| Library / Tipiṭaka / තිපිටක • Tipiṭaka / මහාවග්‌ග-අට්‌ඨකථා • Mahāvagga-aṭṭhakathā |
කම්‌බලානුජානනාදිකථා
Kambalānujānanādikathā
338. කාසිරාජාති කාසීනං රාජා; පසෙනදිස්‌ස එකපිතිකභාතා එස. අඩ්‌ඪකාසියන්‌ති එත්‌ථ කාසීති සහස්‌සං වුච්‌චති තං අග්‌ඝනකො කාසියො . අයං පන පඤ්‌චසතානි අග්‌ඝති, තස්‌මා ‘‘අඩ්‌ඪකාසියො’’ති වුත්‌තො. තෙනෙවාහ – ‘‘උපඩ්‌ඪකාසීනං ඛමමාන’’න්‌ති.
338.Kāsirājāti kāsīnaṃ rājā; pasenadissa ekapitikabhātā esa. Aḍḍhakāsiyanti ettha kāsīti sahassaṃ vuccati taṃ agghanako kāsiyo . Ayaṃ pana pañcasatāni agghati, tasmā ‘‘aḍḍhakāsiyo’’ti vutto. Tenevāha – ‘‘upaḍḍhakāsīnaṃ khamamāna’’nti.
339. උච්‌චාවචානීති සුන්‌දරානි ච අසුන්‌දරානි ච. භඞ්‌ගං නාම ඛොමාදීහි පඤ්‌චහි සුත්‌තෙහි මිස්‌සෙත්‌වා කතං; වාකමයමෙවාතිපි වදන්‌ති.
339.Uccāvacānīti sundarāni ca asundarāni ca. Bhaṅgaṃ nāma khomādīhi pañcahi suttehi missetvā kataṃ; vākamayamevātipi vadanti.
340. එකංයෙව භගවතා චීවරං අනුඤ්‌ඤාතං න ද්‌වෙති තෙ කිර ඉතරීතරෙන චීවරෙනාති එතස්‌ස ‘‘ගහපතිකෙන වා පංසුකූලෙන වා’’ති එවං අත්‌ථං සල්‌ලක්‌ඛිංසු. නාගමෙසුන්‌ති යාව තෙ සුසානතො ආගච්‌ඡන්‌ති, තාව තෙ න අච්‌ඡිංසු; පක්‌කමිංසුයෙව. නාකාමා භාගං දාතුන්‌ති න අනිච්‌ඡාය දාතුං; යදි පන ඉච්‌ඡන්‌ති, දාතබ්‌බො. ආගමෙසුන්‌ති උපචාරෙ අච්‌ඡිංසු. තෙනාහ භගවා ආහ – ‘‘අනුජානාමි භික්‌ඛවෙ ආගමෙන්‌තානං අකාමා භාගං දාතු’’න්‌ති. යදි පන මනුස්‌සා ‘‘ඉධාගතා එව ගණ්‌හන්‌තූ’’ති දෙන්‌ති, සඤ්‌ඤාණං වා කත්‌වා ගච්‌ඡන්‌ති ‘‘සම්‌පත්‌තා ගණ්‌හන්‌තූ’’ති සම්‌පත්‌තානං සබ්‌බෙසම්‌පි පාපුණන්‌ති. සචෙ ඡඩ්‌ඩෙත්‌වා ගතා, යෙන ගහිතං, සො එව සාමී. සදිසා සුසානං ඔක්‌කමිංසූති සබ්‌බෙ සමං ඔක්‌කමිංසු; එකදිසාය වා ඔක්‌කමිංසූතිපි අත්‌ථො. තෙ කතිකං කත්‌වාති ලද්‌ධං පංසුකූලං සබ්‌බෙ භාජෙත්‌වා ගණ්‌හිස්‌සාමාති බහිමෙව කතිකං කත්‌වා.
340.Ekaṃyeva bhagavatā cīvaraṃ anuññātaṃ na dveti te kira itarītarena cīvarenāti etassa ‘‘gahapatikena vā paṃsukūlena vā’’ti evaṃ atthaṃ sallakkhiṃsu. Nāgamesunti yāva te susānato āgacchanti, tāva te na acchiṃsu; pakkamiṃsuyeva. Nākāmā bhāgaṃ dātunti na anicchāya dātuṃ; yadi pana icchanti, dātabbo. Āgamesunti upacāre acchiṃsu. Tenāha bhagavā āha – ‘‘anujānāmi bhikkhave āgamentānaṃ akāmā bhāgaṃ dātu’’nti. Yadi pana manussā ‘‘idhāgatā eva gaṇhantū’’ti denti, saññāṇaṃ vā katvā gacchanti ‘‘sampattā gaṇhantū’’ti sampattānaṃ sabbesampi pāpuṇanti. Sace chaḍḍetvā gatā, yena gahitaṃ, so eva sāmī. Sadisā susānaṃ okkamiṃsūti sabbe samaṃ okkamiṃsu; ekadisāya vā okkamiṃsūtipi attho. Te katikaṃ katvāti laddhaṃ paṃsukūlaṃ sabbe bhājetvā gaṇhissāmāti bahimeva katikaṃ katvā.
