| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
4. කම්‌මනානාකරණපඤ්‌හො
4. Kammanānākaraṇapañho
4. රාජා ආහ ‘‘භන්‌තෙ නාගසෙන, කෙන කාරණෙන මනුස්‌සා න සබ්‌බෙ සමකා, අඤ්‌ඤෙ අප්‌පායුකා, අඤ්‌ඤෙ දීඝායුකා, අඤ්‌ඤෙ බහ්‌වාබාධා අඤ්‌ඤෙ අප්‌පාබාධා, අඤ්‌ඤෙ දුබ්‌බණ්‌ණා, අඤ්‌ඤෙ වණ්‌ණවන්‌තො, අඤ්‌ඤෙ අප්‌පෙසක්‌ඛා, අඤ්‌ඤෙ මහෙසක්‌ඛා, අඤ්‌ඤෙ අප්‌පභොගා, අඤ්‌ඤෙ මහාභොගා, අඤ්‌ඤෙ නීචකුලීනා, අඤ්‌ඤෙ මහාකුලීනා, අඤ්‌ඤෙ දුප්‌පඤ්‌ඤා, අඤ්‌ඤෙ පඤ්‌ඤවන්‌තො’’ති?
4. Rājā āha ‘‘bhante nāgasena, kena kāraṇena manussā na sabbe samakā, aññe appāyukā, aññe dīghāyukā, aññe bahvābādhā aññe appābādhā, aññe dubbaṇṇā, aññe vaṇṇavanto, aññe appesakkhā, aññe mahesakkhā, aññe appabhogā, aññe mahābhogā, aññe nīcakulīnā, aññe mahākulīnā, aññe duppaññā, aññe paññavanto’’ti?
ථෙරො ආහ ‘‘කිස්‌ස පන, මහාරාජ, රුක්‌ඛා න සබ්‌බෙ සමකා, අඤ්‌ඤෙ අම්‌බිලා, අඤ්‌ඤෙ ලවණා, අඤ්‌ඤෙ තිත්‌තකා, අඤ්‌ඤෙ කටුකා, අඤ්‌ඤෙ කසාවා, අඤ්‌ඤෙ මධුරා’’ති? ‘‘මඤ්‌ඤාමි, භන්‌තෙ, බීජානං නානාකරණෙනා’’ති. ‘‘එවමෙව ඛො, මහාරාජ, කම්‌මානං නානාකරණෙන මනුස්‌සා න සබ්‌බෙ සමකා, අඤ්‌ඤෙ අප්‌පායුකා, අඤ්‌ඤෙ දීඝායුකා, අඤ්‌ඤෙ බහ්‌වාබාධා, අඤ්‌ඤෙ අප්‌පාබාධා, අඤ්‌ඤෙ දුබ්‌බණ්‌ණා, අඤ්‌ඤෙ වණ්‌ණවන්‌තො, අඤ්‌ඤෙ අප්‌පෙසක්‌ඛා, අඤ්‌ඤෙ මහෙසක්‌ඛා, අඤ්‌ඤෙ අප්‌පභොගා, අඤ්‌ඤෙ මහාභොගා, අඤ්‌ඤෙ නීචකුලීනා, අඤ්‌ඤෙ මහාකුලීනා, අඤ්‌ඤෙ දුප්‌පඤ්‌ඤා, අඤ්‌ඤෙ පඤ්‌ඤවන්‌තො. භාසිතම්‌පෙතං මහාරාජ භගවතා – ‘කම්‌මස්‌සකා, මාණව, සත්‌තා කම්‌මදායාදා කම්‌මයොනී කම්‌මබන්‌ධූ කම්‌මප්‌පටිසරණා, කම්‌මං සත්‌තෙ විභජති යදිදං හීනප්‌පණීතතායා’’’ති.
Thero āha ‘‘kissa pana, mahārāja, rukkhā na sabbe samakā, aññe ambilā, aññe lavaṇā, aññe tittakā, aññe kaṭukā, aññe kasāvā, aññe madhurā’’ti? ‘‘Maññāmi, bhante, bījānaṃ nānākaraṇenā’’ti. ‘‘Evameva kho, mahārāja, kammānaṃ nānākaraṇena manussā na sabbe samakā, aññe appāyukā, aññe dīghāyukā, aññe bahvābādhā, aññe appābādhā, aññe dubbaṇṇā, aññe vaṇṇavanto, aññe appesakkhā, aññe mahesakkhā, aññe appabhogā, aññe mahābhogā, aññe nīcakulīnā, aññe mahākulīnā, aññe duppaññā, aññe paññavanto. Bhāsitampetaṃ mahārāja bhagavatā – ‘kammassakā, māṇava, sattā kammadāyādā kammayonī kammabandhū kammappaṭisaraṇā, kammaṃ satte vibhajati yadidaṃ hīnappaṇītatāyā’’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
කම්‌මනානාකරණපඤ්‌හො චතුත්‌ථො.
Kammanānākaraṇapañho catuttho.
