| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၆. ကမ္မဇာဒိပဉ္ဟော
6. Kammajādipañho
၆. ‘‘ဘန္တေ နာဂသေန, ကတမေ ဧတ္ထ ကမ္မဇာ, ကတမေ ဟေတုဇာ, ကတမေ ဥတုဇာ, ကတမေ န ကမ္မဇာ, န ဟေတုဇာ, န ဥတုဇာ’’တိ? ‘‘ယေ ကေစိ, မဟာရာဇ, သတ္တာ သစေတနာ, သဗ္ဗေ တေ ကမ္မဇာ; အဂ္ဂိ စ သဗ္ဗာနိ စ ဗီဇဇာတာနိ ဟေတုဇာနိ; ပထဝီ စ ပဗ္ဗတာ စ ဥဒကဉ္စ ဝာတော စ, သဗ္ဗေ တေ ဥတုဇာ; အာကာသော စ နိဗ္ဗာနဉ္စ ဣမေ ဒ္ဝေ အကမ္မဇာ အဟေတုဇာ အနုတုဇာ။ နိဗ္ဗာနံ ပန, မဟာရာဇ, န ဝတ္တဗ္ဗံ ကမ္မဇန္တိ ဝာ ဟေတုဇန္တိ ဝာ ဥတုဇန္တိ ဝာ ဥပ္ပန္နန္တိ ဝာ အနုပ္ပန္နန္တိ ဝာ ဥပ္ပာဒနီယန္တိ ဝာ အတီတန္တိ ဝာ အနာဂတန္တိ ဝာ ပစ္စုပ္ပန္နန္တိ ဝာ စက္ခုဝိညေယ္ယန္တိ ဝာ သောတဝိညေယ္ယန္တိ ဝာ ဃာနဝိညေယ္ယန္တိ ဝာ ဇိဝ္ဟာဝိညေယ္ယန္တိ ဝာ ကာယဝိညေယ္ယန္တိ ဝာ, အပိ စ, မဟာရာဇ, မနောဝိညေယ္ယံ နိဗ္ဗာနံ, ယံ သော သမ္မာပဋိပန္နော အရိယသာဝကော ဝိသုဒ္ဓေန ဉာဏေန ပသ္သတီ’’တိ။ ‘‘ရမဏီယော, ဘန္တေ နာဂသေန, ပဉ္ဟော သုဝိနိစ္ဆိတော နိသ္သံသယော ဧကန္တဂတော, ဝိမတိ ဥပ္ပစ္ဆိန္နာ, တ္ဝံ ဂဏိဝရပဝရမာသဇ္ဇာ’’တိ။
6. ‘‘Bhante nāgasena, katame ettha kammajā, katame hetujā, katame utujā, katame na kammajā, na hetujā, na utujā’’ti? ‘‘Ye keci, mahārāja, sattā sacetanā, sabbe te kammajā; aggi ca sabbāni ca bījajātāni hetujāni; pathavī ca pabbatā ca udakañca vāto ca, sabbe te utujā; ākāso ca nibbānañca ime dve akammajā ahetujā anutujā. Nibbānaṃ pana, mahārāja, na vattabbaṃ kammajanti vā hetujanti vā utujanti vā uppannanti vā anuppannanti vā uppādanīyanti vā atītanti vā anāgatanti vā paccuppannanti vā cakkhuviññeyyanti vā sotaviññeyyanti vā ghānaviññeyyanti vā jivhāviññeyyanti vā kāyaviññeyyanti vā, api ca, mahārāja, manoviññeyyaṃ nibbānaṃ, yaṃ so sammāpaṭipanno ariyasāvako visuddhena ñāṇena passatī’’ti. ‘‘Ramaṇīyo, bhante nāgasena, pañho suvinicchito nissaṃsayo ekantagato, vimati uppacchinnā, tvaṃ gaṇivarapavaramāsajjā’’ti.
ကမ္မဇာဒိပဉ္ဟော ဆဋ္ဌော။
Kammajādipañho chaṭṭho.