342. චීවරපටිග්‌ගාහකන්‌ති යො ගහපතිකෙහි සඞ්‌ඝස්‌ස දීයමානං චීවරං ගණ්‌හාති. යො න ඡන්‌දාගතිං ගච්‌ඡෙය්‍යාතිආදීසු චීවරපටිග්‌ගාහකෙසු පච්‌ඡා ආගතානම්‌පි අත්‌තනො ඤාතකාදීනං පඨමතරං පටිග්‌ගණ්‌හන්‌තො වා එකච්‌චස්‌මිං පෙමං දස්‌සෙත්‌වා ගණ්‌හන්‌තො වා ලොභපකතිකතාය අත්‌තනො පරිණාමෙන්‌තො වා ඡන්‌දාගතිං ගච්‌ඡති නාම. පඨමතරං ආගතස්‌සාපි කොධවසෙන පච්‌ඡා ගණ්‌හන්‌තො වා දුග්‌ගතමනුස්‌සෙසු අවමඤ්‌ඤං කත්‌වා ගණ්‌හන්‌තො වා ‘‘කිං වො ඝරෙ ඨපනොකාසො නත්‌ථි, තුම්‌හාකං සන්‌තකං ගහෙත්‌වා ගච්‌ඡථා’’ති එවං සඞ්‌ඝස්‌ස ලාභන්‌තරායං කරොන්‌තො වා දොසාගතිං ගච්‌ඡති නාම. යො පන මුට්‌ඨස්‌සති අසම්‌පජානො, අයං මොහාගතිං ගච්‌ඡති නාම. පච්‌ඡා ආගතානම්‌පි ඉස්‌සරානම්‌පි භයෙන පඨමතරං පටිග්‌ගණ්‌හන්‌තො වා ‘‘චීවරපටිග්‌ගාහකට්‌ඨානං නාමෙතං භාරිය’’න්‌ති සන්‌තසන්‌තො වා භයාගතිං ගච්‌ඡති නාම. ‘‘මයා ඉදඤ්‌චිදඤ්‌ච ගහිතං, ඉදඤ්‌චිංදඤ්‌ච න ගහිත’’න්‌ති එවං ජානන්‌තො ගහිතාගහිතං ජානාති නාම. තස්‌මා යො න ඡන්‌දාගතිආදිවසෙන ගච්‌ඡති, ඤාතකඅඤ්‌ඤාතකඅඩ්‌ඪදුග්‌ගතෙසු විසෙසං අකත්‌වා ආගතපඅපාටියා ගණ්‌හාති, සීලාචාරපටිපත්‌තියුත්‌තො හොති, සතිමා මෙධාවී බහුස්‌සුතො, සක්‌කොති දායකානං විස්‌සට්‌ඨවාචාය පරිමණ්‌ඩලෙහි පදබ්‍යඤ්‌ජනෙහි අනුමොදනං කරොන්‌තො පසාදං ජනෙතුං, එවරූපො සම්‌මන්‌නිතබ්‌බො.
342. Cīvarapaṭiggāhakanti yo gahapatikehi saṅghassa dīyamānaṃ cīvaraṃ gaṇhāti. Yo na chandāgatiṃ gaccheyyātiādīsu cīvarapaṭiggāhakesu pacchā āgatānampi attano ñātakādīnaṃ paṭhamataraṃ paṭiggaṇhanto vā ekaccasmiṃ pemaṃ dassetvā gaṇhanto vā lobhapakatikatāya attano pariṇāmento vā chandāgatiṃ gacchati nāma. Paṭhamataraṃ āgatassāpi kodhavasena pacchā gaṇhanto vā duggatamanussesu avamaññaṃ katvā gaṇhanto vā ‘‘kiṃ vo ghare ṭhapanokāso natthi, tumhākaṃ santakaṃ gahetvā gacchathā’’ti evaṃ saṅghassa lābhantarāyaṃ karonto vā dosāgatiṃ gacchati nāma. Yo pana muṭṭhassati asampajāno, ayaṃ mohāgatiṃ gacchati nāma. Pacchā āgatānampi issarānampi bhayena paṭhamataraṃ paṭiggaṇhanto vā ‘‘cīvarapaṭiggāhakaṭṭhānaṃ nāmetaṃ bhāriya’’nti santasanto vā bhayāgatiṃ gacchati nāma. ‘‘Mayā idañcidañca gahitaṃ, idañciṃdañca na gahita’’nti evaṃ jānanto gahitāgahitaṃ jānāti nāma. Tasmā yo na chandāgatiādivasena gacchati, ñātakaaññātakaaḍḍhaduggatesu visesaṃ akatvā āgatapaapāṭiyā gaṇhāti, sīlācārapaṭipattiyutto hoti, satimā medhāvī bahussuto, sakkoti dāyakānaṃ vissaṭṭhavācāya parimaṇḍalehi padabyañjanehi anumodanaṃ karonto pasādaṃ janetuṃ, evarūpo sammannitabbo.
