| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
9. කම්‌මකාරඞ්‌ගපඤ්‌හො
9. Kammakāraṅgapañho
9. ‘‘භන්‌තෙ නාගසෙන, ‘කම්‌මකාරස්‌ස එකං අඞ්‌ගං ගහෙතබ්‌බ’න්‌ති යං වදෙසි, කතමං තං එකං අඞ්‌ගං ගහෙතබ්‌බ’’න්‌ති? ‘‘යථා, මහාරාජ, කම්‌මකාරො එවං චින්‌තයති ‘භතකො අහං ඉමාය නාවාය කම්‌මං කරොමි, ඉමායාහං නාවාය වාහසා භත්‌තවෙතනං ලභාමි, න මෙ පමාදො කරණීයො, අප්‌පමාදෙන මෙ අයං නාවා වාහෙතබ්‌බා’ති, එවමෙව ඛො, මහාරාජ, යොගිනා යොගාවචරෙන එවං චින්‌තයිතබ්‌බං ‘ඉමං ඛො අහං චාතුමහාභූතිකං කායං සම්‌මසන්‌තො සතතං සමිතං අප්‌පමත්‌තො උපට්‌ඨිතස්‌සති සතො සම්‌පජානො සමාහිතො එකග්‌ගචිත්‌තො ජාතිජරාබ්‍යාධිමරණසොකපරිදෙවදුක්‌ඛදොමනස්‌සුපායාසෙහි පරිමුච්‌චිස්‌සාමීති අප්‌පමාදො මෙ කරණීයො’ති, ඉදං, මහාරාජ, කම්‌මකාරස්‌ස එකං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන සාරිපුත්‌තෙන ධම්‌මසෙනාපතිනා –
9. ‘‘Bhante nāgasena, ‘kammakārassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, kammakāro evaṃ cintayati ‘bhatako ahaṃ imāya nāvāya kammaṃ karomi, imāyāhaṃ nāvāya vāhasā bhattavetanaṃ labhāmi, na me pamādo karaṇīyo, appamādena me ayaṃ nāvā vāhetabbā’ti, evameva kho, mahārāja, yoginā yogāvacarena evaṃ cintayitabbaṃ ‘imaṃ kho ahaṃ cātumahābhūtikaṃ kāyaṃ sammasanto satataṃ samitaṃ appamatto upaṭṭhitassati sato sampajāno samāhito ekaggacitto jātijarābyādhimaraṇasokaparidevadukkhadomanassupāyāsehi parimuccissāmīti appamādo me karaṇīyo’ti, idaṃ, mahārāja, kammakārassa ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘කායං ඉමං සම්‌මසථ, පරිජානාථ පුනප්‌පුනං;
‘‘‘Kāyaṃ imaṃ sammasatha, parijānātha punappunaṃ;
කායෙ සභාවං දිස්‌වාන, දුක්‌ඛස්‌සන්‌තං කරිස්‌සථා’ති.
Kāye sabhāvaṃ disvāna, dukkhassantaṃ karissathā’ti.
කම්‌මකාරඞ්‌ගපඤ්‌හො නවමො.
Kammakāraṅgapañho navamo.
