| Library / Tipiṭaka / д̇ибидага • Tipiṭaka / д̇хаммасан̇г̇ан̣и-адтагат̇аа • Dhammasaṅgaṇi-aṭṭhakathā |
гаммагат̇аа
Kammakathā
ид̣̇аани яаани д̇ийн̣и гаммаани табзд̇ваа имаани гаммад̣̇ваараани д̣̇ассид̇аани, д̇аани аад̣̇им̣ гад̇ваа авасзсасса д̣̇ваарагат̇ааяа маад̇игаатабанасса вид̇т̇аарагат̇аа ход̇и. д̇ийн̣и хи гаммаани – гааяагаммам̣ важийгаммам̣ маногамманд̇и. гим̣ банзд̇ам̣ гаммам̣ наамаад̇и? жзд̇анаа жзва, згажжз жа жзд̇анаасамбаяуд̇д̇агаа д̇хаммаа. д̇ад̇т̇а жзд̇анааяа гаммабхаавз имаани суд̇д̇аани –
Idāni yāni tīṇi kammāni ṭhapetvā imāni kammadvārāni dassitāni, tāni ādiṃ katvā avasesassa dvārakathāya mātikāṭhapanassa vitthārakathā hoti. Tīṇi hi kammāni – kāyakammaṃ vacīkammaṃ manokammanti. Kiṃ panetaṃ kammaṃ nāmāti? Cetanā ceva, ekacce ca cetanāsampayuttakā dhammā. Tattha cetanāya kammabhāve imāni suttāni –
‘‘жзд̇анаахам̣, бхигкавз, гаммам̣ вад̣̇аами, жзд̇аяид̇ваа гаммам̣ гарод̇и гааязна ваажааяа манасаа’’ (а. ни. 6.63; гат̇аа. 539). ‘‘гааяз ваа хи, аананд̣̇а, сад̇и гааяасан̃жзд̇анаахзд̇у уббаж̇ж̇ад̇и аж̇жхад̇д̇ам̣ сукад̣̇угкам̣, ваажааяа ваа, аананд̣̇а, сад̇и важийсан̃жзд̇анаахзд̇у уббаж̇ж̇ад̇и аж̇жхад̇д̇ам̣ сукад̣̇угкам̣; манз ваа, аананд̣̇а, сад̇и маносан̃жзд̇анаахзд̇у уббаж̇ж̇ад̇и аж̇жхад̇д̇ам̣ сукад̣̇угкам̣’’ (сам̣. ни. 2.25; а. ни. 4.171). ‘‘д̇ивид̇хаа, бхигкавз, гааяасан̃жзд̇анаа агусалам̣ гааяагаммам̣ д̣̇угкуд̣̇раяам̣, д̣̇угкавибаагам̣; жад̇уб̣б̣ид̇хаа, бхигкавз, важийсан̃жзд̇анаа…бз… д̇ивид̇хаа, бхигкавз, маносан̃жзд̇анаа агусалам̣ маногаммам̣ д̣̇угкуд̣̇раяам̣ д̣̇угкавибаагам̣ д̇ивид̇хаа , бхигкавз, гааяасан̃жзд̇анаа гусалам̣ гааяагаммам̣ сукуд̣̇раяам̣ сукавибаагам̣ жад̇уб̣б̣ид̇хаа, бхигкавз, важийсан̃жзд̇анаа…бз… д̇ивид̇хаа, бхигкавз, маносан̃жзд̇анаа, гусалам̣ маногаммам̣ сукуд̣̇раяам̣ сукавибаагам̣’’ (гат̇аа. 539; а. ни. 10.217 т̇огам̣ висад̣̇исам̣). ‘‘сажааяам̣, аананд̣̇а, самид̣̇д̇хи могхабурисо баадалибуд̇д̇асса бариб̣б̣ааж̇агасса звам̣ будто звам̣ б̣яаагарзяяа – сан̃жзд̇анияам̣, аавусо баадалибуд̇д̇а, гаммам̣ гад̇ваа гааязна ваажааяа манасаа, сукавзд̣̇анийяам̣ сукам̣ со взд̣̇аяад̇и…бз… ад̣̇угкамасукавзд̣̇анийяам̣ ад̣̇угкамасукам̣ со взд̣̇аяад̇ийд̇и; звам̣ б̣яаагарамаано ко, аананд̣̇а, самид̣̇д̇хи могхабурисо баадалибуд̇д̇асса бариб̣б̣ааж̇агасса саммаа б̣яаагарамаано б̣яаагарзяяаа’’д̇и (ма. ни. 3.300; гат̇аа. 539).
‘‘Cetanāhaṃ, bhikkhave, kammaṃ vadāmi, cetayitvā kammaṃ karoti kāyena vācāya manasā’’ (a. ni. 6.63; kathā. 539). ‘‘Kāye vā hi, ānanda, sati kāyasañcetanāhetu uppajjati ajjhattaṃ sukhadukkhaṃ, vācāya vā, ānanda, sati vacīsañcetanāhetu uppajjati ajjhattaṃ sukhadukkhaṃ; mane vā, ānanda, sati manosañcetanāhetu uppajjati ajjhattaṃ sukhadukkhaṃ’’ (saṃ. ni. 2.25; a. ni. 4.171). ‘‘Tividhā, bhikkhave, kāyasañcetanā akusalaṃ kāyakammaṃ dukkhudrayaṃ, dukkhavipākaṃ; catubbidhā, bhikkhave, vacīsañcetanā…pe… tividhā, bhikkhave, manosañcetanā akusalaṃ manokammaṃ dukkhudrayaṃ dukkhavipākaṃ tividhā , bhikkhave, kāyasañcetanā kusalaṃ kāyakammaṃ sukhudrayaṃ sukhavipākaṃ catubbidhā, bhikkhave, vacīsañcetanā…pe… tividhā, bhikkhave, manosañcetanā, kusalaṃ manokammaṃ sukhudrayaṃ sukhavipākaṃ’’ (kathā. 539; a. ni. 10.217 thokaṃ visadisaṃ). ‘‘Sacāyaṃ, ānanda, samiddhi moghapuriso pāṭaliputtassa paribbājakassa evaṃ puṭṭho evaṃ byākareyya – sañcetaniyaṃ, āvuso pāṭaliputta, kammaṃ katvā kāyena vācāya manasā, sukhavedanīyaṃ sukhaṃ so vedayati…pe… adukkhamasukhavedanīyaṃ adukkhamasukhaṃ so vedayatīti; evaṃ byākaramāno kho, ānanda, samiddhi moghapuriso pāṭaliputtassa paribbājakassa sammā byākaramāno byākareyyā’’ti (ma. ni. 3.300; kathā. 539).
имаани д̇аава жзд̇анааяа гаммабхаавз суд̇д̇аани. жзд̇анаасамбаяуд̇д̇ад̇хаммаанам̣ бана гаммабхааво гаммажад̇уггзна д̣̇ийбид̇о. вуд̇д̇ан̃хзд̇ам̣ –
Imāni tāva cetanāya kammabhāve suttāni. Cetanāsampayuttadhammānaṃ pana kammabhāvo kammacatukkena dīpito. Vuttañhetaṃ –
‘‘жад̇д̇ааримаани , бхигкавз, гаммаани маяаа саяам̣ абхин̃н̃аа сажчигад̇ваа бавзд̣̇ид̇аани. гад̇амаани жад̇д̇аари? ад̇т̇и, бхигкавз, гаммам̣ ган̣хам̣ ган̣хавибаагам̣, ад̇т̇и, бхигкавз, гаммам̣ суггам̣ суггавибаагам̣, ад̇т̇и, бхигкавз, гаммам̣ ган̣хасуггам̣ ган̣хасуггавибаагам̣, ад̇т̇и, бхигкавз, гаммам̣ аган̣хам̣ асуггам̣ аган̣хаасуггавибаагам̣ гаммагкаяааяа сам̣вад̇д̇ад̇и (а. ни. 4.232-233).… гад̇аман̃жа, бхигкавз, гаммам̣ аган̣хам̣ асуггам̣ аган̣хаасуггавибаагам̣ гаммагкаяааяа сам̣вад̇д̇ад̇и? яад̣̇ид̣̇ам̣ сад̇д̇а б̣ож̇жхан̇г̇аа – сад̇исамб̣ож̇жхан̇г̇о…бз… убзгкаасамб̣ож̇жхан̇г̇о, ид̣̇ам̣ вужжад̇и, бхигкавз, гаммам̣ аган̣хам̣ асуггам̣ аган̣хаасуггавибаагам̣ гаммагкаяааяа сам̣вад̇д̇ад̇и (а. ни. 4.238).… гад̇аман̃жа, бхигкавз, гаммам̣ аган̣хам̣ асуггам̣ аган̣хаасуггавибаагам̣ гаммагкаяааяа сам̣вад̇д̇ад̇и? аяамзва арияо адтан̇г̇иго маг̇г̇о – сзяяат̇ид̣̇ам̣, саммаад̣̇идти …бз… саммаасамаад̇хи. ид̣̇ам̣ вужжад̇и, бхигкавз, гаммам̣ аган̣хам̣ асуггам̣ аган̣хаасуггавибаагам̣ гаммагкаяааяа сам̣вад̇д̇ад̇ий’’д̇и (а. ни. 4.237).
