| Library / Tipiṭaka / திபிடக • Tipiṭaka / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā |
கம்மகதா²வண்ணனா
Kammakathāvaṇṇanā
சேதயித்வா கம்மங் கரோதீதி எத்த² யஸ்மா புரிமசேதனாய சேதயித்வா ஸன்னிட்டா²னகம்மங் கரோதி, தஸ்மா சேதனாபுப்³ப³கங் கம்மங் தங்சேதனாஸபா⁴வமேவாதி சேதனங் அஹங் கம்மங் வதா³மீதி அத்தோ². அத² வா ஸமானகாலத்தேபி காரணகிரியா புப்³ப³காலா விய வத்துங் யுத்தா, ப²லகிரியா ச அபரகாலா விய. யஸ்மா ச சேதனாய சேதயித்வா காயவாசாஹி சோபனகிரியங் மனஸா ச அபி⁴ஜ்ஜா²தி³கிரியங் கரோதி, தஸ்மா தஸ்ஸா கிரியாய காரிகங் சேதனங் அஹங் கம்மங் வதா³மீதி அத்தோ². காயே வாதி காயவிஞ்ஞத்திஸங்கா²தே காயே வா. ஸதீதி த⁴ரமானே, அனிரோதி⁴தே வா. காயஸமுட்டா²பிகா சேதனா காயஸஞ்சேதனா. எத்த² ச ஸுக²து³க்கு²ப்பாத³கேன கம்மேன ப⁴விதப்³ப³ங், சேதனா ச ஸுக²து³க்கு²ப்பாதி³கா வுத்தாதி தஸ்ஸா கம்மபா⁴வோ ஸித்³தோ⁴ ஹோதி. ஸஞ்சேதனியந்தி ஸஞ்சேதனஸபா⁴வவந்தங். ஸமித்³தி⁴த்தே²ரேன ‘‘ஸஞ்சேதனியங், ஆவுஸோ…பே॰… மனஸா ஸுக²ங் ஸோ வேத³யதீ’’தி (ம॰ நி॰ 3.300; கதா²॰ 539) அவிப⁴ஜித்வா ப்³யாகதோ. ஸுக²வேத³னீயந்திஆதி³னா பன விப⁴ஜித்வா ப்³யாகாதப்³போ³ ஸோ பஞ்ஹோ, தஸ்மா ஸம்மா ப்³யாகதோ நாம ந ஹோதி. இதரத்³வயேபி ஏஸேவ நயோ. யதா² பன ஸுத்தானி டி²தானி, ததா² சோபனகிரியானிஸ்ஸயபூ⁴தா காயவாசா அபி⁴ஜ்ஜா²தி³கிரியானிஸ்ஸயோ ச மனொத்³வாரானி, யாய பன சேதனாய தேஹி காயாதீ³ஹி கரணபூ⁴தேஹி சோபனாபி⁴ஜ்ஜா²தி³கிரியங் கரொந்தி வாஸிஆதீ³ஹி விய சே²த³னாதி³ங், ஸா சேதனா கம்மந்தி த்³வாரப்பவத்தியம்பி கம்மத்³வாராபே⁴த³னஞ்ச கம்மத்³வாரவவத்தா²னஞ்ச தி³ஸ்ஸதி, ஏவஞ்ச ஸதி ‘‘காயேன சே கதங் கம்ம’’ந்திஆதி³கா³தா²யோ (த⁴॰ ஸ॰ அட்ட²॰ 1 காயகம்மத்³வார) அதிவிய யுஜ்ஜந்தி.
