| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೨೧. ಏಕವೀಸತಿಮವಗ್ಗೋ
21. Ekavīsatimavaggo
(೨೦೭) ೮. ಕಮ್ಮಕಥಾ
(207) 8. Kammakathā
೮೮೯. ಸಬ್ಬೇ ಕಮ್ಮಾ ನಿಯತಾತಿ? ಆಮನ್ತಾ। ಮಿಚ್ಛತ್ತನಿಯತಾತಿ? ನ ಹೇವಂ ವತ್ತಬ್ಬೇ…ಪೇ॰… ಸಮ್ಮತ್ತನಿಯತಾತಿ? ನ ಹೇವಂ ವತ್ತಬ್ಬೇ…ಪೇ॰… ನತ್ಥಿ ಅನಿಯತೋ ರಾಸೀತಿ? ನ ಹೇವಂ ವತ್ತಬ್ಬೇ…ಪೇ॰… ನನು ಅತ್ಥಿ ಅನಿಯತೋ ರಾಸೀತಿ? ಆಮನ್ತಾ। ಹಞ್ಚಿ ಅತ್ಥಿ ಅನಿಯತೋ ರಾಸಿ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬೇ ಕಮ್ಮಾ ನಿಯತಾ’’ತಿ।
889. Sabbe kammā niyatāti? Āmantā. Micchattaniyatāti? Na hevaṃ vattabbe…pe… sammattaniyatāti? Na hevaṃ vattabbe…pe… natthi aniyato rāsīti? Na hevaṃ vattabbe…pe… nanu atthi aniyato rāsīti? Āmantā. Hañci atthi aniyato rāsi, no ca vata re vattabbe – ‘‘sabbe kammā niyatā’’ti.
ಸಬ್ಬೇ ಕಮ್ಮಾ ನಿಯತಾತಿ? ಆಮನ್ತಾ। ನನು ತಯೋ ರಾಸೀ ವುತ್ತಾ ಭಗವತಾ – ಮಿಚ್ಛತ್ತನಿಯತೋ ರಾಸಿ, ಸಮ್ಮತ್ತನಿಯತೋ ರಾಸಿ, ಅನಿಯತೋ ರಾಸೀತಿ? ಆಮನ್ತಾ। ಹಞ್ಚಿ ತಯೋ ರಾಸೀ ವುತ್ತಾ ಭಗವತಾ – ಮಿಚ್ಛತ್ತನಿಯತೋ ರಾಸಿ, ಸಮ್ಮತ್ತನಿಯತೋ ರಾಸಿ, ಅನಿಯತೋ ರಾಸಿ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬೇ ಕಮ್ಮಾ ನಿಯತಾ’’ತಿ।
Sabbe kammā niyatāti? Āmantā. Nanu tayo rāsī vuttā bhagavatā – micchattaniyato rāsi, sammattaniyato rāsi, aniyato rāsīti? Āmantā. Hañci tayo rāsī vuttā bhagavatā – micchattaniyato rāsi, sammattaniyato rāsi, aniyato rāsi, no ca vata re vattabbe – ‘‘sabbe kammā niyatā’’ti.
೮೯೦. ದಿಟ್ಠಧಮ್ಮವೇದನೀಯಂ ಕಮ್ಮಂ ದಿಟ್ಠಧಮ್ಮವೇದನೀಯಟ್ಠೇನ ನಿಯತನ್ತಿ? ಆಮನ್ತಾ। ಮಿಚ್ಛತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಸಮ್ಮತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ॰…। ಉಪಪಜ್ಜವೇದನೀಯಂ ಕಮ್ಮಂ…ಪೇ॰… ಅಪರಾಪರಿಯವೇದನೀಯಂ ಕಮ್ಮಂ ಅಪರಾಪರಿಯವೇದನೀಯಟ್ಠೇನ ನಿಯತನ್ತಿ? ಆಮನ್ತಾ। ಮಿಚ್ಛತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಸಮ್ಮತ್ತನಿಯತನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
890. Diṭṭhadhammavedanīyaṃ kammaṃ diṭṭhadhammavedanīyaṭṭhena niyatanti? Āmantā. Micchattaniyatanti? Na hevaṃ vattabbe…pe… sammattaniyatanti? Na hevaṃ vattabbe…pe…. Upapajjavedanīyaṃ kammaṃ…pe… aparāpariyavedanīyaṃ kammaṃ aparāpariyavedanīyaṭṭhena niyatanti? Āmantā. Micchattaniyatanti? Na hevaṃ vattabbe…pe… sammattaniyatanti? Na hevaṃ vattabbe…pe….