‘‘Cattārimāni , bhikkhave, kammāni mayā sayaṃ abhiññā sacchikatvā paveditāni. Katamāni cattāri? Atthi, bhikkhave, kammaṃ kaṇhaṃ kaṇhavipākaṃ, atthi, bhikkhave, kammaṃ sukkaṃ sukkavipākaṃ, atthi, bhikkhave, kammaṃ kaṇhasukkaṃ kaṇhasukkavipākaṃ, atthi, bhikkhave, kammaṃ akaṇhaṃ asukkaṃ akaṇhaasukkavipākaṃ kammakkhayāya saṃvattati (a. ni. 4.232-233).… Katamañca, bhikkhave, kammaṃ akaṇhaṃ asukkaṃ akaṇhaasukkavipākaṃ kammakkhayāya saṃvattati? Yadidaṃ satta bojjhaṅgā – satisambojjhaṅgo…pe… upekkhāsambojjhaṅgo, idaṃ vuccati, bhikkhave, kammaṃ akaṇhaṃ asukkaṃ akaṇhaasukkavipākaṃ kammakkhayāya saṃvattati (a. ni. 4.238).… Katamañca, bhikkhave, kammaṃ akaṇhaṃ asukkaṃ akaṇhaasukkavipākaṃ kammakkhayāya saṃvattati? Ayameva ariyo aṭṭhaṅgiko maggo – seyyathidaṃ, sammādiṭṭhi …pe… sammāsamādhi. Idaṃ vuccati, bhikkhave, kammaṃ akaṇhaṃ asukkaṃ akaṇhaasukkavipākaṃ kammakkhayāya saṃvattatī’’ti (a. ni. 4.237).
звам̣ имз б̣ож̇жхан̇г̇амаг̇г̇ан̇г̇аббабхзд̣̇ад̇о баннараса д̇хаммаа гаммажад̇уггзна д̣̇ийбид̇аа. абхиж̇жхаа, б̣яаабаад̣̇о, мижчаад̣̇идти, анабхиж̇жхаа, аб̣яаабаад̣̇о, саммаад̣̇идтийд̇и имзхи бана чахи сад̣̇д̇хим̣ згавийсад̇и жзд̇анаасамбаяуд̇д̇агаа д̇хаммаа взд̣̇ид̇аб̣б̣аа.
Evaṃ ime bojjhaṅgamaggaṅgappabhedato pannarasa dhammā kammacatukkena dīpitā. Abhijjhā, byāpādo, micchādiṭṭhi, anabhijjhā, abyāpādo, sammādiṭṭhīti imehi pana chahi saddhiṃ ekavīsati cetanāsampayuttakā dhammā veditabbā.
д̇ад̇т̇а логуд̇д̇арамаг̇г̇о бхаж̇аабияамаано гааяагаммаад̣̇ийни д̇ийн̣и гаммаани бхаж̇ад̇и. яан̃хи гааязна д̣̇уссийляам̣ аж̇жхаажарад̇и, д̇амхаа сам̣варо гааяигод̇и взд̣̇ид̇аб̣б̣о. яам̣ ваажааяа д̣̇уссийляам̣ аж̇жхаажарад̇и, д̇амхаа сам̣варо ваажасигод̇и взд̣̇ид̇аб̣б̣о. ид̇и саммаагамманд̇о гааяагаммам̣, саммааваажаа важийгаммам̣. зд̇асмим̣ д̣̇ваяз г̇ахид̇з саммааааж̇ийво д̇аббагкигад̇д̇аа г̇ахид̇ова ход̇и. яам̣ бана манзна д̣̇уссийляам̣ аж̇жхаажарад̇и, д̇амхаа сам̣варо маанасигод̇и взд̣̇ид̇аб̣б̣о. со д̣̇идтисан̇габбавааяаамасад̇исамаад̇хивасзна бан̃жавид̇хо ход̇и. аяам̣ бан̃жавид̇хоби маногаммам̣ наама. звам̣ логуд̇д̇арамаг̇г̇о бхаж̇аабияамаано д̇ийн̣и гаммаани бхаж̇ад̇и.
Tattha lokuttaramaggo bhajāpiyamāno kāyakammādīni tīṇi kammāni bhajati. Yañhi kāyena dussīlyaṃ ajjhācarati, tamhā saṃvaro kāyikoti veditabbo. Yaṃ vācāya dussīlyaṃ ajjhācarati, tamhā saṃvaro vācasikoti veditabbo. Iti sammākammanto kāyakammaṃ, sammāvācā vacīkammaṃ. Etasmiṃ dvaye gahite sammāājīvo tappakkhikattā gahitova hoti. Yaṃ pana manena dussīlyaṃ ajjhācarati, tamhā saṃvaro mānasikoti veditabbo. So diṭṭhisaṅkappavāyāmasatisamādhivasena pañcavidho hoti. Ayaṃ pañcavidhopi manokammaṃ nāma. Evaṃ lokuttaramaggo bhajāpiyamāno tīṇi kammāni bhajati.
имасмим̣ таанз д̣̇ваарасам̣санд̣̇анам̣ наама ход̇и. гааяаважийд̣̇ваарзсу хи жобанам̣ бад̇ваа гаммабат̇ам̣ аббад̇д̇амби ад̇т̇и, манод̣̇ваарз жа самуд̣̇аажаарам̣ бад̇ваа гаммабат̇ам̣ аббад̇д̇амби ад̇т̇и; д̇ам̣ г̇ахзд̇ваа д̇ам̣д̇ам̣д̣̇ваарабагкигамзва агам̣су.
Imasmiṃ ṭhāne dvārasaṃsandanaṃ nāma hoti. Kāyavacīdvāresu hi copanaṃ patvā kammapathaṃ appattampi atthi, manodvāre ca samudācāraṃ patvā kammapathaṃ appattampi atthi; taṃ gahetvā taṃtaṃdvārapakkhikameva akaṃsu.
д̇ад̇рааяам̣ наяо – яо ‘миг̇авам̣ г̇амиссаамий’д̇и д̇ханум̣ саж̇ж̇зд̇и, ж̇ияам̣ ваддзд̇и, сад̇д̇им̣ нисзд̇и, бхад̇д̇ам̣ бхун̃ж̇ад̇и, вад̇т̇ам̣ барид̣̇ахад̇и, зд̇д̇аавад̇аа гааяад̣̇ваарз жобанам̣ бад̇д̇ам̣ ход̇и. со аран̃н̃з д̣̇ивасам̣ жарид̇ваа анд̇амасо сасаб̣ил̣аарамад̇д̇амби на лабхад̇и, ид̣̇ам̣ агусалам̣ гааяагаммам̣ наама ход̇и на ход̇ийд̇и? на ход̇и. гасмаа? гаммабат̇ам̣ аббад̇д̇ад̇ааяа. гзвалам̣ бана гааяад̣̇ужжарид̇ам̣ наама ход̇ийд̇и взд̣̇ид̇аб̣б̣ам̣. мажчаг̇г̇ахан̣аад̣̇ий субаяог̇зсуби зсзва наяо.
Tatrāyaṃ nayo – yo ‘migavaṃ gamissāmī’ti dhanuṃ sajjeti, jiyaṃ vaṭṭeti, sattiṃ niseti, bhattaṃ bhuñjati, vatthaṃ paridahati, ettāvatā kāyadvāre copanaṃ pattaṃ hoti. So araññe divasaṃ caritvā antamaso sasabiḷāramattampi na labhati, idaṃ akusalaṃ kāyakammaṃ nāma hoti na hotīti? Na hoti. Kasmā? Kammapathaṃ appattatāya. Kevalaṃ pana kāyaduccaritaṃ nāma hotīti veditabbaṃ. Macchaggahaṇādī supayogesupi eseva nayo.
важийд̣̇ваарзби ‘миг̇авам̣ г̇амиссаами’ ‘взг̇зна д̇хануаад̣̇ийни саж̇ж̇зт̇аа’д̇и аан̣аабзд̇ваа буриманаязнзва аран̃н̃з гин̃жи алабханд̇асса гин̃жааби важийд̣̇ваарз жобанам̣ бад̇д̇ам̣, гаммабат̇ам̣ аббад̇д̇ад̇ааяа бана гааяагаммам̣ на ход̇и. гзвалам̣ важийд̣̇ужжарид̇ам̣ наама ход̇ийд̇и взд̣̇ид̇аб̣б̣ам̣.
Vacīdvārepi ‘migavaṃ gamissāmi’ ‘vegena dhanuādīni sajjethā’ti āṇāpetvā purimanayeneva araññe kiñci alabhantassa kiñcāpi vacīdvāre copanaṃ pattaṃ, kammapathaṃ appattatāya pana kāyakammaṃ na hoti. Kevalaṃ vacīduccaritaṃ nāma hotīti veditabbaṃ.