Cetayitvākammaṃ karotīti ettha yasmā purimacetanāya cetayitvā sanniṭṭhānakammaṃ karoti, tasmā cetanāpubbakaṃ kammaṃ taṃcetanāsabhāvamevāti cetanaṃ ahaṃ kammaṃ vadāmīti attho. Atha vā samānakālattepi kāraṇakiriyā pubbakālā viya vattuṃ yuttā, phalakiriyā ca aparakālā viya. Yasmā ca cetanāya cetayitvā kāyavācāhi copanakiriyaṃ manasā ca abhijjhādikiriyaṃ karoti, tasmā tassā kiriyāya kārikaṃ cetanaṃ ahaṃ kammaṃ vadāmīti attho. Kāye vāti kāyaviññattisaṅkhāte kāye vā. Satīti dharamāne, anirodhite vā. Kāyasamuṭṭhāpikā cetanā kāyasañcetanā. Ettha ca sukhadukkhuppādakena kammena bhavitabbaṃ, cetanā ca sukhadukkhuppādikā vuttāti tassā kammabhāvo siddho hoti. Sañcetaniyanti sañcetanasabhāvavantaṃ. Samiddhittherena ‘‘sañcetaniyaṃ, āvuso…pe… manasā sukhaṃ so vedayatī’’ti (ma. ni. 3.300; kathā. 539) avibhajitvā byākato. Sukhavedanīyantiādinā pana vibhajitvā byākātabbo so pañho, tasmā sammā byākato nāma na hoti. Itaradvayepi eseva nayo. Yathā pana suttāni ṭhitāni, tathā copanakiriyānissayabhūtā kāyavācā abhijjhādikiriyānissayo ca manodvārāni, yāya pana cetanāya tehi kāyādīhi karaṇabhūtehi copanābhijjhādikiriyaṃ karonti vāsiādīhi viya chedanādiṃ, sā cetanā kammanti dvārappavattiyampi kammadvārābhedanañca kammadvāravavatthānañca dissati, evañca sati ‘‘kāyena ce kataṃ kamma’’ntiādigāthāyo (dha. sa. aṭṭha. 1 kāyakammadvāra) ativiya yujjanti.
லோகுத்தரமக்³கோ³ இத⁴ லோகியகம்மகதா²யங் அனதி⁴ப்பேதோபி ப⁴ஜாபியமானோ தீணி கம்மானி ப⁴ஜதி. மனேன து³ஸ்ஸீல்யந்தி காயிகவாசஸிகவீதிக்கமவஜ்ஜங் ஸப்³ப³ங் அகுஸலங் ஸங்க³ண்ஹாதி, மிச்சா²தி³ட்டி²ஸங்கப்பவாயாமஸதிஸமாதி⁴ங் வா. தம்பி சேதங் ‘‘மனஸா ஸங்வரோ ஸாதூ⁴’’தி (ஸங்॰ நி॰ 1.116; த⁴॰ ப॰ 361) வுத்தஸ்ஸ ஸங்வரஸ்ஸ படிபக்க²வஸேன வுத்தங், ந ஸீலவிபத்திவஸேன. ந ஹி ஸா மானஸிகா அத்தீ²தி மக்³க³ஸ்ஸேவ ப⁴ஜாபனங் மஹாவிஸயத்தா. பொ³ஜ்ஜ²ங்கா³ ஹி மனோகம்மமேவ ப⁴ஜெய்யுங், ந ச ந ஸக்கா மக்³க³ப⁴ஜாபனேனேவ தேஸங் ப⁴ஜாபனங் விஞ்ஞாதுந்தி.
Lokuttaramaggo idha lokiyakammakathāyaṃ anadhippetopi bhajāpiyamāno tīṇi kammāni bhajati. Manena dussīlyanti kāyikavācasikavītikkamavajjaṃ sabbaṃ akusalaṃ saṅgaṇhāti, micchādiṭṭhisaṅkappavāyāmasatisamādhiṃ vā. Tampi cetaṃ ‘‘manasā saṃvaro sādhū’’ti (saṃ. ni. 1.116; dha. pa. 361) vuttassa saṃvarassa paṭipakkhavasena vuttaṃ, na sīlavipattivasena. Na hi sā mānasikā atthīti maggasseva bhajāpanaṃ mahāvisayattā. Bojjhaṅgā hi manokammameva bhajeyyuṃ, na ca na sakkā maggabhajāpaneneva tesaṃ bhajāpanaṃ viññātunti.
கம்மபத²ங் அப்பத்தானம்பி தங்தங்த்³வாரே ஸங்ஸந்த³னங் அவரோத⁴னங் த்³வாரந்தரே கம்மந்தருப்பத்தியம்பி கம்மத்³வாராபே⁴த³னஞ்ச த்³வாரஸங்ஸந்த³னங் நாம. ‘‘திவிதா⁴, பி⁴க்க²வே, காயஸஞ்சேதனா அகுஸலங் காயகம்ம’’ந்திஆதி³னா (கதா²॰ 539) கம்மபத²ப்பத்தாவ ஸன்னிட்டா²பகசேதனா கம்மந்தி வுத்தாதி புரிமசேதனா ஸப்³பா³ காயகம்மங் ந ஹோதீதி வுத்தங். ஆணாபெத்வா…பே॰… அலப⁴ந்தஸ்ஸாதி ஆணத்தேஹி அமாரிதபா⁴வங் ஸந்தா⁴ய வுத்தங், வசீது³ச்சரிதங் நாம ஹோதி அகம்மபத²பா⁴வதோதி அதி⁴ப்பாயோ. ‘‘இமே ஸத்தா ஹஞ்ஞந்தூ’’தி பவத்தப்³யாபாத³வஸேன சேதனாபக்கி²கா வா ப⁴வந்தி காயகம்மவோஹாரலாபா⁴. அப்³போ³ஹாரிகா வா மனோகம்மவோஹாரவிரஹா. ஸஸம்பா⁴ரபத²வீஆதீ³ஸு ஆபாத³யோ எத்த² நித³ஸ்ஸனங்.
