| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၄. ကမ္မနာနာကရဏပဉ္ဟော
4. Kammanānākaraṇapañho
၄. ရာဇာ အာဟ ‘‘ဘန္တေ နာဂသေန, ကေန ကာရဏေန မနုသ္သာ န သဗ္ဗေ သမကာ, အညေ အပ္ပာယုကာ, အညေ ဒီဃာယုကာ, အညေ ဗဟ္ဝာဗာဓာ အညေ အပ္ပာဗာဓာ, အညေ ဒုဗ္ဗဏ္ဏာ, အညေ ဝဏ္ဏဝန္တော, အညေ အပ္ပေသက္ခာ, အညေ မဟေသက္ခာ, အညေ အပ္ပဘောဂာ, အညေ မဟာဘောဂာ, အညေ နီစကုလီနာ, အညေ မဟာကုလီနာ, အညေ ဒုပ္ပညာ, အညေ ပညဝန္တော’’တိ?
4. Rājā āha ‘‘bhante nāgasena, kena kāraṇena manussā na sabbe samakā, aññe appāyukā, aññe dīghāyukā, aññe bahvābādhā aññe appābādhā, aññe dubbaṇṇā, aññe vaṇṇavanto, aññe appesakkhā, aññe mahesakkhā, aññe appabhogā, aññe mahābhogā, aññe nīcakulīnā, aññe mahākulīnā, aññe duppaññā, aññe paññavanto’’ti?
ထေရော အာဟ ‘‘ကိသ္သ ပန, မဟာရာဇ, ရုက္ခာ န သဗ္ဗေ သမကာ, အညေ အမ္ဗိလာ, အညေ လဝဏာ, အညေ တိတ္တကာ, အညေ ကဋုကာ, အညေ ကသာဝာ, အညေ မဓုရာ’’တိ? ‘‘မညာမိ, ဘန္တေ, ဗီဇာနံ နာနာကရဏေနာ’’တိ။ ‘‘ဧဝမေဝ ခော, မဟာရာဇ, ကမ္မာနံ နာနာကရဏေန မနုသ္သာ န သဗ္ဗေ သမကာ, အညေ အပ္ပာယုကာ, အညေ ဒီဃာယုကာ, အညေ ဗဟ္ဝာဗာဓာ, အညေ အပ္ပာဗာဓာ, အညေ ဒုဗ္ဗဏ္ဏာ, အညေ ဝဏ္ဏဝန္တော, အညေ အပ္ပေသက္ခာ, အညေ မဟေသက္ခာ, အညေ အပ္ပဘောဂာ, အညေ မဟာဘောဂာ, အညေ နီစကုလီနာ, အညေ မဟာကုလီနာ, အညေ ဒုပ္ပညာ, အညေ ပညဝန္တော။ ဘာသိတမ္ပေတံ မဟာရာဇ ဘဂဝတာ – ‘ကမ္မသ္သကာ, မာဏဝ, သတ္တာ ကမ္မဒာယာဒာ ကမ္မယောနီ ကမ္မဗန္ဓူ ကမ္မပ္ပဋိသရဏာ, ကမ္မံ သတ္တေ ဝိဘဇတိ ယဒိဒံ ဟီနပ္ပဏီတတာယာ’’’တိ။
Thero āha ‘‘kissa pana, mahārāja, rukkhā na sabbe samakā, aññe ambilā, aññe lavaṇā, aññe tittakā, aññe kaṭukā, aññe kasāvā, aññe madhurā’’ti? ‘‘Maññāmi, bhante, bījānaṃ nānākaraṇenā’’ti. ‘‘Evameva kho, mahārāja, kammānaṃ nānākaraṇena manussā na sabbe samakā, aññe appāyukā, aññe dīghāyukā, aññe bahvābādhā, aññe appābādhā, aññe dubbaṇṇā, aññe vaṇṇavanto, aññe appesakkhā, aññe mahesakkhā, aññe appabhogā, aññe mahābhogā, aññe nīcakulīnā, aññe mahākulīnā, aññe duppaññā, aññe paññavanto. Bhāsitampetaṃ mahārāja bhagavatā – ‘kammassakā, māṇava, sattā kammadāyādā kammayonī kammabandhū kammappaṭisaraṇā, kammaṃ satte vibhajati yadidaṃ hīnappaṇītatāyā’’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ကမ္မနာနာကရဏပဉ္ဟော စတုတ္ထော။
Kammanānākaraṇapañho catuttho.