манод̣̇ваарз бана вад̇хагажзд̇анааяа уббаннамад̇д̇ааяа зва гаммабат̇абхзд̣̇ова ход̇и. со жа ко б̣яаабаад̣̇авасзна на баан̣аад̇ибаад̇авасзна. агусалан̃хи гааяагаммам̣ гааяаважийд̣̇ваарзсу самудтаад̇и, на манод̣̇ваарз; д̇ат̇аа агусалам̣ важийгаммам̣. агусалам̣ маногаммам̣ бана д̇ийсуби д̣̇ваарзсу самудтаад̇и; д̇ат̇аа гусалаани гааяаважийманогаммаани.
Manodvāre pana vadhakacetanāya uppannamattāya eva kammapathabhedova hoti. So ca kho byāpādavasena na pāṇātipātavasena. Akusalañhi kāyakammaṃ kāyavacīdvāresu samuṭṭhāti, na manodvāre; tathā akusalaṃ vacīkammaṃ. Akusalaṃ manokammaṃ pana tīsupi dvāresu samuṭṭhāti; tathā kusalāni kāyavacīmanokammāni.
гат̇ам̣ ? сахад̇т̇аа хи баан̣ам̣ хананд̇асса ад̣̇иннам̣ аад̣̇ияанд̇асса мижчаажаарам̣ жаранд̇асса гаммам̣ гааяагаммамзва ход̇и. д̣̇ваарамби гааяад̣̇ваарамзва ход̇и. звам̣ д̇аава агусалам̣ гааяагаммам̣ гааяад̣̇ваарз самудтаад̇и. д̇зхи бана жид̇д̇зхи сахаж̇аад̇аа абхиж̇жхааб̣яаабаад̣̇амижчаад̣̇идтияо жзд̇анаабагкигаа ваа бхаванд̇и, аб̣б̣охааригаа ваа. ‘г̇ажча ид̇т̇аннаамам̣ ж̇ийвид̇аа воробзхи, ид̇т̇аннаамам̣ бхан̣д̣ам̣ авахараа’д̇и аан̣аабзнд̇асса бана гаммам̣ гааяагаммам̣ ход̇и, д̣̇ваарам̣ бана важийд̣̇ваарам̣. звам̣ агусалам̣ гааяагаммам̣ важийд̣̇ваарз самудтаад̇и. д̇зхи бана жид̇д̇зхи сахаж̇аад̇аа абхиж̇жхааб̣яаабаад̣̇амижчаад̣̇идтияо жзд̇анаабагкигаа ваа бхаванд̇и аб̣б̣охааригаа ваа. зд̇д̇агаа аажарияаанам̣ самаанад̇т̇агат̇аа наама.
Kathaṃ ? Sahatthā hi pāṇaṃ hanantassa adinnaṃ ādiyantassa micchācāraṃ carantassa kammaṃ kāyakammameva hoti. Dvārampi kāyadvārameva hoti. Evaṃ tāva akusalaṃ kāyakammaṃ kāyadvāre samuṭṭhāti. Tehi pana cittehi sahajātā abhijjhābyāpādamicchādiṭṭhiyo cetanāpakkhikā vā bhavanti, abbohārikā vā. ‘Gaccha itthannāmaṃ jīvitā voropehi, itthannāmaṃ bhaṇḍaṃ avaharā’ti āṇāpentassa pana kammaṃ kāyakammaṃ hoti, dvāraṃ pana vacīdvāraṃ. Evaṃ akusalaṃ kāyakammaṃ vacīdvāre samuṭṭhāti. Tehi pana cittehi sahajātā abhijjhābyāpādamicchādiṭṭhiyo cetanāpakkhikā vā bhavanti abbohārikā vā. Ettakā ācariyānaṃ samānatthakathā nāma.
вид̇ан̣д̣аваад̣̇ий банааха – ‘агусалам̣ гааяагаммам̣ манод̣̇ваарзби самудтаад̇ий’д̇и. со ‘д̇аяо сан̇г̇ахз аарул̣хам̣ суд̇д̇ам̣ аахараахий’д̇и вуд̇д̇о ид̣̇ам̣ гулумб̣асуд̇д̇ам̣ наама аахари –
Vitaṇḍavādī panāha – ‘akusalaṃ kāyakammaṃ manodvārepi samuṭṭhātī’ti. So ‘tayo saṅgahe āruḷhaṃ suttaṃ āharāhī’ti vutto idaṃ kulumbasuttaṃ nāma āhari –
‘‘буна жабарам̣ , бхигкавз, ид̇хзгажжо саман̣о ваа б̣раахман̣о ваа ид̣̇д̇химаа жзд̇овасиббад̇д̇о ан̃н̃иссаа гужчиг̇ад̇ам̣ г̇аб̣бхам̣ баабагзна манасаа анубзгкаго ход̇и – ‘ахо вад̇ааяам̣ гужчиг̇ад̇о г̇аб̣бхо на сод̇т̇инаа абхинигкамзяяаа’д̇и. звам̣, бхигкавз, гулумб̣асса убагхаад̇о ход̇ий’’д̇и.
‘‘Puna caparaṃ , bhikkhave, idhekacco samaṇo vā brāhmaṇo vā iddhimā cetovasippatto aññissā kucchigataṃ gabbhaṃ pāpakena manasā anupekkhako hoti – ‘aho vatāyaṃ kucchigato gabbho na sotthinā abhinikkhameyyā’ti. Evaṃ, bhikkhave, kulumbassa upaghāto hotī’’ti.
ид̣̇ам̣ суд̇д̇ам̣ аахарид̇ваа ааха – ‘звам̣ жинд̇ид̇амад̇д̇зязва манасаа гужчиг̇ад̇о г̇аб̣бхо пзн̣абин̣д̣о вияа вилийяад̇и. зд̇т̇а гуд̇о гааяан̇г̇ажобанам̣ ваа ваажан̇г̇ажобанам̣ ваа? манод̣̇ваарасмим̣язва бана ид̣̇ам̣ агусалам̣ гааяагаммам̣ самудтаад̇ий’д̇и.
Idaṃ suttaṃ āharitvā āha – ‘evaṃ cintitamatteyeva manasā kucchigato gabbho pheṇapiṇḍo viya vilīyati. Ettha kuto kāyaṅgacopanaṃ vā vācaṅgacopanaṃ vā? Manodvārasmiṃyeva pana idaṃ akusalaṃ kāyakammaṃ samuṭṭhātī’ti.
д̇амзнам̣ ‘д̇ава суд̇д̇асса ад̇т̇ам̣ д̇улаяиссаамаа’д̇и вад̇ваа звам̣ д̇улаяим̣су – ‘д̇вам̣ ид̣̇д̇хияаа баруубагхаад̇ам̣ вад̣̇зси. ид̣̇д̇хи наама жзсаа – ад̇хидтаанид̣̇д̇хи, вигуб̣б̣анид̣̇д̇хи, маномаяид̣̇д̇хи, н̃аан̣авибпаарид̣̇д̇хи, самаад̇хивибпаарид̣̇д̇хи, арияид̣̇д̇хи, гаммавибаагаж̇ид̣̇д̇хи, бун̃н̃авад̇о ид̣̇д̇хи, виж̇ж̇аамаяид̣̇д̇хи , д̇ад̇т̇а д̇ад̇т̇а саммаабаяог̇абажжаяаа иж̇жханадтзна ид̣̇д̇хийд̇и д̣̇асавид̇хаа (бади. ма. 3.10). д̇ад̇т̇а гад̇арам̣ ид̣̇д̇хим̣ вад̣̇зсий’д̇и? ‘бхааванаамаяа’нд̇и. ‘гим̣ бана бхааванаамаяид̣̇д̇хияаа баруубагхаад̇агаммам̣ ход̇ий’д̇и? ‘аама, згажжз аажарияаа згаваарам̣ ход̇ий’д̇и; вад̣̇анд̇и яат̇аа хи барам̣ бахарид̇угаамзна уд̣̇агабхарид̇з гхадз кид̇д̇з гхадоби бхиж̇ж̇ад̇и, уд̣̇агамби нассад̇и, звамзва бхааванаамаяид̣̇д̇хияаа згаваарам̣ баруубагхаад̇агаммам̣ ход̇и. д̇ад̇о бадтааяа бана саа нассад̇ийд̇и. ат̇а нам̣ ‘бхааванаамаяид̣̇д̇хияаа нзва згаваарам̣ на д̣̇вз ваарз баруубагхаад̇агаммам̣ ход̇ий’д̇и вад̇ваа д̇ам̣ сан̃н̃ад̇д̇им̣ ааг̇ажчанд̇ам̣ бужчим̣су – ‘бхааванаамаяид̣̇д̇хи гим̣ гусалаа, агусалаа, аб̣яаагад̇аа? сукааяа взд̣̇анааяа самбаяуд̇д̇аа, д̣̇угкааяа взд̣̇анааяа самбаяуд̇д̇аа, ад̣̇угкамасукааяа взд̣̇анааяа самбаяуд̇д̇аа? савид̇аггасавижаараа, авид̇аггавижаарамад̇д̇аа, авид̇аггаавижаараа? гаамааважараа, руубааважараа, аруубааважараа’д̇и?