Kammapathaṃ appattānampi taṃtaṃdvāre saṃsandanaṃ avarodhanaṃ dvārantare kammantaruppattiyampi kammadvārābhedanañca dvārasaṃsandanaṃ nāma. ‘‘Tividhā, bhikkhave, kāyasañcetanā akusalaṃ kāyakamma’’ntiādinā (kathā. 539) kammapathappattāva sanniṭṭhāpakacetanā kammanti vuttāti purimacetanā sabbā kāyakammaṃ na hotīti vuttaṃ. Āṇāpetvā…pe… alabhantassāti āṇattehi amāritabhāvaṃ sandhāya vuttaṃ, vacīduccaritaṃ nāma hoti akammapathabhāvatoti adhippāyo. ‘‘Ime sattā haññantū’’ti pavattabyāpādavasena cetanāpakkhikā vā bhavanti kāyakammavohāralābhā. Abbohārikā vā manokammavohāravirahā. Sasambhārapathavīādīsu āpādayo ettha nidassanaṃ.
குலும்ப³ஸ்ஸாதி க³ப்³ப⁴ஸ்ஸ, குலஸ்ஸேவ வா. திஸ்ஸோபி ஸங்கீ³தியோ ஆருள்ஹதாய அனநுஜானநதோ ‘‘தவ ஸுத்தஸ்ஸா’’தி வுத்தங். த³ஸவிதா⁴ இத்³தி⁴ படிஸம்பி⁴தா³மக்³கே³ இத்³தி⁴கதா²ய க³ஹேதப்³பா³. பா⁴வனாமயந்தி அதி⁴ட்டா²னித்³தி⁴ங் ஸந்தா⁴ய வத³தி. க⁴டபே⁴தோ³ விய பரூபகா⁴தோ, உத³கவினாஸோ விய இத்³தி⁴வினாஸோ ச ஹோதீதி உபமா ஸங்ஸந்த³தி. தவ பஞ்ஹோதி பா⁴வனாமயாய பரூபகா⁴தோ ஹோதீதி வுத்தோ ஞாபேதுங் இச்சி²தோ அத்தோ². ஆத²ப்³ப³ணித்³தி⁴ விஜ்ஜாமயித்³தி⁴ ஹோதி. ஸத்தமே பதே³தி மண்ட³லாதி³தோ ஸத்தமே பதே³.
Kulumbassāti gabbhassa, kulasseva vā. Tissopi saṅgītiyo āruḷhatāya ananujānanato ‘‘tava suttassā’’ti vuttaṃ. Dasavidhā iddhi paṭisambhidāmagge iddhikathāya gahetabbā. Bhāvanāmayanti adhiṭṭhāniddhiṃ sandhāya vadati. Ghaṭabhedo viya parūpaghāto, udakavināso viya iddhivināso ca hotīti upamā saṃsandati. Tava pañhoti bhāvanāmayāya parūpaghāto hotīti vutto ñāpetuṃ icchito attho. Āthabbaṇiddhi vijjāmayiddhi hoti. Sattame padeti maṇḍalādito sattame pade.
வசனந்தரேன க³மேதப்³ப³த்த²ங் நெய்யத்த²ங், ஸயமேவ க³மிதப்³ப³த்த²ங் நீதத்த²ங். கிரியதோ ஸமுட்டா²தி, உதா³ஹு அகிரியதோதி தேனாதி⁴ப்பேதங் ஸம்பஜானமுஸாவாத³ங் ஸந்தா⁴ய புச்ச²தி, ந உபோஸத²க்க²ந்த⁴கே வுத்தங். தத்த² அவுத்தமேவ ஹி ஸோ அனரியவோஹாரங் வுத்தந்தி க³ஹெத்வா வோஹரதீதி. வாசாகி³ரந்தி வாசாஸங்கா²தங் கி³ரங், வாசானுச்சாரணங் வா.
