| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༦. ཀམྨཛཱདིཔཉྷོ
6. Kammajādipañho
༦. ‘‘བྷནྟེ ནཱགསེན, ཀཏམེ ཨེཏྠ ཀམྨཛཱ, ཀཏམེ ཧེཏུཛཱ, ཀཏམེ ཨུཏུཛཱ, ཀཏམེ ན ཀམྨཛཱ, ན ཧེཏུཛཱ, ན ཨུཏུཛཱ’’ཏི? ‘‘ཡེ ཀེཙི, མཧཱརཱཛ, སཏྟཱ སཙེཏནཱ, སབྦེ ཏེ ཀམྨཛཱ; ཨགྒི ཙ སབྦཱནི ཙ བཱིཛཛཱཏཱནི ཧེཏུཛཱནི; པཐཝཱི ཙ པབྦཏཱ ཙ ཨུདཀཉྩ ཝཱཏོ ཙ, སབྦེ ཏེ ཨུཏུཛཱ; ཨཱཀཱསོ ཙ ནིབྦཱནཉྩ ཨིམེ དྭེ ཨཀམྨཛཱ ཨཧེཏུཛཱ ཨནུཏུཛཱ། ནིབྦཱནཾ པན, མཧཱརཱཛ, ན ཝཏྟབྦཾ ཀམྨཛནྟི ཝཱ ཧེཏུཛནྟི ཝཱ ཨུཏུཛནྟི ཝཱ ཨུཔྤནྣནྟི ཝཱ ཨནུཔྤནྣནྟི ཝཱ ཨུཔྤཱདནཱིཡནྟི ཝཱ ཨཏཱིཏནྟི ཝཱ ཨནཱགཏནྟི ཝཱ པཙྩུཔྤནྣནྟི ཝཱ ཙཀྑུཝིཉྙེཡྻནྟི ཝཱ སོཏཝིཉྙེཡྻནྟི ཝཱ གྷཱནཝིཉྙེཡྻནྟི ཝཱ ཛིཝ྄ཧཱཝིཉྙེཡྻནྟི ཝཱ ཀཱཡཝིཉྙེཡྻནྟི ཝཱ, ཨཔི ཙ, མཧཱརཱཛ, མནོཝིཉྙེཡྻཾ ནིབྦཱནཾ, ཡཾ སོ སམྨཱཔཊིཔནྣོ ཨརིཡསཱཝཀོ ཝིསུདྡྷེན ཉཱཎེན པསྶཏཱི’’ཏི། ‘‘རམཎཱིཡོ, བྷནྟེ ནཱགསེན, པཉྷོ སུཝིནིཙྪིཏོ ནིསྶཾསཡོ ཨེཀནྟགཏོ, ཝིམཏི ཨུཔྤཙྪིནྣཱ, ཏྭཾ གཎིཝརཔཝརམཱསཛྫཱ’’ཏི།
6. ‘‘Bhante nāgasena, katame ettha kammajā, katame hetujā, katame utujā, katame na kammajā, na hetujā, na utujā’’ti? ‘‘Ye keci, mahārāja, sattā sacetanā, sabbe te kammajā; aggi ca sabbāni ca bījajātāni hetujāni; pathavī ca pabbatā ca udakañca vāto ca, sabbe te utujā; ākāso ca nibbānañca ime dve akammajā ahetujā anutujā. Nibbānaṃ pana, mahārāja, na vattabbaṃ kammajanti vā hetujanti vā utujanti vā uppannanti vā anuppannanti vā uppādanīyanti vā atītanti vā anāgatanti vā paccuppannanti vā cakkhuviññeyyanti vā sotaviññeyyanti vā ghānaviññeyyanti vā jivhāviññeyyanti vā kāyaviññeyyanti vā, api ca, mahārāja, manoviññeyyaṃ nibbānaṃ, yaṃ so sammāpaṭipanno ariyasāvako visuddhena ñāṇena passatī’’ti. ‘‘Ramaṇīyo, bhante nāgasena, pañho suvinicchito nissaṃsayo ekantagato, vimati uppacchinnā, tvaṃ gaṇivarapavaramāsajjā’’ti.
ཀམྨཛཱདིཔཉྷོ ཚཊྛོ།
Kammajādipañho chaṭṭho.
