| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༤. ཀམྨནཱནཱཀརཎཔཉྷོ
4. Kammanānākaraṇapañho
༤. རཱཛཱ ཨཱཧ ‘‘བྷནྟེ ནཱགསེན, ཀེན ཀཱརཎེན མནུསྶཱ ན སབྦེ སམཀཱ, ཨཉྙེ ཨཔྤཱཡུཀཱ, ཨཉྙེ དཱིགྷཱཡུཀཱ, ཨཉྙེ བཧྭཱབཱདྷཱ ཨཉྙེ ཨཔྤཱབཱདྷཱ, ཨཉྙེ དུབྦཎྞཱ, ཨཉྙེ ཝཎྞཝནྟོ, ཨཉྙེ ཨཔྤེསཀྑཱ, ཨཉྙེ མཧེསཀྑཱ, ཨཉྙེ ཨཔྤབྷོགཱ, ཨཉྙེ མཧཱབྷོགཱ, ཨཉྙེ ནཱིཙཀུལཱིནཱ, ཨཉྙེ མཧཱཀུལཱིནཱ, ཨཉྙེ དུཔྤཉྙཱ, ཨཉྙེ པཉྙཝནྟོ’’ཏི?
4. Rājā āha ‘‘bhante nāgasena, kena kāraṇena manussā na sabbe samakā, aññe appāyukā, aññe dīghāyukā, aññe bahvābādhā aññe appābādhā, aññe dubbaṇṇā, aññe vaṇṇavanto, aññe appesakkhā, aññe mahesakkhā, aññe appabhogā, aññe mahābhogā, aññe nīcakulīnā, aññe mahākulīnā, aññe duppaññā, aññe paññavanto’’ti?
ཐེརོ ཨཱཧ ‘‘ཀིསྶ པན, མཧཱརཱཛ, རུཀྑཱ ན སབྦེ སམཀཱ, ཨཉྙེ ཨམྦིལཱ, ཨཉྙེ ལཝཎཱ, ཨཉྙེ ཏིཏྟཀཱ, ཨཉྙེ ཀཊུཀཱ, ཨཉྙེ ཀསཱཝཱ, ཨཉྙེ མདྷུརཱ’’ཏི? ‘‘མཉྙཱམི, བྷནྟེ, བཱིཛཱནཾ ནཱནཱཀརཎེནཱ’’ཏི། ‘‘ཨེཝམེཝ ཁོ, མཧཱརཱཛ, ཀམྨཱནཾ ནཱནཱཀརཎེན མནུསྶཱ ན སབྦེ སམཀཱ, ཨཉྙེ ཨཔྤཱཡུཀཱ, ཨཉྙེ དཱིགྷཱཡུཀཱ, ཨཉྙེ བཧྭཱབཱདྷཱ, ཨཉྙེ ཨཔྤཱབཱདྷཱ, ཨཉྙེ དུབྦཎྞཱ, ཨཉྙེ ཝཎྞཝནྟོ, ཨཉྙེ ཨཔྤེསཀྑཱ, ཨཉྙེ མཧེསཀྑཱ, ཨཉྙེ ཨཔྤབྷོགཱ, ཨཉྙེ མཧཱབྷོགཱ, ཨཉྙེ ནཱིཙཀུལཱིནཱ, ཨཉྙེ མཧཱཀུལཱིནཱ, ཨཉྙེ དུཔྤཉྙཱ, ཨཉྙེ པཉྙཝནྟོ། བྷཱསིཏམྤེཏཾ མཧཱརཱཛ བྷགཝཏཱ – ‘ཀམྨསྶཀཱ, མཱཎཝ, སཏྟཱ ཀམྨདཱཡཱདཱ ཀམྨཡོནཱི ཀམྨབནྡྷཱུ ཀམྨཔྤཊིསརཎཱ, ཀམྨཾ སཏྟེ ཝིབྷཛཏི ཡདིདཾ ཧཱིནཔྤཎཱིཏཏཱཡཱ’’’ཏི།
Thero āha ‘‘kissa pana, mahārāja, rukkhā na sabbe samakā, aññe ambilā, aññe lavaṇā, aññe tittakā, aññe kaṭukā, aññe kasāvā, aññe madhurā’’ti? ‘‘Maññāmi, bhante, bījānaṃ nānākaraṇenā’’ti. ‘‘Evameva kho, mahārāja, kammānaṃ nānākaraṇena manussā na sabbe samakā, aññe appāyukā, aññe dīghāyukā, aññe bahvābādhā, aññe appābādhā, aññe dubbaṇṇā, aññe vaṇṇavanto, aññe appesakkhā, aññe mahesakkhā, aññe appabhogā, aññe mahābhogā, aññe nīcakulīnā, aññe mahākulīnā, aññe duppaññā, aññe paññavanto. Bhāsitampetaṃ mahārāja bhagavatā – ‘kammassakā, māṇava, sattā kammadāyādā kammayonī kammabandhū kammappaṭisaraṇā, kammaṃ satte vibhajati yadidaṃ hīnappaṇītatāyā’’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
ཀམྨནཱནཱཀརཎཔཉྷོ ཙཏུཏྠོ།
Kammanānākaraṇapañho catuttho.
