| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
7. කාමයොගසුත්‌තං
7. Kāmayogasuttaṃ
96. වුත්‌තඤ්‌හෙතං භගවතා, වුත්‌තමරහතාති මෙ සුතං –
96. Vuttañhetaṃ bhagavatā, vuttamarahatāti me sutaṃ –
‘‘කාමයොගයුත්‌තො, භික්‌ඛවෙ, භවයොගයුත්‌තො ආගාමී හොති ආගන්‌තා 1 ඉත්‌ථත්‌තං. කාමයොගවිසංයුත්‌තො, භික්‌ඛවෙ, භවයොගයුත්‌තො අනාගාමී හොති අනාගන්‌තා ඉත්‌ථත්‌තං. කාමයොගවිසංයුත්‌තො, භික්‌ඛවෙ, භවයොගවිසංයුත්‌තො අරහා හොති, ඛීණාසවො’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Kāmayogayutto, bhikkhave, bhavayogayutto āgāmī hoti āgantā 2 itthattaṃ. Kāmayogavisaṃyutto, bhikkhave, bhavayogayutto anāgāmī hoti anāgantā itthattaṃ. Kāmayogavisaṃyutto, bhikkhave, bhavayogavisaṃyutto arahā hoti, khīṇāsavo’’ti. Etamatthaṃ bhagavā avoca. Tatthetaṃ iti vuccati –
‘‘කාමයොගෙන සංයුත්‌තා, භවයොගෙන චූභයං;
‘‘Kāmayogena saṃyuttā, bhavayogena cūbhayaṃ;
සත්‌තා ගච්‌ඡන්‌ති සංසාරං, ජාතිමරණගාමිනො.
Sattā gacchanti saṃsāraṃ, jātimaraṇagāmino.
‘‘යෙ ච කාමෙ පහන්‌ත්‌වාන, අප්‌පත්‌තා ආසවක්‌ඛයං;
‘‘Ye ca kāme pahantvāna, appattā āsavakkhayaṃ;
භවයොගෙන සංයුත්‌තා, අනාගාමීති වුච්‌චරෙ.
Bhavayogena saṃyuttā, anāgāmīti vuccare.
‘‘යෙ ච ඛො ඡින්‌නසංසයා, ඛීණමානපුනබ්‌භවා;
‘‘Ye ca kho chinnasaṃsayā, khīṇamānapunabbhavā;
තෙ වෙ පාරඞ්‌ගතා ලොකෙ, යෙ පත්‌තා ආසවක්‌ඛය’’න්‌ති.
Te ve pāraṅgatā loke, ye pattā āsavakkhaya’’nti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. සත්‌තමං.
Ayampi attho vutto bhagavatā, iti me sutanti. Sattamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 7. කාමයොගසුත්‌තවණ්‌ණනා • 7. Kāmayogasuttavaṇṇanā