Tamenaṃ ‘tava suttassa atthaṃ tulayissāmā’ti vatvā evaṃ tulayiṃsu – ‘tvaṃ iddhiyā parūpaghātaṃ vadesi. Iddhi nāma cesā – adhiṭṭhāniddhi, vikubbaniddhi, manomayiddhi, ñāṇavipphāriddhi, samādhivipphāriddhi, ariyiddhi, kammavipākajiddhi, puññavato iddhi, vijjāmayiddhi , tattha tattha sammāpayogapaccayā ijjhanaṭṭhena iddhīti dasavidhā (paṭi. ma. 3.10). Tattha kataraṃ iddhiṃ vadesī’ti? ‘Bhāvanāmaya’nti. ‘Kiṃ pana bhāvanāmayiddhiyā parūpaghātakammaṃ hotī’ti? ‘Āma, ekacce ācariyā ekavāraṃ hotī’ti; vadanti yathā hi paraṃ paharitukāmena udakabharite ghaṭe khitte ghaṭopi bhijjati, udakampi nassati, evameva bhāvanāmayiddhiyā ekavāraṃ parūpaghātakammaṃ hoti. Tato paṭṭhāya pana sā nassatīti. Atha naṃ ‘bhāvanāmayiddhiyā neva ekavāraṃ na dve vāre parūpaghātakammaṃ hotī’ti vatvā taṃ saññattiṃ āgacchantaṃ pucchiṃsu – ‘bhāvanāmayiddhi kiṃ kusalā, akusalā, abyākatā? Sukhāya vedanāya sampayuttā, dukkhāya vedanāya sampayuttā, adukkhamasukhāya vedanāya sampayuttā? Savitakkasavicārā, avitakkavicāramattā, avitakkaavicārā? Kāmāvacarā, rūpāvacarā, arūpāvacarā’ti?
имам̣ бана бан̃хам̣ яо ж̇аанаад̇и со звам̣ вагкад̇и – ‘бхааванаамаяид̣̇д̇хи гусалаа ваа ход̇и, аб̣яаагад̇аа ваа; ад̣̇угкамасукавзд̣̇анийяаа зва, авид̇аггаавижаараа зва, руубааважараа зваа’д̇и. со вад̇д̇аб̣б̣о – ‘баан̣аад̇ибаад̇ажзд̇анаа гусалаад̣̇ийсу гад̇арам̣ годтаасам̣ бхаж̇ад̇ий’д̇и? ж̇аананд̇о вагкад̇и – ‘баан̣аад̇ибаад̇ажзд̇анаа агусалаа зва, д̣̇угкавзд̣̇анийяаа зва, савид̇аггасавижаараа зва гаамааважараа зваа’д̇и. ‘звам̣ санд̇з д̇ава бан̃хо нзва гусалад̇д̇игзна самзд̇и, на взд̣̇анаад̇д̇игзна , на вид̇аггад̇д̇игзна, на бхууманд̇арзнаа’д̇и.
Imaṃ pana pañhaṃ yo jānāti so evaṃ vakkhati – ‘bhāvanāmayiddhi kusalā vā hoti, abyākatā vā; adukkhamasukhavedanīyā eva, avitakkaavicārā eva, rūpāvacarā evā’ti. So vattabbo – ‘pāṇātipātacetanā kusalādīsu kataraṃ koṭṭhāsaṃ bhajatī’ti? Jānanto vakkhati – ‘pāṇātipātacetanā akusalā eva, dukkhavedanīyā eva, savitakkasavicārā eva kāmāvacarā evā’ti. ‘Evaṃ sante tava pañho neva kusalattikena sameti, na vedanāttikena , na vitakkattikena, na bhūmantarenā’ti.
‘гим̣ бана звам̣ маханд̇ам̣ суд̇д̇ам̣ нирад̇т̇ага’нд̇и? ‘но нирад̇т̇агам̣; д̇вам̣ банасса ад̇т̇ам̣ на ж̇аанааси. ‘‘ид̣̇д̇химаа жзд̇овасиббад̇д̇о’’д̇и зд̇т̇а хи нзва бхааванаамаяид̣̇д̇хи ад̇хиббзд̇аа, аат̇аб̣б̣ан̣ид̣̇д̇хи бана ад̇хиббзд̇аа. саа хи зд̇т̇а лаб̣бхамаанаа лаб̣бхад̇и. саа бана гааяаважийд̣̇ваараани мун̃жид̇ваа гаад̇ум̣ на саггаа. аат̇аб̣б̣ан̣ид̣̇д̇хигаа хи сад̇д̇аахам̣ алон̣агам̣ бхун̃ж̇ид̇ваа д̣̇аб̣б̣з ад̇т̇арид̇ваа бат̇авияам̣ саяамаанаа д̇абам̣ жарид̇ваа сад̇д̇амз д̣̇ивасз сусаанабхуумим̣ саж̇ж̇зд̇ваа сад̇д̇амз бад̣̇з тад̇ваа хад̇т̇ам̣ ваддзд̇ваа ваддзд̇ваа мукзна виж̇ж̇ам̣ бариж̇аббанд̇и. ат̇а нзсам̣ гаммам̣ самиж̇жхад̇и. звам̣ аяамби ид̣̇д̇хи гааяаважийд̣̇ваараани мун̃жид̇ваа гаад̇ум̣ на саггаад̇и. ‘на гааяагаммам̣ манод̣̇ваарз самудтаад̇ий’д̇и нидтамзд̇т̇а г̇анд̇аб̣б̣ам̣.
‘Kiṃ pana evaṃ mahantaṃ suttaṃ niratthaka’nti? ‘No niratthakaṃ; tvaṃ panassa atthaṃ na jānāsi. ‘‘Iddhimā cetovasippatto’’ti ettha hi neva bhāvanāmayiddhi adhippetā, āthabbaṇiddhi pana adhippetā. Sā hi ettha labbhamānā labbhati. Sā pana kāyavacīdvārāni muñcitvā kātuṃ na sakkā. Āthabbaṇiddhikā hi sattāhaṃ aloṇakaṃ bhuñjitvā dabbe attharitvā pathaviyaṃ sayamānā tapaṃ caritvā sattame divase susānabhūmiṃ sajjetvā sattame pade ṭhatvā hatthaṃ vaṭṭetvā vaṭṭetvā mukhena vijjaṃ parijappanti. Atha nesaṃ kammaṃ samijjhati. Evaṃ ayampi iddhi kāyavacīdvārāni muñcitvā kātuṃ na sakkāti. ‘Na kāyakammaṃ manodvāre samuṭṭhātī’ti niṭṭhamettha gantabbaṃ.
хад̇т̇амуд̣̇д̣̇ааяа бана мусааваад̣̇аад̣̇ийни гат̇знд̇асса гаммам̣ важийгаммам̣, д̣̇ваарам̣ бана гааяад̣̇ваарам̣ ход̇и . звам̣ агусалам̣ важийгаммамби гааяад̣̇ваарз самудтаад̇и. д̇зхи бана жид̇д̇зхи сахаж̇аад̇аа абхиж̇жхааб̣яаабаад̣̇амижчаад̣̇идтияо жзд̇анаабагкигаа ваа бхаванд̇и, аб̣б̣охааригаа ваа. важийбхзд̣̇ам̣ бана гад̇ваа мусааваад̣̇аад̣̇ийни гат̇знд̇асса гаммамби важийгаммам̣ д̣̇ваарамби важийд̣̇ваарамзва. звам̣ агусалам̣ важийгаммам̣ важийд̣̇ваарз самудтаад̇и. д̇зхи бана жид̇д̇зхи сахаж̇аад̇аа абхиж̇жхааб̣яаабаад̣̇амижчаад̣̇идтияо жзд̇анаабагкигаа ваа бхаванд̇и аб̣б̣охааригаа ваа. зд̇д̇агаа аажарияаанам̣ самаанад̇т̇агат̇аа наама.
Hatthamuddāya pana musāvādādīni kathentassa kammaṃ vacīkammaṃ, dvāraṃ pana kāyadvāraṃ hoti . Evaṃ akusalaṃ vacīkammampi kāyadvāre samuṭṭhāti. Tehi pana cittehi sahajātā abhijjhābyāpādamicchādiṭṭhiyo cetanāpakkhikā vā bhavanti, abbohārikā vā. Vacībhedaṃ pana katvā musāvādādīni kathentassa kammampi vacīkammaṃ dvārampi vacīdvārameva. Evaṃ akusalaṃ vacīkammaṃ vacīdvāre samuṭṭhāti. Tehi pana cittehi sahajātā abhijjhābyāpādamicchādiṭṭhiyo cetanāpakkhikā vā bhavanti abbohārikā vā. Ettakā ācariyānaṃ samānatthakathā nāma.
