| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
২১. একৰীসতিমৰগ্গো
21. Ekavīsatimavaggo
(২০৭) ৮. কম্মকথা
(207) 8. Kammakathā
৮৮৯. সব্বে কম্মা নিযতাতি? আমন্তা। মিচ্ছত্তনিযতাতি? ন হেৰং ৰত্তব্বে…পে॰… সম্মত্তনিযতাতি? ন হেৰং ৰত্তব্বে…পে॰… নত্থি অনিযতো রাসীতি? ন হেৰং ৰত্তব্বে…পে॰… ননু অত্থি অনিযতো রাসীতি? আমন্তা। হঞ্চি অত্থি অনিযতো রাসি, নো চ ৰত রে ৰত্তব্বে – ‘‘সব্বে কম্মা নিযতা’’তি।
889. Sabbe kammā niyatāti? Āmantā. Micchattaniyatāti? Na hevaṃ vattabbe…pe… sammattaniyatāti? Na hevaṃ vattabbe…pe… natthi aniyato rāsīti? Na hevaṃ vattabbe…pe… nanu atthi aniyato rāsīti? Āmantā. Hañci atthi aniyato rāsi, no ca vata re vattabbe – ‘‘sabbe kammā niyatā’’ti.
সব্বে কম্মা নিযতাতি? আমন্তা। ননু তযো রাসী ৰুত্তা ভগৰতা – মিচ্ছত্তনিযতো রাসি, সম্মত্তনিযতো রাসি, অনিযতো রাসীতি? আমন্তা। হঞ্চি তযো রাসী ৰুত্তা ভগৰতা – মিচ্ছত্তনিযতো রাসি, সম্মত্তনিযতো রাসি, অনিযতো রাসি, নো চ ৰত রে ৰত্তব্বে – ‘‘সব্বে কম্মা নিযতা’’তি।
Sabbe kammā niyatāti? Āmantā. Nanu tayo rāsī vuttā bhagavatā – micchattaniyato rāsi, sammattaniyato rāsi, aniyato rāsīti? Āmantā. Hañci tayo rāsī vuttā bhagavatā – micchattaniyato rāsi, sammattaniyato rāsi, aniyato rāsi, no ca vata re vattabbe – ‘‘sabbe kammā niyatā’’ti.
৮৯০. দিট্ঠধম্মৰেদনীযং কম্মং দিট্ঠধম্মৰেদনীযট্ঠেন নিযতন্তি? আমন্তা। মিচ্ছত্তনিযতন্তি? ন হেৰং ৰত্তব্বে…পে॰… সম্মত্তনিযতন্তি? ন হেৰং ৰত্তব্বে…পে॰…। উপপজ্জৰেদনীযং কম্মং…পে॰… অপরাপরিযৰেদনীযং কম্মং অপরাপরিযৰেদনীযট্ঠেন নিযতন্তি? আমন্তা। মিচ্ছত্তনিযতন্তি? ন হেৰং ৰত্তব্বে…পে॰… সম্মত্তনিযতন্তি? ন হেৰং ৰত্তব্বে…পে॰…।
890. Diṭṭhadhammavedanīyaṃ kammaṃ diṭṭhadhammavedanīyaṭṭhena niyatanti? Āmantā. Micchattaniyatanti? Na hevaṃ vattabbe…pe… sammattaniyatanti? Na hevaṃ vattabbe…pe…. Upapajjavedanīyaṃ kammaṃ…pe… aparāpariyavedanīyaṃ kammaṃ aparāpariyavedanīyaṭṭhena niyatanti? Āmantā. Micchattaniyatanti? Na hevaṃ vattabbe…pe… sammattaniyatanti? Na hevaṃ vattabbe…pe….
