| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২১১. কম্বলানুজাননাদিকথা
211. Kambalānujānanādikathā
৩৩৮. কাসীনন্তি কাসীনং জনপদানং, কাসিরট্ঠে নিৰাসীনং জনানং ৰা। পসেনদিস্সাতি পচ্চুট্ঠং, পটিপক্খং ৰা সেনং জিনাতীতি পসেনদি জকারস্স দকারং কত্ৰা। এসাতি এসো কাসিরাজা। ‘‘সহস্স’’ন্তি ইমিনা কাসিসদ্দস্স সঙ্কেতসঙ্খ্যং দস্সেতি। তংঅগ্ঘনকোতি তেন কাসিনা অগ্ঘনকো। কস্মা অড্ঢকাসীতি (থেরীগা॰ অট্ঠ॰ ২৫) ৰুত্তোতি আহ ‘‘অযং পনা’’তিআদি। অযন্তি কম্বলো। পনাতি কারণত্থজোতকো। যস্মাতি হি অত্থো।
338.Kāsīnanti kāsīnaṃ janapadānaṃ, kāsiraṭṭhe nivāsīnaṃ janānaṃ vā. Pasenadissāti paccuṭṭhaṃ, paṭipakkhaṃ vā senaṃ jinātīti pasenadi jakārassa dakāraṃ katvā. Esāti eso kāsirājā. ‘‘Sahassa’’nti iminā kāsisaddassa saṅketasaṅkhyaṃ dasseti. Taṃagghanakoti tena kāsinā agghanako. Kasmā aḍḍhakāsīti (therīgā. aṭṭha. 25) vuttoti āha ‘‘ayaṃ panā’’tiādi. Ayanti kambalo. Panāti kāraṇatthajotako. Yasmāti hi attho.
৩৩৯. ভঞ্জিতব্বং খোমাদীনি পঞ্চ সুত্তানি মিস্সিত্ৰা অৰমদ্দিতব্বন্তি ভঙ্গন্তি দস্সেন্তো আহ ‘‘ভঙ্গং নামা’’তিআদি। ৰাকমযমেৰাতি ভঙ্গনামকেন ৰাকেন নিব্বত্তমেৰ।
339. Bhañjitabbaṃ khomādīni pañca suttāni missitvā avamadditabbanti bhaṅganti dassento āha ‘‘bhaṅgaṃ nāmā’’tiādi. Vākamayamevāti bhaṅganāmakena vākena nibbattameva.
৩৪০. তেতি ভিক্খূ, সল্লক্খিংসু কিরাতি সম্বন্ধো। এতস্সাতি পদস্স, অত্থন্তি সম্বন্ধো। ন অচ্ছিংসূতি ন আসিংসু, ন ৰসিংসূতি অত্থো। নাকামাতি এত্থ কমুধাতু ইচ্ছত্থো যকারলোপোতি আহ ‘‘ন অনিচ্ছাযা’’তি। দাতব্বোতি ভাগো দাতব্বো। উপচারেতি সুসানস্স সমীপে। ‘‘অকামা ভাগং দাতু’’ন্তি ৰচনস্স অনেকন্তভাৰং দস্সেতুং ৰুত্তং ‘‘যদি পনা’’তিআদি। ইধাতি ইমং সুসানং। ‘‘সম্পত্তা গণ্হন্তূ’’তি দেন্তীতি যোজনা। যেনাতি ভিক্খুনা। সদিসা ওক্কমিংসূতি এত্থ সদিসসদ্দো সমপরিযাযোতি আহ ‘‘সমং ওক্কমিংসূ’’তি। সমন্তি ভাৰনপুংসকো। সমানদিসাযাতি ৰা দস্সেন্তো আহ ‘‘একদিসায ৰা’’তি। এত্থ পন যকারলোপো দট্ঠব্বো। বহিমেৰাতি সুসানতো বহি এৰ। কতিকন্তি কতেন পৰত্তং সঙ্গরং।
340.Teti bhikkhū, sallakkhiṃsu kirāti sambandho. Etassāti padassa, atthanti sambandho. Na acchiṃsūti na āsiṃsu, na vasiṃsūti attho. Nākāmāti ettha kamudhātu icchattho yakāralopoti āha ‘‘na anicchāyā’’ti. Dātabboti bhāgo dātabbo. Upacāreti susānassa samīpe. ‘‘Akāmā bhāgaṃ dātu’’nti vacanassa anekantabhāvaṃ dassetuṃ vuttaṃ ‘‘yadi panā’’tiādi. Idhāti imaṃ susānaṃ. ‘‘Sampattā gaṇhantū’’ti dentīti yojanā. Yenāti bhikkhunā. Sadisā okkamiṃsūti ettha sadisasaddo samapariyāyoti āha ‘‘samaṃ okkamiṃsū’’ti. Samanti bhāvanapuṃsako. Samānadisāyāti vā dassento āha ‘‘ekadisāya vā’’ti. Ettha pana yakāralopo daṭṭhabbo. Bahimevāti susānato bahi eva. Katikanti katena pavattaṃ saṅgaraṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২১১. কম্বলানুজাননাদিকথা • 211. Kambalānujānanādikathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / কম্বলানুজাননাদিকথা • Kambalānujānanādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / কম্বলানুজাননাদিকথাৰণ্ণনা • Kambalānujānanādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ভণ্ডাগারসম্মুতিআদিকথাৰণ্ণনা • Bhaṇḍāgārasammutiādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / জীৰকৰত্থুকথাদিৰণ্ণনা • Jīvakavatthukathādivaṇṇanā