вид̇ан̣д̣аваад̣̇ий банааха – ‘агусалам̣ важийгаммам̣ манод̣̇ваарзби самудтаад̇ий’д̇и. со ‘д̇аяо сан̇г̇ахз аарул̣хам̣ суд̇д̇ам̣ аахараахий’д̇и вуд̇д̇о ид̣̇ам̣ убосат̇агканд̇хагад̇о суд̇д̇ам̣ аахари –
Vitaṇḍavādī panāha – ‘akusalaṃ vacīkammaṃ manodvārepi samuṭṭhātī’ti. So ‘tayo saṅgahe āruḷhaṃ suttaṃ āharāhī’ti vutto idaṃ uposathakkhandhakato suttaṃ āhari –
‘‘яо бана бхигку яаавад̇ад̇ияам̣ ануссаавияамаанз сарамаано санд̇им̣ аабад̇д̇им̣ наавигарзяяа самбаж̇аанамусааваад̣̇асса ход̇ий’’д̇и (махаава. 134).
‘‘Yo pana bhikkhu yāvatatiyaṃ anussāviyamāne saramāno santiṃ āpattiṃ nāvikareyya sampajānamusāvādassa hotī’’ti (mahāva. 134).
ид̣̇ам̣ суд̇д̇ам̣ аахарид̇ваа ааха – ‘звам̣ аабад̇д̇им̣ анаавигаронд̇о д̇ун̣хийбхууд̇ова ан̃н̃ам̣ аабад̇д̇им̣ аабаж̇ж̇ад̇и, зд̇т̇а гуд̇о гааяан̇г̇ажобанам̣ ваа ваажан̇г̇ажобанам̣ ваа? манод̣̇ваарасмим̣язва бана ид̣̇ам̣ агусалам̣ важийгаммам̣ самудтаад̇ий’д̇и.
Idaṃ suttaṃ āharitvā āha – ‘evaṃ āpattiṃ anāvikaronto tuṇhībhūtova aññaṃ āpattiṃ āpajjati, ettha kuto kāyaṅgacopanaṃ vā vācaṅgacopanaṃ vā? Manodvārasmiṃyeva pana idaṃ akusalaṃ vacīkammaṃ samuṭṭhātī’ti.
со вад̇д̇аб̣б̣о – ‘гим̣ банзд̇ам̣ суд̇д̇ам̣ нзяяад̇т̇ам̣ уд̣̇ааху нийд̇ад̇т̇а’нд̇и? ‘нийд̇ад̇т̇амзва маяхам̣ суд̇д̇а’нд̇и. со ‘маа звам̣ аважа, д̇улаяиссаамасса ад̇т̇а’нд̇и вад̇ваа звам̣ бужчид̇аб̣б̣о – ‘самбаж̇аанамусааваад̣̇з гим̣ ход̇ий’д̇и? ж̇аананд̇о ‘самбаж̇аанамусааваад̣̇з д̣̇уггадам̣ ход̇ий’д̇и вагкад̇и. д̇ад̇о вад̇д̇аб̣б̣о ‘винаяасса д̣̇вз муулаани – гааяо жа ваажаа жа; саммаасамб̣уд̣̇д̇хзна хи саб̣б̣аабад̇д̇ияо имзсуязва д̣̇вийсу д̣̇ваарзсу бан̃н̃ад̇д̇аа, манод̣̇ваарз аабад̇д̇ибан̃н̃абанам̣ наама над̇т̇и. д̇вам̣ ад̇ивияа винаяз багад̇ан̃н̃уу, яо сад̇т̇аараа абан̃н̃ад̇д̇з таанз аабад̇д̇им̣ бан̃н̃абзси, саммаасамб̣уд̣̇д̇хам̣ аб̣бхаажигкаси, ж̇инажаггам̣ бахарасий’д̇иаад̣̇иважанзхи ниг̇г̇ан̣хид̇ваа уд̇д̇ари бан̃хам̣ бужчид̇аб̣б̣о – ‘самбаж̇аанамусааваад̣̇о гирияад̇о самудтаад̇и уд̣̇ааху агирияад̇о’д̇и? ж̇аананд̇о ‘гирияад̇о’д̇и вагкад̇и. д̇ад̇о вад̇д̇аб̣б̣о – ‘анаавигаронд̇о гад̇арам̣ гирияам̣ гарод̇ий’д̇и? ад̣̇д̇хаа хи гирияам̣ абассанд̇о вигхаад̇ам̣ аабаж̇ж̇иссад̇и. д̇ад̇о имасса суд̇д̇асса ад̇т̇зна сан̃н̃аабзд̇аб̣б̣о. аяан̃хзд̇т̇а ад̇т̇о – явааяам̣ ‘самбаж̇аанамусааваад̣̇о ход̇ий’д̇и вуд̇д̇о, со аабад̇д̇ид̇о гим̣ ход̇и? ‘гад̇араабад̇д̇и ход̇ий’д̇и ад̇т̇о. ‘д̣̇уггадаабад̇д̇и ход̇и’. саа жа ко на мусааваад̣̇алагкан̣зна, бхаг̇авад̇о бана важанзна важийд̣̇ваарз агирияасамудтаанаа аабад̇д̇и ход̇ийд̇и взд̣̇ид̇аб̣б̣аа. вуд̇д̇амби жзд̇ам̣ –
So vattabbo – ‘kiṃ panetaṃ suttaṃ neyyatthaṃ udāhu nītattha’nti? ‘Nītatthameva mayhaṃ sutta’nti. So ‘mā evaṃ avaca, tulayissāmassa attha’nti vatvā evaṃ pucchitabbo – ‘sampajānamusāvāde kiṃ hotī’ti? Jānanto ‘sampajānamusāvāde dukkaṭaṃ hotī’ti vakkhati. Tato vattabbo ‘vinayassa dve mūlāni – kāyo ca vācā ca; sammāsambuddhena hi sabbāpattiyo imesuyeva dvīsu dvāresu paññattā, manodvāre āpattipaññapanaṃ nāma natthi. Tvaṃ ativiya vinaye pakataññū, yo satthārā apaññatte ṭhāne āpattiṃ paññapesi, sammāsambuddhaṃ abbhācikkhasi, jinacakkaṃ paharasī’tiādivacanehi niggaṇhitvā uttari pañhaṃ pucchitabbo – ‘sampajānamusāvādo kiriyato samuṭṭhāti udāhu akiriyato’ti? Jānanto ‘kiriyato’ti vakkhati. Tato vattabbo – ‘anāvikaronto kataraṃ kiriyaṃ karotī’ti? Addhā hi kiriyaṃ apassanto vighātaṃ āpajjissati. Tato imassa suttassa atthena saññāpetabbo. Ayañhettha attho – yvāyaṃ ‘sampajānamusāvādo hotī’ti vutto, so āpattito kiṃ hoti? ‘Katarāpatti hotī’ti attho. ‘Dukkaṭāpatti hoti’. Sā ca kho na musāvādalakkhaṇena, bhagavato pana vacanena vacīdvāre akiriyasamuṭṭhānā āpatti hotīti veditabbā. Vuttampi cetaṃ –
‘‘анаалабанд̇о мануж̇зна гзнажи,
‘‘Anālapanto manujena kenaci,
ваажааг̇ирам̣ но жа барз бхан̣зяяа;
Vācāgiraṃ no ca pare bhaṇeyya;
аабаж̇ж̇зяяа ваажасигам̣ на гааяигам̣,
Āpajjeyya vācasikaṃ na kāyikaṃ,
бан̃хаа мзсаа гусалзхи жинд̇ид̇аа’’д̇и. (бади. 479);
Pañhā mesā kusalehi cintitā’’ti. (paṭi. 479);
звам̣ агусалам̣ важийгаммам̣ на манод̣̇ваарз самудтаад̇ийд̇и нидтамзд̇т̇а г̇анд̇аб̣б̣ам̣.
Evaṃ akusalaṃ vacīkammaṃ na manodvāre samuṭṭhātīti niṭṭhamettha gantabbaṃ.
яад̣̇аа бана абхиж̇жхаасахаг̇ад̇зна жзд̇асаа гааяан̇г̇ам̣ жобзнд̇о хад̇т̇аг̇г̇аахаад̣̇ийни гарод̇и, б̣яаабаад̣̇асахаг̇ад̇зна жзд̇асаа д̣̇ан̣д̣абараамаасаад̣̇ийни, мижчаад̣̇идтисахаг̇ад̇зна жзд̇асаа ‘канд̣̇асиваад̣̇аяо сздтаа’д̇и д̇зсам̣ абхиваад̣̇анаан̃ж̇алигаммабхууд̇абийтагабарибхан̣д̣аад̣̇ийни гарод̇и, д̇ад̣̇аа гаммам̣ маногаммам̣ ход̇и, д̣̇ваарам̣ бана гааяад̣̇ваарам̣. звам̣ агусалам̣ маногаммам̣ гааяад̣̇ваарз самудтаад̇и. жзд̇анаа банзд̇т̇а аб̣б̣охааригаа.
