙ කාමා ‘කාමා’ත්‌වෙව සඞ්‌ඛං ගච්‌ඡන්‌ති. සෙය්‍යථාපි , භික්‌ඛවෙ, දහරො කුමාරො මන්‌දො උත්‌තානසෙය්‍යකො ධාතියා පමාදමන්‌වාය කට්‌ඨං වා කඨලං 4 වා මුඛෙ ආහරෙය්‍ය. තමෙනං ධාති සීඝං සීඝං 5 මනසි කරෙය්‍ය; සීඝං සීඝං මනසි කරිත්‌වා සීඝං සීඝං ආහරෙය්‍ය. නො චෙ සක්‌කුණෙය්‍ය සීඝං සීඝං ආහරිතුං, වාමෙන හත්‌ථෙන සීසං පරිග්‌ගහෙත්‌වා දක්‌ඛිණෙන හත්‌ථෙන වඞ්‌කඞ්‌ගුලිං කරිත්‌වා සලොහිතම්‌පි ආහරෙය්‍ය. තං කිස්‌ස හෙතු? ‘අත්‌ථෙසා, භික්‌ඛවෙ, කුමාරස්‌ස විහෙසා; නෙසා නත්‌ථී’ති වදාමි. කරණීයඤ්‌ච ඛො එතං 6, භික්‌ඛවෙ, ධාතියා අත්‌ථකාමාය හිතෙසිනියා අනුකම්‌පිකාය, අනුකම්‌පං උපාදාය. යතො ච ඛො, භික්‌ඛවෙ, සො කුමාරො වුද්‌ධො හොති අලංපඤ්‌ඤො, අනපෙක්‌ඛා දානි 7, භික්‌ඛවෙ, ධාති තස්‌මිං කුමාරෙ හොති – ‘අත්‌තගුත්‌තො දානි කුමාරො නාලං පමාදායා’ති.
7. ‘‘Yebhuyyena, bhikkhave, sattā kāmesu laḷitā 8. Asitabyābhaṅgiṃ 9, bhikkhave, kulaputto ohāya agārasmā anagāriyaṃ pabbajito hoti, ‘saddhāpabbajito kulaputto’ti alaṃ vacanāya. Taṃ kissa hetu? Labbhā 10, bhikkhave, yobbanena kāmā te ca kho yādisā vā tādisā vā. Ye ca, bhikkhave, hīnā kāmā ye ca majjhimā kāmā ye ca paṇītā kāmā , sabbe kāmā ‘kāmā’tveva saṅkhaṃ gacchanti. Seyyathāpi , bhikkhave, daharo kumāro mando uttānaseyyako dhātiyā pamādamanvāya kaṭṭhaṃ vā kaṭhalaṃ 11 vā mukhe āhareyya. Tamenaṃ dhāti sīghaṃ sīghaṃ 12 manasi kareyya; sīghaṃ sīghaṃ manasi karitvā sīghaṃ sīghaṃ āhareyya. No ce sakkuṇeyya sīghaṃ sīghaṃ āharituṃ, vāmena hatthena sīsaṃ pariggahetvā dakkhiṇena hatthena vaṅkaṅguliṃ karitvā salohitampi āhareyya. Taṃ kissa hetu? ‘Atthesā, bhikkhave, kumārassa vihesā; nesā natthī’ti vadāmi. Karaṇīyañca kho etaṃ 13, bhikkhave, dhātiyā atthakāmāya hitesiniyā anukampikāya, anukampaṃ upādāya. Yato ca kho, bhikkhave, so kumāro vuddho hoti alaṃpañño, anapekkhā dāni 14, bhikkhave, dhāti tasmiṃ kumāre hoti – ‘attagutto dāni kumāro nālaṃ pamādāyā’ti.
‘‘එවමෙවං ඛො, භික්‌ඛවෙ, යාවකීවඤ්‌ච භික්‌ඛුනො සද්‌ධාය අකතං හොති කුසලෙසු ධම්‌මෙසු, හිරියා අකතං හොති කුසලෙසු ධම්‌මෙසු, ඔත්‌තප්‌පෙන අකතං හොති කුසලෙසු ධම්‌මෙසු, වීරියෙන අකතං හොති කුසලෙසු ධම්‌මෙසු, පඤ්‌ඤාය අකතං හොති කුසලෙසු ධම්‌මෙසු, අනුරක්‌ඛිතබ්‌බො තාව මෙ සො, භික්‌ඛවෙ, භික්‌ඛු හොති. යතො ච ඛො, භික්‌ඛවෙ, භික්‌ඛුනො සද්‌ධාය කතං හොති කුසලෙසු ධම්‌මෙසු, හිරියා කතං හොති කුසලෙසු ධම්‌මෙසු, ඔත්‌තප්‌පෙන කතං හොති කුසලෙසු ධම්‌මෙසු, වීරියෙන කතං හොති කුසලෙසු ධම්‌මෙසු, පඤ්‌ඤාය කතං හොති කුසලෙසු ධම්‌මෙසු, අනපෙක්‌ඛො දානාහං, භික්‌ඛවෙ 15, තස්‌මිං භික්‌ඛුස්‌මිං හොමි – ‘අත්‌තගුත්‌තො දානි භික්‌ඛු නාලං පමාදායා’’’ති. සත්‌තමං.
‘‘Evamevaṃ kho, bhikkhave, yāvakīvañca bhikkhuno saddhāya akataṃ hoti kusalesu dhammesu, hiriyā akataṃ hoti kusalesu dhammesu, ottappena akataṃ hoti kusalesu dhammesu, vīriyena akataṃ hoti kusalesu dhammesu, paññāya akataṃ hoti kusalesu dhammesu, anurakkhitabbo tāva me so, bhikkhave, bhikkhu hoti. Yato ca kho, bhikkhave, bhikkhuno saddhāya kataṃ hoti kusalesu dhammesu, hiriyā kataṃ hoti kusalesu dhammesu, ottappena kataṃ hoti kusalesu dhammesu, vīriyena kataṃ hoti kusalesu dhammesu, paññāya kataṃ hoti kusalesu dhammesu, anapekkho dānāhaṃ, bhikkhave 16, tasmiṃ bhikkhusmiṃ homi – ‘attagutto dāni bhikkhu nālaṃ pamādāyā’’’ti. Sattamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. කාමසුත්‌තවණ්‌ණනා • 7. Kāmasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6. මහාසුපිනසුත්‌තවණ්‌ණනා • 6. Mahāsupinasuttavaṇṇanā