Vacanantarena gametabbatthaṃ neyyatthaṃ, sayameva gamitabbatthaṃ nītatthaṃ. Kiriyato samuṭṭhāti, udāhu akiriyatoti tenādhippetaṃ sampajānamusāvādaṃ sandhāya pucchati, na uposathakkhandhake vuttaṃ. Tattha avuttameva hi so anariyavohāraṃ vuttanti gahetvā voharatīti. Vācāgiranti vācāsaṅkhātaṃ giraṃ, vācānuccāraṇaṃ vā.
க²ந்த³ஸிவாத³யோ ஸெட்டா²தி க²ந்தா³தி குமாரா. ஸிவாதி மஹெஸ்ஸரா, மிச்சா²தி³ட்டி²யா நித³ஸ்ஸனத்த²மித³ங் வுத்தந்தி த³ட்ட²ப்³ப³ங். நத்தி²கதி³ட்டா²த³யோ ஏவ ஹி கம்மபத²ப்பத்தா கம்மந்தி. சேதனா பனெத்த² அப்³போ³ஹாரிகாதி காயத்³வாரே வசீத்³வாரே ச ஸமுட்டி²தாபி காயகம்மங் வசீகம்மந்தி ச வோஹாரங் ந லப⁴தி அபி⁴ஜ்ஜா²தி³ப்பதா⁴னத்தா. ‘‘திவிதா⁴, பி⁴க்க²வே, மனோஸஞ்சேதனா அகுஸலங் மனோகம்ம’’ந்தி பன வசனதோ ஸபா⁴வேனேவ ஸா மனோகம்மங், ந அபி⁴ஜ்ஜா²தி³பக்கி²கத்தாதி ‘‘அபி⁴ஜ்ஜா²தி³பக்கி²காவா’’தி ந வுத்தங். இமஸ்மிங் பன டா²னே காயங்க³வாசங்கா³னி அசோபெத்வா சிந்தனகாலே சேதனாபி சேதனாஸம்பயுத்தத⁴ம்மாபி மனொத்³வாரே ஏவ ஸமுட்ட²ஹந்தி, தஸ்மா சேதனாய அப்³போ³ஹாரிகபா⁴வோ கத²ஞ்சி நத்தீ²தி அதி⁴ப்பாயோ.
Khandasivādayo seṭṭhāti khandāti kumārā. Sivāti mahessarā, micchādiṭṭhiyā nidassanatthamidaṃ vuttanti daṭṭhabbaṃ. Natthikadiṭṭhādayo eva hi kammapathappattā kammanti. Cetanā panettha abbohārikāti kāyadvāre vacīdvāre ca samuṭṭhitāpi kāyakammaṃ vacīkammanti ca vohāraṃ na labhati abhijjhādippadhānattā. ‘‘Tividhā, bhikkhave, manosañcetanā akusalaṃ manokamma’’nti pana vacanato sabhāveneva sā manokammaṃ, na abhijjhādipakkhikattāti ‘‘abhijjhādipakkhikāvā’’ti na vuttaṃ. Imasmiṃ pana ṭhāne kāyaṅgavācaṅgāni acopetvā cintanakāle cetanāpi cetanāsampayuttadhammāpi manodvāre eva samuṭṭhahanti, tasmā cetanāya abbohārikabhāvo kathañci natthīti adhippāyo.
‘‘திவிதா⁴ , பி⁴க்க²வே, காயஸஞ்சேதனா குஸலங் காயகம்ம’’ந்திஆதி³வசனதோ (கதா²॰ 539) பாணாதிபாதாதி³படிபக்க²பூ⁴தா தப்³பி³ரதிவிஸிட்டா² சேதனாவ பாணாதிபாதவிரதிஆதி³கா ஹொந்தீதி ‘‘சேதனாபக்கி²கா வா’’தி வுத்தங், ந ‘‘விரதிபக்கி²கா’’தி. ரக்க²தீதி அவினாஸெத்வா கதே²தி. பி⁴ந்த³தீதி வினாஸெத்வா கதே²தி.
‘‘Tividhā , bhikkhave, kāyasañcetanā kusalaṃ kāyakamma’’ntiādivacanato (kathā. 539) pāṇātipātādipaṭipakkhabhūtā tabbirativisiṭṭhā cetanāva pāṇātipātaviratiādikā hontīti ‘‘cetanāpakkhikā vā’’ti vuttaṃ, na ‘‘viratipakkhikā’’ti. Rakkhatīti avināsetvā katheti. Bhindatīti vināsetvā katheti.
