| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
6. கம்மஜாதி³பஞ்ஹோ
6. Kammajādipañho
6. ‘‘ப⁴ந்தே நாக³ஸேன, கதமே எத்த² கம்மஜா, கதமே ஹேதுஜா, கதமே உதுஜா, கதமே ந கம்மஜா, ந ஹேதுஜா, ந உதுஜா’’தி? ‘‘யே கேசி, மஹாராஜ, ஸத்தா ஸசேதனா, ஸப்³பே³ தே கம்மஜா; அக்³கி³ ச ஸப்³பா³னி ச பீ³ஜஜாதானி ஹேதுஜானி; பத²வீ ச பப்³ப³தா ச உத³கஞ்ச வாதோ ச, ஸப்³பே³ தே உதுஜா; ஆகாஸோ ச நிப்³பா³னஞ்ச இமே த்³வே அகம்மஜா அஹேதுஜா அனுதுஜா. நிப்³பா³னங் பன, மஹாராஜ, ந வத்தப்³ப³ங் கம்மஜந்தி வா ஹேதுஜந்தி வா உதுஜந்தி வா உப்பன்னந்தி வா அனுப்பன்னந்தி வா உப்பாத³னீயந்தி வா அதீதந்தி வா அனாக³தந்தி வா பச்சுப்பன்னந்தி வா சக்கு²விஞ்ஞெய்யந்தி வா ஸோதவிஞ்ஞெய்யந்தி வா கா⁴னவிஞ்ஞெய்யந்தி வா ஜிவ்ஹாவிஞ்ஞெய்யந்தி வா காயவிஞ்ஞெய்யந்தி வா, அபி ச, மஹாராஜ, மனோவிஞ்ஞெய்யங் நிப்³பா³னங், யங் ஸோ ஸம்மாபடிபன்னோ அரியஸாவகோ விஸுத்³தே⁴ன ஞாணேன பஸ்ஸதீ’’தி. ‘‘ரமணீயோ, ப⁴ந்தே நாக³ஸேன, பஞ்ஹோ ஸுவினிச்சி²தோ நிஸ்ஸங்ஸயோ ஏகந்தக³தோ, விமதி உப்பச்சி²ன்னா, த்வங் க³ணிவரபவரமாஸஜ்ஜா’’தி.
6. ‘‘Bhante nāgasena, katame ettha kammajā, katame hetujā, katame utujā, katame na kammajā, na hetujā, na utujā’’ti? ‘‘Ye keci, mahārāja, sattā sacetanā, sabbe te kammajā; aggi ca sabbāni ca bījajātāni hetujāni; pathavī ca pabbatā ca udakañca vāto ca, sabbe te utujā; ākāso ca nibbānañca ime dve akammajā ahetujā anutujā. Nibbānaṃ pana, mahārāja, na vattabbaṃ kammajanti vā hetujanti vā utujanti vā uppannanti vā anuppannanti vā uppādanīyanti vā atītanti vā anāgatanti vā paccuppannanti vā cakkhuviññeyyanti vā sotaviññeyyanti vā ghānaviññeyyanti vā jivhāviññeyyanti vā kāyaviññeyyanti vā, api ca, mahārāja, manoviññeyyaṃ nibbānaṃ, yaṃ so sammāpaṭipanno ariyasāvako visuddhena ñāṇena passatī’’ti. ‘‘Ramaṇīyo, bhante nāgasena, pañho suvinicchito nissaṃsayo ekantagato, vimati uppacchinnā, tvaṃ gaṇivarapavaramāsajjā’’ti.
கம்மஜாதி³பஞ்ஹோ ச²ட்டோ².
Kammajādipañho chaṭṭho.