Yadā pana abhijjhāsahagatena cetasā kāyaṅgaṃ copento hatthaggāhādīni karoti, byāpādasahagatena cetasā daṇḍaparāmāsādīni, micchādiṭṭhisahagatena cetasā ‘khandasivādayo seṭṭhā’ti tesaṃ abhivādanaañjalikammabhūtapīṭhakaparibhaṇḍādīni karoti, tadā kammaṃ manokammaṃ hoti, dvāraṃ pana kāyadvāraṃ. Evaṃ akusalaṃ manokammaṃ kāyadvāre samuṭṭhāti. Cetanā panettha abbohārikā.
яад̣̇аа бана абхиж̇жхаасахаг̇ад̇зна жзд̇асаа ваажан̇г̇ам̣ жобзнд̇о ‘ахо вад̇а яам̣ барасса, д̇ам̣ мамассаа’д̇и баравид̇д̇уубагаран̣ам̣ абхиж̇жхааяад̇и, б̣яаабаад̣̇асахаг̇ад̇зна жзд̇асаа ‘имз сад̇д̇аа хан̃н̃анд̇у ваа, б̣аж̇жханд̇у ваа, ужчиж̇ж̇анд̇у ваа, маа ваа ахзсу’нд̇и вад̣̇ад̇и, мижчаад̣̇идтисахаг̇ад̇зна жзд̇асаа ‘над̇т̇и д̣̇иннам̣, над̇т̇и яидта’нд̇иаад̣̇ийни вад̣̇ад̇и, д̇ад̣̇аа гаммам̣ маногаммам̣ ход̇и, д̣̇ваарам̣ бана важийд̣̇ваарам̣. звам̣ агусалам̣ маногаммам̣ важийд̣̇ваарз самудтаад̇и. жзд̇анаа банзд̇т̇а аб̣б̣охааригаа.
Yadā pana abhijjhāsahagatena cetasā vācaṅgaṃ copento ‘aho vata yaṃ parassa, taṃ mamassā’ti paravittūpakaraṇaṃ abhijjhāyati, byāpādasahagatena cetasā ‘ime sattā haññantu vā, bajjhantu vā, ucchijjantu vā, mā vā ahesu’nti vadati, micchādiṭṭhisahagatena cetasā ‘natthi dinnaṃ, natthi yiṭṭha’ntiādīni vadati, tadā kammaṃ manokammaṃ hoti, dvāraṃ pana vacīdvāraṃ. Evaṃ akusalaṃ manokammaṃ vacīdvāre samuṭṭhāti. Cetanā panettha abbohārikā.
яад̣̇аа бана гааяан̇г̇аваажан̇г̇аани ажобзд̇ваа рахо нисинно абхиж̇жхааб̣яаабаад̣̇амижчаад̣̇идтисахаг̇ад̇аани жид̇д̇аани уббаад̣̇зд̇и, д̇ад̣̇аа гаммам̣ маногаммам̣, д̣̇ваарамби манод̣̇ваарамзва. звам̣ агусалам̣ маногаммам̣ манод̣̇ваарз самудтаад̇и. имасмим̣ бана таанз жзд̇анааби жзд̇анаасамбаяуд̇д̇агаа д̇хаммааби манод̣̇ваарзязва самудтаханд̇и. звам̣ агусалам̣ маногаммам̣ д̇ийсуби д̣̇ваарзсу самудтаад̇ийд̇и взд̣̇ид̇аб̣б̣ам̣.
Yadā pana kāyaṅgavācaṅgāni acopetvā raho nisinno abhijjhābyāpādamicchādiṭṭhisahagatāni cittāni uppādeti, tadā kammaṃ manokammaṃ, dvārampi manodvārameva. Evaṃ akusalaṃ manokammaṃ manodvāre samuṭṭhāti. Imasmiṃ pana ṭhāne cetanāpi cetanāsampayuttakā dhammāpi manodvāreyeva samuṭṭhahanti. Evaṃ akusalaṃ manokammaṃ tīsupi dvāresu samuṭṭhātīti veditabbaṃ.
яам̣ бана вуд̇д̇ам̣ ‘д̇ат̇аа гусалаани гааяаважийманогаммааний’д̇и, д̇ад̇рааяам̣ наяо – яад̣̇аа хи гзнажи гааран̣зна вад̇д̇ум̣ асаггонд̇о ‘баан̣аад̇ибаад̇аа ад̣̇иннаад̣̇аанаа гаамзсумижчаажаараа бадивирамаамий’д̇и имаани сигкаабад̣̇аани хад̇т̇амуд̣̇д̣̇ааяа г̇ан̣хаад̇и, д̇ад̣̇аа гаммам̣ гааяагаммам̣ д̣̇ваарамби гааяад̣̇ваарамзва. звам̣ гусалам̣ гааяагаммам̣ гааяад̣̇ваарз самудтаад̇и. д̇зхи жид̇д̇зхи сахаг̇ад̇аа анабхиж̇жхаад̣̇аяо жзд̇анаабагкигаа ваа хонд̇и, аб̣б̣охааригаа ваа.
Yaṃ pana vuttaṃ ‘tathā kusalāni kāyavacīmanokammānī’ti, tatrāyaṃ nayo – yadā hi kenaci kāraṇena vattuṃ asakkonto ‘pāṇātipātā adinnādānā kāmesumicchācārā paṭiviramāmī’ti imāni sikkhāpadāni hatthamuddāya gaṇhāti, tadā kammaṃ kāyakammaṃ dvārampi kāyadvārameva. Evaṃ kusalaṃ kāyakammaṃ kāyadvāre samuṭṭhāti. Tehi cittehi sahagatā anabhijjhādayo cetanāpakkhikā vā honti, abbohārikā vā.
яад̣̇аа бана д̇аанзва сигкаабад̣̇аани важийбхзд̣̇ам̣ гад̇ваа г̇ан̣хаад̇и, д̇ад̣̇аа гаммам̣ гааяагаммам̣, д̣̇ваарам̣ бана важийд̣̇ваарам̣ ход̇и. звам̣ гусалам̣ гааяагаммам̣ важийд̣̇ваарз самудтаад̇и. д̇зхи жид̇д̇зхи сахаг̇ад̇аа анабхиж̇жхаад̣̇аяо жзд̇анаабагкигаа ваа хонд̇и, аб̣б̣охааригаа ваа.
Yadā pana tāneva sikkhāpadāni vacībhedaṃ katvā gaṇhāti, tadā kammaṃ kāyakammaṃ, dvāraṃ pana vacīdvāraṃ hoti. Evaṃ kusalaṃ kāyakammaṃ vacīdvāre samuṭṭhāti. Tehi cittehi sahagatā anabhijjhādayo cetanāpakkhikā vā honti, abbohārikā vā.
яад̣̇аа бана д̇зсу сигкаабад̣̇зсу д̣̇ияяамаанзсу гааяан̇г̇аваажан̇г̇аани ажобзд̇ваа манасаава ‘баан̣аад̇ибаад̇аа ад̣̇иннаад̣̇аанаа гаамзсумижчаажаараа бадивирамаамий’д̇и г̇ан̣хаад̇и, д̇ад̣̇аа гаммам̣ гааяагаммам̣, д̣̇ваарам̣ бана манод̣̇ваарам̣ ход̇и. звам̣ гусалам̣ гааяагаммам̣ манод̣̇ваарз самудтаад̇и. д̇зхи жид̇д̇зхи сахаг̇ад̇аа анабхиж̇жхаад̣̇аяо жзд̇анаабагкигаа ваа хонд̇и, аб̣б̣охааригаа ваа.
Yadā pana tesu sikkhāpadesu diyyamānesu kāyaṅgavācaṅgāni acopetvā manasāva ‘pāṇātipātā adinnādānā kāmesumicchācārā paṭiviramāmī’ti gaṇhāti, tadā kammaṃ kāyakammaṃ, dvāraṃ pana manodvāraṃ hoti. Evaṃ kusalaṃ kāyakammaṃ manodvāre samuṭṭhāti. Tehi cittehi sahagatā anabhijjhādayo cetanāpakkhikā vā honti, abbohārikā vā.
‘мусааваад̣̇аа взраман̣ий’аад̣̇ийни бана жад̇д̇аари сигкаабад̣̇аани вуд̇д̇анаязнзва гааяаад̣̇ийхи г̇ан̣ханд̇асса гусалам̣ важийгаммам̣ д̇ийсу д̣̇ваарзсу самудтаад̇ийд̇и взд̣̇ид̇аб̣б̣ам̣. ид̇хааби анабхиж̇жхаад̣̇аяо жзд̇анаабагкигаа ваа хонд̇и, аб̣б̣охааригаа ваа.
‘Musāvādā veramaṇī’ādīni pana cattāri sikkhāpadāni vuttanayeneva kāyādīhi gaṇhantassa kusalaṃ vacīkammaṃ tīsu dvāresu samuṭṭhātīti veditabbaṃ. Idhāpi anabhijjhādayo cetanāpakkhikā vā honti, abbohārikā vā.