கம்மகதா²வண்ணனா நிட்டி²தா.
Kammakathāvaṇṇanā niṭṭhitā.
சக்கு²விஞ்ஞாணத்³வாரந்தி சக்கு²விஞ்ஞாணஸ்ஸ த்³வாரங். சக்கு² ச தங் விஞ்ஞாணத்³வாரஞ்சாதி வா சக்கு²விஞ்ஞாணத்³வாரங். சக்கு² விஞ்ஞாணத்³வாரந்தி வா அஸமாஸனித்³தே³ஸோ. தங் பன சக்கு²மேவ. ஏஸ நயோ ஸேஸேஸுபி. ‘‘சக்கு²னா ஸங்வரோ ஸாதூ⁴’’திஆதி³காய (த⁴॰ ப॰ 360) கா³தா²ய பஸாத³காயசோபனகாயஸங்வரே ஏகஜ்ஜ²ங் கத்வா காயேன ஸங்வரோ வுத்தோ, தங் இத⁴ பி⁴ந்தி³த்வா அட்ட² ஸங்வரா, தப்படிபக்க²பா⁴வேன அஸங்வரா அட்ட² கதி²தா. ஸீலஸங்வராத³யோபி பஞ்சேவ ஸங்வரா ஸப்³ப³த்³வாரேஸு உப்பஜ்ஜமானாபி, தப்படிபக்க²பா⁴வேன து³ஸ்ஸீல்யாதீ³னி அஸங்வராதி வுத்தானி. தத்த² து³ஸ்ஸீல்யங் பாணாதிபாதாதி³சேதனா. முட்ட²ஸ்ஸச்சங் ஸதிபடிபக்கா² அகுஸலா த⁴ம்மா. பமாத³ந்தி கேசி. ஸீதாதீ³ஸு படிகோ⁴ அக்க²ந்தி. தி²னமித்³த⁴ங் கோஸஜ்ஜங்.
Cakkhuviññāṇadvāranti cakkhuviññāṇassa dvāraṃ. Cakkhu ca taṃ viññāṇadvārañcāti vā cakkhuviññāṇadvāraṃ. Cakkhu viññāṇadvāranti vā asamāsaniddeso. Taṃ pana cakkhumeva. Esa nayo sesesupi. ‘‘Cakkhunā saṃvaro sādhū’’tiādikāya (dha. pa. 360) gāthāya pasādakāyacopanakāyasaṃvare ekajjhaṃ katvā kāyena saṃvaro vutto, taṃ idha bhinditvā aṭṭha saṃvarā, tappaṭipakkhabhāvena asaṃvarā aṭṭha kathitā. Sīlasaṃvarādayopi pañceva saṃvarā sabbadvāresu uppajjamānāpi, tappaṭipakkhabhāvena dussīlyādīni asaṃvarāti vuttāni. Tattha dussīlyaṃ pāṇātipātādicetanā. Muṭṭhassaccaṃ satipaṭipakkhā akusalā dhammā. Pamādanti keci. Sītādīsu paṭigho akkhanti. Thinamiddhaṃ kosajjaṃ.
வினா வசீத்³வாரேன ஸுத்³த⁴ங் காயத்³வாரஸங்கா²தந்தி இத³ங் வசீத்³வாரஸல்லக்கி²தஸ்ஸ முஸாவாதா³தி³னோபி காயத்³வாரே பவத்திஸப்³பா⁴வா அஸுத்³த⁴தா அத்தீ²தி தங்னிவாரணத்த²ங் வுத்தங். ந ஹி தங் காயகம்மங் ஹோதி. ஸுத்³த⁴வசீத்³வாரோபலக்கி²தங் பன வசீகம்மமேவ ஹோதீதி. எத்த² அஸங்வரோதி ஏதேன ஸுத்³த⁴காயத்³வாரேன உபலக்கி²தோ அஸங்வரோ த்³வாரந்தரே உப்பஜ்ஜமானோபி வுத்தோ. த்³வாரந்தரானுபலக்கி²தங் ஸப்³ப³ங் தங்த்³வாரிகாகுஸலஞ்சேதி வேதி³தப்³ப³ங். ஏவஞ்ச கத்வா கம்மபத²ஸங்ஸந்த³னே ‘‘சோபனகாயஅஸங்வரத்³வாரவஸேன உப்பஜ்ஜமானோ அஸங்வரோ அகுஸலங் காயகம்மமேவ ஹோதீ’’திஆதி³ ‘‘அகுஸலங் காயகம்மங் சோபனகாயஅஸங்வரத்³வாரவஸேன வசீஅஸங்வரவஸேன ச உப்பஜ்ஜதீ’’திஆதி³னா ஸஹ அவிருத்³த⁴ங் ஹோதி. அஸங்வரோ ஹி த்³வாரந்தரே உப்பஜ்ஜமானோபி ஸத்³வாரே ஏவாதி வுச்சதி, ஸத்³வாரவஸேன உப்பன்னோதி ச, கம்மங் அஞ்ஞத்³வாரே அஞ்ஞத்³வாரவஸேன சாதி ஏவங் அவிருத்³த⁴ங்.