৮৯১. ন ৰত্তব্বং – দিট্ঠধম্মৰেদনীযং কম্মং দিট্ঠধম্মৰেদনীযট্ঠেন নিযতং, উপপজ্জৰেদনীযং কম্মং…পে॰… অপরাপরিযৰেদনীযং কম্মং অপরাপরিযৰেদনীযট্ঠেন নিযতন্তি? আমন্তা। দিট্ঠধম্মৰেদনীযং কম্মং উপপজ্জৰেদনীযং হোতি, অপরাপরিযৰেদনীযং হোতি…পে॰… উপপজ্জৰেদনীযং কম্মং দিট্ঠধম্মৰেদনীযং হোতি, অপরাপরিযৰেদনীযং হোতি…পে॰… অপরাপরিযৰেদনীযং কম্মং দিট্ঠধম্মৰেদনীযং হোতি, উপপজ্জৰেদনীযং হোতীতি? ন হেৰং ৰত্তব্বে । তেন হি দিট্ঠধম্মৰেদনীযং কম্মং দিট্ঠধম্মৰেদনীযট্ঠেন নিযতং, উপপজ্জৰেদনীযং কম্মং…পে॰… অপরাপরিযৰেদনীযং কম্মং অপরাপরিযৰেদনীযট্ঠেন নিযতন্তি।
891. Na vattabbaṃ – diṭṭhadhammavedanīyaṃ kammaṃ diṭṭhadhammavedanīyaṭṭhena niyataṃ, upapajjavedanīyaṃ kammaṃ…pe… aparāpariyavedanīyaṃ kammaṃ aparāpariyavedanīyaṭṭhena niyatanti? Āmantā. Diṭṭhadhammavedanīyaṃ kammaṃ upapajjavedanīyaṃ hoti, aparāpariyavedanīyaṃ hoti…pe… upapajjavedanīyaṃ kammaṃ diṭṭhadhammavedanīyaṃ hoti, aparāpariyavedanīyaṃ hoti…pe… aparāpariyavedanīyaṃ kammaṃ diṭṭhadhammavedanīyaṃ hoti, upapajjavedanīyaṃ hotīti? Na hevaṃ vattabbe . Tena hi diṭṭhadhammavedanīyaṃ kammaṃ diṭṭhadhammavedanīyaṭṭhena niyataṃ, upapajjavedanīyaṃ kammaṃ…pe… aparāpariyavedanīyaṃ kammaṃ aparāpariyavedanīyaṭṭhena niyatanti.
কম্মকথা নিট্ঠিতা।
Kammakathā niṭṭhitā.
একৰীসতিমৰগ্গো।
Ekavīsatimavaggo.
তস্সুদ্দানং –
Tassuddānaṃ –
সাসনং নৰং কতং অত্থি কোচি তথাগতস্স সাসনং নৰং করোতি লব্ভা তথাগতস্স সাসনং পুন নৰং কাতুং, পুথুজ্জনো তেধাতুকেহি ধম্মেহি অৰিৰিত্তো, অত্থি কিঞ্চি সংযোজনং অপ্পহায অরহত্তপ্পত্তি, অত্থি অধিপ্পাযিদ্ধি বুদ্ধানং ৰা সাৰকানং ৰা, অত্থি বুদ্ধানং বুদ্ধেহি হীনাতিরেকতা, সব্বা দিসা বুদ্ধা তিট্ঠন্তি, সব্বে ধম্মা নিযতা, সব্বে কম্মা নিযতাতি।
Sāsanaṃ navaṃ kataṃ atthi koci tathāgatassa sāsanaṃ navaṃ karoti labbhā tathāgatassa sāsanaṃ puna navaṃ kātuṃ, puthujjano tedhātukehi dhammehi avivitto, atthi kiñci saṃyojanaṃ appahāya arahattappatti, atthi adhippāyiddhi buddhānaṃ vā sāvakānaṃ vā, atthi buddhānaṃ buddhehi hīnātirekatā, sabbā disā buddhā tiṭṭhanti, sabbe dhammā niyatā, sabbe kammā niyatāti.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৮. কম্মকথাৰণ্ণনা • 8. Kammakathāvaṇṇanā