анабхиж̇жхаад̣̇исахаг̇ад̇зхи бана жид̇д̇зхи гааяан̇г̇ам̣ жобзд̇ваа жзд̇ияан̇г̇ан̣асаммаж̇ж̇анаг̇анд̇хамаалаад̣̇ибууж̇анажзд̇ияаванд̣̇анаад̣̇ийни гаронд̇асса гаммам̣ маногаммам̣ ход̇и, д̣̇ваарам̣ бана гааяад̣̇ваарам̣. звам̣ гусалам̣ маногаммам̣ гааяад̣̇ваарз самудтаад̇и. жзд̇анаа банзд̇т̇а аб̣б̣охааригаа. анабхиж̇жхаасахаг̇ад̇зна жид̇д̇зна ваажан̇г̇ам̣ жобзд̇ваа ‘ахо вад̇а яам̣ барасса вид̇д̇уубагаран̣ам̣ на д̇ам̣ мамассаа’д̇и анабхиж̇жхааяад̇о аб̣яаабаад̣̇асахаг̇ад̇зна жид̇д̇зна ‘саб̣б̣з сад̇д̇аа авзраа аб̣яааб̣аж̇жхаа анийгхаа сукий ад̇д̇аанам̣ барихаранд̇уу’д̇и вад̣̇анд̇асса саммаад̣̇идтисахаг̇ад̇зна жид̇д̇зна ‘ад̇т̇и д̣̇инна’нд̇иаад̣̇ийни уд̣̇аахаранд̇асса гаммам̣ маногаммам̣ ход̇и, д̣̇ваарам̣ бана важийд̣̇ваарам̣. звам̣ гусалам̣ маногаммам̣ важийд̣̇ваарз самудтаад̇и. жзд̇анаа банзд̇т̇а аб̣б̣охааригаа. гааяан̇г̇аваажан̇г̇аани бана ажобзд̇ваа рахо нисиннасса манасаава анабхиж̇жхаад̣̇исахаг̇ад̇аани жид̇д̇аани уббаад̣̇знд̇асса гаммам̣ маногаммам̣, д̣̇ваарамби манод̣̇ваарамзва. звам̣ гусалам̣ маногаммам̣ манод̣̇ваарз самудтаад̇и. имасмим̣ бана таанз жзд̇анааби жзд̇анаасамбаяуд̇д̇агаа д̇хаммааби манод̣̇ваарзязва самудтаханд̇и.
Anabhijjhādisahagatehi pana cittehi kāyaṅgaṃ copetvā cetiyaṅgaṇasammajjanagandhamālādipūjanacetiyavandanādīni karontassa kammaṃ manokammaṃ hoti, dvāraṃ pana kāyadvāraṃ. Evaṃ kusalaṃ manokammaṃ kāyadvāre samuṭṭhāti. Cetanā panettha abbohārikā. Anabhijjhāsahagatena cittena vācaṅgaṃ copetvā ‘aho vata yaṃ parassa vittūpakaraṇaṃ na taṃ mamassā’ti anabhijjhāyato abyāpādasahagatena cittena ‘sabbe sattā averā abyābajjhā anīghā sukhī attānaṃ pariharantū’ti vadantassa sammādiṭṭhisahagatena cittena ‘atthi dinna’ntiādīni udāharantassa kammaṃ manokammaṃ hoti, dvāraṃ pana vacīdvāraṃ. Evaṃ kusalaṃ manokammaṃ vacīdvāre samuṭṭhāti. Cetanā panettha abbohārikā. Kāyaṅgavācaṅgāni pana acopetvā raho nisinnassa manasāva anabhijjhādisahagatāni cittāni uppādentassa kammaṃ manokammaṃ, dvārampi manodvārameva. Evaṃ kusalaṃ manokammaṃ manodvāre samuṭṭhāti. Imasmiṃ pana ṭhāne cetanāpi cetanāsampayuttakā dhammāpi manodvāreyeva samuṭṭhahanti.
д̇ад̇т̇а аан̣ад̇д̇исамудтид̇зсу баан̣аад̇ибаад̇аад̣̇иннаад̣̇аанзсу гаммамби гааяагаммам̣ д̣̇ваарамби гаммавасзнзва гааяад̣̇вааранд̇и вад̣̇анд̇о гаммам̣ рагкад̇и, д̣̇ваарам̣ бхинд̣̇ад̇и наама. хад̇т̇амуд̣̇д̣̇ааяа самудтид̇зсу мусааваад̣̇аад̣̇ийсу д̣̇ваарамби гааяад̣̇ваарам̣, гаммамби д̣̇вааравасзнзва гааяагамманд̇и вад̣̇анд̇о д̣̇ваарам̣ рагкад̇и гаммам̣ бхинд̣̇ад̇и наама. д̇асмаа ‘гаммам̣ рагкаамий’д̇и д̣̇ваарам̣ на бхинд̣̇ид̇аб̣б̣ам̣, ‘д̣̇ваарам̣ рагкаамий’д̇и гаммам̣ на бхинд̣̇ид̇аб̣б̣ам̣. яат̇аавуд̇д̇знзва бана наязна гамман̃жа д̣̇вааран̃жа взд̣̇ид̇аб̣б̣ам̣. звам̣ гат̇знд̇о хи нзва гаммам̣ на д̣̇ваарам̣ бхинд̣̇ад̇ийд̇и.
Tattha āṇattisamuṭṭhitesu pāṇātipātaadinnādānesu kammampi kāyakammaṃ dvārampi kammavaseneva kāyadvāranti vadanto kammaṃ rakkhati, dvāraṃ bhindati nāma. Hatthamuddāya samuṭṭhitesu musāvādādīsu dvārampi kāyadvāraṃ, kammampi dvāravaseneva kāyakammanti vadanto dvāraṃ rakkhati kammaṃ bhindati nāma. Tasmā ‘kammaṃ rakkhāmī’ti dvāraṃ na bhinditabbaṃ, ‘dvāraṃ rakkhāmī’ti kammaṃ na bhinditabbaṃ. Yathāvutteneva pana nayena kammañca dvārañca veditabbaṃ. Evaṃ kathento hi neva kammaṃ na dvāraṃ bhindatīti.
гаммагат̇аа нидтид̇аа.
Kammakathā niṭṭhitā.
ид̣̇аани ‘бан̃жа вин̃н̃аан̣аани бан̃жавин̃н̃аан̣ад̣̇ваарааний’д̇иаад̣̇ийсу жагкувин̃н̃аан̣ам̣ сод̇авин̃н̃аан̣ам̣ гхаанавин̃н̃аан̣ам̣ ж̇ивхаавин̃н̃аан̣ам̣ гааяавин̃н̃аан̣анд̇и имаани бан̃жа вин̃н̃аан̣аани наама. жагкувин̃н̃аан̣ад̣̇ваарам̣ сод̇а… гхаана… ж̇ивхаа… гааяавин̃н̃аан̣ад̣̇вааранд̇и имаани бан̃жа вин̃н̃аан̣ад̣̇ваараани наама. имзсам̣ бан̃жаннам̣ д̣̇ваараанам̣ васзна уббаннаа жзд̇анаа нзва гааяагаммам̣ ход̇и, на важийгаммам̣, маногаммамзва ход̇ийд̇и взд̣̇ид̇аб̣б̣аа. жагкусампассо сод̇а… гхаана… ж̇ивхаа… гааяа… маносампассод̇и имз бана ча сампассаа наама. жагкусампассад̣̇ваарам̣ сод̇а… гхаана… ж̇ивхаа… гааяа… маносампассад̣̇вааранд̇и имаани ча сампассад̣̇ваараани наама.
Idāni ‘pañca viññāṇāni pañcaviññāṇadvārānī’tiādīsu cakkhuviññāṇaṃ sotaviññāṇaṃ ghānaviññāṇaṃ jivhāviññāṇaṃ kāyaviññāṇanti imāni pañca viññāṇāni nāma. Cakkhuviññāṇadvāraṃ sota… ghāna… jivhā… kāyaviññāṇadvāranti imāni pañca viññāṇadvārāni nāma. Imesaṃ pañcannaṃ dvārānaṃ vasena uppannā cetanā neva kāyakammaṃ hoti, na vacīkammaṃ, manokammameva hotīti veditabbā. Cakkhusamphasso sota… ghāna… jivhā… kāya… manosamphassoti ime pana cha samphassā nāma. Cakkhusamphassadvāraṃ sota… ghāna… jivhā… kāya… manosamphassadvāranti imāni cha samphassadvārāni nāma.
жагкуасам̣варо сод̇а… гхаана… ж̇ивхаа… басаад̣̇агааяа… жобанагааяаасам̣варо ваажааасам̣варо маноасам̣варод̇и – имз адта асам̣вараа наама. д̇з ад̇т̇ад̇о ‘д̣̇уссийляам̣ мудтассажжам̣ ан̃н̃аан̣ам̣ агканд̇и госаж̇ж̇а’нд̇и имз бан̃жа д̇хаммаа хонд̇и. д̇зсу згад̇хаммоби бан̃жад̣̇ваарз водтаб̣б̣анабарияосаанзсу жид̇д̇зсу нуббаж̇ж̇ад̇и, ж̇аванагкан̣зязва уббаж̇ж̇ад̇и. ж̇аванз уббанноби бан̃жад̣̇ваарз асам̣варод̇и вужжад̇и.