එවඤ්‌ච පන භික්‌ඛවෙ සම්‌මන්‌නිතබ්‌බොති එත්‌ථ පන එතාය යථාවුත්‌තාය කම්‌මවාචායපි අපලොකනෙනාපි අන්‌තොවිහාරෙ සබ්‌බසඞ්‌ඝමජ්‌ඣෙපි ඛණ්‌ඩසීමායපි සම්‌මන්‌නිතුං වට්‌ටතියෙව. එවං සම්‌මතෙන ච විහාරපච්‌චන්‌තෙ වා පධානඝරෙ වා න අච්‌ඡිතබ්‌බං. යත්‌ථ පන ආගතාගතා මනුස්‌සා සුඛං පස්‌සන්‌ති, තාදිසෙ ධුරවිහාරට්‌ඨානෙ බීජනිං පස්‌සෙ ඨපෙත්‌වා සුනිවත්‌ථෙන සුපාරුතෙන නිසීදිතබ්‌බන්‌ති.
Evañca pana bhikkhave sammannitabboti ettha pana etāya yathāvuttāya kammavācāyapi apalokanenāpi antovihāre sabbasaṅghamajjhepi khaṇḍasīmāyapi sammannituṃ vaṭṭatiyeva. Evaṃ sammatena ca vihārapaccante vā padhānaghare vā na acchitabbaṃ. Yattha pana āgatāgatā manussā sukhaṃ passanti, tādise dhuravihāraṭṭhāne bījaniṃ passe ṭhapetvā sunivatthena supārutena nisīditabbanti.
තත්‌ථෙව උජ්‌ඣිත්‌වාති ‘‘පටිග්‌ගහණමෙව අම්‌හාකං භාරො’’ති වත්‌වා ගහිතට්‌ඨානෙයෙව ඡඩ්‌ඩෙත්‌වා ගච්‌ඡන්‌ති. චීවරනිදහකන්‌ති චීවරපටිසාමකං. යො න ඡන්‌දාගතිං ගච්‌ඡෙය්‍යාතිආදීසු චෙත්‌ථ ඉතො පරඤ්‌ච සබ්‌බත්‌ථ වුත්‌තනයෙනෙව විනිච්‌ඡයො වෙදිතබ්‌බො. සම්‌මුතිවිනිච්‌ඡයොපි කථිතානුසාරෙනෙව ජානිතබ්‌බො.
Tattheva ujjhitvāti ‘‘paṭiggahaṇameva amhākaṃ bhāro’’ti vatvā gahitaṭṭhāneyeva chaḍḍetvā gacchanti. Cīvaranidahakanti cīvarapaṭisāmakaṃ. Yo na chandāgatiṃ gaccheyyātiādīsu cettha ito parañca sabbattha vuttanayeneva vinicchayo veditabbo. Sammutivinicchayopi kathitānusāreneva jānitabbo.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
211. කම්‌බලානුජානනාදිකථා • 211. Kambalānujānanādikathā
213. චීවරපටිග්‌ගාහකසම්‌මුතිකථා • 213. Cīvarapaṭiggāhakasammutikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā
කම්‌බලානුජානනාදිකථාවණ්‌ණනා • Kambalānujānanādikathāvaṇṇanā
චීවරපටිග්‌ගාහකසම්‌මුතිආදිකථාවණ්‌ණනා • Cīvarapaṭiggāhakasammutiādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / භණ්‌ඩාගාරසම්‌මුතිආදිකථාවණ්‌ණනා • Bhaṇḍāgārasammutiādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ජීවකවත්‌ථුකථාදිවණ්‌ණනා • Jīvakavatthukathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi
211. කම්‌බලානුජානනාදිකථා • 211. Kambalānujānanādikathā
213. චීවරපටිග්‌ගාහකසම්‌මුතිකථා • 213. Cīvarapaṭiggāhakasammutikathā
