১. কম্মনিরোধসুত্তৰণ্ণনা

1. Kammanirodhasuttavaṇṇanā

১৪৬. সম্পতি ৰিজ্জমানস্স চক্খুস্স তংনিব্বত্তস্স কম্মস্স চ অধিপ্পেতত্তা ‘‘ন চক্খু পুরাণং, কম্মমেৰ পুরাণ’’ন্তি ৰত্ৰা যথা তস্স চক্খুস্স পুরাণপরিযাযো ৰুত্তো, তং দস্সেন্তো আহ – ‘‘কম্মতো পনা’’তিআদি। পচ্চযনামেনাতি পুরিমজাতিসংসিদ্ধত্তা ‘‘পুরাণ’’ন্তি ৰত্তব্বস্স পচ্চযভূতস্স কম্মস্স নামেন। এৰং ৰুত্তন্তি ‘‘পুরাণকম্ম’’ন্তি এৰং ৰুত্তং। পচ্চযেহি অভিসমাগন্ত্ৰা কতন্তি তণ্হাৰিজ্জাদিপচ্চযেহি অভিমুখভাৰেন সমাগন্ত্ৰা সমেচ্চ নিব্বত্তিতং। চেতনাযাতি কম্মচেতনায। পকপ্পিতন্তি অভিসমীহিতং। ৰেদনাযাতি অত্তানং নিস্সায আরম্মণং কত্ৰা পৰত্তায ৰেদনায। ৰত্থূতি নিব্বত্তিকারণং পৰত্তট্ঠানন্তি ৰিপস্সনাপঞ্ঞায পস্সিতব্বং। কম্মস্স নিরোধেনাতি কিলেসানং অনুপ্পাদনিরোধসিদ্ধেন কম্মস্স নিরোধেন। ৰিমুত্তিং ফুসতীতি অরহত্তফলৰিমুত্তিং পাপুণাতি। আরম্মণভূতো নিরোধো নিব্বানং ‘‘কম্মনিরোধো’’তি ৰুচ্চতি, ‘‘কম্মং নিরুজ্ঝতি এত্থা’’তি কত্ৰা। ‘‘ঝাযথ, ভিক্খৰে, মা পমাদত্থা’’তি ৰুত্তত্তা ‘‘পুব্বভাগৰিপস্সনা কথিতা’’তি ৰুত্তং।

146. Sampati vijjamānassa cakkhussa taṃnibbattassa kammassa ca adhippetattā ‘‘na cakkhu purāṇaṃ, kammameva purāṇa’’nti vatvā yathā tassa cakkhussa purāṇapariyāyo vutto, taṃ dassento āha – ‘‘kammato panā’’tiādi. Paccayanāmenāti purimajātisaṃsiddhattā ‘‘purāṇa’’nti vattabbassa paccayabhūtassa kammassa nāmena. Evaṃ vuttanti ‘‘purāṇakamma’’nti evaṃ vuttaṃ. Paccayehi abhisamāgantvā katanti taṇhāvijjādipaccayehi abhimukhabhāvena samāgantvā samecca nibbattitaṃ. Cetanāyāti kammacetanāya. Pakappitanti abhisamīhitaṃ. Vedanāyāti attānaṃ nissāya ārammaṇaṃ katvā pavattāya vedanāya. Vatthūti nibbattikāraṇaṃ pavattaṭṭhānanti vipassanāpaññāya passitabbaṃ. Kammassa nirodhenāti kilesānaṃ anuppādanirodhasiddhena kammassa nirodhena. Vimuttiṃ phusatīti arahattaphalavimuttiṃ pāpuṇāti. Ārammaṇabhūto nirodho nibbānaṃ ‘‘kammanirodho’’ti vuccati, ‘‘kammaṃ nirujjhati etthā’’ti katvā. ‘‘Jhāyatha, bhikkhave, mā pamādatthā’’ti vuttattā ‘‘pubbabhāgavipassanā kathitā’’ti vuttaṃ.

কম্মনিরোধসুত্তৰণ্ণনা নিট্ঠিতা।

Kammanirodhasuttavaṇṇanā niṭṭhitā.

Next: ২-৫. অনিচ্চনিব্বানসপ্পাযসুত্তাদিৰণ্ণনা • 2-5. Aniccanibbānasappāyasuttādivaṇṇanā

Related texts:

তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. কম্মনিরোধসুত্তং • 1. Kammanirodhasuttaṃ

অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. কম্মনিরোধসুত্তৰণ্ণনা • 1. Kammanirodhasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact