| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၂. ကမ္မကထာဝဏ္ဏနာ
2. Kammakathāvaṇṇanā
၆၃၃-၆၃၅. ဣဒာနိ ကမ္မကထာ နာမ ဟောတိ။ တတ္ထ ‘‘နာဟံ, ဘိက္ခဝေ, သဉ္စေတနိကာနံ ကမ္မာန’’န္တိ (အ. နိ. ၁၀.၂၁၇) သုတ္တပဒံ နိသ္သာယ ‘‘သဗ္ဗံ ကမ္မံ သဝိပာက’’န္တိ ယေသံ လဒ္ဓိ, သေယ္ယထာပိ မဟာသံဃိကာနံ; တေသံ ‘‘စေတနာဟံ, ဘိက္ခဝေ, ကမ္မံ ဝဒာမီ’’တိ (အ. နိ. ၆.၆၃) သတ္ထာရာ အဝိသေသေန စေတနာ ‘‘ကမ္မ’’န္တိ ဝုတ္တာ; သာ စ ကုသလာကုသလာဝ သဝိပာကာ, အဗ္ယာကတာ အဝိပာကာတိ ဣမံ ဝိဘာဂံ ဒသ္သေတုံ သဗ္ဗံ ကမ္မန္တိ ပုစ္ဆာ သကဝာဒိသ္သ, ပဋိညာ ဣတရသ္သ။ ပုန သဗ္ဗာ စေတနာတိ ပဉ္ဟေသု အဗ္ယာကတံ သန္ဓာယ ပဋိက္ခေပော, ကုသလာကုသလေ သန္ဓာယ ပဋိညာ ဝေဒိတဗ္ဗာ ။ ဝိပာကာဗ္ယာကတာတိအာဒိ သဝိပာကာဝိပာကစေတနံ သရူပေန ဒသ္သေတုံ ဝုတ္တံ။ သေသမေတ္ထ ဥတ္တာနတ္ထမေဝ။ ‘‘နာဟံ, ဘိက္ခဝေ’’တိ သုတ္တံ သတိ ပစ္စယေ ဒိဋ္ဌဓမ္မာဒီသု ဝိပာကပဋိသံဝေဒနံ သန္ဓာယ ဝုတ္တံ, တသ္မာ အသာဓကန္တိ။
633-635. Idāni kammakathā nāma hoti. Tattha ‘‘nāhaṃ, bhikkhave, sañcetanikānaṃ kammāna’’nti (a. ni. 10.217) suttapadaṃ nissāya ‘‘sabbaṃ kammaṃ savipāka’’nti yesaṃ laddhi, seyyathāpi mahāsaṃghikānaṃ; tesaṃ ‘‘cetanāhaṃ, bhikkhave, kammaṃ vadāmī’’ti (a. ni. 6.63) satthārā avisesena cetanā ‘‘kamma’’nti vuttā; sā ca kusalākusalāva savipākā, abyākatā avipākāti imaṃ vibhāgaṃ dassetuṃ sabbaṃ kammanti pucchā sakavādissa, paṭiññā itarassa. Puna sabbā cetanāti pañhesu abyākataṃ sandhāya paṭikkhepo, kusalākusale sandhāya paṭiññā veditabbā . Vipākābyākatātiādi savipākāvipākacetanaṃ sarūpena dassetuṃ vuttaṃ. Sesamettha uttānatthameva. ‘‘Nāhaṃ, bhikkhave’’ti suttaṃ sati paccaye diṭṭhadhammādīsu vipākapaṭisaṃvedanaṃ sandhāya vuttaṃ, tasmā asādhakanti.
ကမ္မကထာဝဏ္ဏနာ။
Kammakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၁၇) ၂. ကမ္မကထာ • (117) 2. Kammakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၂. ကမ္မကထာဝဏ္ဏနာ • 2. Kammakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၂. ကမ္မကထာဝဏ္ဏနာ • 2. Kammakathāvaṇṇanā