Vinā vacīdvārena suddhaṃ kāyadvārasaṅkhātanti idaṃ vacīdvārasallakkhitassa musāvādādinopi kāyadvāre pavattisabbhāvā asuddhatā atthīti taṃnivāraṇatthaṃ vuttaṃ. Na hi taṃ kāyakammaṃ hoti. Suddhavacīdvāropalakkhitaṃ pana vacīkammameva hotīti. Ettha asaṃvaroti etena suddhakāyadvārena upalakkhito asaṃvaro dvārantare uppajjamānopi vutto. Dvārantarānupalakkhitaṃ sabbaṃ taṃdvārikākusalañceti veditabbaṃ. Evañca katvā kammapathasaṃsandane ‘‘copanakāyaasaṃvaradvāravasena uppajjamāno asaṃvaro akusalaṃ kāyakammameva hotī’’tiādi ‘‘akusalaṃ kāyakammaṃ copanakāyaasaṃvaradvāravasena vacīasaṃvaravasena ca uppajjatī’’tiādinā saha aviruddhaṃ hoti. Asaṃvaro hi dvārantare uppajjamānopi sadvāre evāti vuccati, sadvāravasena uppannoti ca, kammaṃ aññadvāre aññadvāravasena cāti evaṃ aviruddhaṃ.
அத² வா எத்தா²தி ஸுத்³த⁴ங் அஸுத்³த⁴ந்தி ஏதங் அவிசாரெத்வா ஏதஸ்மிங் சோபனேதி வுத்தங் ஹோதி. ஏவங் ஸதி த்³வாரந்தரோபலக்கி²தங் கம்மபத²பா⁴வப்பத்ததாய வசீமனோகம்மங் சோபனகாயஅஸங்வரத்³வாரே உப்பன்னங், ஸேஸங் ஸப்³ப³ங் தங்த்³வாருப்பன்னாகுஸலங் விய ‘‘சோபனகாயஅஸங்வரோ’’தி வுச்சதி. கம்மபத²பா⁴வப்பத்தியா த்³வாரந்தருப்பன்னங் காயகம்மஞ்ச ததா² ந வுச்சதீதி கம்மபத²ஸங்ஸந்த³னவிரோதோ⁴ ஸியா, தத³விரோத⁴ங் தத்தே²வ வக்கா²ம. ஸீலஸங்வராத³யோ பஞ்ச நிக்கே²பகண்டே³ ஆவி ப⁴விஸ்ஸந்தி. தத்த² ஞாணஸங்வரே பச்சயஸன்னிஸ்ஸிதஸீலஸ்ஸ, வீரியஸங்வரே ச ஆஜீவபாரிஸுத்³தி⁴யா அந்தோக³த⁴தா த³ட்ட²ப்³பா³.
Atha vā etthāti suddhaṃ asuddhanti etaṃ avicāretvā etasmiṃ copaneti vuttaṃ hoti. Evaṃ sati dvārantaropalakkhitaṃ kammapathabhāvappattatāya vacīmanokammaṃ copanakāyaasaṃvaradvāre uppannaṃ, sesaṃ sabbaṃ taṃdvāruppannākusalaṃ viya ‘‘copanakāyaasaṃvaro’’ti vuccati. Kammapathabhāvappattiyā dvārantaruppannaṃ kāyakammañca tathā na vuccatīti kammapathasaṃsandanavirodho siyā, tadavirodhaṃ tattheva vakkhāma. Sīlasaṃvarādayo pañca nikkhepakaṇḍe āvi bhavissanti. Tattha ñāṇasaṃvare paccayasannissitasīlassa, vīriyasaṃvare ca ājīvapārisuddhiyā antogadhatā daṭṭhabbā.
Related texts:
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / கம்மகதா²வண்ணனா • Kammakathāvaṇṇanā