೮೯೧. ನ ವತ್ತಬ್ಬಂ – ದಿಟ್ಠಧಮ್ಮವೇದನೀಯಂ ಕಮ್ಮಂ ದಿಟ್ಠಧಮ್ಮವೇದನೀಯಟ್ಠೇನ ನಿಯತಂ, ಉಪಪಜ್ಜವೇದನೀಯಂ ಕಮ್ಮಂ…ಪೇ॰… ಅಪರಾಪರಿಯವೇದನೀಯಂ ಕಮ್ಮಂ ಅಪರಾಪರಿಯವೇದನೀಯಟ್ಠೇನ ನಿಯತನ್ತಿ? ಆಮನ್ತಾ। ದಿಟ್ಠಧಮ್ಮವೇದನೀಯಂ ಕಮ್ಮಂ ಉಪಪಜ್ಜವೇದನೀಯಂ ಹೋತಿ, ಅಪರಾಪರಿಯವೇದನೀಯಂ ಹೋತಿ…ಪೇ॰… ಉಪಪಜ್ಜವೇದನೀಯಂ ಕಮ್ಮಂ ದಿಟ್ಠಧಮ್ಮವೇದನೀಯಂ ಹೋತಿ, ಅಪರಾಪರಿಯವೇದನೀಯಂ ಹೋತಿ…ಪೇ॰… ಅಪರಾಪರಿಯವೇದನೀಯಂ ಕಮ್ಮಂ ದಿಟ್ಠಧಮ್ಮವೇದನೀಯಂ ಹೋತಿ, ಉಪಪಜ್ಜವೇದನೀಯಂ ಹೋತೀತಿ? ನ ಹೇವಂ ವತ್ತಬ್ಬೇ । ತೇನ ಹಿ ದಿಟ್ಠಧಮ್ಮವೇದನೀಯಂ ಕಮ್ಮಂ ದಿಟ್ಠಧಮ್ಮವೇದನೀಯಟ್ಠೇನ ನಿಯತಂ, ಉಪಪಜ್ಜವೇದನೀಯಂ ಕಮ್ಮಂ…ಪೇ॰… ಅಪರಾಪರಿಯವೇದನೀಯಂ ಕಮ್ಮಂ ಅಪರಾಪರಿಯವೇದನೀಯಟ್ಠೇನ ನಿಯತನ್ತಿ।
891. Na vattabbaṃ – diṭṭhadhammavedanīyaṃ kammaṃ diṭṭhadhammavedanīyaṭṭhena niyataṃ, upapajjavedanīyaṃ kammaṃ…pe… aparāpariyavedanīyaṃ kammaṃ aparāpariyavedanīyaṭṭhena niyatanti? Āmantā. Diṭṭhadhammavedanīyaṃ kammaṃ upapajjavedanīyaṃ hoti, aparāpariyavedanīyaṃ hoti…pe… upapajjavedanīyaṃ kammaṃ diṭṭhadhammavedanīyaṃ hoti, aparāpariyavedanīyaṃ hoti…pe… aparāpariyavedanīyaṃ kammaṃ diṭṭhadhammavedanīyaṃ hoti, upapajjavedanīyaṃ hotīti? Na hevaṃ vattabbe . Tena hi diṭṭhadhammavedanīyaṃ kammaṃ diṭṭhadhammavedanīyaṭṭhena niyataṃ, upapajjavedanīyaṃ kammaṃ…pe… aparāpariyavedanīyaṃ kammaṃ aparāpariyavedanīyaṭṭhena niyatanti.
ಕಮ್ಮಕಥಾ ನಿಟ್ಠಿತಾ।
Kammakathā niṭṭhitā.
ಏಕವೀಸತಿಮವಗ್ಗೋ।
Ekavīsatimavaggo.
ತಸ್ಸುದ್ದಾನಂ –
Tassuddānaṃ –
ಸಾಸನಂ ನವಂ ಕತಂ ಅತ್ಥಿ ಕೋಚಿ ತಥಾಗತಸ್ಸ ಸಾಸನಂ ನವಂ ಕರೋತಿ ಲಬ್ಭಾ ತಥಾಗತಸ್ಸ ಸಾಸನಂ ಪುನ ನವಂ ಕಾತುಂ, ಪುಥುಜ್ಜನೋ ತೇಧಾತುಕೇಹಿ ಧಮ್ಮೇಹಿ ಅವಿವಿತ್ತೋ, ಅತ್ಥಿ ಕಿಞ್ಚಿ ಸಂಯೋಜನಂ ಅಪ್ಪಹಾಯ ಅರಹತ್ತಪ್ಪತ್ತಿ, ಅತ್ಥಿ ಅಧಿಪ್ಪಾಯಿದ್ಧಿ ಬುದ್ಧಾನಂ ವಾ ಸಾವಕಾನಂ ವಾ, ಅತ್ಥಿ ಬುದ್ಧಾನಂ ಬುದ್ಧೇಹಿ ಹೀನಾತಿರೇಕತಾ, ಸಬ್ಬಾ ದಿಸಾ ಬುದ್ಧಾ ತಿಟ್ಠನ್ತಿ, ಸಬ್ಬೇ ಧಮ್ಮಾ ನಿಯತಾ, ಸಬ್ಬೇ ಕಮ್ಮಾ ನಿಯತಾತಿ।
Sāsanaṃ navaṃ kataṃ atthi koci tathāgatassa sāsanaṃ navaṃ karoti labbhā tathāgatassa sāsanaṃ puna navaṃ kātuṃ, puthujjano tedhātukehi dhammehi avivitto, atthi kiñci saṃyojanaṃ appahāya arahattappatti, atthi adhippāyiddhi buddhānaṃ vā sāvakānaṃ vā, atthi buddhānaṃ buddhehi hīnātirekatā, sabbā disā buddhā tiṭṭhanti, sabbe dhammā niyatā, sabbe kammā niyatāti.
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೮. ಕಮ್ಮಕಥಾವಣ್ಣನಾ • 8. Kammakathāvaṇṇanā
