| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
८. अट्ठमवग्गो
8. Aṭṭhamavaggo
(८३) ११. कम्महेतुकथा
(83) 11. Kammahetukathā
५४६. कम्महेतु अरहा अरहत्ता परिहायतीति? आमन्ता। कम्महेतु सोतापन्नो सोतापत्तिफला परिहायतीति? न हेवं वत्तब्बे…पे॰… कम्महेतु अरहा अरहत्ता परिहायतीति? आमन्ता। कम्महेतु सकदागामी…पे॰… अनागामी अनागामिफला परिहायतीति? न हेवं वत्तब्बे…पे॰…।
546. Kammahetu arahā arahattā parihāyatīti? Āmantā. Kammahetu sotāpanno sotāpattiphalā parihāyatīti? Na hevaṃ vattabbe…pe… kammahetu arahā arahattā parihāyatīti? Āmantā. Kammahetu sakadāgāmī…pe… anāgāmī anāgāmiphalā parihāyatīti? Na hevaṃ vattabbe…pe….
कम्महेतु सोतापन्नो सोतापत्तिफला न परिहायतीति? आमन्ता। कम्महेतु अरहा अरहत्ता न परिहायतीति? न हेवं वत्तब्बे …पे॰… कम्महेतु सकदागामी…पे॰… अनागामी अनागामिफला न परिहायतीति? आमन्ता। कम्महेतु अरहा अरहत्ता न परिहायतीति? न हेवं वत्तब्बे…पे॰…।
Kammahetu sotāpanno sotāpattiphalā na parihāyatīti? Āmantā. Kammahetu arahā arahattā na parihāyatīti? Na hevaṃ vattabbe …pe… kammahetu sakadāgāmī…pe… anāgāmī anāgāmiphalā na parihāyatīti? Āmantā. Kammahetu arahā arahattā na parihāyatīti? Na hevaṃ vattabbe…pe….
कम्महेतु अरहा अरहत्ता परिहायतीति? आमन्ता। पाणातिपातकम्मस्स हेतूति? न हेवं वत्तब्बे…पे॰… अदिन्नादानकम्मस्स हेतु…पे॰… कामेसुमिच्छाचारकम्मस्स हेतु… मुसावादकम्मस्स हेतु… पिसुणवाचाकम्मस्स हेतु… फरुसवाचाकम्मस्स हेतु… सम्फप्पलापकम्मस्स हेतु… मातुघातकम्मस्स 1 हेतु… पितुघातकम्मस्स हेतु… अरहन्तघातकम्मस्स हेतु… रुहिरुप्पादकम्मस्स हेतु…पे॰… सङ्घभेदकम्मस्स हेतूति? न हेवं वत्तब्बे…पे॰…।
Kammahetu arahā arahattā parihāyatīti? Āmantā. Pāṇātipātakammassa hetūti? Na hevaṃ vattabbe…pe… adinnādānakammassa hetu…pe… kāmesumicchācārakammassa hetu… musāvādakammassa hetu… pisuṇavācākammassa hetu… pharusavācākammassa hetu… samphappalāpakammassa hetu… mātughātakammassa 2 hetu… pitughātakammassa hetu… arahantaghātakammassa hetu… ruhiruppādakammassa hetu…pe… saṅghabhedakammassa hetūti? Na hevaṃ vattabbe…pe….
कतमस्स कम्मस्स हेतूति? हन्द हि अरहन्तानं अब्भाचिक्खतीति। अरहन्तानं अब्भाचिक्खनकम्मस्स हेतु अरहा अरहत्ता परिहायतीति? आमन्ता। ये केचि अरहन्तानं अब्भाचिक्खन्ति, सब्बे ते अरहत्तं सच्छिकरोन्तीति? न हेवं वत्तब्बे…पे॰…।
Katamassa kammassa hetūti? Handa hi arahantānaṃ abbhācikkhatīti. Arahantānaṃ abbhācikkhanakammassa hetu arahā arahattā parihāyatīti? Āmantā. Ye keci arahantānaṃ abbhācikkhanti, sabbe te arahattaṃ sacchikarontīti? Na hevaṃ vattabbe…pe….
कम्महेतुकथा निट्ठिता।
Kammahetukathā niṭṭhitā.
अट्ठमवग्गो।
Aṭṭhamavaggo.
तस्सुद्दानं –
Tassuddānaṃ –
छ गतियो, अन्तराभवो, पञ्चेव कामगुणा कामधातु, पञ्चेव आयतना कामा, रूपिनो धम्मा रूपधातु, अरूपिनो धम्मा अरूपधातु, सळायतनिको अत्तभावो रूपधातुया, अत्थि रूपं अरूपेसु, रूपं कम्मं, रूपं जीवितं, कम्महेतुका परिहायतीति।
Cha gatiyo, antarābhavo, pañceva kāmaguṇā kāmadhātu, pañceva āyatanā kāmā, rūpino dhammā rūpadhātu, arūpino dhammā arūpadhātu, saḷāyataniko attabhāvo rūpadhātuyā, atthi rūpaṃ arūpesu, rūpaṃ kammaṃ, rūpaṃ jīvitaṃ, kammahetukā parihāyatīti.
Footnotes:
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ११. कम्महेतुकथावण्णना • 11. Kammahetukathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ११. कम्महेतुकथावण्णना • 11. Kammahetukathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ११. कम्महेतुकथावण्णना • 11. Kammahetukathāvaṇṇanā
