| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
211. கம்ப³லானுஜானநாதி³கதா²
211. Kambalānujānanādikathā
338. தேன கோ² பன ஸமயேன காஸிராஜா ஜீவகஸ்ஸ கோமாரப⁴ச்சஸ்ஸ அட்³ட⁴காஸிகங் கம்ப³லங் பாஹேஸி உபட்³ட⁴காஸினங் க²மமானங். அத² கோ² ஜீவகோ கோமாரப⁴ச்சோ தங் அட்³ட⁴காஸிகங் கம்ப³லங் ஆதா³ய யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஜீவகோ கோமாரப⁴ச்சோ ப⁴க³வந்தங் ஏதத³வோச – ‘‘அயங் மே, ப⁴ந்தே, அட்³ட⁴காஸிகோ கம்ப³லோ காஸிரஞ்ஞா பஹிதோ உபட்³ட⁴காஸினங் க²மமானோ. படிக்³க³ண்ஹாது மே, ப⁴ந்தே, ப⁴க³வா கம்ப³லங், யங் மமஸ்ஸ தீ³க⁴ரத்தங் ஹிதாய ஸுகா²யா’’தி. படிக்³க³ஹேஸி ப⁴க³வா கம்ப³லங். அத² கோ² ப⁴க³வா ஜீவகங் கோமாரப⁴ச்சங் த⁴ம்மியா கதா²ய ஸந்த³ஸ்ஸேஸி…பே॰… பத³க்கி²ணங் கத்வா பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, கம்ப³ல’’ந்தி.
338. Tena kho pana samayena kāsirājā jīvakassa komārabhaccassa aḍḍhakāsikaṃ kambalaṃ pāhesi upaḍḍhakāsinaṃ khamamānaṃ. Atha kho jīvako komārabhacco taṃ aḍḍhakāsikaṃ kambalaṃ ādāya yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho jīvako komārabhacco bhagavantaṃ etadavoca – ‘‘ayaṃ me, bhante, aḍḍhakāsiko kambalo kāsiraññā pahito upaḍḍhakāsinaṃ khamamāno. Paṭiggaṇhātu me, bhante, bhagavā kambalaṃ, yaṃ mamassa dīgharattaṃ hitāya sukhāyā’’ti. Paṭiggahesi bhagavā kambalaṃ. Atha kho bhagavā jīvakaṃ komārabhaccaṃ dhammiyā kathāya sandassesi…pe… padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, kambala’’nti.
339. தேன கோ² பன ஸமயேன ஸங்க⁴ஸ்ஸ உச்சாவசானி சீவரானி உப்பன்னானி ஹொந்தி. அத² கோ² பி⁴க்கூ²னங் ஏதத³ஹோஸி – ‘‘கிங் நு கோ² ப⁴க³வதா சீவரங் அனுஞ்ஞாதங் , கிங் அனநுஞ்ஞாத’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ச² சீவரானி – கோ²மங் கப்பாஸிகங் கோஸெய்யங் கம்ப³லங் ஸாணங் ப⁴ங்க³ந்தி.
339. Tena kho pana samayena saṅghassa uccāvacāni cīvarāni uppannāni honti. Atha kho bhikkhūnaṃ etadahosi – ‘‘kiṃ nu kho bhagavatā cīvaraṃ anuññātaṃ , kiṃ ananuññāta’’nti? Bhagavato etamatthaṃ ārocesuṃ. Anujānāmi, bhikkhave, cha cīvarāni – khomaṃ kappāsikaṃ koseyyaṃ kambalaṃ sāṇaṃ bhaṅganti.
340. தேன கோ² பன ஸமயேன யே தே பி⁴க்கூ² க³ஹபதிசீவரங் ஸாதி³யந்தி தே குக்குச்சாயந்தா பங்ஸுகூலங் ந ஸாதி³யந்தி – ஏகங்யேவ ப⁴க³வதா சீவரங் அனுஞ்ஞாதங், ந த்³வேதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, க³ஹபதிசீவரங் ஸாதி³யந்தேன பங்ஸுகூலம்பி ஸாதி³யிதுங்; தது³ப⁴யேனபாஹங், பி⁴க்க²வே, ஸந்துட்டி²ங் வண்ணேமீதி.
340. Tena kho pana samayena ye te bhikkhū gahapaticīvaraṃ sādiyanti te kukkuccāyantā paṃsukūlaṃ na sādiyanti – ekaṃyeva bhagavatā cīvaraṃ anuññātaṃ, na dveti. Bhagavato etamatthaṃ ārocesuṃ. Anujānāmi, bhikkhave, gahapaticīvaraṃ sādiyantena paṃsukūlampi sādiyituṃ; tadubhayenapāhaṃ, bhikkhave, santuṭṭhiṃ vaṇṇemīti.
கம்ப³லானுஜானநாதி³கதா² நிட்டி²தா.
Kambalānujānanādikathā niṭṭhitā.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கம்ப³லானுஜானநாதி³கதா² • Kambalānujānanādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கம்ப³லானுஜானநாதி³கதா²வண்ணனா • Kambalānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ப⁴ண்டா³கா³ரஸம்முதிஆதி³கதா²வண்ணனா • Bhaṇḍāgārasammutiādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஜீவகவத்து²கதா²தி³வண்ணனா • Jīvakavatthukathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 211. கம்ப³லானுஜானநாதி³கதா² • 211. Kambalānujānanādikathā