Cakkhuasaṃvaro sota… ghāna… jivhā… pasādakāya… copanakāyaasaṃvaro vācāasaṃvaro manoasaṃvaroti – ime aṭṭha asaṃvarā nāma. Te atthato ‘dussīlyaṃ muṭṭhassaccaṃ aññāṇaṃ akkhanti kosajja’nti ime pañca dhammā honti. Tesu ekadhammopi pañcadvāre voṭṭhabbanapariyosānesu cittesu nuppajjati, javanakkhaṇeyeva uppajjati. Javane uppannopi pañcadvāre asaṃvaroti vuccati.
жагкувин̃н̃аан̣асахаж̇аад̇о хи пассо жагкусампассо наама, жзд̇анаа маногаммам̣ наама, д̇ам̣ жид̇д̇ам̣ маногаммад̣̇ваарам̣ наама. зд̇т̇а бан̃жавид̇хо асам̣варо над̇т̇и . самбадижчанасахаж̇аад̇о пассо маносампассо наама, жзд̇анаа маногаммам̣ наама, д̇ам̣ жид̇д̇ам̣ маногаммад̣̇ваарам̣ наама. зд̇т̇ааби асам̣варо над̇т̇и. санд̇ийран̣аводтаб̣б̣анзсуби зсзва наяо. ж̇аванасахаж̇аад̇о бана пассо маносампассо наама, жзд̇анаа маногаммам̣ наама, д̇ам̣ жид̇д̇ам̣ маногаммад̣̇ваарам̣ наама. зд̇т̇а асам̣варо жагкуасам̣варо наама ход̇и. сод̇агхаанаж̇ивхаабасаад̣̇агааяад̣̇ваарзсуби зсзва наяо. яад̣̇аа бана руубаад̣̇ийсу ан̃н̃ад̇араарамман̣ам̣ манод̣̇вааригаж̇аванам̣ винаа важийд̣̇ваарзна суд̣̇д̇хам̣ гааяад̣̇ваарасан̇каад̇ам̣ жобанам̣ баабаяамаанам̣ уббаж̇ж̇ад̇и, д̇ад̣̇аа д̇зна жид̇д̇зна сахаж̇аад̇о пассо маносампассо наама, жзд̇анаа гааяагаммам̣ наама, д̇ам̣ бана жид̇д̇ам̣ аб̣б̣охааригам̣, жобанасса уббаннад̇д̇аа манод̣̇вааранд̇и сан̇кяам̣ на г̇ажчад̇и. зд̇т̇а асам̣варо жобанагааяаасам̣варо наама. яад̣̇аа д̇аад̣̇исам̣язва ж̇аванам̣ винаа гааяад̣̇ваарзна суд̣̇д̇хам̣ важийд̣̇ваарасан̇каад̇ам̣ жобанам̣ баабаяамаанам̣ уббаж̇ж̇ад̇и, д̇ад̣̇аа д̇зна жид̇д̇зна сахаж̇аад̇о пассо маносампассо наама, жзд̇анаа важийгаммам̣ наама, д̇ам̣ бана жид̇д̇ам̣ аб̣б̣охааригам̣, жобанасса уббаннад̇д̇аа манод̣̇вааранд̇и сан̇кяам̣ на г̇ажчад̇и. зд̇т̇а асам̣варо ваажааасам̣варо наама. яад̣̇аа бана д̇аад̣̇исам̣ ж̇аванажид̇д̇ам̣ винаа гааяаважийд̣̇ваарзхи суд̣̇д̇хам̣ манод̣̇ваарамзва худ̇ваа уббаж̇ж̇ад̇и, д̇ад̣̇аа д̇зна жид̇д̇зна сахаж̇аад̇о пассо маносампассо наама, жзд̇анаа маногаммам̣ наама, д̇ам̣ бана жид̇д̇ам̣ маногаммад̣̇ваарам̣ наама. зд̇т̇а асам̣варо маноасам̣варо наама. ид̇и имзсам̣ адтаннам̣ асам̣вараанам̣ васзна жагкуасам̣варад̣̇ваарам̣, сод̇а… гхаана… ж̇ивхаа… басаад̣̇агааяа… жобанагааяа… ваажаа… маноасам̣варад̣̇вааранд̇и имаани адта асам̣варад̣̇ваараани взд̣̇ид̇аб̣б̣аани.
Cakkhuviññāṇasahajāto hi phasso cakkhusamphasso nāma, cetanā manokammaṃ nāma, taṃ cittaṃ manokammadvāraṃ nāma. Ettha pañcavidho asaṃvaro natthi . Sampaṭicchanasahajāto phasso manosamphasso nāma, cetanā manokammaṃ nāma, taṃ cittaṃ manokammadvāraṃ nāma. Etthāpi asaṃvaro natthi. Santīraṇavoṭṭhabbanesupi eseva nayo. Javanasahajāto pana phasso manosamphasso nāma, cetanā manokammaṃ nāma, taṃ cittaṃ manokammadvāraṃ nāma. Ettha asaṃvaro cakkhuasaṃvaro nāma hoti. Sotaghānajivhāpasādakāyadvāresupi eseva nayo. Yadā pana rūpādīsu aññatarārammaṇaṃ manodvārikajavanaṃ vinā vacīdvārena suddhaṃ kāyadvārasaṅkhātaṃ copanaṃ pāpayamānaṃ uppajjati, tadā tena cittena sahajāto phasso manosamphasso nāma, cetanā kāyakammaṃ nāma, taṃ pana cittaṃ abbohārikaṃ, copanassa uppannattā manodvāranti saṅkhyaṃ na gacchati. Ettha asaṃvaro copanakāyaasaṃvaro nāma. Yadā tādisaṃyeva javanaṃ vinā kāyadvārena suddhaṃ vacīdvārasaṅkhātaṃ copanaṃ pāpayamānaṃ uppajjati, tadā tena cittena sahajāto phasso manosamphasso nāma, cetanā vacīkammaṃ nāma, taṃ pana cittaṃ abbohārikaṃ, copanassa uppannattā manodvāranti saṅkhyaṃ na gacchati. Ettha asaṃvaro vācāasaṃvaro nāma. Yadā pana tādisaṃ javanacittaṃ vinā kāyavacīdvārehi suddhaṃ manodvārameva hutvā uppajjati, tadā tena cittena sahajāto phasso manosamphasso nāma, cetanā manokammaṃ nāma, taṃ pana cittaṃ manokammadvāraṃ nāma. Ettha asaṃvaro manoasaṃvaro nāma. Iti imesaṃ aṭṭhannaṃ asaṃvarānaṃ vasena cakkhuasaṃvaradvāraṃ, sota… ghāna… jivhā… pasādakāya… copanakāya… vācā… manoasaṃvaradvāranti imāni aṭṭha asaṃvaradvārāni veditabbāni.
жагкусам̣варо сод̇а… гхаана… ж̇ивхаа… басаад̣̇агааяа… жобанагааяа… ваажаа… маносам̣варод̇и имз бана адта сам̣вараа наама. д̇з ад̇т̇ад̇о ‘сийлам̣ сад̇и н̃аан̣ам̣ канд̇и вийрияа’нд̇и имз бан̃жа д̇хаммаа хонд̇и. д̇зсуби згад̇хаммоби бан̃жад̣̇ваарз водтаб̣б̣анабарияосаанзсу жид̇д̇зсу нуббаж̇ж̇ад̇и. ж̇аванагкан̣зязва уббаж̇ж̇ад̇и. ж̇аванз уббанноби бан̃жад̣̇ваарз сам̣варод̇и вужжад̇и. д̇асса саб̣б̣ассааби жагкувин̃н̃аан̣асахаж̇аад̇о хи пассо жагкусампассод̇иаад̣̇инаа асам̣варз вуд̇д̇анаязнзва уббад̇д̇и взд̣̇ид̇аб̣б̣аа. ид̇и имзсам̣ адтаннам̣ сам̣вараанам̣ васзна жагкусам̣варад̣̇ваарам̣…бз… маносам̣варад̣̇вааранд̇и имаани адта сам̣варад̣̇ваараани взд̣̇ид̇аб̣б̣аани.
Cakkhusaṃvaro sota… ghāna… jivhā… pasādakāya… copanakāya… vācā… manosaṃvaroti ime pana aṭṭha saṃvarā nāma. Te atthato ‘sīlaṃ sati ñāṇaṃ khanti vīriya’nti ime pañca dhammā honti. Tesupi ekadhammopi pañcadvāre voṭṭhabbanapariyosānesu cittesu nuppajjati. Javanakkhaṇeyeva uppajjati. Javane uppannopi pañcadvāre saṃvaroti vuccati. Tassa sabbassāpi cakkhuviññāṇasahajāto hi phasso cakkhusamphassotiādinā asaṃvare vuttanayeneva uppatti veditabbā. Iti imesaṃ aṭṭhannaṃ saṃvarānaṃ vasena cakkhusaṃvaradvāraṃ…pe… manosaṃvaradvāranti imāni aṭṭha saṃvaradvārāni veditabbāni.
